Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, September 10, 2010

العيد فرحة.. ولابد منها


العيد فرحة وصلاة وكحكة وغوريبة ولبس جديد.. ولمة عيلة وفرحة وضحكة بعد تعب صيام شهر جميل..

دايما تسمع اللى يقولك ازاى بكرة العيد وانت مكشر كدة؟ ده احساسك بإن بكرة العيد كفيل إنه يخليك منتعش ومبتسم

هل دى حقيقة فعلا؟ هل احنا لازم نفرح بالعيد عشان كبرنا على إن العيد فرحة.. واتربينا على اننا أول ما نسمع أغنية (صفاء ابو السعود) كل عيد نزقطط وندخل فى مود العيد.. ونغنى معها ( اهلا اهلا بالعيد.. مرحب مرحب بالعيد)

يعنى العيد بقى زيه زى العادات والتقاليد اللى اتربينا عليها.. لازم ولا بد أول ما يجي نفرح بمجيه؟ حتى الأطفال بيستنوه ويفرحوا بيه.. عشان الفرحة باللبس الجديد والعيدية وبس؟

ولا عشان بجد احنا من جوانا حاسين بيه وفرحانين بمجيه!! وبتزيد فرحتنا بإبتهالات صلاة العيد اللى بنتهافت على الجوامع صباح كل عيد.. عشان نصلى ونعيد على كل الناس اللى نعرفها واللى منعرفهاش.. والأطفال تقعد فى الجامع تستنى الأطفال اللى زيهم أو الأمهات اللى بتعدى بإبتسامة صافية عاذبة تقدملهم حاجة حلوة وتتمنى لهم عيد سعيد.. ياخدها الطفل فى خجل وابتسامة بريئة سواء كان فاهم معنى العيد أو لأ.. المهم عنده واللى عينه مركزة عليها هى الحاجة الحلوة..

طب دلوقتى وف ظل الطروف اللى كل واحد فينا عايشها.. فى ظل الهموم اللى كل واحد فينا شايلها بإختلافها.. هل لسه بنفرح بقدوم العيد؟ هل لسه بنستنى العيدية؟؟ ولو حتى كانت رمزية.. لكن المهم إنها بتفكرنا بأيام غير منسية فى حياتنا وذكرياتنا الطفولية! هل لسه بننزل نشترى لبس العيد وحتى لو ماكنش عشان خاطر العيد.. لكن اهى برضة فرصة إننا نشترى لبس جديد والسلام!!

طب لو فعلا ده بقى حالنا.. ومابقتش حاجة تفرحنا.. يبقى هنفرح امتى؟؟؟ ولا خلاص مابقاش فيه جوانا رضا بأى حاجة حلوة فى حياتنا.. و عمرنا ما هنقلع النضارة السودا من على عينينا..

ياللا نفرح بالعيد وننسى همومنا.. وندارى كل مشاكلنا بإبتسامة نحاول جاهدين نخليها من قلوبنا.. وحتى لو كانت إبتسامة سطحية مع الوقت هناخد عليها وتبقى بجد ومش تمثيل.. مفيش حاجة مستهلة.. واليوم اللى بيعدى مش هيرجع تانى..

وكل سنة وكل عيد وكل لحظة سعيدة وانتم طيبين وبألف صحة وسلام

رحاب المليحي