Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, December 18, 2010

ست شمعات

يوم 24-12-2004

جت روشى للدنيا.. كان نفس اليوم اللى الدكاترة قالولى إنى هاولد فيه.. بس ماقالوليش الساعة كام تحديدا هاتيجى..

اليوم ده هو ليلة الكريسمس فى لندن.. يعنى لا فى مواصلات ولا فى أى حاجة توصلنى المستشفى.. يوم ساقع كدة..

وأنا ماكنش بقالى متغربة غير شهور.. لأ وكمان ابوها كان فى مصر وقتها لظروف خارجة عن إرادته.. وانا كنت قاعدة عند واحدة صاحبتنا.. وماكنتش مقتنعة اساسا إنى هاولد فى نفس اليوم اللى قالولى عليه..

المهم حصل وروشى هل هلالها يوم الكريسمس.. وأنا لا كنت فاهمة يعنى إيه أطفال ولا يعنى إيه أمومة.. جابوهالى بدمها بعد الولادة لافنها فى فوطة.. قرفت طبعا وفاضلت إنهم يحموها الأول.. مش معنى إنها بنتى هتطلعه عليا من أولها بقى

روشان يعنى (اكتمال القمر).. تقريبا أخدت على الأسم ده تريقة من طوب الأرض.. وخُفاف الظل اللى قالولى ماكنتى سمتيها قمر أحسن.. ولا بدل روشانا تسميها روتانا.. قد إيه من كتر سعادتى بكلامهم كنت بطلع دخان من ودانى..

بدأت الأمومة والطفولة.. يمكن الأمهات بس اللى هاتحس بكلامى.. إنك فى بداية معرفتك بالأمومة بتكونى لا تمثلى غير بقرة حلوب.. بالإضافة لعدم وجود أى حياة إجتماعية بالمرة..

وأسئلة وعلامات استفهام لا تنهتى.. هو ايه يا ترى سبب العياط؟ بطنك واجعكى؟ جعانة؟ يا ترى عايزة تغيرى البامبرز؟ نشوف كدة.. لأ فلة.. طيب زهقانة اعملك فقرة ترفيهية.. اييييييه بخا، إيه دمى تقيل؟ طيب أولع فى نفسى طيب؟؟؟؟؟؟

وفى الآخر تعببببببببببببببببببببببببببت، فى مرة كنت على شعرة بقى.. روحت ماسكها مطوحها على السرير.. كانت تقريبا شهرين مثلا.. هبطت سالمة الحمدلله قبل ما ترشق فى الحيطة..

مانكرش إن روشان شافت بصراحة ايام بيضا معاية.. ما انا كنت بتعلم فيها الأمومة بقى.. بالإضافة إنى متغربة ولوحدى ومش فاهمة حاجة ولا عارفة أعمل إيه.. عاملتها حقل تجارب..

ف مرة كنت هانساها عند ناس أصحابنا وأمشى.. كانت نايمة ومش قدام عينى.. نسيتها هو أنا مخى دفتر!!

لما قررت أفطمها.. كانت عمالة تعيط طول الليل وماكنتش عارفة انام.. حطيتها فى العربية بتاعتها ودخلتها المطبخ تعيط براحتها وقفلت عليها الباب.. بس برضه صوتها كان واصلنى ومعرفتش أنام

وقت ما كانت بتزحف كانت ساعات بتصحى بدرى.. وانا لسه عايزة انام.. كنت اطلعها الصالة وسط لعبها.. وعقبال ما تجيلى الأوضة أكون لحقت نمت لى ساعة.. اهو احسن من مفيش

وهى عندها سنتين.. كنا فى رمضان بنفطر عند واحدة صاحبتنا.. وبطبيعة البيوت هنا انك تدخل من باب الشقة تتطلع سلم على الشقة نفسها.. روشى كانت بتلعب ناحية ترابزين السلم واحنا بنفطر.. صاحبتنا كانت مغطية جزء من الترابزين بفوطة عشان كان فيه مساحة منه فاضية.. وروشى عمالة ترجع لورا.. وانا مش قلقانة لإنها كانت بعيد عن السلم نفسه.. لكن فجأااااااااه مالقناش روشى.. وقعت 3 متر نزلت على أول سلمة.. كان يوم تاريخي لا يُنسى ف حياتى.. عناية ربنا الإلهية هى بس اللى حفظت على البنت يومها الحمدلله.. اتسحرت يومها فى المستشفى وعياط هيستيرى لمدة 3 ايام ..

من بعدها بقيت لو حصل حاجة.. آخرى اتخض كدة لمدة لحظة وانا قاعدة مكانى ماتحركش..

يعنى مثلا مرة كنا بنلعب بولينج.. كانت واقفة ورا واحد صاحبنا وهو جى يلعب.. وهو بقى مركز وبعزم ما فيه بيرجع ايده بالكورة لورا. اااااااااى.. راشقت فى راسها.. عملت لها كورة بولينج صغنانة أخديتها معاها وهى مروحة.. ساعتها كنت بشرب بيبسى وهى منهارة صريخ.. قلت لها تاخدى بق؟؟ رفضت، مش عارفة ليه!!!

بعد ما خفت كنا فى حفلة والأرض باركيه.. أبوها ماخدش باله أخدها مقص اتكومت على الأرض.. وكلاكيت تانى مرة كورة جديدة بألوان الطيف فى نفس المكان فى راسها.. ههههه واوا.. روحت مصورها.. أهو برضه تذكار.. بس مارضيتش تضحك عشان الصورة تتطلع حلوة..

روشان دلوقتى تحسها أنسة كدة.. رافعة شعار يا تقنعنى يا تقنعنى يا هعكنن عليك وعلى اللى يتشددلك.. وللا اكسنت العربى اللى بقى متدلع مدى على فرانكو بس فى الكلام بقى مش الكتابة..

أنا عارفة إنى هشوف ايام بيضا.. قبل ما اتجوز ماما قالت لى: ربنا يرزقك ببنات مه اصله داين تدان.. لما حملت فى روشى.. قالت لى: أنا مسمحاكى خلاص.. قلت لها: كدة ومسمحانى؟؟ أمال لو ماكنتيش سمحتينى كان هيحصل فيا إييييييه؟

وتعدى الأيام والسنين.. وروشى كمان كام يوم تتطفى شمعتها الستة.. ست سنين أمومة وطفولة.. ست سنين ما بين شد وإرخى.. ست سنين ما بين اعلمها الصح من الغلط.. وما بين اعمل عبيط انا تعبت. اعمل نفسك مش واخد بالك ..

بس فى النهاية الحمدلله على كل شىء.. اهى ميزة برضة الواحد بيخلص ذنوبه فى الدنيا أول بأول..

كل سنة وانتى طيبة يا روشى يا مروووووشى


الأم المثالية: حوبا الأروبة



Thursday, December 16, 2010

مامى، عايزة شجرة


- مامى

- هااااااا ؟؟

- عندنا ف المدرسة شجرة

- اهلا وسهلا

- إيه يا مامى!! اهلا وسهلا دى؟؟ بقولك عندنا شجرة

- طيب اروح أسقيهالكم يعنى ولا اعمل ايه!!!

- شجرة كريسمس يا ماااااامى

- اااااااااه، كريسمس.. مش تقولى كدة يا روشى.. طيب

- هو احنا ليه مش هنجيب واحدة؟

- عشان الكريسمس ده مش .....

- مااااااااااااااااامى، حلوة الشجرة دى اللى انتى اشترتيها

- شجرة إيه بس يا جومى، ده ورد يا حبيبتى

- ورررررد، اااااااه، حلو الورد اللى فى الشجرة

- مفيش شجرة يا بنتى خاااالص، ده ورد بس

- ها، يا مامى، قوليلى ليه بابا مش هيجبلنا شجرة كريسمس؟

- هو أنا مش قلت لك؟

- لأ يا مامى اتكلمتى مع جومى وماردتيش عليا

- كنت بقولك إننا الكريسمس ده مش بتاعنا عشان احنا مسلمين

- ............

- يعنى كل أصحابك اللى بيتكلموا عربى دول مسلمين معندهمش شجرة

- اااه ليه بقى؟

- عشان هما زيك مسلمين.. لكن الميسات بتوعك اللى بيتكلموا انجليزى دول ممكن يكون عندهم شجرة أو بيحتفلوا بيه عشان هما مش مسلمين ومش بيصلوا زينا ومش بيصوموا زينا

- ماااااااااااااااااامى، أنا معاية شجرة

- يقطع الشجر وسنينه.. معاكى فين يا جومى؟

- أهو

- ده كارت يا حبيبتى وإنتى رسمة عليه شجرة الكريسمس

- طيب بصى، أهو

- Dear Santa, Can you bring me a gift? Jumanna

- يا ولاد ...... الناس الطيبين.. ده انتوا بتشبطوا العيال بقى!!!

- هو بيقول اييييييه؟

- مين ده يا جومى؟

- فى الورقة بيقول ايه؟

- اسمها مكتوب ايه فى الكارت؟

- مامى

- نعم يا روشى

- أنا لازم اجيب هدية للميس

- ليه ياختى؟

- عشان أصحابى جابولها هدية

- مش هما جابولها.. كفاية عليها كدة.. هى هتتطمع بقى ولا ايه؟

- بس يا مامى أنا عايزة اجيبلها زى اصحابى

- هو أنا مش لسه بقول إننا مش بنحتفل بالكريسمس.. احنا عندنا العيد الصغير اللى هو بعد رمضان والعيد الكبير اللى بتلبسى فيه لبس جديد

- طب ما احنا عملنا حفلة الكريسمس فى المدرسة.. وأنا روحت وغنيت فيه.. وإنتى مازعقتيش!!

- احتفلى براحتك بيه فى المدرسة لكن فى البيت لأ.. وبعدين ما المدرسة فى العيد بتعملكم احتفال صغير بالعيد.. واللى مش مسملين بيحتفلوا برضه معاكى.. صح؟

- اه، بس أنا ع.......

- باااااااااااااااااااااابى

- اهلا، اهلا، جوووومى

- بناتك عايزين شجرة كريسمس

- أمهم اسمها لوولا

- طب سانتا مش هيجي يُغزنى بهدية.. مثلا ورقة بمية استرلينى وأنا نايمة أوخ؟

- يُغززززك؟ أوعدك يا حياتى أول ما يخترعوا ورقة بمية هبقى أخليه يُغزك بيها

- كددددة، طييييب، ياللا يا بنات على بابى.. بابى هيجبلكم شجرة وهدايا.. استلقى وعدك بقى من الزن والنكد اللى هتشوفه

- هيييييييييييييييييييييييييييييييييييييييييييييييه

رحاب المليـــــــحي