Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, December 28, 2011

وعجبى يا زمن

اقولك ع سر؟؟؟
بس اوعى تقوله لحد

لما الدنيا تضيق بيا،
وتقفل ف وشى
وتسود ف عينيا

لما قلب الانسان يبقى قاسى اكتر من الحجر
لما الحجر يلين،
لكن قلب (البنى ادم) اللى المفروض مليان مشاعر واحاسيس مايتفطرش

لما صاحبى يضحك ف وشى ويضربنى ف ضهرى
لما اللى بخلص له وافديه بحياتى سواء صديق أو حبيب يبعنى ع أول ناصية

لما الدموع تتحجر ف عينيا واعند انها ابدا مش هتنزل ع حد ما يستهلهاش
لما اضحك ف وش الناس وانا من جوايا بتقطع اربا

بحس وقتها ان الحيوان أوفى من الانسان
يادوب تأكله وتحن عليه وتحبه بجد
هيخلص لك ويحبك
لا هيخونك ولا هيعوضك

يعنى شوية أكل وشوية حنية ع حيوان
تكسبه

لكن (احيانا) لو عملت المستحيل مع الانسان
يبيعك

وعجبى يا زمن

رحاب المليحي

Tuesday, December 27, 2011

بنات فيرجن 2011

بس، بس.. كابتشن

- ؟؟؟!!!! أنا؟

- ايوة، ايوة... ممكن نتشعرف؟

- تتعرفى بمين؟ بيا؟

- هو البعيد غبى وللا ايه؟

- اصلى مستغرب يعنى، اللى اعرفه ان الولد هو اللى بيعاكس البنت مش العكس

- ياااااى، ده انت قدددديم قوى قوى، ده كان زمان

- ااااااه، قلتيلى، طب انا مش فاضى دلوقتى، خليها وقت تانى

- بس انا بحبك.. عايزة نرتشبط

- نرتشبط ؟ تفتكرى انا ممكن ارتشبط بواحدة خنفة!

- خنفة ف عينيك .... ده انا بتدلع بس عليك ثوية

- ثوية !!! ااااه قلتيلى بقى معلش اثلى مقفل ماليش ف الدلع

- كوبة، اوووف

- بتقولى حاجة حضرتك ؟

- خالث مالث، ها بقى، قلت ايه ؟ ده انا بحبك من معاميكى

- طب هتدفعيلى كام ؟

- نعم ؟

- مش بتقولى الزمن اتغير! يبقى خلاص عليكى انتى الشقة والمهر وانا هدخل بمجهودى، طيب؟

- ايه؟ ايه؟ ايه؟ شقة ومهر ايييه، يا عم انت؟ ده انت شطحت بتفكيرك قوى قوى

- قرفتينى بقى بدلعك المرق ده، مش انتى اللى بتجرى ورايا اهو؟

- احم، ياريت تراعى انك بتجرحنى بكلامك.. ماتنساش انى انثى برضه وبتكثف

- اه ثحيح، وش كثوف، اصل سوهى عليا بعد دخلتك العبقرية عليا

- اعتبرنى بنكشك، بجر كلام معاك، لكن توصل لحد الجواز يبقى معطلكش

- ههههههه، هو اللى بنعملوا ف الحريم هيطلع علينا وللا اييييييييه!!!

- بص، احنا نرتشبط حبة صغنانين، دخلت دماغى، نكمل، مادخلتش يبقى سكتك خضرا بقى. فل؟

- عارفة انتى ناقصك ايه وانتى بتتكلمى كدة؟ حجرين شيشة تفاح ونبقى ع مية بيضا

- برسيك الله، الحق عليا يعنى؟؟ بدل ما اديك استمارة ستة لما ازهق منك.. ف اصدمك وتتعقد بقية حياتك

- لا انا اتعقدت خالث مالث من ربع ثاعة كلام معاكى ، ده حتى لسانى اتعوج كمان وبقيت بخنف،
غووووورى يا بت يا واد،
انصرفى ، انصرفى


رحاب المليحي

Friday, December 23, 2011

لما البنت تكبر



لما البنت تكبر يقولوا لمامتها بنتك بقيت عروسة وكبرتك
لكـــــن مش المشكلة ف انها تكبر

المشكلة ان تفكيرها بيكبر..
بتبدأ تاخد بالها من نفسها..
تقف قدام المراية كتير
تبص حوليها وتشوف مين بيعمل ايه، تبقى عايزة تقلده
ع طول حابه تلبس فساتين
ويا سلام بقى لما تطقم الاكسسورات مع الوانات الفستان

تطلع لحاجات مش لسنها، زى انها تطلب تحط روج وبرفيوم،
وتوعدك انها المرة دى وبس مش هتتطلب كدة كل مرة

حتى أسئلتها بتكبر معاها وبتزيد
وبتكون عايزة تعرف عن الدنيا اكتر واكتر

ولإن الجيل ده جيل التكنولوجيا،ف بيكونوا فاهمينها اكتر مننا احنا الكبار

من عالم الفيس بوك
لعالم الوى
لعالم البلاى ستيشن
للايكس بوكس
للأى باد
واكيد قبل سن عشر سنين هتتطلب يكون معاها اى فون :)

بس الاهم من كل مُغريات الدنيا دى.. اننا نربيهم ع الدين والأخلاق، الصح والغلط
عشان احنا بقينا ف زمن اختلط بيه الحابل بالنابل، الصح بالغلط، الحلال بالحرام

زمان كنا بنقول الحلال بين والحرام بين**

لكن دلوقتى بقى صعب قوى وسط المُغريات، ووسط السهولة اللى بقيت متوفرة ف كل سُبل حياتنا.. انك تقدر تمشى ع الصح للأبد

بالظبط بتكون أشبه باللى ماشى ع الحبل،
وأى واحد ممكن يشغلك ويلخمك عشان تقع ع جدور رقبتك
وتبقى زيه مش احسن منه

اه كويس ان اطفالنا يكونوا مثقفين ومُلمين بكل تكنولوجيا الحياة
واه كويس اننا منحرمهمش من حاجة
واه كويس انهم يدلعوا ويعيشوا سنهم

لكن الاهم انهم يتربوا صح
طلباتهم مش كلها مُجابة
يكون فيه ثواب وعقاب.. عشان يتربوا ع انهم يمشوا صح

يمشوا صح عشان ربنا هو اللى شايفهم مش عشان خايفين مننا
لإن ببساطة لا احنا معاهم 24 ساعة ولا احنا عايشين لهم طول العمر

ربنا يارب يقدرنا ع تربية اطفالنا (جيل التكنولوبيا) تربية سليمة وصحيحة

عشان هما دول جيل المستقبل

جيل مش بيخاف من كلمة الحق حتى لو ع رقبته
جيل طموح عايز يبقى حاجة لنفسه ولبلده
جيل بيخاف من ربنا مش بيخاف من بنى ادمين
ف لازم يطلع جيل صح الصح (ان شاء الله)

رحاب المليحي

Wednesday, December 21, 2011

كفاية بقى


احيانا لما الاحداث تبقى كتيرة اكتر من اللازم

عقل البنى ادم مش بيقدر يستوعبها كلها ف وقت واحد

لازم يقعد يفنطها ويحللها ويدرسها عشان يقدر يميز مين فيها صح ومين غلط

مين بيزيف الحقائق ويجملها ويوهمك عشان تصدق الاكاذيب بجدارة

ومين بيحطك قدام الحقيقة عارية ويصدمك بيها.. بس لازم تستوعب ان هى دى الحقيقة من غير تزويق كلام ومن غير لعب بالألفاظ

لكن بتوصل لمرحلة تلاقى نفسك عامل زى الكورة اللى بتتشاط من كل الاتجاهات، تتطلع لفوووووق للسما وجمالها.. بس ف لحظة وبكل قسوة تنزل لتحت تخبط ف الارض

لكن كتير قوى تلاقينا احنا نفسنا اللى بنزيف الحقايق ونألف الأكاذيب عشان نضحك بيها ع روحنا.. عشان نقنع بيها نفسنا ان احنا اللى صح، ونبرر بيها قلة شهامتنا وعدم جدعتنا ومعيلتنا

لأ وبيوصل بينا الجُرم كمان اننا عايزين كل اللى حاولينا يصدقوا اننا احنا اللى صح وكمان يمشوا ع خُطانا.. ولما ده يحصل يبقى احنا كدة وصلنا لقمة نجاحنا

لما نقلب الصح غلط والغلط صح
لما نبقى مانفهمش حاجة ونفتى بكل ثقة
لما نعمل فيها رجالة بشنبات واحنا خسارة فينا حتى كلمة (ذكر) اللى مكتوبة ف البطاقة
لما نرضى بالغلط ونأيده مادام ع هوانا.. ونوقف للصح ونعرضه طالما مش قادرين نعملوا
لما نخوض ف اعراض الناس ع اساس اننا ملايكة نازلين من السما
لما نطلع صور وفيديوهات غير حقيقية عشان ندارى بيها الحقيقة.. ونخلى ناس كتير فى صفنا
لما نقف قدام بعض كمسلمين نشتم ونسب ونلعن سنسفيل بعض، تحت مُسمى الدين والأخلاق
لما نتصدر للهايفة ونمسك ف ديل الموضوع ونسيب المبدأ والمضمون

لما ولما ولما

يبقى احنا اكيد محتاجين وقفة مع نفسنا
محتاجين نقتنع ان الكدب مالوش رجلين
محتاجين نعيد حسابتنا

محتاجين حد يقولنا زى زمان ان اللى بيكدب (النوز) بتاعته بتكبر ..وكمان بيروح النار وربنا مش بيحبه

مهو مش معقول للدرجة دى يعنى جتتنا نحست.. ومش قادرين نُدرك حقيقة واحدة
ان الموت مش بعيد عن حد فينا وان عمره ما كان بالسن
واننا هنُسأل عن كل حاجة عملنها ف الدنيا اللى جابتنا لورا بأفعالنا دى

كفاية بقى تزييف ف الحقايق
كفاية تشكييك ف نوايا الناس
كفاية تاخدوا العاطل بالباطل

الرحمة حلوة برضه

ارحموا من ف الارض
يرحمكم من ف السماء

رحاب المليحي

Thursday, December 15, 2011

العين فلقت الحجر

دارى ع شمعتك تقيد

كنا دايما زمان بنسمع المثل ده
ساعات كنا بنعمل بيه بس لحد ما الموضوع يكمل وبعدين ننشر الخبر..
واحيانا تانية ماكناش بنقدر نصبر وننشر الخبر من قبل حتى ما يحصل
تلاقى الناس خايفة عليك وتقولك: (انت ايييييه! مش بتتبل ف بقك فولة؟ يا عم دارى ع شمعتك... عشان الحسد)

لكن احنا كان لينا وجهة نظر تانية، وهى إننا فرحانين وعيونا بتلمع من الفرحة.. ف مش عايزين نكتم فرحتنا..

كمان عايزين الناس اللى حولينا تشاركنا فرحتنا.. لإن لما بنشوف فرحتهم ف عينيهم لحاجة تخصنا احنا مش هما، ده بينعكس علينا ويخلينا طايرين من ع الأرض طير
حاسين بمدى حبهم ومعزتهم لينا.. مقدرين فرحتهم بينا اللى احيانا ممكن توصل لدموع الفرحة

ده كان زماااااااااااااااااان***

دلوقتى بقى تحس ان كل الناس بتتصنت ع كل الناس.. عشان يشوفوا يا ترى ايه اللى عند ده مش عند ده!!

يا ترى ايه اللى فيه ايدك مش عنده، ف يرشقك العين المتينة ويقول ف عقله:( ياااااا بختك)..

لكن ف وشه الابتسامة تكون من هنا لهنا مع الجززز ع الاسنان
ويقولك من تحت ضرسه: (يا حبيبببببى مبروووووووووك، انت مش متخيل فرحنلك قد ايييييه)

وف سره يقول: (ياريتنى كنت انا مش انت يا بعيد، هو انا ناقص ايد ولا رجل عشان ماوصلش للى انت وصلت له؟!)

- الكحكة ف ايد اليتيم (كتير) بتكون عجبه


ولما تقول: (ده انا حصلى وجرالى مصايب قد كدة.. بس ياللا الحمدلله)..

يقول: (اااااه خايف من الحسد، بيبعد عنه العين.. ليه يعنى؟ هنحسده ولا هنحسده!! حكم)

بس يبوصلك وتحس الدمعة هتفر من عينيه ويقولك: (معلش اهى اخدت الشر وراحت، المهم الصحة، هتعمل غيرها اكيد. بس انت متزعلش نفسك)

ومن جواه تلاقى قلبه بينط يفط لحد ودانه.. فرحان انه شايفك متكدر وحزين
______________

ليه بقينا وحشين قوى كدة؟
ليه مابقناش شايفين غير نفسنا وبس؟
ليه محدش بيفرح لحد وكله بيضرب ويخزوق كله؟
ليه؟

رحاب المليحي

Sunday, December 11, 2011

حجاب بلا حجاب


المتعارف عليه عادة اننا مانجبرش بنت ع الحجاب.. يعنى لو مش عايزة تتحجب من نفسها يبقى خلاص ربنا يهديها.. ننقشها ونفهمها اهمية الحجاب ونسيبها لضميرها بقى

دايما البنت بتبرر عدم حجابها مثلا بإن فيه بنات كتير محجبات شكلا بس لكن كل تصرفاتهم بعيدة كل البعد عن الحجاب والدين
وع النقيض فيه بنات مش محجبات لكن محترمات ومؤدبات وضفرهم برقبة محجبات كتير

كل الكلام ده معروف ومحفوظ

لكــــــــن

لم نيجى بقى نطبق ده ف بلاد الفرنجة هل هينفع اننا نسيب البنت براحتها لحد ما تاخد الخطوة دى بنفسها؟

هل هينفع انها بعد ما توصل لمرحلة المراهقة ويبقى ليها صاحبتها الغير مسلمات.. واللى كل واحدة فيهم مصاحبة ولابسه كل ما هو قل ودل

هل هينفع تيجى بقى وقتها تقولها يا حبيبتى انتى كبرتى ولازم تتحجبى

- هتقولك بكل سلاسة: نعممممم يا عمر؟؟؟

- اصل يا حبيبتى عارفة انتى، القصة القديمة بتاعة لما يخيروكى ما بين البونبونية المُغلفة واللى متسابة كدة ف الهوا.. هتختارى انتى ايه؟؟
اقولك انا.. المفروض انك تختارى المغلفة

- لا شغال معاية اللى متسابة ف الهوا.. طالما سليمة ومفيش حاجة تقول انها وحشة او ماتتاكلش


- لألأ، يا حبيبتى هى القصة بتقول انك لازك تختارى المغلفة عشان تبقى متأكدة انها مش بايظة ومش متاكلة قبل كدة، ومش فيها اى ميكروبات من الهوا اللى رايح جاى ع اللى مش مغلفة

- لا انت مش فاهم ما هى المغلفة الحلوة الامورة ممكن برضه تترمى ف الزبالة لو بصيت ع تاريخ صلاحيتها لقيته انتتتتتتتهى،

يعنى من الاخر ماتخدش بالمظاهر، ممكن تكون مغلفة ويخدعك شكلها لكن لو كلتها يا حرام بطتنك هتوجعك..

وقتها بقى ماتلومش غير نفسك.. اصل انت اللى ماخدتش بالك وماركزتش وماهتمتش انك تاخد من وقتك ثانية وتبص ع تاريخ الصلاحية وخدعك شكلها.. وللا ايه سعادتك؟

- هه؟؟؟؟ احم، مش مهم القصة دى يا حبيبتى، بلاها خالص الحوار، ده مش موضوعنا

انا بس بحاول اقربلك الفكرة مش اكتر.. ان دايما الحاجة المتغلفة المتحافظ عليها الناس بتحبها وبتتطلبها اكتر من الحاجة اللى كاشفة نفسها للناس

- ع فكرة انا مش معترضة ع كلامك نهائى، وعارفة ان عادة الشيوخ ف بلاد الغرب بتقول ان يُستحب أن الأهل تعود بناتها ان الحجاب يكون تكملة للبسهم من صغرهم عشان يتربوا ويكبروا ع كدة

بس هو احنا مالناش الحق ف اننا يبقى لينا مُطلق الحرية ف الاختيار؟ زينا زى البنات ف مصر مثلا؟

اصل ببساطة ممكن ارضيكم والبسوا قدامكم ولما اخرج اقلعه.. وخلى بالك ان القانون ف اوروبا ف صفنا.. يعنى طالما بنمارس حريتنا ومش بنتعدى ولا بنأذى حد.. بيطلعوا ليكوا انتوا كارت اصفر للتحذير بعدم التعدى ع حريتنا
صح وللا ف كلامى حاجة غلط؟؟

- عندك حق، وانا عارف ان دايما الرك ع التربية وع البيت.. بس مازلت شايف ان لما البنت من صغرها تتربى ان الحجاب حاجة مُكملة للبسها وتستوعب ان ده حفاظا عليها وتبقى مقتنعة بكدة ده هيسهل الأمور كتير
ها بقى قلتى ايه؟؟

..........!!!!.........


رحاب المليحي

Saturday, December 10, 2011

هو فيه حياء عند الغرب؟؟؟


نيجى للأدب والتربية والحياء،

ويا ترى هل هما موجودين عند الغرب وللا لأ!!

اممممممم

- لما تبقى المجلات اللى موجودة ف السوبر ماركت قدام الاطفال غلافها ستات عريانة

- لما يبقى شرب السجاير من سن 16 سنة وشرب الكحل من 18

- لما يبقى اتنين لسه ف ابتدائى طالعين من المدرسة ماشين يبوسوا بعض

- لما يبقى ف حمام خلع الملابس للمركز الرياضى، العادى ان كله بيقلع قدام بعض، وعادى بالنسبة للاطفال ان البنت تقلع قدام الولد وهما وافقين يضحكوا ويتكلموا

- لما يبقى طفل ف الحضانة داخل حمام المدرسة، يدخل عليه طفل تانى يطلب منه انه يقلع

- لما يُحكى أن أصغر طفل ف بريطانيا سنه 13 سنة، صاحبته 15 سنة، حامل منه.. البوليس يحقق فى الوقعه عشان سببين،

اولهم انهم يثبتوا انه والد الجنين عشان ماكنش أول علاقة ف حياة البنت،

وتانيهم انهم لسه اطفال ع الحوارات دى

- نيجى بقى للتربية والأدب... عندهم التهزيق ممنوع، الضرب ممنوع، الزعيق ممنوع، ليه؟ عشان دى قوانين البلد.. ف لازم الكل يكبر ويترعرع ع كدة

اخرهم يوقفوا ولادهم ف (النوتى كورنر) أو يحرموهم من حاجة بيحبوها وشكرا

قانون: ماتربنيش شكرا ****

رحاب المليحي

Thursday, December 08, 2011

عيون دامعة


كتير بتحس ان دموعك ماليه عينيك لكن مش عايزة تنزل
يإما صعبان عليها نفسها
يإما مستكبرة
يإما شايفة انها اقوى من انها تنزل
يإما عيب انها تنزل
يإما شايفة ان نزولها من عدمه مش هيفرق
يإما دموع حجر مش هى اللى تنزل
يإما لا عاش ولا كان اللى يكون سبب ف نزولها
يإما هتتكسر اكتر بنزولها

بس لو الدموع ماقدرتش تتماسك
وفاض بيها ورفضت بقائها ف العين
وكسرت كل القيود ونزلت

مش هتقف بسهولة
ومهما العين مسحت دموعها
وحاولت تداوى دموع عينيها
مش هتقدر برضه تطيب خاطرها

مهو فاض بيها ومش قادرة تستحمل وتقاوم

اه هى ضعيفة مهما بان عليها من قوة
اه هى كانت مستكبرة لكن خلاص بقى ما باليد حيلة
اه هى كانت شايفة ان عيب انها تنزل قدام الناس لكن الناس هتعملها ايه ولا هتفيدها بإيه!
اه كانت بتقاوم النزول يمكن عشان برستيجها وكرامتها.. بس طظ فى البرستيج قدام دمعة مخنوقة
اه يمكن نزولها هيكسرها لفترة.. لكن بعد ما تنزل كل الدموع اللى حيشاها وخنقها وتهدى.. ده هيقويها من تانى

اصلها لازم تنزل
لازم العين تفضى شوية عشان ترجع تملى من جديد
لازم تتناسى مش تنسى
لازم تدى مساحة للى جى

اصل اكيد هيكون فيه جديد
مهو النكد ده زى البحر مش بيخلص
لازم تبقى اقوى منه عشان تقدر تعيش
وتكمل لنهاية المطاف
عيش وتعايش
رحاب المليحي

Sunday, December 04, 2011

لما...... ايه؟



لما تكون زعلان ماتبينش، مهو الناس اصلها فيها اللى مكفيها

لما تكون مجروح ماتقولش، مش دايما اصلك هتلاقى حد يسمعك

لما تكون مبقوق اكتم جواك، مهو الحياة مش ع طول بمبى بمبى

لما تكون وحيد ماتدورش، احيانا الوحدة بتكون صحية

لما تكون عيونك مليانة دموع ارسم الابتسامة ع وشك، اصل الناس كلها دموعها محبوسة

لما تكون غضبان ماتتكلمش، عشان ماتغلطش ف حق حد مالوش ذنب

لما تكون مُحبط بُص ف مرايتك، يمكن تلاقى فيك ميزة تحمد ربك عليها

لما تكون مكسور ماتنتظرش حد يطبطب، اصل لو الدنيا كلها حاولت تداوى آلامك محدش هيقدر عليها غير نفسك

لما تكون متشائم مش شايف أمل ف بكرة، مش عارف انت عايش ليه، بُص للى أقل منك وحاله يصعب ع الكافر، يمكن وقتها تحمد ربنا وترضى باللى انت فيه

لما تكون مغرور وشايف انك ماجبتكش ولادة، بص للى هو احسن منك ف أخلاقه وتواضعه، يمكن وقتها تعرف حجمك الحقيقى

لما تكون بتركب عالناس عشان توصل، افتكر ان آخرتك ف التراب ومفيش حاجة باقية، يمكن وقتها تستغفر ربنا وترضى بقليلك

لما ولما ولما..... مهى أصلها مابتخلص، ومالهاش نهاية طول ما احنا عايشين ع وش الدنيا..

ف لازم كل لما تحصلنا شوية (لمات) نوقف، نركز، نعيد حساباتنا، ونحمد ربنا ونرضى بنصيبنا عشان نقدر نكمل المشوار،

لإن الدنيا هتمشى وهتكمل بينا أو من غيرنا

والشاطر اللى يسبق ويضحك ف الاخر

رحاب المليحي

ليه الأطفال ف لندن بتحب المدرسة عن الأجازة؟














رحاب المليحي

Saturday, November 26, 2011

نظرة الغرب لثورة مصر ايه؟


بعد ثورة يناير كل الناس ف مصر كانت بتسأل وتتسأل يا ترى ايه رأى الغرب فينا دلوقتى؟ يا ترى ايه نظرتهم لينا دلوقتى؟

قبل ما اقول كلامهم بعد الثورة هقول فكرة بعضهم قبل الثورة

- فيه منهم ماكنش يعرف مصر فين ع الخريطة اشاسا.. تقوله بقى
Egypt
تقوله
Cairo

حمار بديل وعلامات استفهام وتعجب تملى وشه

- ومنهم اللى كان متخيل ان مصر دى مش اكتر من بنى ادمين راجعيين، لا يمتوا للثقافة بصلة، كل مصرى منا بيركن الجمل بتاعه تحت بيته..

- اما الحجاب ف متخلينوه كله عبارة عن نقاب.. وان الزى الرسمى للمحجبات هو الاسود، وماينفعش ان مسلمة تلبس الوان تانية..
ودى غلطة الاعلام اللى كانت دايما بتوصلهم الصورة دى عن مصر

زى بالظبط (القناة الاولى) بتاعتنا

ما علينا

- ايام الثورة كانوا قد ايه فخورين بينا بزيادة، الصفحات الاولى لجرايدهم ومجلاتهم واخبارهم ف التلفزيون كانت تحتل اخبار الثورة المصرية.. وقد ايه انه شعب اجبر العالم كله انه يحترموا..

- وان فكرتهم دايما كانت ان المصرى بيمشى ورا اللى مشغله مالوش حق الاعتراض، بعد اللى شافوه وقاروه ده خلاهم يفتحوا بوقهم مهنجيين مش مصدقين

- عرفوا وقتها انهم كانوا غلطانين،وكنت تشوف الفخر بينا ف عينيهم، كنت تشوف قد ايه هما شاغوفين يسألوا ويعرفوا اكتر عن الثورة وشباب الثورة

- يوم التنحى شارع العرب
Edgware Road
كان قايم ع رجل، الكلاكسات عندنا ممنوعة منعا باتا.. لكن يومها سابوا المصريين تعبر بكل الطرق عن فرحتهم.. بس المهم انهم مايعطلوش المرور

- تانى يوم التنحى كانوا معانا بيحتفلوا معانا.. فرحانين بينا كأنهم مصريين.. تشوف الفرحة مالية قلوبهم وعيونهم.. تمشى وسطهم فخور ورافع راسك انك مصرى
وكانوا بيستأذنوا انهم يتصوروا مع كل مصرى

- وحتى الان مازالت اخبارنا تحتل العنوانين الاولى لصفحاتهم.. وبالرغم ان المصريين بيقولوا ان مصر بتتفضح قدام العالم باللى بيحصل فيها

لكن الاجانب مدركين ان احنا مش شعب همج، وان احنا مش بلطجية، وان احنا مش عايزين ولا غاوين نموت ونتصاب، وان كله بسبب الحكومة مش بسبب الشعب

- ولحد دلوقتى بنعمل مظاهرات قدام السفارة المصرية، واحيانا بيكونوا معانا يسندونا مقتنعين باللى بنعملوا وفخورين بيه

** مهما حصل هنفضل نقول ارفع راسك فوق انت مصرى

ومهما كاميرات العالم نقلت صورة الهمج والبلطجة اللى بيحصل، لكن الغرب عارف الحقيقة وعارف ان الشعب عايز الصلاح مش عايز الخراب

الدور والباقى بقى ع اللى جوه البلد، المصريين اللى لسه مش فاهمين
_______________

ومعلومة بقى
الصورة المُصحبة لكلامى انتشرت بعد يوم التنحى ع كل صفحات الانترنت والفيدوهات بشكل غريب

وهى صورة (بنتى) يوم التنحى.. صورتهالها البى بى سى فى لندن :)

حوبا الأروبة