Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, December 30, 2012

كاميرة النوم الخفية



لما بتكون سينجل ونايم ف اوضتك لوحدك بليل مقفول عليك بابك.. اكيد ممكن تعمل حاجات وانت نايم.. لكن عمرك ما هتعرفها لو محدش حكالك عنها

لما تتجوز بقى الموضوع بيختلف.. وبرغم انك بتنفش ريشك.. وتقعد تحكى وتتحاكى لنصك التانى انك ما بتتحركش ومكان ما بتنام بتقوم من غير ما حد يحس بيك.. وانك عمرك ابدا ابدا ما عملت صوت نهائى وانت نايم ( لا من فوق .. احم، ولا من تحت)
بس لحظك السىء والأكيد ان الحقيقة المُرة هتبان ومسيرك ف يوم من الايام هتتكشف

مثلا مثلا يعنى

-          يا حبيبتى هو انتى ليه بتشخرى وانتى نايمة؟
-          هه؟ انا؟ عمرها ما تحصل.. تلاقيه كان صوت شخيرك انت وصحيت عليه.. هىء
-          طب اسمعى كدة
·         يفتح موبيله ويسمعها صوت شخيرها وهى نايمة
-          ايه ده؟؟ مين دى؟
-          ده انتى يا حياتى قلت اسجلك صوتك عشان تصدقينى
-          انت اكيد بتهرج.. انا صوتى كدة؟ لأ لأ لأ مش صوتى ده
-          ده انا كنت حاطيت الموبيل جنب بُقك.. وانتى ولاااااا حاسة.. بس انا خُفت من قوة شخيرك تاخدى معاكى فردة الشبشب ولا حاجة
******
-          حبيبتى هو انتى ضربتينى وانا نايم؟
-          نعم؟
-          اصلى صاحى عينى ورمة وبتوجعنى
-          أومال انا اقول ايه.. ده انت نمت وانا كنت لسه صاحية وشى ف وشك وسرحانة.. لاقيتك بطول دراعك وهوب مدينى بالبونية ف وشى
-          مين ده؟ بطلى تتبلى عليا بقى
-          وشوية وعقبال ما فوقت من البونية.. قمت بركبتك وراشقها ف ركبتى.. ايه بتلعب ماتش مُلاكمة ف الحلم؟
-          كل دى اشاعات مغرضة عشان تدارى عملتك
-          اشاعات؟ ده انا كنت خلاص هسب لك
-          هسب لك؟ حد يقول لجوزو هسب لك؟!!!
****
-          هو ايه اللى انت عملته امبارح ده؟
-          عملت ايه يا بيبى؟
-          كنا نايمين وتقريبا انت صحيت مفزوع على حاجة وقعت ف البيت.. روحت ماسكنى من كتافى وقعدت تهزنى وتزعق وتقول: قومى شوفى في ايه؟ قومى شوفى فى ايه؟ خخخخخخخخ ونمت تانى
-          هههههههههههه اه تصدقى انا لما صحيت الصبح.. افتكرت حاجة شبة كدة ف قمت اشوف بقى هو كان ايه اللى وقع بليل واحنا نايمين.. احم سورى بيبى
****
-          لأااااااا كدة كتير بقى، كدة كتير
-          ايه يا بنت الناس بس ايه اللى حصل؟
-          ابقى نايمة بليل الاقيك فجأة وبدون مقدمات تنزل عليا بالأقلام لحد ما عدمتنى العافية.. وبعدين تقولى اوووووه سورى سورى وف ثانية تكمل نوم تانى..
-          ممممممم، مش فاكر.. اكيد كنت بحلم بحاجة فيها ضرب ف جت فيكى.. انا اسف يا حبيبتى

رحاب المليحي

Monday, December 03, 2012

كان عايز يتجوز



أحمد شاب يعيش ف لندن.. انسان متدين وف حاله وعلى قده.. كان كل طموحه انه يتجوز بنت مصرية، متدينة ويعيشوا سوا حياة بسيطة 

اتعرف احمد على رجل اعمال مصرى واخد لجوء سياسى وعايش ف لندن.. عرض عليه انه يجوزه بنته فى مصر..  وكان مطلق والدتها ومتجوز واحدة تانية ف لندن.. لكن كان بيحب بنته اللى عرضها على احمد.. وكان شايف انه مش هيلاقى لبنته شاب احسن من احمد 

وفعلا سافر احمد مصر عشان يتعرف على البنت ووالدتها.. عمل استخارة.. وحس ان البنت كويسة..
بس اللى كان مستغربه ان البنت من ناحية هادية بزيادة ومن ناحية مالهاش رأي.. اللى هو يقول عليه حلو يبقى ده كمان نفس رأيها.. واللى يقول عليه وحش برضه يا محاسن الصدف يبقى ده كمان نفس رأيها

ولما سأل اهلها قالوله انها من عيلة محافظة.. وان مالهاش اى اتصال بالعالم الخارجى.. عشان والدتها مش بتسيبها تروح اى مكان لوحدها غير ولازم تكون معاها.. وانه حد غريب عليها ومش واخدة عليه ف تلاقيها مكسوفة.. لكن لما تاخد عليه هتتغير للاحسن

احمد شاف ان كلامهم منطقى جدا.. وخاض التجربة واتجوزها.. بس ماكنش مبسوط معاها.. كان حاسس ان دماغها دماغ (بيبى).. لا تفقه شىء فى أى شىء.. ولا بتعرف تعمل اى حاجة لوحدها.. ولا حتى بتاخد وتدى فى الكلام.. 

وحتى لما حاول يعملها ورقها عشان تسافر معاه لندن.. السفارة رفضت سفرها عشان تاريخ والدها السىء وانه مطلوب فى مصر.. ف مش كمان هيسافروله بنته

ف بقيت الحيرة حيرتين.. حيرة انه لازم يسيبها فى مصر ويرجع لندن عشان شغله.. ويروح ويجى عليها ومش ده اللى كان بيحلم بيه.. وحيرة انه كمان مش مبسوط معاها ومش عارف يتعامل
ولما اشتكى لأبوها أكتر من مرة انه مش عارف يتعامل معاها..

 ابوها صرحه انها عندها مشكلة عقلية.. عشان كانت متعلقة بيه قوى ف لما سافر وسابها..  مُخها توقف على السن اللى سابها وسافر فيه.. يعنى هى لو عندها 21 سنة شكلا.. لكن عقلها واقف على 12 سنة من ساعة سفر والدها.. وإنها لما كانت فى امتحانات ثانوية عامة كانت بتكتب له جوابات فى ورقة الاجابة بدل ما تجاوب على أسئلة الامتحان

اتصدم احمد لما عرف حقيقة البنت.. واشتد ف الكلام مع والدها انه غلطان انه معرفوش الكلام ده من الاول.. وانه حرام عليها يجوزها وماكنش ينفع لها جواز من الاساس عشان هى لازم تتعامل معاملة الاطفال.. مش انها تفتح بيت وتتحمل مسئولية وتجيب اطفال تربيهم كمان..

فكر احمد كتير يعمل ايه؟ يطلقها ولا حرام عليه يسيبها زى ما  ابوها سابها؟ لكن كان شايف ان حرام عليه بكل المقاييس انه يعاملها معاملة الزوجة.. وفعلا طلقها..
وبعد كذا سنة توفت البنت إلى رحمة الله من غير ما تشوف ابوها تانى

رحاب المليحي

Sunday, November 18, 2012

حلم من لندن

واحد انجليزى قعد سنين يحلم حلم معين مابيتغيرش.. وكل ما يحكيه لحد مايعرفش يفسرهوله

لحد ما ف مرة قابل مسلم وقاله ع حلمه المتكرر وانه مش عارف له معنى.. طلب منه المسلم انه يحكى له حلمه
قاله الانجليزى: بحلم انى بطلع سبع سلالم.. وعند السلمة السبعة بفتح شباك
أول ما بفتح الشباك بيظهر لى نور غريب وكلمة أو رسمة مش بفهم معناها

بعد ما المسلم سمع حلمه.. كتب له كلمة.. وسأله اذا كانت هى دى الكلمة اللى بيشوفها ف حلمه؟

أول ما الاجنبى شاف الكلمة بص للمسلم، أخده بالحضن.. وقعد يعيط.. قاله: ايوة هى دى، هى دى

المسلم دمع وقاله: دى كلمة (الله).. وشرح له يعنى ايه الله.. وكلمه عن الاسلام والسبع سموات

طلب منه الاجنبى انه ياخده يوديه على الجامع عشان يشهر اسلامه.. وقد كان

* إنك لا تهدى من احببت ولكن الله يهدى من يشاء *
رحاب المليحي

مش مسلم وعايز يحج.. هه؟


(موريس) شاب من الاتحاد السوفيتى.. عايش ف لندن.. شغلته (شيال) فى فندق الماريوت.. 

بنى ادم دماغه لاسعة ومتناقض.. يعنى اللى بيطق فى دماغه لازم يعمله مهما كان.. رافض لفكرة الزواج أو وجود النساء ف حياته عموما.. ويعشق السفر.. 

بحُكم شغله ف الفندق .. بيمر  عليه اشكال والوان من البشر.. وكان بيلفت نظره العرب.. كان بيركز ف تصرفاتهم.. يلاقى اللى منهم ماشى مع ستات.. واللى منهم بيهتم يعرف اللحمة اللى بياكلها حلال وللا لأ، وقدام كدة يلاقيه بيشرب خمرة عادى جدا.. فأخد فكرة مش ولابد عن الاسلام 

لحد ما شاف (محمد) شاب مسلم ومتزوج.. بيشتغل معاه ف نفس الفندق.. لاقاه شخص ملتزم.. هزاره محدود مع زميلاته ف الشغل.. بيصلى الصلاة ف وقتها.. مش بيشرب.

سأل (موريس) (محمد) عن السبب ان غير المسلمين ممنوعين من دخول مكة والمدينة؟ وماكنش مقتنع بإنه يعنى ايه مُحرمه ع غير المسلمين.. وان مفيش حاجة اسمها كدة.. وان الكلام ده كان زمان لكن لازم يكون اتغير دلوقتى.. وان ماينفعش المسلمين يبقوا بالرجعية دى

وبدأ (موريس) يسأل كل السعوديين والخليجين اللى بيجوا الفندق.. وكل واحد منهم يقوله كلام شكل.. وفيه منهم قالوا معلومة كانت جديدة على (محمد) نفسه.. ان دلوقتى بقى فيه بوابة معمولة لغير المسلمين بيدخلوا بيها مكة والمدينة ولكن بيزوروا  اماكن محدودة.

(محمد) عشان يريحه طلب منه الاتصال بالسفارة السعودية وهما اللى هيجبوله من الاخر.. 

وفعلا (موريس) اتصل بيهم ورجع لمحمد متعصب..
 استغرب (محمد) شكله وسأله عن سبب عصبيته.. رد (موريس) ف منتهى العصبية ان اللى ردت عليه قليلة الذوق والادب.. وانه لما قالها انه سائح وعايز يزور بلدكوا.. قلت له ف منتهى البرود انه مينفعش وشوف لك مكان تانى تروحه

وكمل كلامه بعصبية اكتر: يعنى ايه سائح بيقولهم ان عايز اجى بلدكوا اصرف فلوس وهما يرفضوا!!

 ضحك (محمد) وقاله ان الفلوس عندهم بيعملوها مراكب من كترها.. وانهم مش محتاجين فلوسك ف حاجة.. وده مش سبب يخليك تزور البلد

ضرب (موريس) بكل الكلام عرض الحائط.. وراح حجز تذاكر الطيران.. وصادف ان الميعاد اللى حجز فيه يوافق وقت الحج.. وكله تصميم انه هيسافر يعنى هيسافر

لما (محمد) لاقاه مصمم بشكل مبالغ فيه ع السفر.. قاله ان تأشيرة دخول المكان المقدس ده، هو انه يسلم ويبقى معاه شهادة تثبت اسلامه

تحمس (موريس) لما لقى ان اخيرا فيه أمل انه يسافر.. وطلب من (محمد) ياخده الجامع اللى هيشهر فيه اسلامه
وفعلا راحوا الجامع سوا.. وطلب (موريس) من (محمد) يعلمه ازاى يتوضأ.. وبعدها راح لشيخ الجامع وأسلم وأخد الشهادة اللى تثبت اسلامه

بعدها طلع على السفارة السعودية وقابل القنصل.. وشرح له انه داخل الاسلام جديد وانه حابب يروح الاراضى المقدسة وانه فعلا حجز التذاكر..

كان فاضل على ميعاد الحج حوالى شهر ونص.. تفهم القنصل موقفه وحدد له ميعاد يجي له فيه وانه هيخليه يسافر يحج
خرج (موريس) من السفارة طاير من السعادة انه اخيرا هيتحقق حلمه وهيسافر البلد اللى محدش ابدا مش مسلم قدر يشوفها 

ولما حكى (موريس) لـ (محمد) اللى حصل بينه وبين القنصل.. اندهش (محمد) جدا.. وقاله ان المسلمين نفسهم مايقدروش يقرروا يسافروا ف الوقت القصير ده.. وان حتى لو حصل لازم يكون مع فوج مش كل واحد بدماغه ولوحده كدة.. 

وان استحالة الكلام ده يكون حقيقى.. لكن نصحه انه يستنى للميعاد اللى القنصل حدده ويروح السفارة تانى لعل وعسى

وفعلا ف الميعاد المحدد راح (موريس) السفارة وقابل القنصل تانى.. عمل القنصل اتصالاته.. وحط (موريس) مع فوج من الافواج اللى بتدفع الاف الجنيهات الاسترلينى عشان تسافر.. اللى هو الفندق بتاعهم بيكون بيطل ع الحرم لزم.. ومدفعهوش حاجة.. سفرهُ ع حساب السفارة

سافر (موريس) فعلا وأدى مناسك الحج كلها.. انبهر بتصميمات الحرم وبزحمة الحُجاج المهولة.. ولكن كان بيلفت نظره اكتر الحاجات السلبية.. زى الناس اللى بتنام ف الحرم.. والناس اللى مش بتصلى.. والناس اللى بتضرب وتتخانق وتزاحم عشان تقف ف مكان تصلى

وبعد ما انتهى الحج رجع (موريس) لندن تانى.. حط شهادة الاسلام ف الدُرج.. ورجع لديانته ورجع للشُرب من جديد.. ولا أى حاجة من اللى شافها وعاشها ف الحج هزته أو حركت ساكنا فيه

* إنك لا تهدى من احببت ولكن الله يهدى من يشاء *

رحاب المليحي