Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, March 27, 2013

إنه يوم عيد ميلادى

** بما إن بكرة اليوم المقدس ف حياتى إنه يوم عيد ميلادى. **

لازم ادلع نفسى بقى.. وشوية أنانية.. وأكتب عن نفسى شوية
لا بيفرق معاية عيد جواز ولا عيد أم ولا أى بتنجان..

وده يرجع إنى من صغرى كنت بقعد قد كدة أرتب لليوم ده

وعشان عيد ميلادى الأساسى يوم 28 مارس ومكتوبة ف شهادة الميلاد 30 مارس.. ف طبعا دى فرصتى ولازمن ولابد مفوتهاش..

ف كنت بعمله مرتين ف مارس.. يوم وسط أصحابى ويوم وسط عيلتى

وبالنسبة لأهلى لا يجوز بوتيتا إنهم يقولولى كل سنة وانتى طيبة (حاف

كدة).. لازم وحق مستحق يجيبوا هدية حلوة وقيمة كدة

أصل أنا مش بتاعة المهم النية.. والهدية مش بقيمتها والكلام الفاكسان

ده.. لا لا لا المثل بيقول ان سرقت اسرق جمل..

وبعدين ده يوم ف السنة لازم انتهز وأكل السمكة من راسها حتى ذيلها..

ومايضرش إنى أدخل ع الشوك كمان

مرة وأنا صغيرة قبل عيد ميلادى عديت ع مكتبة عاجبنى شكل أباجورة..

روحت لخالتى احكى لها، ال يعنى مش واخدة بالى انه شهر عيد ميلادى

قالت لى: خلاص طالما عاجباكى هاتيها منى ليكى هدية عيد ميلادك..

انشكحت انا بقى.. ف لقد نجحت الخطة..

روحت المحل وطبعا مش هاجيبها ف كيس عادى كدة.. دى الهدية لحوبا

برضة يعنى.. ف لفيتها لفة حوة تليق بيا.. وبعدين رجعت ع البيت،

مافكرتش حتى أعدى ع خالتى أفرجها ع الهدية اللى جابتهالى..

لا لا خالص.. طلعت ع بيتى دخلت أوضتى.. وفتحت بقى لفة الهدية..

قووووم أتفاجئت بهديتى.. وااااو ذوقى جنان

لما بقيت فى الجامعة بقيت أختار الكافية اللى يتعمل فيه العيد ميلاد..

وأجبر الكل يدفع ال Minimum charge

اللى كانت على ايامى حونينة لسه 25ج.. وأعفو الأصحاب العاديين انهم

مايجبوش هودية وكفاية عليهم ال25ج.. لكن الكلوز فريندز.. هىء

فاهمين انتوا بقى طبعا

لما الواحد كبر بقى شويتين واتجوز.. بقى الحمدلله مابيحتفلش بأى

حاجة خالص.. كتر خير الدنيا انى بعمل للبنات اعياد ميلادهم.. وخصوصا

ان لحظى السعيد البهيج عيد ميلاد بنتى الصغيرة بعدى بيوم، ف أخدت منى الأضواء

هيييييح يالا الواحد هياخد زمنه وزمن غيره

بس ده لا يمنع إنى طول شهر مارس بطلب من أبوهم طلبات ع حس ان عيد ميلادى اخر الشهر بقي..

ايييييييه ده شهر ف السنة؟؟ احم قصدى يوم ف السنة
رحاب المليحي

Tuesday, March 26, 2013

حكاية متكررة



-         حبيبتى يا لولا.. وحشتنيى يا بت
-         والله انتى اكتر يا لوزا.. مش مصدقة اننا بقالنا 5 ساعات ماتكلمناش
-         ماتفكرنييش، ده النت فصل ومش معاية كريدت ف الموبيل، معرفتش اتصل بيكى يا بيبى
-         لا، وانا كمان كنت مصدعة قوى ف نمت ولسه صاحية دلوقتى
-         الف سلامة عليكى يا عمرى.. خلى بالك من نفسك بقى ماتخضنيش عليكى
-         لأ، انا احسن دلوقتى مش تقلقى عليا بيبى، مووووه

****** بعد يومين
-         لوزا،
-         نعم يا رو....
-         تعاليلى ع الشات ضرورى عايزاكى
-         ايه؟ خير يا بنتى؟ مالك؟ قلقتينى عليكى
-         انتى كلمتى حمادة ؟
-         هه؟ حمادة مين؟
-         انتى هتستعبطى؟! حمادة الواد بتاعى.. ها، رجعت لك الذاكرة كدة وللا لسه؟
-         ااااااه، ايه يا حبى هو انتى هتغيرى منى وللا ايه؟ ده هو جه ع بالى قلت أسأل عليه
-         ممممممم طيب ياريت ماتتكررش
*******
-         لوزا، هو انا مش سبق وقلت لك مالكيش دعوة بحمادة؟
-         حمادة، حمادة، قرفتينى يعنى.. مالك واخدة فيه شالوت كدة؟ ده حتى ولا شكل ولا منظر
-         والله؟ ماتخلينا نتكلم ع المكشوف بقى.. وقولى انك هتموتى عليه؟
-         نعمممممم؟ لأ يا عينيا.. ده ما يسواش بصلة ف سوق الرجالة.. وع فكرة بقى ده بيضحك عليكى.. وانا لولا انى بخاف ع مشاعرك كنت صدمتك بحقيقته
-         يا شيخة؟ ايه التناقض اللى انتى فيه ده؟ وايه بقى اللى خلاكى تحسى بكدة يا هانم؟
-         افتكرى ان انتى اللى طلبتى تعرفى.. حمادة بتاعك ده بيجرى ورايا بالمشوار وانا اللى منفضاله.. أقوله ماتنساش انك مرتبط بأختى وصاحبتى.. يقولى ما انا ارتبط بيها بس عشان أوصللك
-         ايه؟؟؟؟؟؟
-         هى دى حقيقة حمادة بتاعك، وانا اذا كنت بكلمه ف ده عشان أعقله كدة وأخليه يسبنى ف حالى ويركز معاكى انتى
-         لا ونبى؟ لأ تصدقى طلعتى أصيلة والله
-         هيييح شوفتى ازاى ظلمتينى؟
-         لوزا، انا مش عايزة اعرفك تانى عشان انتى شخصية واطية.. وانا للاسف اتخدعت فيكى.. وخلى حمادة بقى ينفعك.. مهو أصل الطيور ع اشكالها تقع

رحاب المليحي