Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, November 15, 2016

فيه ناس الغربه كسراها

** فيه ناس الغربه كسراها وناس الغربه كارهاها وناس مضطره ف بتبعد وشايله وطنها جواها **

الكوبليه ده من أغنية اصاله قد ايه بيوجع مش بس ع سوريا لايق ع كل المغتربين.. ناس كتير هترد تقولك ما احنا غرباء جوه بلادنا.. احترم احساسكوا ومش هسخر أو أستهين بيه.. 


لكن لو بصينا للنص المليان من الكوبايه هنلاقى انك يوم ما تُقع سواء مرض أو حزن هتلاقى اللى يسندك هتلاقى اللى يتصل بك يواسيك.. هتلاقى أهل وأصحاب بيوقفوا جانبك وف ضهرك ويسندوك.. مش هتحس انك لوحدك هتلاقى اللى قلبه عليك ويسمعك وتفضفض له.. 

حتى لو مش هيقدر يساعدك بس ع الاقل هيسمعك، 
هتخرج اللى جواك ومش هتحتاج تزوق الكلام لإنه منك وهيفهمك.. هتقعد معاه وجها لوجه تكلمه.. مش هتكلمه سكايب ولا واتس واب وحزنك يبقى مجرد ايموشن حزين أو قلب مكسور..

هتحس بالدفا وسط عيلتك ولادك هيكبروا وسطهم.. مش تبعت لهم صور بمراحلهم العمريه طول السنه عشان لما تنزل أجازة مايتفاجأوش انهم كبروا فجأه 


لو يوم تعبتى هتعرفى تروحي لدكتور اى وقت.. اه هتدفعى لكن هتشترى بالفلوس راحتك وهتحجزى ميعاد ف القريب.. مش ميعاد بعدها بشهرين تكوني موتى خلاص.. 



ولو حاجة عويصه ومعرفوش يشخصوها هيقولولك لا انتى تمام زى الفل أو يشخصوها غلط ويلبسوكى ف حيطه.. 



ف لما تحتارى وتسود الدنيا ف وشك تبعتى لدكاترة مصر يشخصولك الحاله وف لحظة هيشخصوها وصح لكن برضه مهما شخصوا ومهما كاتبولك ع ادويه مش هينفع تصرفيها غير عن طريق البقر اللى عندك ف غربتك لإن كلها لازم تتصرف بروشتات ولازم الدكاترة اللى عندك هما اللى يشخصوا وهما اللى يحولوكى ع متخصصين وموت يا حمار واستنى بقى دورك بالشهرين والتلاته 



صحاب الغربه مهما كانوا كويسين ومهما كنتى بتحبيهم بيكونوا غير صحاب سنين عمرك اللى كبرتى معاهم وعارفينك من صغرك ومرت عليكوا حكايات وحكايات.. 



اللى هما مهما فاتت سنين مشوفتيهمش اول ما تتقابلوا مابيكنش فيه لا عتاب ولا نكد.. بتكونوا زى اللى كانوا مع بعض امبارح هزار وضحك من القلب اللى بيطول العمر ده.. بيوقف بيكوا الزمن وبترجعوا لايام زمان تحكوا وتفتكروا مغامرتكم وانتوا لسه صغيرين 



دفا بيت الاسرة بيت العيله غير اى دفا ممكن تحسيه.. احساسك انك وسط اهلك ده بيساوي كتير اللى عايشين فيه مش هيحسوه زى المتغربين عنه.. 



ماينفعش ف غربتك يوم تتعبي وتوقعى من طولك انتى العمود الفقرى للبيت حتى لو ليوم هيحصل خلل ف نظام البيت.. لكن ف بلدك وسط اهلك هتلاقى اللى يشيل عنك ولادك ويجيب لك اكلك لحد سريرك



لو الغربه بالنسبالكوا انكوا تعيشوا ف مكان نضيف وتخرجوا من بلدكوا وبس.. هتدفعوا قدام كدة كتير اوى ، ضريبة الغربة مايُستهنش بيها.. بتكسر البنى ادم من جواه مهما باين عكس ده.. بتخليه متقوقع جوه نفسه مهما كان حوليه ناس.. 



هتبقى ع اعصابك مع اى تليفون يرن من بلدك حاطيط ايدك ع قلبك ليكون حد عزيز عليك توفاه الله من غير ما تلحق تسلم عليه.. 



الغربه مهما كانت حلوة ف شكلها من بره هى كسرة نفس ووجع 


قلب كتير من جواها مايحسش بيها غير اللى داقها.. 

رحاب المليــــحي


Monday, October 03, 2016

الأروبه نقمه ولا نعمه؟

** أختلف مفهوم كلمة (أروبة) ما بين الناس.. فى ناس شايفها انها حاجة مش حلوة وناس شايفاها ميزة

هطرح الفكرتين من خلال حوار بنتين

·        أ : بُحكم أن أهلى متوفين وعايشه لوحدى كان لازم عليا انى اعمل كل حاجة بنفسى.. ماستناش حد يعمل لى.. محدش فاضى لحد حتى لو عيلتى.. بطبيعة الحال كل واحد عنده مشغله ومسئولياته وبيته وعياله.. بس ف نفس الوقت لما حد يقولى يا أروبه بتضايق بحس انها مش كلمه حلوة.. بحسها اللى هو اه ما انتى دايسه ف كل مكان وتعرفى تجيبي أرار الحاجة

·        ب: انا بقى عكسك انا شايفه انى لو كنت كدة كنت هبقى مبسوطه.. فكرة انك ماتبقيش محتاجة لحد ولا متعشمه ف حد ولا تذلى نفسك لحد عشان يعملك حاجة انتى مش عارفه تعمليها لنفسك دى نعمه كبيرة جدا.. وزى ما قولتى محدش فاضى لحد.. انا بقى بحس كتير انى مبعرفش اتصرف.. بحس احيانا بالسذاجه والعبط وانى كتير لازم اعتمد ع حد يتصرف بالنيابه عني ويفكر لى ف حل

·        أ: بس يعني مش أتحسد ع الحاجة الوحيده اللى انا فالحه فيها مش اسلوب يعني.. مابقاش بحاول اساعد الناس ولو حد طلب حاجة منى أقوله يعمل ايه.. وف الاخر يتقالى لا برافو عليكي طلعتي أروبه.. ايه الأروبه اللى فيها يعني؟ أنى بساعدك؟ أنى بُحكم انى عايشه بطولى بعرف اتصرف، ف بقولك تعمل ايه؟ يعني اسكت ابطل اساعد الناس ؟؟

·        ب: انتى ليه مأفورة؟ ليه واخداها بحساسيه؟ يكفيكي فخرا إن محدش بيلجأ لك وتخذليه.. يكفيكي فخرا ان الناس يوم ما يتزنقوا عارفين هيسألوا مين ومتاكدين ان المعلومات اللى هتديهالهم.. وانك حتى لو متعرفيش هتسألي مش هتقولى معرفش وتنفضى.. دى ميزة مش موجوده عند ناس كتير.. كله بقى بيقول يالا نفسى محدش فايق يساعد حد.. ده الناس تبقى عارفه المعلومه وتخليها لنفسها وماترضاش تساعد بيها غيرها.. يسموكى اروبه يسموكى عفريته المهم النتيجه مش المُسمى

·        أ: الحمدلله ده فضل ونعمه من رب العالمين بس انا مش قوية زى ما انا مبينه.. كتير من جوايا بكون ضعيفه ومحتاجه اللى يشد من اذري بس مبقولش.. ساعات بحتاج الإيد الحنينه اللى تطبطب عليا وتسمعني حتى لو انا عارفه هعمل ايه بس محتاجه احس ان في حد مهتم بيا  زى ما انا بعمل مع الناس.. ما انا ف الاول والاخر حتى لو أروبه أنا بنى أدمه ونفسى ف حد يراعينى ف وقت شدتى حتى لو مابينتش ده

·        ب: طبعا، كلنا ف الأخر مهما كنا بنبان أقوياء ف بتيجي علينا أوقات ضعف كتير بنحتاج اللى يحتوينا.. بس برضه هرجع واقولك العشم وحش.. الأفضل انك ماتستنيش حاجة من حد.. جه لوحده وحس بيكي خير وبركه ماجاش أديكي عارفه طريقك وعارفه هتتصرفى ازاى وهتعملى ايه وليكي الله اللى تدعيله وتشتكي له همك..

رحاب المليــــحي 




Tuesday, May 03, 2016

حالتك النفسيه

الحاله النفسيه لها عامل كبير اوي وبتأثر تأثير كبير علينا سواء بالآيجاب أو بالسلب
يعني لو كنت مبسوط هتشوف كل حاجة حلوة وهتحس ناس كتير وحشاك ولك مزاج ترغي وتهزر للصبح
بعكس لو كنت متضايق هتبقى مش طايق نفسك ولا طايق حد يجي جانبك ولا يهزر معاك وأي كلمه مهما كانت هايفه هتقفش عليها
زى لما تبقى عارف ان بكرة صيام هتصحى نفسيا متأقلم انك مش هتاكل مدي اشارات لدماغك انك صايم..
عكس لو صاحي عارف ان النهاردة العيد هتلاقي نفسك واقع من الجوع ونفسك مفتوحه للأكل
حالتنا النفسيه هى اللي بتتحكم فينا بشكل أو بأخر واللي المخ عارفه هو اللي العين بتشوفه حتى لو مش صح..
يعني لو داخل تعمل عمليه وحد جربها ونقلك تجربته دى وكانت كلها أوجاع..
حتى لو العمليه سهله هتبقى داخل ف دماغك انك هتشوف الويل.. وقبل حتى ما تتشك بالإبره هتبقى بتنط من مكانك خايف ومأفور..
ده عشان انت مأقلم نفسك انها صعبه وانك هتتوجع ع حسب ما سمعت وع حسب ما مخك استوعب
لو حد كلمك كتير عن واحد صاحبه قد ايه هو بنى ادم كويس ومحترم والناس كلها بتحبه.. يوم ما تقابله هتلاقي نفسك حابه من قبل ما تعرفه من كتر كلام صاحبك عليه.. حكمت عليه انه كويس؛
والعكس صحيح
مدى اقتناعك بالحاجة وتأثر حالتك النفسيه بها هو اللي بيحركك دايما

رحاب المليـــحي

Monday, April 11, 2016

الكلمه الحلوة بتفرق

لما يبقى حولينا ناس بتحبنا وبتحاول تبسطنا ولو بحاجات بسيطه واحنا مبنفكرش حتى نقولهم شكرا؛ يبقى ده مايرضيش ربنا

لما تلاقي اللي يسمعك ف عز حزنك ويشاركك ويحاول يساعدك ولو حتى بالكلام مش بالفعل وماتقدروش؛ يبقى حرام عليك

لما حد متتوقعوش ف مناسبه تخصك يجيب لك هديه أو يفتكرك ولو بكلمة حلوة وانت ماتردهاش؛ يبقى خسارة فيك

لما حد ف عز همومه يفرح لفرحك من قلبه ويرمي ورا ضهره أحزانه عشان مايضيكش ويوم ما يحتاج لك يلاقيك مشغول عنه؛ يبقى ماتستهلوش

لما يكون ف حياتك حد كل افعاله معاك حلوة ويوم ما يغلط ف حقك سواء قاصد أو لأ تعاتبه وتجرحه وتنسى ان رصيده عندك يسمح؛ يبقى خسارة فيك

احنا بطبيعة الحال لما بنتعود ع حاجة وتبقى موجودة ف حياتنا دايما بننسى انها نعمه وممكن تزول ف لحظة.. 

بننسى ان اللي مفرحنا ومقدرنا.. ممكن نصحى الصبح مانلقيهوش موجود معانا ف الدنيا

بننسى ان اللي بيعمل معانا مواقف جدعنه كتير ويوم ما يغلط ونمسك ف الغلط ونسيب الحلو هيبطل يعمل اى حاجة كويسه تاني 

قدر اللي قدامك حس بحب الناس ليك.. قول للي بيعمل حاجة حلوة انه بيعمل حاجة حلوة.. ماتتخيلش رد فعله وسعادته بكلامك هتبقى عامله ازاي.. 

احنا ف وسط زحمة الحياة نسينا ان الكلمه الحلوة صدقه وان اللي حولينا محتاجينها عشان نشد من أزرهم ونخليهم يكملوا صعوبات وضغوط الحياه

ماتستهونش بالكلمه الحلوة.. انت متعرفش تأثيرها الايجابي ع اللي قدامك هتبقى عامله ازاي..

 احيانا بتكون بارقة أمل بمقام رساله ليهم من عند ربنا بيقولهم انتوا ماشين صح كملوا الطريق للاخر


طلع الحلو اللي جواك للي يستاهله قبل ما يفوت الاوان 

رحاب المليــــحي

Sunday, April 10, 2016

* كل لقطه ف حياتنا وراها قصه


** الحياة ايه غير شوية صور فوق بعضها**

احيانا بنقول الجمله دى من باب التهريج.. بس احنا لو فكرنا فيها هنلاقيها حقيقه فعلا وهنلاقي ان كل صورة ف البوم حياتنا وراها قصه

يعني لما نكون ف خروجه مع الأصحاب أو سفرية ونتصور.. نلاقي الصورة بتشع بهجه وفرحه وانبساط وايجابيه غير عاديه

بعدها بفترة لو اتفرجنا ع صورنا هنلاقينا بدون ما نحس بنبتسم.. بنفتكر اللحظة اللي وقف عندها الزمن واخدنا فيها اللقطه دى وقد ايه كنا مبسوطين ساعتها

لكن فيه صور تانيه لما بنشوفها بتفكرنا بناس راحت من حياتنا وسابت لنا بس اللقطه اللي توجع قلوبنا وتخلينا بدون ما نحس ندمع من وجع الفراق

وفيه نوع تاني من الصور بتكون عبارة عن طاقه سلبيه وبنحاول نخرجها عن طريق لقطه تبين عكس اللي جوانا..

يعني نبقى من جوانا مكسورين ومخنوقين بس نتصور واحنا بنمثل الانبساط.. يمكن ده يخرجنا من المود اللي احنا فيه ولو خروج وقتي

لكل صورة الف معنى.. متحسدوش الناس ع صورهم وهما بيضحكوا.. ومتحكمش عليه انه مقضيها وحياته كلها سعاده وفرح.. ممكن يكون اتعس واحد ف الدنيا ومعندوش غير شوية صور يعيش ع ذكراهم 

رحاب المليحي


Wednesday, April 06, 2016

ليه الطفل جوه مختلف عن طفل بره؟

دايما بنقول ان ولادنا بيتولدوا أذكياء بس مع الوقت بيتحولوا ونسبة ذكاءهم بتقل
من رأيي ده يرجع لكمية الوجبات الهولاميه اللى بيخدوها ف المدراس اللى بتكرهم حتى انهم 
يروحوا المدرسه

يعنى انا اللى افتكره عن المدرسه الشنطه التقيله اللى بتقطم الضهر ولازم كل يوم بليل اقعد اراجع جدول السبع حصص اللى هيكون عندى تانى يوم عشان مانساش الكتاب بتاع المادة لحسن المُدرس يطين عشتي

وقبل الامتحانات لازم احفظ حاجات قد كدة.. مجرد أصُم مش مهم أفهم.. المهم انى ادخل الامتحان أصب كل اللى حفظته ع ورقة الاسئله عشان اجيب درجة كويسه ف الاخر

حتى ف الجامعه برغم انها كانت عملية مش نظريه بس كانت جامعه خاصه.. كانوا احيانا بيدونا قبل الامتحان حاجات نحفظها عشان نسمعها ف ورقة الاسئله.. ونتيجة الدكتور متطلعش زى وشه ف الاخر
لكن أول ما نخرج من الامتحان ولا بنكون فاكرين أي حاجة من اللى ذكرناه.. بنرميه ورا ضهرنا ونحاول 
نعمله ديليت من دماغنا استعدادا لصم المادة اللى بعدها

وف الاخر يقولك ارمي بقى كل اللى اتعلمته ورا ضهرك عشان الحياة العمليه مختلفه تماما عن اللى انت ذاكرته طول سنين دراستك.. ما طبيعى نكره المدرسه ع التعليم ع اللى عايز يتعلم

ف دول اوروبا بقى بيعتمدوا ع الفهم مش الحفظ.. بيركزوا كمان ع منطقة الابداع اللى جوه كل طفل.. بيشوفوا هو موهوب ف ايه وينموا الموهبه أو يلفتوا نظر الأهل لموهبة ابنهم عشان يشتغلوا عليها

شنطة المدرسة مفيهاش غير كراسه وكتاب وقلم.. القرايه عندهم شىء اساسي من قبل حتى ما يتعلموا يقروا.. من اول ما يدخلوا حضانه لازم كل يوم يروحوا البيت معاهم كتاب والاب أو الام يقروه معاهم ويمضوا ف الكراسه بتاريخ اليوم انهم قروا مع طفلهم الكتاب الفلاني..

مع الوقت بيحب الطفل القرايه.. ولما يكبروا شوية المدرسة بتاخد كل فصل المكتبه يقعدوا فيها حصه كامله ويقروا اللى هما عايزينوا.. وبعدين يستعيروا كتاب ويحافظوا عليه لحد ما يرجعوه تانى المكتبه

الواجب بياخدوه بس يوم الجمعه عشان يعملوه ف الويك اند سبت واحد.. احيانا بيكون عن معلومات عامه لازم يعملوا سيرش ع جوجل عشان يعرفوها ويكتبوها كحل للواجب

اما عن الامتحانات ف بتكون بس لمعرفة مستوي الطالب مش فكرة نجاح وسقوط ومفيش ان اللى يسقط ميطلعش السنة اللى بعدها..

جوه الفصل مقسيمنهم مجموعات.. كل مجموعه ع حسب مستوي الطفل الفكرى.. يعنى الشُطار ف مجموعه مع بعض.. اللى اقل ف نسبة الاستيعاب ف مجموعه تانيه

والامتحان يحددوا بيه مستوى الطفل ف اللى مثلا مستواه بقى أعلى من الاول ينقلوه ع المجموعه اللى أحسن من اللى كان فيها وهكذا..

بيحببوا الاطفال ف المدرسة، بيعملولهم رحلات علميه ورحلات ترفيهيه بتكون بمبالغ رمزيه واحيانا ببلاش..

وساعات بياخدوا الطلبه ف الجنينه اللى جنب المدرسه وكل واحد معاه ورقه وقلم يحاول يرسم اللى هو شايفه ف الجنينه ويكلموهم اكتر عن الطبيعه

بعد اليوم الدراسي بيكون فيه club مدته ساعه الا ربع ف الطبيخ أو كرة سلة أو خياطه.. والطفل اللى clubحابب حاجه منهم بيدفع مبلغ رمزى ويدخل ف ال 
اللى عاجبه

بيخلوهم يعملوا حاجات بإيديهم كمسابقه واللى يكسب له هديه.. يعنى زى مثلا يوم لمشاهير الكرتون يلبسوا الشخصيه اللى يحبوها بس يعملوها من بواقى الحاجات اللى ف البيت عندهم مش يشتروا الهدوم جاهزه

فيه حفلات زى حفلة الكريسمس اللى يغني واللى يمثل واللى يعزف وبيدربوهم فترة طويله ع دورهم عشان ف يوم الحفلة الاهالى كلها تروح تتفرج وتفتخر بوقفة ولادها ع المسرح

ف نهاية كل تيرم بيقابلوا الاهالى كل أهل طفل لوحده ومُدرس الفصل بيشرح لأهل الطفل مستواه كان فين وبقى فين وعايزه يوصل لفين.. ولو فيه أى ملحوظات الاهل حابين يقولوها للمُدرس بيسمعهم بصدر رحب حتى لو نقض عشان ف النهاية المهم هو مصلحة الطفل

متهيألي كدة عرفنا ليه طفل بره مختلف عن طفل جوة.. ومالهاش علاقه بكونه طفل مصرى أو أوروبي ليها علاقة بالبلد نفسها وتفكيرها ومناهجها..

رحاب المليــــحي

Monday, April 04, 2016

ويبقى الأب أحب للبنت من الزوج

ف ايام المدرسه كنت بستنى بابا وهو جى بليل من الشغل وجايب لي معاه كيس مليان حاجات حلوة شيكولاتات ع مصاصات.. واقعد اذاكر وانا بمزمز فيهم
واستناه ف البلكونه كل يوم جمعه وهو راجع من الصلاه وجايب لي معاه ميكي عدد الاسبوع والمفاجأه لما الاقيه داخل عليا بمجلد ميكي
ولحد ما بقيت ف الجامعه كان برضه يعدي ع بتاع الجرايد ويجبهالي ويقولي يا حبيبتي بقيت اتكسف اجيبها مابقاش عندنا اطفال..

وف كل عيد ميلاد اشترط عليه يجيب لي دهب وف سنة من السنين جاب لي طقم دهب كامل قالي جيبنا الشبكه فاضل العريس.. كان ردي عليه ان العرسان بتيجي وتروح المهم النفس
وكنت كل ما اطلب منه حاجه يتعصب ويشتكى لمامتى ان طالباتي مابتخلص.. وبعدها الاقيه جايب لي اللي انا عايزاه
وماما تقولي اهو انا مش باخد غير العصبيه وف الاخر تاخدي اللي انتى عايزاه
كنت دايما شايفه نفسي دلوعة بابا وع الحجر وطلباتي أوامر
أما بقى بعد الجواز ف لنا هنا وقفه..
وقت الشبكه قالي معلش هتبقى حاجة صغيرة دلؤقتي لكن بعد كدة هجيب لك حاجة اكبر.. بقالي 12 سنة متجوزة ماشفتش دهب تاني..
قعد يقولي كل ويك اند هسافرك مكان جديد هنلف العالم.. لو خرجنا من البيت ف الويك اند بالعيال طبعا، يبقى كتر خير الدنيا
لما اشترى حاجة جديدة وأسأله عن رأيه فيها يسألني الأول دى بفلوسي ولا فلوسك؟
لو قلت بفلوسي تبقى حلوة وتحفه وتجنن ومش فارق معاه يعرف سعرها
كل عيد ميلاد لازم احذر واتوعد انه لو نسيه وماجبش هدية هيتنكد عليه.. والأضمن انى بختار هديتي بنفسي بدل ما يجيب لي حاجة مش ع ذوقي
أما عيد الجواز ف دى حاجة مش معترف بيها ف قاموسه اساسا لو افتكره يبقى خير وبركه
كل واحدة بتحلم تتجوز واحد زى ابوها يدلعها وتبقى بالنسباله الدنيا وما فيها.. بس حتى لو لاقيته المشاكل والمسئوليات وضغوط الحياه بتخليه غصبا عنه بينسى التفاصيل الصغيره اللي بتفرحها.. لأنه طول الوقت بيلف ف ساقيه
حتى هى كمان المسئوليات بتكبرها ومابتبقاش اي حاجة بتفرحها زى زمان..

س الأكيد ان لو ابوها دخل عليها بكيس الحاجات الحلوة ومجلد ميكي هتطير من السعاده

رحاب المليــــحي

Thursday, March 31, 2016

ارحموا جيبي اللي جنب قلبي


** اجيب منين؟ أأقطع من جلدي واديكوا؟ **
البق اللي بنسمعوا دايما من أي راجل لما مراته تتطلب منه فلوس..
 بس صاحبتنا بقى دخلت له من الحتة اللي مابيقدرش يقاومها
هى : حبيبي، عايزة فلوس عشان .....
هو: هو انتي مش لسه واخده منى مصروف البيت من اسبوع؟
هى: مش تستنى أكمل.. اصلي كنت بفكر ابسطك ازاي! ف قلت مفيش غير انى اعملك أكله كدة ترُم بيها عضمك وتملى بيها كرشك
هو: كرشي؟ أنا حتى سمبتيك خالص.. فين الكرش ده؟
هى: هه؟ حاسب تشفط أكتر من كدة لتقطع النفس.. المهم تحب تاكل ايه بقى؟
هو: أنا قررت أعمل دايت، وماكلش أنا والعيال لمدة أسبوع عشان ننهض بصحتنا.. ارحميني بقى.. جيبي اللي جنب قلبي برد ووجعني
هى: تحب تاكل لحم استيك مع بطاطس محمرة مع .....
هو: بسسس جوعتيني.. آمنت بالله.. بتعرفي ازاي تتطلعي القرش من جيب الأسد

تاني يوم كان شامم  ريحة الأكل واصله للشارع
 أكل وهو مبسوط وملى بطنه ونسي حتى يسألها صرفت كام
 مفيش 4 ساعات جات له رعشه وحرارة ومعدته قلبت وراح المستشفى.. وطلع عنده تسمم

هي: سلامتك؛ آدي آخرة الطفاسه.. طب فيه شوية لحمة لسه فاضلين مش هتاكلهم عشان نتأكد ان التسمم منها
هو: استيك لأ؛ استيك لأ.. وفاكريني أطلقك بالمره لما اخرج من المستشفى

رحاب المليـــحي


Wednesday, March 16, 2016

مواجهة أم لنفسها


(انت لازم تبوس ايد امك عشان هى ست عظيمة)

- ده كان كومنت قريته ف بوست عن واحد بيحكى ازاى أمه علمته من صغره انه يتصدق ع الفقير لحد ما بقيت عادة فيه

سرحت ف الكلام.. وقفت قدام مرايتى أواجه نفسى..
هل يا ترى انا بعلم بناتى حاجة الا بيها لما يكبروا يفتخروا بيا؟؟ 
هل يا ترى لما اموت حد ممكن يقولهم ان أمكم كانت ست عظيمة؟

والاجابة كانت (معتقدش)

حياة كل بيت دلؤقتى بقيت قايمة ع التكنولوجيا.. كل واحد ماسك الموبيل او التابليت .. الخ

وحتى لو الاسرة كلها قاعدة مع بعض ف نفس المكان.. هتلاقى المشهد المتكرر هو انهم فاتحين التلفزيون كمصدر للازعاج او صوت للخلفية.. وكل واحد وشه ف الاله اللى قدامه بيكلمها وبترد عليه

ولو احتاج حاجة وسأل ومالقاش اجابة يدخل يعمل سيرش ع جوجل وخلاص.. وحتى الدين مابقيناش متعمقين فيه.. آخرنا بنعلمهم الصلاة وحفظ سور القرأن الصغيرة.. ويبقى كده عملنا اللى علينا..

وسط زحمة الحياة بقينا سايبين اطفالنا للمدارس والنت هما اللى يعلموهم.. ولو جم يتكلموا معانا سؤال ف التانى ف التالت بنزهق ونزعق ونخليهم يقطموا عشان صدعنا او عشان مش فاضيين..

اوبشن الصبر مابقاش موجود نهائى.. اوبشن اننا ننزل لمستواهم ونلعب بألعابهم او حتى نعلمهم حاجة جديدة.. لو عملناها مرة مابنعملهاش تانى

ع عكس الاجانب مثلا.. تلاقيهم صابورين ووددين لولادهم جدا.. يلعبوا معاهم ويجوبوا ع اسئلتهم.. ويغنوا ويضحكوا معاهم بصوت عالى ف اى مكان حتى لو كان ف الباص.. وحتى لو كانوا مصدعين اللى حوليهم.. عادى، طالما هما مبسوطين ومش بيضروا حد.. بيخلوا الاطفال التانية اللى ف الباص تتشد وتتفرج عليهم وع وشهم ابتسامه تلقائيه بريئه

بجد الواحد بقى عامل زى اللى داير ف ساقيه وايامه كلها شبه بعض.. نفسه يعمل pause بقى شوية ويشوف فين التفاصيل اللى فايتاه ف زحمة حياته عشان ياخد باله منها قبل ما يفقد دفة الكنترول ع كل حاجة

# ركزوا مع ولادكم قبل ما يفوت الاوان
# ماتسبوش التكنولوجيا تضيعنا


رحاب المليـــحي

Sunday, March 13, 2016

عُقدة الخواجه


لما بنزل مصر اجازات الناس لازم تسألني: وياترى بقى بناتك خواجات ومبيعرفوش يتكلموا ولا كلمه عربي وهنتعامل معاهم بلغة الاشارة؟

ويضحكوا ع كلامهم وهما واثقين ان الاجابه هتبقى ايوة أو ع أقل تقدير يعني، بيتكلموا عربي مكسر

بس بيتفاجأوا لما بقولهم لا طبعا بناتى مصريين قبل ما يكونوا انجليز وانا منعاهم من الكلام بالانجليزى ف البيت

الاقي ردود افعال الناس انهم يتنحوا ويفتحوا بوقهم مش مصدقين اللي بيسمعوه.. وكأني عملت المعجزة التامنه ..
يقولولي ازاي ان كان احنا هنا ف مصر عندنا عقدة الخواجه والناس بتمنع ولادها تتكلم عربي وكأن الانجليزى هو لغة ولاد الناس والهاي كلاس.. وانتى بتعملي عكسه تماما وف لندن طب ازاي؟ 

الحكايه بدأت ف أول يوم دخلت فيه بنتي الكبيره الحضانه.. كانت طبعا لا تفقه شىء ف الانجليزي والمدرسين بيحاولوا يتفهموا معاها بلغة الاشارة عشان يقدروا يتواصلوا.. مستوعبين ومقدرين انها مش من اصل انجليزى وان لغتها الأولى عربي ومش متضايقين

بدأت اتكلم معاها بعض الكلمات الانجليزى البسيطه ف البيت اللي تقدر تفهم بيها اللي قدامها هى عايزه ايه زى انها عايزة تدخل الحمام او تاكل .... الخ

لكن ف يوم لفت نظرى وانا موديها الحضانه انهم كاتبين ورقه كبيره ع الباب اننا ف البيت نتكلم مع ولادنا لغة بلادهم

ولما سألت المدرسه: يعني مانتكلمش معاهم انجليزي؟ 

قالت لي: لا خالص.. لانهم اول ما هيخرجوا من باب البيت كل الدنيا حوليهم انجليزى ف طبيعي انهم هيتعلموه ف متستعجليش

وكل ما يقدروا يقولوا جمل كامله وصحيحه بلغة بلادهم كل ما هيقدروا يكتسبوا اى لغه تانيه بسهوله

ومن وقتها من 12 سنه وانا مانعه الانجليزى ف البيت.. ولو قالولي مش عارفين معنى الكلمه بالعربي 

بترجمهالهم عشان تثبت ف دماغهم ويقولوها المرة اللي بعدها بالعربي

رحاب المليــــحي

Wednesday, March 09, 2016

ثقافة شعب

لما كنت عايشه ف مصر كنت واخده ع احوالها وأوضاعها ومش 
بستغربها ف حاجة

بس لما خرجت من الصندوق وسافرت بره وتعاملت مع الاجانب ورجعت مصر تاني اجازة.. بقيت بفكر بطريقه مختلفه وبشوف الحاجات اللي كنت واخده عليها عادى انها ﻷ مش عادى ولازم إنى أنقضها


ف مثلا ف ثقافة الطابور..
احنا ف مصر منعرفش يعني ايه نقف ف طابور بنظام وكلنا هنوصل ف الاخر من غير ما نزنق ع بعض ونتخانق

ف لندن خروجاتهم واستمتعهم بيومهم بيبدأ من وقفة الطابور.. يعني لو ف انتظار ترابيزة تفضى ف مطعم حابين ياكلوا فيه.. بيقفوا ف الطابور يتكلموا ويهزروا لحد ما يجي دورهم من غير تأفف وعصبيه

لما بروح أى مصلحه حكومية ف مصر اخلص أى ورقة ولو عبيطه.. بيطلع عيني من المكتب ده للمكتب ده..
واكتبي طلب ولازم يمضي عليه فلان وعلان..

وﻷ؛ لازم تروحي الأول المبنى الفلانى ف منطقه تانيه خالص تمضي عليه وبعدين ترجع لنا تانى.. الخ الخ

ف لندن انت ممكن من مكتب البريد تخلص مصالح كتير اوى.. زى انك تقدم ع باسبور.. تخلص ورق عربيتك.. تغيير فلوس.. تدفع فواتير.. تستفسر عن اى حاجة وهما يدلوك

وكله بيخلص براحه ومن نفس المكان ومن غير ما يشتتوك
دايما ف الاماكن الحكومية بياخدوا وقت طويل ممكن ساعات لحد ما يشوفوا طلباتك.. عشان بيكون قدامك عدد كبير وكل واحد بكلمه وطلب.. ف تلاقيهم دايما كاتبين يافطه ان العصبيه مش هتجيب لك حقك بل بالعكس هتضيعه

عكس مصر ف وقت الزحمه تلاقي اللي صوته بيعلى وشكله هيعمل مشاكل أو يعرف حد مهم يهدوه ويدخلوه هو قبل بقية الناس اللى واقفه
وغيره وغيره

نفسي شعبنا يغير من ثقافته.. هو ده السلاح اللي ممكن نتطور بيه 
ونتقدم كشعب وكبلد

رحاب المليــــحي

Sunday, March 06, 2016

ليه بتعملوا كده؟


المتعارف عليه زمان ان اى مشروع او فكرة تنجح بندعمها ونميها.. لكن دلؤقتي بقى العكس صحيح.. لازم ندور ع اى طريقه لإسقاطها وفشلها 

زى مثلا فكرة تاكسي الuber 

ف كل بلد اتعمل فيها نجح واكتسح ونافس التاكسيات العاديه لإنه ببساطه نص تمن التاكسي العادى بالإضافه للاحترام والتقدير اللي بتشوفه من السواق

والأهم الأمان ثم الأمان.. انك تكون عارف تفاصيل السواق والعربيه ونمرتها.. وكمان لو عندك اى ملحوظة سلبيه بشأن التوصيله بتبعت للشركه ع النت وهما فورا بيردولك حقك.. 

مش سواقين التاكسيات العاديه اللي يتنكوا عليك ويركبوا اللي ع مزاجهم ولما تطلب منهم يشغلوا التكييف يقولك بايظ.. ولما تتطلب منهم يشغلوا العداد يرد السواق منهم ببرود: العداد مابيأكلش عيش يا استاذ 

بس ف كل بلد اتهاجم بطريقه مختلفه.. يعنى ف لندن الblack cab اللي هو زيه زي التاكسي الابيض ف مصر بالعداد.. اعترضوا بشده ع الuber واجتمعوا ورفعوا عليهم قضيه بس طبعا خسروها وخلص الموضوع

اما بقى ف مصر ف لنا هنا وقفه..
التاكسيات التانيه اتجمعوا وبقى يبلطجوا ع اى عربيه يحسوا انها تاكسي uber ممكن توصل انهم يضربوا السواق ويكسروا العربيه

سواقين الuber بقوا عرضة للبهدله والضرب والبلطجه؛ ولأنهم اصلا ولاد ناس مهندسين ومحاميين ...الخ 
مبيعرفوش ينزلوا لمستوى سواق التاكسي الحشاش المبرشم

وبقوا يطلبوا من الناس اللي تركب معاهم تساعد ف حمايتهم زى ان الزبون يقعد جنب السواق عشان مايبنش انه تاكسي uber.. 
زى انه يسلم عليه وهو نازل خصوصا ف اماكن زى المطار أكنهم أصحاب عشان سواقين التاكسي ف المطار مايحسوش انه uber

ليه وصلنا لكده؟ الرزق ده بتاع ربنا وكل واحد بياخد رزقه المكتوب له.. مش هنقطع بعض ع القرش.. محدش هياخد اكتر من اللي مقسوم له.. 
اتقوا الله

رحاب المليــحي

Thursday, March 03, 2016

وأخدنا ايه من كلام الناس؟



مؤخرا مع انتشار مواقع التواصل الاجتماعي بقيت الاقي ناس كتير بتشتكي من الصعوبات اللي بيحطوها الاهل للجواز.. من شبكه بألاف مؤلفه.. 
لفرح ياما هنا ياما هناك تتباهى بيه العروسه وسط صحابها وتعرفهم مقامهم.. لنيش مالوش لازمه.. لعدد معرفش كام صيني.. لعدد كام 
فوطه..

وان لازم الشقه تبقى جاهزة وع سنجة عشره وتتفرش كلها قبل الجواز بما فيها اوضة الاطفال اللي يا عالم هيجوا امتى بس لازم تبقى جاهزة برضه.. عشان لما يجوا الضيوف تبارك نتفشخر كدة ويبان الصرف وناخد العين ع حق ربنا كمان مايضرش

واللي ف ايامنا بيعمل عكس المتعارف عليه ويتبع المثل القديم (ع قد لحافك مد رجليك).. ويرفض المظاهر الفارغه ومش مهم نظرة الناس ولا مهم فرح فين وشبكه بكام المهم سعادته هو واللي اختارها شريكة حياته..

تلاقي كل الناس مشيره البوستات اللي من النوعيه دى ومبسوطين بيهم اوي..

بس اعتقادى الشخصي لما هيجي الموضوع عندهم هينسوا ان البساطه ف الجواز اللي عجبتهم وقالوا فيها قصايد.. وقت الجد هيرجعوا لقديمه ويطلبوا ويتأمروا

لما باجي اقارن ده بالجوازات بره مصر.. ف بلاقي اختلاف ما بين السما والارض

الراجل بيروح لأهل البنت يقولهم انا ظروفي كذا بقبض كذا عايش ف المكان الفلاني.. بنزل مصر مرة ف السنه مثلا .. ده وضعى ودى ظروفي

ولو البيت اللي عايش فيه ضيق او كان مشترك بينه وبين شباب تانين.. بيدور ع مكان اوسع ويكون ع قد امكانياته برضه..

اه بيكون نفسه يعيش البنت ف نفس المستوى اللي هى كانت عايشه فيه ف بيت ابوها لكن الغربه مبترحمش.. ولا في بابا هيساعده ولا ماما هتسلفه اخر الشهر لما يتزنق

ف البنت بتبقى عارفه انها داخله ع مسئوليه وانهم هيبنوها سوا طوبه طوبه بكل ما تعنيه الكلمه دى من معنى

ولا فيه بقى نيش ولا صيني.. حتى ممكن ف الاول يعيشوا ف شقه صغيره ع قدهم ولما ربنا يكرمهم بأطفال يبقوا يعزلوا لمكان اكبر وتكون ظروفهم اتحسنت شوية

وسنه ورا سنه وكل ما يبصوا وراهم يبتسموا ويحمدوا ربنا ع اللي كانوا فيه وبقوا فيه بمجهودهم وصبرهم.. وانهم لما اخدوها خطوة خطوة حسوا بحلاوة اللي وصلوا له ومن غير مساعدة حد ولا تدخل حد ف مشاكلهم اللي دائما وابدا بتكون سبب رئيسي ف هدم البيوت العمرانه

الحياه ابسط من اننا نكلكعها عشان خاطر الناس واللي هيقولوه الناس.. الناس عمرهم ما عجبهم 
حاجة ولا هيعجبهم حاجة.. اشتري راحتك وسعادتك وانسى الناس


رحاب المليــــحي

Friday, February 26, 2016

طب لندن

كنت دايما ف الأفلام بسمع كلمة: أنا رايح اعمل check up  ف لندن

كنت بسرح بخيالى كده واقول يا سلام دى شكلها الجنه بعينها.. وده دايما طبع اللى إيديه ف المايه..

بس لما روحت لندن وعشت فيها 12 سنة.. استوعبت ان الكلام ده كله هجص..
وان أقل كلمه تتقال: (ربنا ما يحوجنا لطب لندن)

طبعا محدش هيصدقنى بكلام نظري.. ف خلينا مانرغيش وننزل بأمثله عمليه لحالات تبع التأمين الصحي

مثلا: دكتور واحد بس بتسجل معاه ويُسمى الGP، انت وعيلتك طبعا.. وده عادة بتختاره بُناءا على إنه جنب بيتك أو إن حد رشحهولك

مواعيد العمل للدكتور بتكون من 9ص لــ 5م لازم تكون حاجز معاه من قبل كده.. لو حصلت حاجة طارئه ف نفس اليوم الصبح مثلا وحد من الاولاد تعب.. لازم يتعب ما بين 9ص لحد 9.30ص

ده الوقت اللى بياخدوا فيه حالات مستعجله مش حاجزة من قبل كده.. بعد كدة بقى يقولك احجز تانى يوم أو روح المستشفى

لما تروح للGP  ولو حالتك  مش تخصصه بيحولك ع مُتخصص.. لو لقى الموضوع مش حرج أوي وهما دايما شايفين اننا بنتدلع وزى الفل..
 فـــ عقبال بقى ما يبعت حالتك للمستشفى والمستشفى تبعت لك جواب بالميعاد إذ تُفاجأ إن الميعاد لسه بعد 3 شهور..

 أما لو روحت المستشفى منك لنفسك كدة من غير ما يكون دكتور محولك بتدخل ع
( قسم الطوارىء).. الوقت اللى متوقع إنك تقضيه ف قسم الطوارىء مش أقل من 3 ساعات للكبار أو الأطفال..

 لو الحاله مستعجله اوى ممكن يدخلوها على طول.. وتبقى مستعجله من وجهة نظرهم هما مش انت..
يعنى لو انت شايف ان ابنك سخن مولع أو بيتقطع قدامك، بس هما مش شايفين ان الموضوع مستاهل.. هتقعد ال3 ساعات لحد ما تمر بكل المراحل براحه وبهدوء ولحد ما تعرف ابنك بيتشكى من ايه ويدولوه دواء

لان فيه أدويه كتير منها الإنتبيوتك للكبار أو للأطفال ممنوع صرفها ف الاجزاخانات بدون روشته من الدكتور

واحيانا كمان مبيعرفوش يشخصوا الحاله، ف يقولولك احنا هنحجز لك ميعاد ف يوم تانى تعال ونشوفك لو حسيت انك بقيت كويس قبلها ماتجيش.. وهرجع واقول الكلام ده ينطبق ع الكبار والاطفال.. لو طوعتهم ومشيت يبقى خير وبركه وأهو ارتاحوا منك عشان فيه كتير غيرك منتطرين الكشف عليهم..

احيانا بقى كمان بيشخصوا غلط ويلبسوك ف حيطه ويمشوا ف سكه تانيه خالص غير سكة العلاج اللى المفروض يمشوا فيها.. لحد ما حالتك تتدهور وتكتشف انك لازم ترفع عليهم قضيه وعمرهم ما هيطلعوا نفسهم غلطانين..

 وساعات كمان بيعملوا عمليات غلط ويقولوا لك عشان نرجع نعملها تانى مش مضمون نسبة نجاحها ف خلاص كدة..

وقدامى اشخاص لما نزلوا مصر، الدكاتره ماكنوش مصدقين انهم كانوا بيتعالجوا ف لندن من التشخيص الغلط والعمليات اللى اتعملت غلط..

ف زى ما بيقولوا اللى ميعرفش يقول عدس.. والأمثله كتير


 رحاب المليــــحي