دائما ما تلتقط أعيننا لقطات من نبض الحياة.. لقطات موجودة سواء فى حياتنا الشخصية أو فى حياة من حولنا.. لقطات لا علاقة لها ببعضها البعض، ولكنها متكررة مهما إختلف المكان والزمان
** اللقطة الأولى
- فى مصر:
- Mamy, A piece of cake, please
- Sure My Love
************
- فى أوروبا:
- I want ..........
- هو أنا مش قلت مية مرة مفيش انجليزى ف البيت!
- اللقطة دى متكررة وبنشوفها كتير قوى.. البيت المصرى يفتخر إن ولاده مش بيتكلموا عربى وبيتكلموا أى لغة تانية.. أصل مدرستهم لغات ويااااااى، يعنى إيه يتلكموا عربى فى بلد عربى!! لازم طبعا يوكبوا العصر ويبقى العربى هو اللغة التانية فى حياتهم
- لكن فى بلاد برة بيحرص البيت إن العربى يكون هو اللغة الأولى عند الطفل مش التانية.. حتى فى المدرسة دايما يقولوا لأولياء الأمور كلموهم بلغة بلادهم فى البيت.. فكل ما هايقدروا يلقطوا كلمات ويكونه جمل مفيدة بلغتهم.. هيقدروا يلقطوا أى لغة تانية بسهولة..
** اللقطة التانية
- السيدة الغير عاملة لجوزها: عايزة فلوس، اشترى شوية حاجات
- ليييييييييييه؟ هو أنا مش كنت لسه مديكى فلوس أول الشهر.. راحوا فين؟ لحقوا خلصوا؟
- اه خلصوا، هما إيه هايخللوا !! مه كله بيروح فى كرشك انت وعيالك.. هو أنا يعنى باخد حاجة ف جيبى؟؟ ولا أكون باخد حاجة ف جيبى!!
*************
- السيدة العاملة: كل سنة وانت طيب يا حبيبى، اتفضل هديتك
- الله، دى جميلة قوى، بس شكلها غالى؟
- ماتغلاش عليك.. أمال انا بشتغل ليه!! عشان أقدر اجيب اللى نفسى فيه وقت ما أعوز من غير ما اتحط تحت س و ج
- مهما اختلفت اللقطة دى من أسلوب وأبعاد.. بس ف النهاية اللى جوة القلب بالنسبة لست البيت بيكون أحيانا فوق ما الراجل يتخيل.. فهى لازم تحاسب على القرش.. وما تقدرش قوى تجيب كل اللى نفسها فيه عشان ميزانية البيت ماتختلش.. وحتى لو حوشت وجابت مثلا هدية لجوزها.. مهى فى النهاية فلوس جوزها وهى –مقلبها- منه مش تعبانة فيها.. فمش هتكون مبسوطة ولا حاسة بفخر وهى بتقدمهاله.. على عكس السيدة العاملة اللى عارفة قيمة القرش اللى بتجيبه وتعبانة فيه.. وحاسة إن لها كيان ولها هدف وكمان مش عالة على المجتمع.. وزى ما بتاخد بتدى..
** اللقطة التالتة
- المتغرب: بلدى وحشتنى قوى.. نفسى ارجع واعيش فى وسط الناس اللى بحبها
- ترجع فين يا عم؟ إنت مجنون؟ هى دى بلد يتقعد فيها أصلا؟ ده أنا بس مستنى الفرصة وأركب الجناحات وأطير على أى بلد واسيب المخروبة دى
- ما إنت مش هتعرف قيمتها غير لما تبعد عنها.. وتتذل فى بلد تانية وعند ناس لا ليها ملة ولا دين
- ايوووووة هتقعد بقى تقولى ماشربتش من نيلها.. جربت تغنيلها.. أنا يا عم عايز اسافر واتذل.. اشمعنى انت وغيرك سافروا وعرفوا وشافوا!! أنا بقى ماليش نفس ولا ماليش نفس، أشوف الدنيا زيكم
- دايما ده حال الناس.. كل واحد باصص للتانى.. عنده إيه وبيعمل إيه.. مبسوط مش مبسوط مش مهم.. بس الأكيد إنه مبسوط وهيتفرتك كمان من الإنبساط.. بس بيخاف من الحسد وبيضحك على صاحبه عشان مايحسدوش..
- لا المتغرب قادر يستحمل غربته.. ولا اللى مش متغرب قادر يستحمل دنيته وبلده ونفسه يهج فيها امبارح قبل النهاردة
** وطووووول ما احنا ماشين هنلاقى لقطات متكررة كتيرة قوى فى حياتنا.. أحيانا من كتر تكررها مابقناش ناخد بالنا منها.. وكأنها بقيت فى حياتنا زى المية والهوا
رحاب المليحي
