Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, October 07, 2010

عفريت يا ماااااامى



- جوووووووووووووومى

- عايزة ايه يا أوشى؟

- (بتضحك) أنا خايفة، أنا خايفة..... عفريت، عفريت

- عفريت!!!! عااااااا.. مامى، أوشى بتقولى فيه عفريت

- عفريت؟؟ جبتوها منين دى!! مفيش حاجة اسمها كدة.. بطلى تخوفيها يا روشى

- أنا بكذب عليها يا مامى.. قصدى بضحك عليها... ييييي، بلعب معها

- طب بلاش اللعب البايخ ده.. قال عفريت قال.. ده انتوا تخوفوا مية عفريت

- مامى، عندى (هوم ورك)

- طب ياللا عشان نعمله وتشلينى

- حاضر مامى

- ماااااااااامى، اكتبيلى صورة

- جومى اسمها ارسميلى صورة مش اكتبيلى.. وسيبينى دلوقتى عشان اذاكر مع روشى.. بلاش حركاتك دى

- مامى انا جيبت (البوك) اهو

- مش قلنا بلاش انجليزى ف البيت

- الكتاب يا مامى

- ها.. اتفضلى أقرى

- B-i-g

- مش عايزاكى تشتهجيها.. بس ما علينا.. ها، بقى تبقى إيه على بعضها؟

- هااا؟

- قلنها مية مرة قبل كدة يا روشى.. تبقى إيه على بعضها؟

- تبقى The

- الصبرررررررررر من عندك يارب

- (روشى بتفرك وساكتة)

- مامى عايزة اعمل (بيبى)

- روووووحى يا جومى.. يعنى بتستأذنى إنك تدخلى الحمام!!!

- روشى بلاها قرايه.. هى (تو) بتتكتب ازاى؟

- كدة 2

- جميل قوى و 20 بتتكتب ازاى؟

- كدة 50

- !!!!!! الاتنين اتقلبت خمسة فى لحظة.. طب ازاى!! ازاااااى؟ فهمهالى دى

- (روشى بدأت تتعصب)

- بلاها انجليزى خالص.. قوليلى حرف ميم: موزة.. صح؟

- صح

- طيب بابا اسمه مصطفى يبقى أول حرف منه ايه؟

- بابا مصطفى موزة

- مامى هو سوبنج بوب بيعيط ليه فى الكرتون؟

- عااااااااااااا، تصدقوا إنى أنا اللى هجيبلكم عيلة العفاريت كلها.. دول كمان لو رضيوا يجولكم

******************

- مامى الميس مديانى (هوم ورك) فيه أرقام

- ورينى

- اهو يا مامى.. هى بتقول إيه؟؟

- اسمها مكتوب إيه مش بتقول إيه؟

- مكتوب إيه يا مامى؟

- .........

- مامى.. مكتوب إيه؟ دى رسمة سرير صح يا مامى؟

- اه، عايزينك تشوفى طول السرير ده بالمعالق.. (فى سرى): "ازاى يعنى ده السرير المرسوم طوله مايجبش معلقة واحدة.. ركزى ركزى عيب تحرجى نفسك قدام البنت"

- ها يا مامى

- اااااااااااااه فهمت.. تشوفى طول سريرك بالمعالق هيعمل كام معلقة.. (فى سرى) "الحمدلله ماتفضحتش"

- هييييييه، هجيب معالق من المطبخ

- على الله بقى يبقى عندنا معالق كفاية

- مامى وأنا كمان عايزة ملاعق

- جومى، ملاعق إيه بس... روحى لونى ياللا

- نوووو، أنا هجيب ملاعق مع أوشى من المخبخ.. ها يا مامى ها!!

- ...... أنا هدخل الحمام أريح منكم شوية.. أسمع صوت حد منكم بقى

- (تك، تك).. مامى، مامى، عايزين نعمل (بيبى) هنعمل على روحنا

- لأاااااااااااااااااااااااااااااااااا

**************

ابقوا اطمنوا عليا بقى :)

رحاب المليـــحي