Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, July 30, 2009

أنا فين؟! الحلقة الرابعة


- هااااوم، أنا نمت كتير وللا إيه؟!!!
- صح النوم يا حبيبتى.. نمتى كويس؟
- آه الحمد لله، إيه ده هو إحنا خلاص روحنا بيتنا الجديد؟
- لأ يا ملك، إحنا قاعدين فى بيت كريم صاحبى
- قاعدين عنده ليه؟ وهو فين؟
- هو سافر مصر.. بصراحة سفره دة جه فى وقته
- مش فاهمة حاجة
- أصل بعد لما خلصوا الست اسابيع فى الفندق اللى ماكنش عاجبك.. ماكانتش لسه الحكومة شافت لنا مكان نقعد فيه.. فنقلونا لفندق تانى أحسن بكتير.. الأوضة عاملة زى الأستديو فلات جواها الحمام والمطبخ
- طيب ده كلام جميل.. إيه بقى اللى مقعدنا عند صاحبك؟
- علشان فرصة البيت فاضى وفيه إنترنت ودش عربى وكمان فيه غسالة.. فمش محتاجين كل كام يوم ننزل الشارع علشان نغسل هدومنا
- ممممم، والمفروض إننا هنقعد هنا قد إيه؟
- ممكن لحد ما كريم يرجع إن شاء الله
- أنا زهقت بقى من المرمطة اللى إحنا فيها دى.. صحيح من خرج من داره ......
- اصبرى يا ملك.. إن شاءالله آخرتها خير، بكرة تقولى محمد قال.. مش إنتى بتثقى فيا؟
- مش دايما يعنى بس ماشى
- بقى كده، ماشى يا ملك.. بكرة نقعد نفتكر الأياد دى ونضحك عليها
- شم،شم،شم، هو فى حاجة بتتحرق وللا أنا متهيألى؟
- آاااااه، ده أنا كنت معلى النار على الأكل علشان يستوى بسرعة.. بس يارا كانت بتعيط فكنت عايز أشوفها مالها ونسيت أوطى على النار
- هى هى، طب روح يا فالح اطفى البوتوجاز قبل ما تولع فى البيت، ده عُهدة
- ...............
- عارفة يا ملك، برغم انك اتبهدلتى كتير قوى فى البلد دى من ساعة ما جيتى.. وانهارتى وصعبت عليكى نفسك وكرامتك كتير برضه.. لكن صمدتى وكنتِ خير زوجة يعتمد عليها
- كرامتى؟؟ وإيه اللى جه على كرامتى؟
- يعنى مثلا فى الفندق اللى كنا قاعدين فيه قبل كده.. ماكنتيش قادرة تصدقى إنك تنتقلى من شقة بجنينة لفندق شبه بدروم.. وكنتِ من صباحية ربنا تاخدى يارا وتسيبى الأوضه علشان مايجلكيش اكتئاب.. وتقعدى تلفى فى الشوارع وتروحى يوميا عند بسمة صاحبتك علشان تطبخى لنا.. لإنك كنتِ بتقرفى تستخدمى المطبخ الجماعى اللى فى الفندق.. وبسمة برضه برغم إنها كانت بتحاول تساعدك فى إنها تسيب لك البيت كل يوم تعيشى فيه براحتك وتخرج هى لدراستها إلا إنك برضه ماكنتيش مرتاحة.. تقعدى تنضفى البيت علشان كان على طول مش نضيف ويارا بتزحف فكنت بتخافى إنها تاخد أى حاجة من الأرض.. وكنتِ متخيلة إن بسمة لما ترجع هاتشكرك على إنك نضفتى البيت.. لكن دائما كان رد فعلها بارد وكأنك معملتيش أى حاجة.. وكان ده بيجرحك وبيجى على كرامتك قوى.. وكنتِ صابرة ومستحملة
- ....... ساعات بيجى منى برضه.. كانت ماما دايما تقول لى برغم إنك مدلعة لكن وقت الجد بتصمدى وتستحملى وتكونى بمية راجل.. واضح إن ماما كان عندها حق
- ربنا يخليكى ليا، هى يارا فين؟ أنا مش سامع لها صوت
- ولا أنا برضه..... إيه ده؟ دى نايمة ورا الباب
- هاهاها، بنزينها لما بيخلص بتتقلب فى أى مكان
- هى يارا بقى عندها قد إيه دلوقتى؟
- يارا عيد ميلادها الأولانى كمان اسبوع
- ياااااه الوقت جرى بسرعة.. طيب هانعمل لها عيد ميلادها فين؟
- هو لازم يعنى؟ مش مهم السنة دى.. وبعدين أنا مش مقتنع بأعياد الميلاد أساسا.. حد يحتفل إن سنة فاتت من عمرهُ؟
- نعم؟؟ أنا بحب اللمة وأعياد الميلاد مناسبة حلوة تلم فيها الناس.. وأنا إن شاء الله مش هفوت عيد ميلاد لها من غير ما اعمله.. أنا كنت بعمل عيد ميلادى لحد ما اتجوزت.. هااه بقى هانعمله فين؟
- ممممم، نعمله هنا.. بس طبعا الأول لازم نستأذن كريم
- أكيد طبعا، صحيح هى هدومى فين؟
- ما إحنا مش جايبين هنا هدوم كتير
- آه يعنى قصدك أن بقية الهدوم فى الفندق التانى
- لأ، مش كلها.. الحاجات الضرورية بس.. لكن بقية الحاجات كلها مقسمينها على تلات أماكن
- إزاى يعنى؟
- يعنى لما بدأنا ننقل ماكنش ينفع كل حاجتنا اللى كانت معانا فى الشقة ناخدها معانا الفنادق.. ما هو الأوضه يا تاخدنا يا تاخد حاجتنا
- آه فـــــ إيه بقى؟
- فحطيناهم فى شنط.. وفرقنا الشنط على تلاتة من أصحابى اللى عندهم شقق.. لحد ما ربنا يكرمنا بشقة إن شاء الله
- طيب أنا .......
(تك تك تك)
- ده تلاقيه علي؟
- وعرفت منين؟
- ما هو عايش هنا يا ملك
- فعلا؟؟ ليه؟
- ما هو كريم صاحبنا مأجرله أوضه هنا.. ما هى الشقة تلات أوض، فأوضة منهم علي واخدها
- اللى يشوف كده يقول إن الأوض يرمح فيها الخيل.. دى كل أوضة متر فى متر ونص
- عادى يا ستى واحنا مالنا، كله مستفيد.. كريم عايز حد يساعده فى إيجار البيت وعلي عايز مكان مايكنش غالى قوى
- آاااه فهمت، نظام فيد واستفيد.. طيب روح افتح بقى وأنا هدخــــــ
- إوعى تقول لى هتدخلى تقعدى على الإنترنت.. البسى الطرحة وتعالى اقعدى معانا علشان نتغدى سوا
- أووووف، طيب............ مش هياخد باله، هاقعد شوية على النت واروحلهم على طوووووووووول.. شعاااااااااااااااااااااااااااع
رحاب المليـــــحي



Tuesday, July 28, 2009

أنا فين؟! الحلقة الثالثة

- ملك، ملك..... عمال أنادى عليكِ مش بتردى عليا ليه؟

- ..........

- ملللللللللللك

- هه، إيه إيه فى إيه؟؟؟؟ بالراحة هو أنا طرشة ؟

- لأ خالص، مالك مسهمة ليه؟

- كنت بحلم حلم غريب مريب

- خير، احكيلى

- كنت بحلم إنى فى مصر.. وقعدت فيها كتير قوى بتاع شهرين كدة مثلا.. لأ،لأ شهر ونص بس

- ويا ترى اتبسطتى هناك؟

- آه قوى، أول ما وصلت لقيت ماما مستنيانى فى المطار.. أخدتنى بالحضن أنا ويارا.. وقعدنا نعيط.. ولما روحت البيت فضلت اتفرج على كل ركن فيه وكأنى أول مرة أشوفه.. وماعرفتش انام فى فى أوضتى على سريرى.. وفضلت سهرانة طول الليل مش مصدقة إنى فى مصر

- وكلمتى أصحابك؟؟

- وده سؤال ؟؟!!.. طبعا، كل أصحابى كانوا واحشنى بجنون.. نسيت أى إساءة حصلت من أى حد منهم فى يوم من الأيام.. وجريت على تليفونى وكلمت كل الناس.. وكنت مُستمتعة برد فعل كل واحد فيهم لما يعرف إنى فى مصر.. بس ......

- بس إيه؟؟؟

- بس فى ناس كانت دايما بتتحجج إنها مش فاضية تقابلنى وعلى طول مشغولة.. وحتى لو ده فعلا حقيقى بس أنا مش قاعدة معاهم طول السنة يعنى كان لازم يفضولى ولو ساعة

- بس أكيد فى ناس كتير قابلوكى برضه؟

- اه الحمد لله، كل الناس اللى بعتبرهم أقرب وأعز أصحابى قابلونى وفرحتهم بوجودى ماتتقدرش.. وقضينا مع بعض أحلى ايام.. افتكرنا أيام زمان وضحكنا عليها.. كان بقالى كتير مضحكتش من قلبى...........

- طيب كويس، سهمتى ليه تانى؟

- أصلى افتكرت كلامهم ليا ... برغم إنه كان غريب بس لما فكرت فيه لقيته حقيقى

- قالولك إيه؟

- قالوا لى إنى اتغيرت كتير.. وبقت أعرف أتحمل المسئولية.. وإنهم ماكانوش متخيلين إنى هاصمد سنة ونص فى لندن من غير ما أرجع..

- وإيه كمان؟

- وإنى بقيت عملية اكتر منى عاطفية

- ممممم، وإنتى قلت لهم إيه؟؟

- قلت لهم لما يكون كل الناس اللى بحبهم بعيد عنى.. ومقضياها لقاء وفراق.. وعارفة إنى مهما قعدت مع بابا وماما فى الأخر هسافر وأسيبهم.. ومش هايشوفوا يارا غير مرة فى السنة أما بقية السنة هيقضوها صور من على الانترنت لحد السنة اللى بعدها.. هيكون فيه إيه اصعب من كده !! مهما كنت عاطفية قسوة الحياة هتخلينى غصب عنى أكون عملية

- إنتِ طبعا عندك حق.. بس هى دى سُنة الحياة.. والحمد لله إنك اقدرتى نوعا ما تعدى أصعب مرحلة فى الغربة.. وإحنا سوا هنعدى كل حاجة صعبة إن شاء الله.. وكفاية إن ربنا رزقنا بأحلى يارا فى الدنيا..

- صحيح هى يارا فين؟

- بتلعب فى التلاجة.. بس على فكرة إنتِ ماكنتيش بتحلمى؟

- يعنى إيه؟

- يعنى كل اللى إنتِ بتقوليه ده حقيقة مش حلم.. إنتِ فعلا سافرتى مصر وقعدتى ست أسابيع

- هههههه؟؟؟؟؟؟

- بأمارة إننا كنا المفروض هنقعد خمس أسابيع بس لكن وإحنا فى المطار رفضوا يسفروكى علشان يارا ماكانش معاها إقامة

- إيه ده؟؟ أيوه الكلام ده صح.. يعنى أنا مكنتش بحلم

- لأ

- ............ طيب لو سفرى مصر ماكانش حلم.. لكن أكيد أكيد المكان اللى أنا فيه ده كابوس.. إحناااااا فين؟

- إحنا فى فندق

- فندق إيه ده اللى تحت الربع.. ده ناقص واحد نجمة ده وللا إيه؟

- اهدى بس علشان افهمك

- فين شقتى؟ فين جنينتى؟ أنا إيه اللى جبنى هنااااا؟

- احنا اضطرينا نسيب شقتنا علشان صاحبها رجع.. فكان لازم نمشى.. ومابقاش عندنا مكان نعيش فيه.. فطلبنا مساعدة الحكومة.. وهما جابونا هنا لحد ما يشوفولنا مكان مناسب

- مكان مناسب؟؟ وده إن شاءالله كمان كام سنة؟

- ست أسابيع بس.. شفتى مش كتير إزاى

- فات منهم كام؟

- إحممم، يوم

- والله!!!! عااااااااااا، أنا عايزة أرجع مصر تانى

(بووووووووووووووووم)

- إيه ده فى إيه؟؟؟ إيه اللى بيحصل برة ده؟

- لحظة واحدة أخرج أشوف فيه إيه

(بعد نص ساعة)

- روحت فين وسيبتنا؟

- كان فيه راجل كبير وقع من على السلم.. فكنت بعمل له الإسعافات الأولية

- وإيه بقى اللى وقعه؟

- هه، مفيش أصله كان شارب زيادة

- سكران يعنى

- آه

- أنا داخلة أناااااام.. قبل ما يجرالى حاجة

(ويويويويويويويويويوي)

- لأ،لأ، كده كتير.. كتير قوى

- ده جهاز الإنذار

- آه ما أنا واخدة بالى

- يعنى لازم نسيب الأوضة ونطلع فوق علشان ده إنذار بالحريق

- فوووووق؟ هو احنا تحت!!!!

- اه احنا قاعدين فى الأرضى

- أرضك... آاه ماشى ماشى

- ولا اقولك استنى كده......... لأ خلاص زى ما توقعت طلع انذار كاذب زى ما بيحصل كل مرة

- الصبر من عندك يااااارب، هو الحمام فين؟

- برة فى الكوريدور

- نعم؟؟؟ انت عايز تفهمنى إنه حمام جماعى لكل الإوض؟

- اه، والمطبخ كمان برة

- آاه الحمام برة والمطبخ كمان.. ممممم.. والغسالة أكيد هى كمان برة مش كدة؟

- الحقيقة لأ

- إيه مش هنغسل هدومنا؟؟؟ مفيش غسالة اساسا فى الفندق وللا إيه؟

- لأ مفيش، بس فى أماكن برة فى الشوارع مخصوصة للغسيل.. بتكون عبارة عن محل صغير جواه كذا غسالة تدفعى وتغسلى

- ممممم، هو، هو الكمبيوتر فين؟؟

- أهو عندك.. طيب أنا هدخل الحمام واجيلك على طول

- ده لو لقيتنى

- بتقولى حاجة يا حبيبتى

- لا أبدا يا حبيبى......... خدنى يا شعااااااع خدنى بعيد عن هنا.. هاتنى كمان ست أسابيع.. بااااااااااي

رحاب المليــــــــــــــــــحي

-