Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, January 07, 2012

انا مش داخل نت.. انا جدع


لما تبقى مخنوق، زهقان، متعصب، متمرد

احيانا اول قرار بتاخده انك تبعد عن النت
تروح قافل الفيس، الشات

* عذرا نرجوا المحاولة ف وقت لاحق

تاخد نفس عميق، وتقول ايوة كدة احسن، انا كدة مرتاح، الواحد محتاج ياخد فترة نقاهة
يعنى لو ماكنش فيه نت كان هيحصل ايه يعنى؟ ما كنت هعيش برضه
هاموت مثلا من غيره؟ ولا هتنقص منى حتة؟ نوهائى
ايوة كدة احسن، بلا وجع دماغ
انا كدة مرتاح اكتر بكتير

اول يوم: يعدى ف حاجات كنت مأجلها
تانى يوم: تنام بقى شوية تريح من اول يوم

مه انا عايش اهو، هىء
ايوة كدة، انا جدع
مش فاضل يعنى غير النت اللى يتحكم ف حياتى ويخلينى مش قادر اعيش من غيره، ليه يعنى كان من بقية اهلى؟!!!

تالت يوم: تبص للكمبيوتر بحسره وعينيك بتقوله: تصدق وحشتنى وتغرغر عينيك بالدموع

رابع يوم: (ده الجدع اللى يصمد للرابع)
يبدأ شوشو يلعب ف دماغك

لألأ، انا لسه صامد.. بس اصل، اصل، اصحابى بس وحشونى
اصل كتير منهم صحابى بس فيس ونت
ف حاسس انى بعدت قوى عنهم وعايز اطمن عليهم

طب هطمن بس عليهم واقفل

كمان مابقتش عارف اخبار اى حاجة، مهو انا لا بحب اتابع جرايد ولا قنواتنا الفضائية الفاشلة اللى بتحور الكلام ع مزاجها

بحب اكتر اتابع الرأى والرأى الاخر ع النت
وادخل كمان ف مناقشات مع الناس، بستفيد منهم احيانا كتير

يوووووووه بقى

هو انا ايه يعنى اللى جبرنى ع كدة؟
اه مش قادر اعيش من غير النت
اه الناس وحشتنى
اه حاسس انى ناقصنى حاجة وحاجة كبيرة

**** استيتس

اانا جيييييييييت، وحشتوووووونى :)


رحاب المليحي

Friday, January 06, 2012

شوبينج اون لاين

فيه موقعين مشهورين قوى ف بلاد الفرنجة تشترى اون لاين من عليهم

الأول: eBay.com
______

الموقع ده بيبيع من الإبرة للصاروخ.. أى حاجة وكل حاجة تلاقيها عليه
فيه منها الجديد وفى منها المستخدم


طريقة التعامل عليه عبارة عن (بيدينج) أو مزاد

بمعنى انك لو عايز تبيع (لاب توب) مستعمل عليه
بتخلى السعر يبدأ من الصفر.. وتحدد كام يوم هيتعمل فيه المزاد.. وتحدد كمان الساعة اللى هينتهى فيها المزاد

ف تبدأ الناس تدخل تزود ف السعر.. وعادة بيستنوا لاخر لحظة ويزودوا.. بحيث انه مايكنش غالى قوى ف الاخر

يعنى لو متحدد 3 ايام وينتهى المزاد عليه الساعة 6 م
تبدأ بقى الناس تزود السعر من 6 الا ربع لحد 6 بالدقيقة

ويقفل المزاد واخر واحد زود السعر هو اللى مبروك عليه اشتراه

احيانا بقى صاحب اللاب توب يلاقى وقت المزاد قرب يخلص.. والسعر اللى وصل له اللاب مش عاجبه.. يُزق اصحابه انهم يدخلوا يزودوا السعر شوية
بس لو انتهى المزاد ولبسه حد من صحابه يبقى (فلوسه حلال) بقى واشترى حاجته تانى

وقتها بيتعمل زى فيلم كدة، انه اللى وقع عليه المزاد يقول لا خلاص مش عايزه
وصاحب اللاب توب يقول اوك ويبدأ يزايد عليه من جديد

بس لو حصل الموضوع ده كذا مرة من نفس الاشخاص.. بتبان انها لعبة وبيقفلولهم حسابهم ع الموقع شوية.. لا يبيع ولا يشترى كنوع من شد الودان

اما لو المزاد عدى ع خير وسلام.. لازم يبعتلك الفلوس الاول قبل ما تبعت له اللاب،
ولو ماعجبكش اللاب بتتطلب منه فلوسك.. وترجع له حاجته ويا ضار مادخلك شر

لكن لو لعب معاك الدنيئة ومارضاش.. بتبعت بقى للموقع نفسه وهو اللى بيتعامل
*************

التانى: gumtree
________

برضه الموقع ده بيكون عليه كل حاجة.. حتى العربيات وفرص العمل تلاقيهم عارضينها عليه


بس طريقة الشراء بتكون انك تشوف الحاجة وصورتها سواء جديدة او مستخدمة.. والشراء بيكون مش ع النت.. لأ، لازم تروح مكان ما هى موجودة تاخدها

وصاحبها بيكون سايب نمرة تليفونه او ايميله.. تتواصلوا بقى مع بعض.. وتتفقوا ع ميعاد تتقابلوا.. طبعا مع مبدأ اللى سبق اكل النبأ
بمعنى لو واحد راح دقيقة قبلك وعاجبته الحاجة يبقى بخ خلاص مش من نصيبك

اما لو لاقيتها وعجبتك بس حسيت انها غالية تتناقش مع صاحبها انكوا تنزلوا ف سعرها.. لو اتفقتوا انتوا الاتنين يبقى مبروك ع الشارى والبايع
رحاب المليحي

Tuesday, January 03, 2012

انتمة اه، انتمة لأ


لما تسأل حد ايه رأيك ف الأنتمة ما بين الولد والبنت؟ بتؤمن بيها ولا لأ؟
أول رد تلقائى ومن غير تفكير تلاقيه بيسألك:
أنتمة ارتباط ولا صداقة؟!

هى الأنتمة بقيت تُعبر عن (الارتباط) من امتى؟
ماكنتش على ايامى الكلام ده
ما علينا

هتلاقى نوعين من التفكير لا يمتوا لبعض بصلة

التفكير الأول** ( رأى آيا منهم: ولد أو بنت)

- اه طبعا مؤمن بيها جدا.. لازم يكون ف حياتى صديقة وتكون غير كل بقية البنات اللى فى حياتى.. ماكدبش عليك احيانا ممكن الصداقة تقلب بحب وف الاخر ممكن نخسر بعض خالص

- لكن ده مش قانون متعارف عليه يعنى.. كتير جدا الصداقة بتستمر.. وبالعكس ممكن البنت تكون أقرب لى من انتيمى الولد

- احيانا بتفهمنى من غير ما اتكلم.. وبنكون فعلا اخوات واصدقاء وبنخاف على بعض.. اخوات بمعنى الكلمة مش مجرد عنوان لحاجات بتحصل غلط بينا

- بتكون صداقة مبنية ع الاحترام والتفاهم.. حتى الغيرة فيها مسموحة.. لإنها غيرة معزة وخوف ع الطرف التانى.. مش غيرة خنقة وحب، وارتباط، وجواز، وكوشة.. ومانجيلكش ف حاجة وحشة يا معلم

- بتكون أنتمة تحمل مشاعر جميلة لطرفين بيكملوا بعض.. لكن مش عايزين من ورا معزتهم لبعض لا مصلحة ولا ارتباط

- اسرارهم مع بعض.. ومصايبهم كمان مع بعض

- بس احيانا لما كل طرف منهم بيرتبط رسمى. تلاقى الخطيب أو الخطيبة بيغيروا من كونهم (انتيم)

- العريس يقول: مارضاش يكون لمراتى انتيم.. ع اساس انى كيس جوافة يعنى؟

- والعروسة تقول: طالما انا دخلت حياتك يبقى محتاج انتيمة ف ايه؟ متهيألى انا أولى بأسرارك.. ولا ناوى تحكيلها بقى حاجات مش هتحكيهالى؟ ولا يكونش ناوى تشتكيلها منى لما اضايقك؟ هاااااااه ؟

- هما عيلة ف بعضيهم بقى ودى مشاكلهم يحلوها مع بعض.. بلا وجع دماغ
**************

التفكير التانى** (رأى الولد أو البنت)

- انتمة؟ انتمة؟

- هو فيه انتمة ما بين ولد والبنت؟ تفى من بقك

- دى كلها افتكاسات ابدوعها الشباب عشان يحللوا اللى بيعملوه

- طبعا حرام.. يعنى ايه يكون ليا انتيم ولد؟ مالهم البنات يعنى؟ خلصوا ولا خلصوا؟

- احنا اتولدنا وكبرنا على العيب والحرام.. ومفيش حاجة اصلا اسمها صداقة ما بين الولد والبنت.. ده فُجر

- ده لو ولد طلب منى كشكول المحاضرات بتكسف وبقول يا ارض ابلعينى.. ما عنده ياختى صحابه الصيع.. وانا مالى كان من بقية اهلى.. اللى اختشوا ماتوا صحيح

- لا لا لا، انتمة؟ يا حوستى... انتى عايزة اهلى يقطعونى حتت ولا ايه؟

- اللى يكتب عليا رسمى هو ده اللى يبقى جوزى وصديقى وانتيمى.. غير كدة يبقى لا يجي جانبى ولا لسانه يجى ع لسانى

- حتى زمالة الشغل الواحد.. لازم تبقى محسورة على صباح الخير يا جارى انت ف حالك وانا ف حالى.. وكبيرنا كلام ف الشغل.. لكن مرقعة البنات بتاعة اليومين دول بقى بحجة انهم زمايل ف الشغل.. دى قلة ادب وقلة تربية..

- اهالينا ربونا ع ان ده حرام.. يبقى ده حرام ومايصحش من غير تفكير

- ال انتمة ال؟

رحاب المليحي

Sunday, January 01, 2012

ليلة لا تنسى.. النيو يير

كل سنة اتفرج ع النيو يير ف التلفزيون بحسرة كدة
وابقى متحسرة ومتفرتكة زعل انى مش ف الشارع ف ليلة السُكر والعربدة

السنة دى بقى طقت ف دماغنا ف لحظة اللا وعى.. اننا ننزل نتفرج على الــ (فير وركس) ف وسط البلد الساعة 12 عند
(London Eye)


** اللى مش عارف الفير وركس:: دى عبارة عن الفراقيع الالوانات اللى بتتعمل فى السما لما مصر بتكسب ف الماتشات **
وهى ف لندن لا تتعدى الربع ساعة.. لكن بتكون أمم واقفة تتفرج

وقررنا النزول فعلا بدون أى ضغوط خارجية.. وبرغم اننا بدأنا المشوار قبلها بساعتين وبالمواصلات طبعا.. عشان كانوا مقفلين المنطقة كلها اللى حولين المكان.. الا ان كانت الدنيا زحمة جدا برضه

وعشان نوصل للمكان اللى هيتعمل فيه الفير وركس اخدنا بتاع ساعة مشى..
ولازم نركز اننا كان معانا اطفال مسهرينهم للوقت المتأخر ده، عشان يتفرجوا ع فراقيع النيو يير

ياللا كله يهون عشان اول ليلة فى السنة الجديدة تبقى مختلفة

وصلنا قريب من المكان.. لاقينا اننا كل ما هنقرب اكتر كل ما هنتسحل ف الزحمة اكتر.. ف مراعاة لكرامتنا والطُفيليات اللى معانا قررنا نقف ع مسافة بعيدة.. واهو كله بيتفرقع ف الجو وكله هيشوف، بيس يعنى..
المهم اللمة يا ولاد.. ونقضى ربع ساعة حوه

بدأت الناس تتوافد وكله يجي قدامنا ويقف.. أو يزنق نفسه ف وسطنا ويقف.. وكان معانا عربية بيبى مش باينة طبعا بالنسبة لهم.. وكل واحد اساسا ماشيله بالازازة..
وحتى اللى ف وعيهم بياخدوا بالهم، بس بعد ما يكونوا هيتكفوا ع وشهم من الكعبلة ف عربية البيبى

هييييه، بقى بدأت الفير وركس، الاطفال الحمدلله مش شايفين غير رُكب الناس.. وعشان احنا بعيد شوية حلوين ف ماكنتش واو قوى

وعشان الليلة تكمل بقى كان فيه ضباب لفترة كدة.. ع اساس ان الربع ساعة مدة كبير طبعا تتحمل ان يجي ضباب يضيع شوية من الالوانات اللى بتتفرقع ف السما.. اللى احنا برضه مش شايفنها للدرجة اصلا

كل ده مش مهم..
خلاص خلصت الربع ساعة وهابى نيو يير وفرقعوا ازازيز الشمبانيا
وكان لا يقل عن 400 الف واحد حولين المكان بيتفرجوا..

ايه بقى الخطوة اللى جاية؟؟
اننا نروح ان شاء الله بيوتنا.. هأ، وهذه كانت اللحظة الحاسمة التى لا تُنسى
الناس ماشية ف اتجاهين قدام بعض، ناس عايزة تمشى يمين وناس شمال
ده غير طبعا السكرانين اللى ماشيين يتراقصوا وماشين بالعرض لوحدهم

تقريبا محدش بيتحرك من مكانه ولا حتى قوة الدفع نافعه من شدة الزحمة.. انا ماسكة بنتى ف ايدى متبتة عليها واكاد أُجزم انى مش عارفة الف راسى ابص عليها من كتر الزحمة.. وانا عارفة انها متداسة بين الرجلين بس مش شايفها

والبيبى اللى كانت معانا ف عربيتها كانت بترقع بالصوت، من الخضة وانها مش عارفة تتنفس من الزحمة.. وتقريبا الناس كلها بتتزق عليها ومش عارفين يعملوا حاجة

جينا بالذوق نقول لواحدة سكرانة ماسكة الازازة: حسبى معانا بيبى.. قالت: لا مفيش مكان.. وقعدت ترقص

لاقينا بقى ان الذوق مش هينفع مع العالم دى.. ف اتعصبنا كلنا ودخلنا فيها لابسنها الازازة كلها ع هدومها، وبقينا نزق بكل عزمنا واللى يقع يقع، واللى يسب ويشتم.....براحته، مش فارقة

المهم نعدى ايكش يولعوا كلهم ف ستين داهية

فضلنا كدة شاغلين ضرب بالكوع وزق ف البشر لحد ما وصلنا عند بوابة، البوليس قافلها وواقفين وراها.. قلنا ناخد بريك بقى شوية بعد المعركة.. دى اللى حسيت للحظة انى ف التحرير

وبعدين نكمل، تكون الدنيا هديت شوية عشان نطلع من الكابوس المميت ده ونروح

قعدوا بقى الناس يخبطوا ع البوابة ويشتموا ويتسلقوها عشان يعدوها.. لإن وراها ع طول محطة المترو..

بس عشان المترو مايقدرش يستوعب الاعداد الخيالية دى.. ف قفلنها عشان الناس تتمشى مش تركب

المهم ف الاخر هجموا ع البوابة فتحوها، والبوليس جه جرى يتصل ببعضه عشان يزودوا عددهم يمنعوا الناس اللى ماعدتش انها ماتعديش

كنا احنا بقى عدينا وشخطنا ف البوليس عشان معانا اطفال وهنعدى يعنى هنعدى

وكانت لسه بقى هتقوم خناقة ما بين اتنين هنود وهيكسروا ازازير ع بعض.. خدنا ديلنا ف اسناننا ونطنا ف المترو،

وصلنا الحمدلله سالمين بيوتنا.. نسب ونلعن ف دى تجربة ونحلف ما هنكرارها تانى

وهابى نيو يير بقى :)


رحاب المليحي