Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, April 15, 2013

أنا زيي زيك ع فكرة مش .......


ممممم مش عارفة أبدأ قصتى منين.. هى قصة غريبة شوية وبخاف أحكيها لتفهم غلط


بس لإنى مخنوقة قوى هفضفض مع قراءك يا حوبا

وأتمنى إنهم ........

خلينى أحكى الأول وبلاش الدباجة دى.. معلش أعذورنى انا مخضوضة قوى


أنا بنت مغربية عايشة ف المغرب طول عمرى.. فى فترة من فترات حياتى ماكنش ليا أصحاب خالص وده يرجع لإن مامتى كانت دايما بتخوفنى من الأصحاب.. كانت دايما بتقولى ان محدش فيهم هيحبنى بجد ف ده خلانى ابعد عن كل الناس



بس جه عليا وقت حسيت انى وحيدة قوى ونفسى اتكلم مع حد.. صادف وقتها إنى اتعرفت على النت ع بنوتة مصرية..

وبدأنا نتكلم مع بعض ساعات طويلة.. كان فيه فرق ما بين المغرب ومصر ف طريقة الحُب.. بمعنى إننا ف المغرب كلامنا مفيهوش أسلوب الحب والحنية اللى لاقيته متوفر قوى ف المصريين فى اسلوب تعاملهم مع بعض


بقيت برتاح لها وبحكى لها كل أسرارى.. ومش مهتمة ولا خايفة لإنى عارفة انها طلعت ولا نزلت علاقتنا نت بس وعمرنا ما هنشوف بعض


ومع الوقت لقيت منها اهتمام بزيادة قوى.. وبتكلمنى كتير.. ولما بتعب صحيا تتصل بيا ومن كتر خوفها عليا تقعد تعيط


أنا بصراحة برغم إنى كنت مستغربها إلا إنى كنت حابة اهتمامها بيا.. بما إنى كنت محرومة منه وماليش أصحاب قوى


أحيانا كنت بحاول ابعد عنها شوية عشان ماتعلقش بيها وف نفس الوقت كنت حاسة ان فيه حاجة غلط أنا مش فهمها


لما كنت ببعد عنها كانت تتخانق معاية ولما بقى ليا أصحاب بقيت تغيير منهم وتزعق لى وبقيت تمنعنى أتكلم مع حد


بعدها الموضوع تطور ولاقيتها بتقولى انها مش عايزة تتجوز ونفسها أنها تعيش معاية ع طول.. وبرغم إنى من جوايا كنت مقتنعة إن كل اللى بيحصل ده غلط ف غلط.. لكن مانكرش إن كان عجبنى اهتمامها وحبها وغيرتها اللى كنت أول مرة أجربهم


واستمرت علاقتنا نت سنة كاملة.. فى الفترة دى كنت حاسة بالذنب، حاسة إنى بعمل حاجة غلط وبغضب ربنا.. 

اه بحبها بس كصديقة مش اكتر.. حاولت افهمها كتير ان اللى ف دماغها ده عمره ما هيحصل وان مهما كنا بنحب بعض مش هيحصل ونعيش سوا لكن هى كان اللى ف دماغها ف دماغها


قررت انى اخد خطوة ايجابية وانى ابعد عنها يمكن تتوب عن اللى فى دماغها.. بعدت عنها خمس شهور.. كانت زى المجنونة عمالة تدور عليا على النت وتتصل بيا مية مرة ف اليوم وانا مابردش


بس بعدها حسيت بالذنب ناحيتها ورجعت اكلمها تانى.. عاتبتنى كتير وكانت مجروحة منى قوى.. وقالت لى انها بسببي اتعرفت ع بنات وحشة ف مصر عشان انا بعدت عنها


رجعنا نتكلم تانى عادى وفضلت هى بنفس اهتمامها وحبها ماتغيرش فيهم شيء


لكن فجأة هى اللى اختفيت.. وقتها حسيت ان انا اللى فعلا بحبها وعايزاها ف حياتى.. لإنها بقيت عارفة عني كل حاجة وعارفة اسرارى.. بس عايزاها كصديقة مش زى ما هى عايزه


بقيت انا اللى بجرى وراها وبتصل بيها كتير وهى مابتردش.. ولما ظهرت تانى فوجئت بيها متغيرة من ناحيتى.. يعنى بتعاملنى معاملة وحشة قوى وبقيت باردة جدا ف معاملتها..


وانا اللى بقيت اجى ع نفسى واكلمها ونفسى ترجع زى الاول ف اهتمامها لكن هى خلاص اتغيرت.. 


سألتها اكتر من مرة عن سبب تغيير مشاعرها من ناحيتى.. وفوجئت بردها.. إنها اتعرفت ف مصر ع ست مسيحية متجوزة وعندها اطفال لكن جوزها مسافر برة مصر


سألتها باستنكار: وانتى عايزة ايه من ست متجوزة؟ 
قالت لى: انها مش بتحبه وبتحبنى انا.. وعلى طول بنكون مع بعض..
 بس فجأة الست دى اختفيت ومابقيتش بترد ع تليفونتها وده مجننها عشان اتعلقت بيها قوى 


أنا اشمئزت جدا من كلامها وعارفة ان المفروض اقطع علاقتى بيها.. لكن مش قادرة.. فعلا بحبها ومتعلقة بيها ونفسى نرجع أصدقاء زى الأول.. أصدقاء وبس



 رحاب المليحي