Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, February 27, 2012

الحياة بقيت مُسكنات

عشان تعيشها من غير ما تشتكى تاخد مسكنات
عشان تهيس وتدارى دموعك خد مسكنات
عشان تعيش من غير ما تفكر اضرب مسكنات
عشان تداوى الأه وتكتمها وتدوبها فى بحر من التناسى بلبع مسكنات

من الاخر لازم تاخد مسكنات عشان تقدر تعيش
عشان تقدر تقاوم
عشان تقدر تستمر

ايا كان بقى نوع المسكن فى النهاية كلها مسكنات

اصلك لو بطلتها وقررت تقاومها وتعمل سبع رجالة فى بعض.. وتواجه المشاكل والصعاب والمصايب والأزمات والصدمات

هتلاقى نفسك بقيت يا حرام ريشة فى مهب الريح.. بتتخبط يمين وشمال ومش عارف ترسى ولا توصل لبر الأمان

حاجة من الاتنين يا تضعف وتشوف الحياة سودا.. وتكتئب وتتجنب الحياة وتلعن العيشة واللى عايشنها

يإما ترجع تانى للمسكنات اللى بتعلى دماغك وتخليك خارج نطاق همومك وضعفك واكتئابك

بس احيانا مفعول المسكن بينتهى بسرعة.. او تكرار نفس المسكن مرات ومرات بيفقد ايجابياته فى الحياة

ف يبقى حتما ولابد انك لازم تغير النوع عشان تاخد نفس المفعول او احسن

فيه مسكنات ايجابية ومشروعة وبتخليك تقاوم صعاب الحياة بطريقة ظريفة وسهلة زى الصحاب والخروج وتغيير روتين ونمط الحياة

بس برضه احيانا من كتر ما حياتك اخدت ع المسكنات.. ومهما كانت قوة المسكن بتوصل لمرحلة انه يديك سعادة وقتية.. وبعدها ترجع ريما لحالتها القديمة

بس ما باليد حيلة عشان نعيش لازم نقضيها مسكنات..
ع أمل ان يوما ما تبقى الحياة بمبى من غير ما نبلبع ونضرب ف مسكنات

رحاب المليحي

10 comments:

Anonymous said...

Mohamed Mashaly
خلاص مفيش حاجه نافعه .المخدرات هى الحل

Anonymous said...

الحياة مسكنات فعلا :)
هاجر عماد

Anonymous said...

Nona El Shamy
wallaaaaaahi m3aaaaky 7a2
al7yaaah b2eet mashiaa blmosakenaaat

Anonymous said...

الشاعر هشام سيد احمد
مسكنات صح انا شكلي هاجي ع الطريق ده قريب

Anonymous said...

Ramy Elalfy
معاكي حق في كل حرف
بس برضه لازم نقاوم ادمان المسكنات ونواجه وجع القلب والمشاكل لأن كل الحاجات دي بتقوينا وبتخلينا نقدر نقف علي رجلينا في اعتى المشاكل

Anonymous said...

انا مصريه
الواحد من كتر المسكنات بقى مدمن ومحتاج يدخل مصحه وبردوا النتيجه وقتها صغير نعمل ايه يعنى ننتحر ونخلص ولا نعيش دور عبدو العبيط ونطنش بقى ولا ايه

Anonymous said...

Sami Ahmed
حالتك صعبة قوى, أنا ههتم بحالتك وهتصلك بجهاز مكافحة المسكنات D:
حلوة يا حوبا :)

Anonymous said...

Sarah El-Eskafy
انا دخلت فى مرحلة المهدئات ومش عارفة اتأقلم
قلبت باكتئاب خلاص :(

Anonymous said...

Nehal Rashed S
nafsy agrab el mhd2at bas b5af

Anonymous said...

Abdallah Elrefaiey
كلامك صح بس ربنا يبعدها عنا