Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, October 07, 2011

حماتى؟؟؟ اشمعنى


- (تك... تك) تخبط الأم باب اوضة إبنها

- هاااااااااوم، نعم يا ماما عايزة حاجة؟

- قوم يابنى عايزة انزل اشترى شوية طلبات

- ماينفعش تتأجل شوية طيب يا حاجة.. عشان (ريم) نايمة ومش عايزة ازعجها

- هى لسه بسلمتها نايمة؟ ايه وهتنام لحد الضهر!! ما تخليها تتلحلح كدة تقوم تحضرلك الفطار وتكويلك هدومك خلينا نلحق مشورنا

- يا ماما مهى طالعان عينيها مع الولاد طول اليوم.. حقها يعنى ترتاحلها شوية

- (تمصمص الأم شفتها) مهو دلعك ده اللى مخليها ركباك.. يا واد، انشف معاها شوية مش كل حاجة تقولها امين

- يا ماما يا حبيبتى طالما الست شايلانى ومش مقصرة فى حاجة.. اعكنن انا على اللى خلفوها ليه طيب؟ ده حتى مايرضيش ربنا

- (تتعصب الأم صوتها يعلى) طول عمرك هتفضل عبيط، إخلص ياللا عايزة انزل

- (تصحى ريم على صوت حماتها الحنون) خير يا ماما فى حاجة؟

- لا يا حبيبتى ده انا كنت بقول للدكر جوزك يوطى صوته لحسن يقلق منامك وتسودى عيشة أمه اللى هى أنا

- (تبتسم ريم ابتسامة صفرا وتجز على اسنانها) اممممم، صباح الأنوار يا حماتى

_______________________

- (يقفل احمد الباب عشان ينام)

- ( الاوضة اللى جانبه خبط لزق) ااااااه ااااااه، هموت مش قادرة، إهىء، إهىء

- (يجرى احمد على مامته) مالك يا ماما؟ مالك؟ انتى كويسة؟

- كويسة؟ كل الهيصة اللى انا عاملها دى وكويسة؟ انت نظرك ضعف وللا ايه؟؟ اااااااه

- طب اهدى بس، اجيبلك دواء الضغط؟

- لا خليك قاعد جانبى يابنى، ماتغيبش عن عينى لحظة لحسن يجرالى حاجة يااااابنى

- هه؟ اصل يا ماما (ريم) هتنام بقى وانا عايز الحقها.. قصدى عايز انام يعنى لحسن تعباااااان ميت يا مامتى يا حبيبتى

- نام فى حضنى يا ضنايا.. وللا خلاص من لقى مراته نسى أمه!!!

- :| :| ، لا يا حاجة ده انتى الخير والبركة يا حبيبتى.. هو أنا عايش غير بدعاكى

- قول لنفسك بقى.. ده انا اللى بدعى عليه ماقولكش على اللى بيجراله.. مش عايزة احكيلك عشان بس ماتفتكرش انى بشكر فى نفسى.. ف ماتخلنيش ادعى عليك بقى يابنى.. انا زعلى مفيش اوحش منه

- (فى سره: هى دى حاجة الواحد يتفشخر بيها يعنى!!) طيب يا ماما، انا شايفك بقيتى حلوة وزى الفل اهو.. تصبحى على خير بقى.. هبقى أطل عليكى كل شوية

- ااااااااه، مه الكلام معاك يا ابنى ناسانى التعب.. لكن لو مشيت وسيبتنى لوحدى ... اااااااااه، الوجع هينئح عليا تانى.. تعال ودينى المستشفى خلااااااص مش قادرة

- لاااااا وعلى ايه!!!! أنا عندى شغل بكرة.. انام جانبك بقى وخلاص.. و(ريم) هتنام وجانبها فاضى.. إهىء إهىء

__________________

- احمد يا حبيبى انا نازلة اعمل شوبينج

- خدى ماما معاكى يا حبيبتى عشان زهقانة

- (ريم فى سرها: ربنا قادر على كل شىء)

- ريم، مش بتردى ليه؟

- هه؟ بس اصلى نازلة اجيب هدوم ليا.. وماما بتتعب من المشى الكتير.. وللا ايه يا ماما؟

- تجيبى هدوم؟ بنت حلااااال، تصدقى يا ريم يا حبيبتى انا كمان حاسة ان هدومى كلها كدة بقيت قديمة ومحتاجة كدة كام حاجة جديدة

- (احمد يتعمق فى قراية الجورنال ولا اكنه سامع عشان عارف ان هو اللى هيلبس)

- وماله يا حماتى، بس اصلى رايحة لمحلات شبابى شوية اجيب منها الوانات صيفى كدة تليق عليا وعلى سنى

- ايه هو اصله ده؟ يعنى انتى شايفانى كبرت وكحكحت وابنى بيلفعنى على ضهره!! ما انا كمان عايزة البس الوان حلوة كدة وشيك.. وعايزة اروح للكوافير اعمل ضوافرى

- هههههه، ايه يا حاجة انتى بتحبى جديد وللا ايه؟ ولا معاكى قرشين من المعاش زيادة محيرينك؟؟

- (الام تخمس فى وشه) فلوس؟؟ منين يا ضنايا؟ هو معاش ابوك ده بتسميه فلوس! وبعدين هو انا مخلفة راجل وكبرته وعلمته وصرفت عليه وتعبت فى تربيته ليه؟ عشان لما يبقى بشنابات يحاسبنى ويقولى بتعملى ومابتعمليش.. إهىء، إهىء

- كدة يا احمد.. اديك جرحت مشاعير ومحاسيس أمك الفاضلة.. ياللا صالحها بقى وقب بورقة ب 500 عشان أمك ترضى عنك.. لحسن انت عارف لو غضبت بتكون عاصفة الصحراء

- (يبص احمد لريم بنظرة حزينة.. ويطلع الفلوس لأمه، اللى تجرى تفط تنط تقوم تلبس عشان تلحق تنزل مع ريم)

__________________

- ياللا يا حبيبى قوم كل.. ده انا طبخالك بإيديه النهاردة.. وللا خلاص نسيت أكل أمك؟

- اييييييييه ده بجد يا ماما؟؟ ياااااااه من زمان ماكلتش من ايدك.. وحشنى اكلك والله

- يا حبيبى يابنى.. تلاقى بطنك نشفت من اكل مراتك.. اللى لا لون ولا طعم.. بس اعمل ايه يابنى غصبا عنى بستحمل اكلها.. ما انت عارف بقى الواحد كبر.. بس فشرررر الشباب شباب القلب

- طبعا، ربنا يديكى الصحة يا أحلى أم فى الدنيا.. ها بقى عملالى ايه على الغدا؟

- اسكت، والمفاجأة بقى؟

- فرحييييينى بقالى كتير مافرحتش

- انا اللى جيبت الاكل ده من فلوووووسى.. انت عارف انا احب ابقى خفيفة.. واصرف من معاية.. اااااااه ماحبش حد يتنطط عليا ولا يحسبنى

- هههههههههههههه

- (ترفع الام حاجبها سبع سبعات) نعم؟؟؟ ايه اللى يضحك يا احمد؟

- (يسرح احمد ويفتكر مراته وهى بتقوله: فاكر يا حبيبى من اربع سنين لما مامتك جت وقالت لنا انها هتقعد معانا شهر عشان تراعينى وانا حامل) ههههههههههه

- ايه يا احمد يابنى انت اتجننت ولا ايه؟

- نهائى يا والدتى.. ها بقى قوليلى طبخالى ايه؟

- تعال شووووف بنفسك مش عايزة احرقلك المفاجأة.. لحسن تشبع من الفرحة

- (يبص احمد ع السفرة) فين يا ماما الأكل؟

- سلامة الشوف يا حبيبى.. مش شايف؟ ده انا عملالك الاكل اللى انت بتحبه؟

- اااااه، قصدك على ساندوتش الجمبرى ده اللى تحسيه متاكل قبل كدة!!! لأ تمام، يعنى ده لحد ما الاكل يخلص.. تصبيرة يعنى صح؟

- ايه يا احمد؟ جرى ايه؟ ده انا نزلت دفعت من جيبى ونقيتلك الجمبرى جمبريايه جمرياية عشان تتريق على امك بالشكل ده.. إهىء، إهىء

- (فى سره: حسبى الله ونعمة الوكيل)

رحاب المليحي

Wednesday, October 05, 2011

مايحكمشى


ما تحسبوش يا بنات إن الجواز راحة.. وماتزعلوش يا بنات إن قلنا بصراحة إن ....


- مالك ماسكة فى الأغنية دى بقالك يومين ليه يعنى؟

- نعم؟ هو الواحد مش هيعرف كمان يفرغ عن نفسه بأغنية!!! وبعدين يا حبيبى دى مش مجرد أغنية ده واقع مرير

- واقع؟ ليه بقى؟ ده انتى قاعدة واكلة شاربة نايمة.. وبتاخدى مصروف إيدك الشهرى وبفسحك على قد ما بقدر مش بخليكى عايزة حاجة.. عايزة ايه تانى!!! اكتر من كدة يبقى معندكيش دم لا مؤاخذة

- تيراراراراراراراااا... اوعى الجنة ونعيمها.. قدام ده بتاخد ايه بقى؟؟؟ بتاخد اهتمام ورعاية لولادك واساسا متعرفش عنهم حاجة نهائى.. ده احيانا لما حد يسألك عندهم كام سنة ولا فى سنة كام بتهنج مبتعرفش ترد.. ولا حتى تعرف حاجة عن البيت واحتياجاته.. وكمان بترجع البيت تلاقى غداك جاهز وهدومك مكوية.. الخ، الخ.. لعلمك الشغالة الفليبنية بتاخد اكتر من كدة

- طيب مهو، خلصين كدة.. يكفيكى إن أنا بجيب الفلوس عشان انتى تصرفيها ومش بحسبك

- هأ، أصلى متجوزاك على طمع

- ايوووووة ، قولى كدة بقى... اخدتينى لحم وهترمينى عضم.. وانا شاب ساذج كنت فاكرك واخدنى عن حب.. إهىء إهىء

- لا لا، احنا كدة هنقرع وهتوسع منك.. ده انا واخداك 80 كيلو.. دلوقتى لما بتوزن نفسك، الميزان بيلف مرتين بخاف عليه من الانفجار.. ال اخدتك لحم ورميتك عضم ال

- يا ماما ده متربى على العز .. انتى ايش فهمك انتى.. أصلى قررت استثمره .. اهو ينفع فى اليوم الأسود

- هأ، ما يحكمشى

_________________

- مامى، مامى، (ماى فريند) فى المدرسة عاملى اكونت على النت

- على فين يا حبيبتى؟

- على النت يا مامى، اسمه ....، اسمه.....

- ماتقوليش الفيس بوك

- ايوووووة، هو ده.. صح

- حلاوتك، وجابلك ايميل منين؟

- عاملى يا مامى واحد بس مش فاكرة على ايه

- وماله!!!! وحطلك صورة يا روحى؟

- صورنى من كاميرة اللاب توب وحطها.. وقالى اقولك انه خلانى اعملك اد

- .................

- مامى، بيقولك اعملى اكسيبت

- إلا هو انتى بقيتى تعرفى تقرى؟

- إيه يا مامى انتى بتتريقى عليا!! ما انتى عارفة انى لسه صغيرة مش بعرف اقرا

- امممممممممم، لسه مابتقراش واتعملها اكونت وعملت لى اد.......... مايحكمشى

_______________

- مامى، أنا هطلع الشارع العب مع صحابى

- نعم ياختى.. الساعة 2 بليل ولا هو عشان احنا فى مصر بقى ف هيصة يعنى!!

- مامى، كل صحابى بيلعبوا برة فى الشارع.. هقعد انا فى البيت اعمل ايه؟

- بالنسبة ان الساعة 2 بليل ممكن ننام يعنى.. صح؟ فكرة برضه

- لا، انا مش عايزة انام.. عايزة العب

- اتفضلى حضرتك بس ياريت ما تتأخريش عن الفجر لحسن أقلق

- (بعد عشر دقايق جت تانى)

- مامى، هو انا ممكن احط (ليب ستيك وبرفيوم)؟

- نعم؟ مش واخدة بالى حضرتك؟؟

- هو انا ممكن احط (ليب ستيك وبرفيوم)؟

- اه وماله؟ هو سعادتك ماقلتيليش عندك كام سنة؟

- عندى اربعة ولما اخلصهم هبقى خمسة

- وعايزة تحطى ليب ستيك وبرفيوم!!!!! هى مرارة واحدة لو اتفقعت مش هتلاقينى.. مايحكمشى

_______________

- ماتيجى شات عايزاكى

- ادينى جيت اهو.. نحم؟

- تاكلى كنافة؟

- لا لسه ضاربة كشرى.. ها عايزة ايه؟ ارغى

- ننميلنا نمية كدة.. ماتقوليش انك توبتى وعايزة توردى ع جنة يعنى

- اطلاقا، هو اللى يعرفك يورد ع جنة ابدا

- انا قلت كدة برضه، اصل الواحد لو فضل ساكت كدة هيطق لازم يفش غليلوه شوية

- انسانة طول عمرك، فشى ياختى فشى

- فاكره الموضوع إياه؟

- انهى فيهم؟ مهى مواضيعك مابتخلص!!

- يا بنتشى الخناقة الآخرنية دى

- اه، مالها؟

- مش جه بقى بسلمته يجر شكلى بكلمتين على اساس انى هنسى العك اللى قاله اخر مرة.. بما إن الزهايمر عندى شغال ع ودنه.. واكلمه عاتى، بس هو فاكر ايه؟ ده لا منكن يحصل اباتا.. طلعت قرفى بقى فيه

- امممم، ومين اللى اتعور ف الاخر؟

- عيب عليكى يا بنتشى ده انا اللى يجي عليا مايكسبش.. والله ياختشى بقيت بخاف على اللى بغضب عليهم من كتر المصايب اللى بتحصلهم بعدها.. بس ده لا يمنع ان من جوايا، جوه قوى كدة اللى هى كدة حاجة ماتتشافش تلاقينى طيوبة وعثولة

- اااااااااااااه طبعا، ده الواحد لازم يتقى شرك.. انتى هتقوليلى.. طيبة ايه، وبراءة اييييه.. مش بقولك انسانة.. مايحكمشى

____________

- أنا نازلة؟

- رايحة فين؟

- خارجة

- ايوة، يعنى رايحة فين؟

- اروح ما اطرح ما اروح بقى.. هو انت شريكى!!! ده انت حايله جوزى

- امممم، هى بقيت كدة يعنى؟ طب معلش اعصرى ع نفسك شجرة ليمون وقوليلى

- لع، ماليش مزاج.. ياللا هش بقى عشان هتأخر

- لا يا شيخة، طب هتقولى رايحة فين ولا اقولك مفيش خروج.. هاااااااااا؟

- عندى ميعاد مع الكوافيرة الساعة 3 وربع، الساعة 4 هعمل شوبينج، 5 إلا دقيقتين هروح لمامتى، وعلى 6 ونص وخمسة هكون فى البيت حضرتك.. مايلزمش اى خدمات؟

- ايوة كدة، هتنسى نفسك ولا ايه؟ هع هع هع

- (فى سرها) هع هع؟ اللى يضحك ف الاخر يا عينيا.. ولا مكان من دول رايحاه.. فاكرين نفسكوا ايه!! ده احنا نلعبكوا ع السبع شناكل. مايحكمشى



رحاب المليحي