Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, February 29, 2012

وحشتنا ايام بقلظ وكرنبة

ايام ما كنا مش شايلين هم حاجة
ايام ما كانت الضحكة طالعة مجلجلة من قلوبنا
ايام ما كانت اقصى طموحتنا اننا نشترى مصاصة ولا عروسة
ايام ما كانت الدنيا بتتقلب لو حد ضربنا على ايدينا وقالنا كدة كُخ
ايام ما كان اللى فى قلبنا على لسانا بنقولوا كدة خبط لزق
ايام ما كنا ننام بليل نحلم بلعبة جديدة ولا خروجة ظريفة مع اهالينا

-- يا مين تانى يجيبك يا احلى ايام؟

ماكنش فيه نفسنة
ماكنش فيه كذب
ماكنش فيه لت وعجن
ماكنش فيه تزييف
ماكنش فيه قسوة
ماكنش فيه ضمير ميت
ماكنش فيه ياللا نفسى

كان فيه صدق مشاعر
كان فيه قلب ابيض
كان فيه مشاعر صافية من اى شوائب
كان فيه حُب
كان فيه قلوب مليانة خير
كان فيه ناس بتخاف على بعض

كان فيه بنى ادم حلال يتقال عليه (انسان)
كان فيه .... بس خلاص خلص... بح

رحاب المليحي

Monday, February 27, 2012

الحياة بقيت مُسكنات

عشان تعيشها من غير ما تشتكى تاخد مسكنات
عشان تهيس وتدارى دموعك خد مسكنات
عشان تعيش من غير ما تفكر اضرب مسكنات
عشان تداوى الأه وتكتمها وتدوبها فى بحر من التناسى بلبع مسكنات

من الاخر لازم تاخد مسكنات عشان تقدر تعيش
عشان تقدر تقاوم
عشان تقدر تستمر

ايا كان بقى نوع المسكن فى النهاية كلها مسكنات

اصلك لو بطلتها وقررت تقاومها وتعمل سبع رجالة فى بعض.. وتواجه المشاكل والصعاب والمصايب والأزمات والصدمات

هتلاقى نفسك بقيت يا حرام ريشة فى مهب الريح.. بتتخبط يمين وشمال ومش عارف ترسى ولا توصل لبر الأمان

حاجة من الاتنين يا تضعف وتشوف الحياة سودا.. وتكتئب وتتجنب الحياة وتلعن العيشة واللى عايشنها

يإما ترجع تانى للمسكنات اللى بتعلى دماغك وتخليك خارج نطاق همومك وضعفك واكتئابك

بس احيانا مفعول المسكن بينتهى بسرعة.. او تكرار نفس المسكن مرات ومرات بيفقد ايجابياته فى الحياة

ف يبقى حتما ولابد انك لازم تغير النوع عشان تاخد نفس المفعول او احسن

فيه مسكنات ايجابية ومشروعة وبتخليك تقاوم صعاب الحياة بطريقة ظريفة وسهلة زى الصحاب والخروج وتغيير روتين ونمط الحياة

بس برضه احيانا من كتر ما حياتك اخدت ع المسكنات.. ومهما كانت قوة المسكن بتوصل لمرحلة انه يديك سعادة وقتية.. وبعدها ترجع ريما لحالتها القديمة

بس ما باليد حيلة عشان نعيش لازم نقضيها مسكنات..
ع أمل ان يوما ما تبقى الحياة بمبى من غير ما نبلبع ونضرب ف مسكنات

رحاب المليحي