Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, November 19, 2011

لندن رايح راجع.. أبناء ولكن


- حوبا، حو........ إيييييييه ده؟؟؟ إنتى بتعيطى؟؟؟ مالك؟؟؟؟

- ..........

- حوبا، مالك؟ فى إيه؟ مين اللى كانت لسه خارجة من البيت دى؟؟؟ يا بنتى ردى عليا

- دى السوشيال وركار

- مين؟؟ آه، يعنى بتبيع إيه؟

- بتبيع تحقيقات.. عملت معاية تحقيق

- ايييييييييييييييييه؟؟؟؟ ليه نيلتى إيه يا مصيبة!!!!! هو أنا مش عارفاكى.. قولى، قولى مش هفتن عليكى

- هههه

- أيوة كدة أضحكى وأهدى وقوليلى براحة تحقيق إيه؟ وبتاع إيه؟

- البنت راحت قالتلهم ف المدرسة إنى ضربتها

- بنت مين؟ بنتك؟

- بقولك إيه أنا مش ناقصة غباءك.. أنا فيا اللى مكفينى

- خلاص، خلاص.. أنا هسكت خالص، طب هى ليه راحت قالت كدة؟ وحتى يعنى لو حصل، إيه المشكلة؟

- لأ مشكلة، ومشكلة كبيرة كمان.. للأسف هنا بيقوى الأطفال على أهاليهم

- نعم؟ إزاى يعنى؟

- يعنى بيصدقوا كلام الأطفال وبياخدوا بيه

- طب إحكيلى، إيه اللى حصل مع بنوتتك؟

- امبارح كنت عايزاها تلبس وهى عاملة تتلكع.. ف حدفتها بالقميص ف جه فى وشها عملها خط أحمر كدة خفيف.. عادى يعنى.. لما سألوها بقى فى المدرسة ده من إيه!! راحت قايلالهم ماما ضربتنى.. وإنها قال إيه تعبانة وعايزة تروح.. المفعوصة اللى ماكملتش ست سنين.. كلمونى قالولى إنها عندها صداع وعايزانى.. ده ع اساس إنها فاهمة يعنى إيه صداع.. لما رحت ماجبوليش سيرة خالص باللى هى قالته.. بس قالولى أوديها المستشفى يمكن يكون فيه حاجة وجعاها فعلا.. طبعا أنا طنشت وأخدتها وروحت.. وكنت حاسة فى عينيها لمعان غريب اللى هو نظرة إنتصار كدة إنها نفذت اللى فى دماغها

- ههههه، لأ بنتك لعبتها صح.. وبعدين؟

- لقيت على بليل بتكلمنى اللى هى زى المشرفة الإجتماعية كدة.. بتقولى إن المدرسة بالغتهم إن البنت عندها فى جبينها خط أحمر.. فهى هتيجى تحقق فى الموضوع تشوف إذا كان جد ضربها وللا هى أتخبطت وللا إيه الحكاية

- يا لهووووى، للدرجة دى يعنى؟ ده الموضوع مش مستاهل.. وبعدين؟

- جت اقعدت مع البنت لوحدهم بتاع نص ساعة تتكلم معاها وتخليها تعيد وتزيد فى الكلام.. وبعدين اقعدت معاية لوحدنا وبعدين مع بابها.. واساسا عقبال ما جت كان الخط الأحمر ده أختفى.. فلقيت ان الموضوع مش مستدعى

- لا والله؟ ف إيه بقى؟

- قالت إن الخطوة التانية لو الموضوع يستاهل بيلجئوا للبوليس.. لكن طالما مفيش حاجة تستدعى هتكمل تحقيقاتها بإنها تكلم حضانة أختها والدكتورة اللى بنتعامل معها وتشوف يعنى إذا كان الموضوع ده حصل قبل كدة مع أختها وللا معها.. ولما يخلص التحقيق هتبعتلى تقرير باللى حصل

- !!!!!! ماتقوليليش إن ده العادى هنا

- للأسف.. بصى هو فيه ناس فعلا بتجوع ولادها وتحبسهم وحاجات غريبة كدة.. فهما ضد العنف بكل المقاييس.. لكن ماينفعش تبقى دى الحالة العامة.. وكل ما الطفل يقول أى كلام يبعتوا يجيبوا أهله يحققه معاه.. موضوع سخيف يعنى وبيحطك تحت ضغط نفسى.. بالإضافة إن فى بعض الأحيان بيخلق فجوة ما بين ولى الأمر والطفل

- آه طبعا، أمال مثلا لما الطفل يغلط المفروض تعقبيه إزاى؟

- لأ هنا إياكى والضرب.. تروحى ورا الشمس وش لو عرفوا.. خصوصا بقى إنهم بيعلموا الأطفال فى المدراس نمرة الطوارىء.. بحيث لو حصل أى حاجة يتصل فورا بيهم.. تلاقى البوليس فوق دماغك

- كدة كتير والله

- قال وتقولى ساعدتها وللا كمان تزعقيلها.. يعنى لا ضرب ولا شخط.. حطيها ف النوتى كورنر.. اعمليلها كدة مكان لما تغلط تزنبيها فيه.. كان على لسانى أقولها ما تاخديها تربيها إنتى وتكسبى فيا ثواب.. حاجة تحرق الدم

- تحرقة بس!!! ده أنا الضغط عندى علي وانتى بتحكى بس.. ده ربنا يكون فى عونك إنك عيشتى الموقف كله بنفسك

- يا بنتى ده فيه ناس بترجع بلدها بسبب الموضوع ده.. أنا سمعت مرة إبن بقى مش صغير كبير وفاهم بيعمل إيه.. جاب لأبوه البوليس علشان قال إيه الأب بيتعدى على حريته.. والبوليس أخد الأب القسم.. ولما الأب لقى الموضوع كبر تعهد إنه مش هيعمل كدة تانى.. وإنه كان فاكر إنه كدة بيربيه صح وإنه ماكنش بيتعدى على حريته لكن بيعرفه الصح من الغلط.. المهم فعلا أخله سبيله وروح.. لما رجع البيت تخيل إن الإبن هيكون ندمان ويبوس إيده إنه يسمحه.. لقاه قاعد على النت وللا بص لأبوه حتى

- دول أجانب أكيد؟

-لأ ياختى اللى يوجع قلبك إنهم مصريين

- أشتم، أشتم؟؟ وبعدين إتصرف مع إبنه ازاى؟!

- قاله تعال ننزل مصر نريح أعصابنا أسبوع.. وفى مطار القاهرة راح مقطع باسبوره.. وقاله أنا تجبلى البوليس!! طب أبقى ورينى هتعرف تسافر تانى إزاى

- سبحان اللى خلاه أساسا يمسك أعصابه لحد ما نزل بيه مصر

- لأ ومرة الطفل راح قالهم فى المدرسة إن ابوه دخله الفريزر.. وأمه طلعته وهو بيتكتك وقعدت تنشفه بالسيشوار.. وبرضه حققه مع أهله

- هههههه، جامدة دى.. الأطفال اساسا خيالهم واسع.. مش فاهمة إيه الهبل ده

- شفتى بقى يا ستى، أدى الغربة واللى بناخده منها.. يعنى مش كفاية متغربين وطالعان عينا ومحسودين كمان على غربتنا.. لأ كمان يقسوا علينا عيالنا اللى طلعنا بيهم من الدنيا

- فعلا عندك حق والله يا حوبا، وزى ما قلتى وبتقولى دايما هى باكيدج ماينفعش تاخد حلوها وتسيب مرها.. يا تاخدها كلها يا تسيبها كلها.. وكل واحد واختياره

- بالظبط، وربنا يهدى


رحاب المليحي

14 comments:

Anonymous said...

Amr Aly
هههههههههههههههههههههههه جامدة جدا

بس الموضوع دا لو هنا في مصر واحد جاي بيقول لأب بتضرب ابنك ليه بيتهيألي اللي بيسأل هيضرب مع الواد

بس بالطريقة دي الابن هو اللي بيربي الاب ودا خطر وغلط
بس المفروض يكون التركيز من المشرف الاجتماعي على اولياء الامور غير المسئولين تشدد الرقابة على تربيتهم لاولادهم انما ناس عادية جدا مش من حقهم لان اذا انتصر الابن على الاب او الام مش هيقدر الوالد يرفع عينه في عين ابنه سواء كان صح او غلط

الرسول بيقول انصر اخاك ظالما او مظلوما يعني لو ظالم يترد عن ظلمه مش يتعلم الادب يتسجن ويروح بلده

دا تدمير لعلاقة الاسرة

Anonymous said...

Amir Elmelegy
دي حاجه من الحاجات اللي ماخلتنيش أكمل
و بصراحه تربية الأطفال هناك دي من أهم المشاكل
و مافيهاش رجعة
يعني اللي بيكمل مش هايعرف يرجع
خلي بالك يا رحاب

Anonymous said...

Sara Abdeen
طظ فيهم هما واللي خلفوهم انا حره اضرب بنتي ولا اشتمها حاجه غريبه صحيحوتحرق الدم انا متغاظالك جدا ده انا لو مكانك كنت مسكت بنتس علقتها في المروحه وهي شغاله لو كانت اشتكتني للمس بتاعتها انا عاوزه اروح اتخانق معاهم ممكن

Anonymous said...

Sara Abdeen
طظ فيهم هما واللي خلفوهم انا حره اضرب بنتي ولا اشتمها حاجه غريبه صحيحوتحرق الدم انا متغاظالك جدا ده انا لو مكانك كنت مسكت بنتس علقتها في المروحه وهي شغاله لو كانت اشتكتني للمس بتاعتها انا عاوزه اروح اتخانق معاهم ممكن

Anonymous said...

Basma Bahaa
ههههههههههههه جامده فعلا
موضوع الفريز والسيشوار دا..دا ايه حرقة الدم اللى انتى فيها دى يا حوبه!

Anonymous said...

فريق عمل محمد شاكر الفكرة حلوة لكن تطبيقها بشكل عام شيء غريب جداً
الله يكون في عون المصريين
متغربين
ومحسودين
وكمان متربيين من عيالهم الصغيرين

Anonymous said...

Fatma Alzihery
لاحول ولا قوه الا بالله
للاسف الحريه الزايده بتتقلب لضدها ..
مشكله الاطفال الى بيتربوا خارج البلد ان عاداتهم بيكتسبوها من المحيط الى عايشين فيه وبيكون جزء من اتجاهتهم وحكايه انهم يقولوا للمشرفه دا بيكون عادى بالنسبه ليهم لكن عندنا بتختلف .. مفيش اشاسا
ربنا يعينك على تربيتهم ويهديهم ليكى ويكونوا احلى بنوتات

Anonymous said...

Muhammad Fattouh
عليكى و على الاجازه
انا لو ابنى عمل معيا كده ها استنا لحد الاجازه و انفضه علقه و اسيبه فى البيت لحد ميقول حقى برقبتى اه و ها اقطع سلك التلفون ربنا يكون فى عونك بس الله يكرمك ارحمينا

Anonymous said...

Bent Masr
حوبه هوه ده حصل بجد ولا قصة الفتيها ... ده كده بيبالغوا اوى وكده الاطفال لما يكبروا مش هراعوا اهلهم
الحمد لله على نعمة الإسلام وكفى بها نعمة بجد

Anonymous said...

Silver Man Mahmoud
جامده
ههههههههههههههههههه

Anonymous said...

Abdallah Elrefaiey
غريب اووي الموضوع ده بس مش غريب عليهم

Anonymous said...

Basma Abdelbaset
لا ما تقوليش أنا عمالة أقرأ وحاسة أنه جالى الضغط

أنتى كويسة يا بنتى

Anonymous said...

Mohamed Abd El Daym
ههههههه حلوة بيعلمو العيال نمرة الطوارئ ...هاتى العيال وتعالى مش هتنفعى هناك ؛) حلوة يا رحاب .

hasona said...

كلها أمور غريبة
لا نعلم من نصدق وبمن نثق
وكيف نفهمهم