Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, February 02, 2012

بتعيطى ليه يا أمى؟

- بتعيطى ليه يا أمى؟

- الولا ابنى، حد يدورلى عليه، مخى هيشت منى.. ابنى راح ولا لسه؟ حد يطمنى

- اهدى بس يا أمى وقوليلى هو راح فين؟ هو فى التحرير؟

- ياريته فى التحرير كنت هبقى عارفة انى لو مالقتوش يبقى عوضى على الله.. مهو اصله دايما بيروح التحرير شايل كفنه وكاتب اسمه ونمرة تليفونى على ايده.. عشان لو بعد الشر جراله حاجة حد من ولاد الحلال يتصل بيا يقولى

- شوفتى ازاى كلامك بيطمنك اهو، يعنى هو مش هناك وطالما محدش اتصل يبقى ان شاء الله هو كويس وهيجيلك يطمنك عليه بنفسه

- ابنى صحى الصبح وشه منور بشوش، بصراحة كنت اول مرة اشوفه داخل عليا مبسوط كدة وكأنه ملاك طاير ف السما..

- قلت له: مش بعادة يعنى؟ ايه اللى مفرحك كدة على الصبح؟ ربنا يفرح قلبك دايما

- قالى: جى اصبح على امى اللى ماليش غيرها فى الدنيا قبل ما اسافر

- قلت له: تسافر؟ على فين يابنى؟

- قالى والابتسامة مش بتفارق وشه: حاجة ف السريع كدة يا أمى على بورسعيد.. اتفرج ع الماتش وارجع بليل ان شاء الله

- قلت له: يابنى البلد مش امان الايام دى.. خليك فى حضنى يا ضنايا.. ده انا ماليش غيرك

- قالى: يا امى هيجرالى ايه يعنى ده ماتش كورة.. ده انتى مش بتقلقى عليا كدة وانا نازل التحرير.. يعنى بذمتك ماتش الكورة ولا ميدان التحرير؟!

- قلت له: يابنى انا قلبى مش مطمن.. انا معاك انهم قالوا ان الامن مأمن المكان كله ومفيش قلق.. لكن مهو دايما بيقولوا ودايما بيطلعوا كدابين وخوانة

- ضحك وقالى: يعنى اخرهم ايه؟ هنموت مثلا؟ ده احنا ماموتناش ف التحرير هنموت ف ماتش؟ وبعدين لن يصيبنا إلا ما كتب الله لنا..

- قلت له: بعد الشر عليك، هتتعب قلبى معاك وف الاخر هتنفذ اللى ف دماغك، روح يابنى ربنا ينور طريقك ويحفظك انت وكل اللى زيك وترجع لى سالم غانم، مجبور الخاطر

- قالى: ايوة كدة يا احلى أم، ادعيلى ربنا ما يحرمنى من دعواتك

- وراااااااح، وماسمعتش عنه حاجة بعدها، بتصل عليه، تليفونه مقفول.. انا عايزة ابنى، حد يقولى انه عايش.. انا ماصدقتش اللى شوفته فى التلفزيون ده.. قلت ده كابوس، ده اكيد مش ف مصر.. دى اكيد بلد مش على الخريطة اللى يتعمل فيها كدة.. دول عاملوا عليهم كماشة، دول، دول شالوهم راموهم، هو في كدة يا عالم؟ هو فى حد يعمل كدة ف ولاده ياهوووووووو؟

- طب استهدى بالله يا امى وتعالى نطلع على محطة مصر.. وان شاء الله ربنا يطمن قلبك وتلاقيه يجي يترمى ف حضنك ويبوس ايديكى

(فى محطة مصر الاف من الناس واقفة ف انتظار القطر اللى جى من بورسعيد)

الناس واقفة تواسى بعضها

- انت عرفت حاجة عن ابنك؟

- لا لسه بس انا متفائل خير ان شاء الله راجع، ان شاء الله هشوفه تانى

- وانت عرفت توصل لولادك؟

- اتصلت بابنى واحد زميله رد عليا ومن صوت الدوشة والضرب ماكنتش سامع كويس.. بس طمنى ان ابنى بخير بس انا مش مصدقه حاسس ان ابنى جراله حاجة.. حتى لو جراله حاجة، يارب رجعهولى مصاب انا قابل لكن ماترجعوش ميت.. اللهم لا اعتراض

- يااااااااااااااااااااااا ابنى، اببببببنى

- ايه يا امى؟ ماتقوليش انه ......

- مش قلت لى هتلاقيه ويترمى ف حضنك؟! صدقت يابنى اهو فى حضنى لكن ميت، ميت، اللى حمى الناس ف التحرير، مات فى الاستاد ف ماتش كورة.. روحت هدر يابنى.. وحت غدر يا حبيب أمك.. موتوك ولاد بلدك يا ضنايا.. ربنا ينتقم منهم.. لنا الله يابنى.. حسبى الله ونعمة الوكيل.. حسبى الله ونعمة الوكيل

رحاب المليحي