Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, March 14, 2012

وتظل الفجوة ما بين الأباء والأبناء ف لندن

ف لندن ممنوع الضرب او حتى الزعيق.. اقصى حاجة تعاقب بيها طفلك.. انك تذنبه ف اى مكان ف البيت وتمنعه من حاجة بيحبها

طبعا الكلام ده مايكولش معانا احنا العرب.. يجيب مع الانجليز ممكن،

براحتهم هما اصلا باردين وع قلوبهم مراوح.. ولا عندهم عيب ولا حرام ولا كدة كُخ

بس خلينا نحط الكلام ده ع جنب دلوقتى

وندخل ف موضوع تانى

ان اى كلام الطفل يقوله للمدرسة لازم ولابد يتاخد بيه.. ولازم يحققوا فيه ويعرفوا اذا كان صح ولا من خيال الطفل

زى مثلا

بنت مصرية (7 سنين) ف تانية ابتدائى قاعدة تتاوب ف الفصل..

سألتها المُدرسة عن سبب كسلها؟

قالت لها البنت انها مانمتش كويس عشان اخوها احمد كان عمال يعيط طول الليل

المُدرسة راحت لاحمد (5 سنين) فى الحضانة.. تسأله هل كلام اخته صح ولا لأ؟ ولو صح كان ايه سبب عياطه طول الليل؟

الولد رد بكل براءة قالها اه صح، اصل ماما مسكتنى ضربتنى ف الحيطة

طبعا كدة الموضوع إغمق ودخل ف الجد.. المُدرسة بلغت المدرسة

والمدرسة بدورها قعدت اربع ايام تستجوب ف ايمى واحمد.. كل يوم يسألوهم نفس الأسئلة والولاد يردوا بنفس الاجابات.. بما يعنى ان كلامهم اكيد اكيد صح واكيد اكيد خيالهم مش واسع

كل ده والاب والام ميعرفوش اى حاجة ولا المدرسة بلغتهم ولا حتى ولادهم قالولهم حاجة نهائى

بعد الاربع ايام وبعد ما الولاد مايغيروش اقوالهم.. اتصلت المدرسة بالأم وبالأب، وطلبت حضورهم ف التو واللحظة

وبدأ معاهم التحقيق ف كلام ولادهم،

انكرت الأم ووضحت للمدرسة ان بنتها كانت تعبانة وحرارتها عالية وده سبب عدم نومها.. اما بالنسبة لكلام ابنها ف ده كان مفاجأة لها وانها ولا جت جنبه ولا ضربته خالص

ولما سألوا الأب انكر هو كمان كلام ولاده وانه مش حقيقى.. سألوه اذا كان واثق ان مراته ماتعملش كدة ؟ جاوب من غير تفكير انها طبعا ماتعملش كدة

روحت الأم البيت وهى متغاظة من ولادها.. ولما الولاد رجعوا سألتهم فى هدوء مصطنع هل هما فعلا مصدقين اللى قالوه!

ردت ايمى: معرفش انا قلت كدة وخلاص

رد احمد ف لا مبالاة: زمان وانا صغير ضربتينى

حاولت تفهمهم وهى بتجز ع سنانها ان اللى هما بيعملوه ده اكبر غلط.. عشان ممكن جدا البوليس ياخدهم ومايشوفهاش تانى

ورجعت تانى سألت احمد: هو انا مسكتك خبطتك ف الحيطة؟

قالها: انا كان قصدى اختى زقتنى وانا بلعب معاها.. هما اللى فهموا غلط

تانى يوم

راحت الأم المدرسة تقولهم الولد بيقول انه كان قصده اخته مش أمه.. وانتوا اللى فهمته قصده غلط.. بعد ما مشيت جابوا احمد سألوه

رد ف هدوء: ماما اللى قالت لى اقول كدة.. قالت لو ماقلتش كدة البوليس هيجي ياخدها

زاد الأمر تعقيدا

بلغوا الأم بأقوال الولد، وطلبوا منها تمضى إقرار ع نفسها بعدم التعرض لولادها.. وده طبعا يديهم الحق ف اى لحظة لو اتكرر الموضوع ده تانى انهم ياخدوهم منها بسهولة.. رفضت الأم انها تمضى وقالت لهم انا معملتش فيه حاجة ومش همضى لإنى لو مضيت ده معناه انى ضربته فعلا وانا ماضربتوش

الإخصائية الإجتماعية اللى بتحقق ف الموضوع من بدايته قالت لها انا مصدقاكى بس ف نفس الوقت مصدقاه لإنه ثابت ع اقوله

حكيت لها الام ع موقف حصل منه

إنهم عندهم قطة.. وف يوم بيدورا عليها مش لاقينها ف البيت خالص.. سألوه ماشفتهاش؟ قالهم دى كانت واقفة ناحية الشباك ونطيت وقعت ماتت

وف الاخر لاقوه مخبيها ف درج من ادراج مكتبه

سألتها الأخصائية عن السبب من وجهة نظرها اللى يخليه يقول كدة! قالت لها الام يمكن عشان عرفناه ع التكنولوجيا بدرى من اى فون لاى باد لبلاى استيشن ف خياله بقى واسع.. يمكن عشان متدلع شوية زيادة.. مش عارفة بصراحة

طلبت الأخصائية الاجتماعية زيارة الولاد ف بيتهم عشان تشوف ازاى عايشين ولعبهم واوضتهم.. وفعلا راحت ف الميعاد المتفق عليه

ايمى كانت اعصابها تعبت من اللى بيحصل والتحقيق والاسئلة الكتير.. وكانت فعلا خايفة لا يجى البوليس ياخد مامتها وماتشوفهاش تانى

ف لما الاخصائية سألتها ردت البنت بتوتر احنا كويسين ومبسوطين ومش عايزينك هنا وياللا امشى

اما احمد ف الموضوع ده فرعنه بزيادة وحس ان بقاله ضهر او مصدر قوة.. برغم انه خمس سنين وبرغم انه مش بيقول ده بلسانه.. لكن ممكن قوى تحسه من نظرة عينيه اللى بقيت قوية وحادة.. واللى هو مش همه حد وعرف طريقه وعرف ازاى يضايق اهله لو فكروا يضايقوه ولا يعقبوه

فلما الاخصائية سألته جاوبها ف برود انه زهق بقى من الموضوع ده ومش عايز يتكلم فيه تانى

احتارت الاخصائية ف الموقف، لكن ف النهاية جت ف صف الأم وقالت احيانا الولاد بيكون خيالهم واسع بزيادة وقفلت التحقيق ع كدة وانتهى الموضوع

بس ده لا يمنع ان الأم بقى ليها ملف اسود ف المدرسة ولو اى حاجة حصلت تانى مش هيبقى فيها تهريج

وان قلبها وجعها من ابنها اللى هو نور عينيها واللى كل طلباته بتجيله.. وحسيت فجأة بالغدر من اقرب حد ليها

ونرجع ونقول ادى اخرة الغربة واللى بناخده منها

رحاب المليحي



مش لاقى شغل ف لندن

لما يبقى واحد (مصرى) مهندس كمبيوتر ومعاه الجنسية الانجليزية.. وواخد كمان شهادته من لندن


مديره يهودى كان مستئصاده عشان مسلم.. وفضل وراه لحد ما خلاه يسيب الشغل

وبعدها ما يلاقيش شغل لمدة شهور.. وهو متجوز وعنده 3 ولاد


وف الاخر يضطر يشتغل سواق تاكسى عشان يصرف ع بيته ومراته وولاده.. ومايفضلش قاعد زى خيبتها ف البيت


** يبقى اوروبا مش جنة زى ما الناس متخيلة


** يبقى الناس اللى فاكرة ان بلاد برة قاعدة مستنيهم هما بالذات.. عشان يجوا يشتغلوا ويقبضوا الاف.. دى ناس عايشة ف احلام اليقظة


** واللى يقولك اهج من البلد واسافر.. ان شاالله اغسل صحون، المهم ماعيش فيها.. دى ناس بتستعبط


بقولك معاه الجنيسة وواخد شهادته من انجلترا واشتغل سواق تاكسى


واللى بيفهم يقدر يوازن الامور ومايبصش تحت رجليه

رحاب المليحي

حدث بالفعل


حدث بالفعل ف لندن***

اتصلت صحيت صاحبتها من النوم الساعة 7ص

- خير يا سامية؟ مش عادتك تتصلى بدرى كدة!

- الحقينى

- في اييييييه؟ ولادك بخير؟

- مش انتى تعرفى بنوتة ف مدرسة ولادنا اسمها روشان؟!

- ايوة مالها؟

- ولادى كانوا فى الجنينة دلوقتى بيلعبوا (بالهوكى توكى)، لقطوا اتنين انجليز بيتكلموا مع بعض.. واحد بيقول للتانى : هتروح المدرسة الفلانية عدى البوابة هتلاقى البنت خدها وامشى، بس هما ماسمعوش اسم البنت كويس بيقولولى روشان، راشيل.. حاجة زى كدة.. لكن متأكدين من اسم المدرسة

- يا نهااااار اسود.. طب انا اعمل ايه دلوقتى؟ اعمل ايه؟

- مش انتى تعرفى مامتها؟ حسيتى منها ان فيه مشاكل مع جوزها مثلا؟

- اه اعرفها، بس لأ عمرها ما كلمتنى على مشاكل ف البيت عندها

- طيب خير، بصى احنا نستنى لما نقابلها ف المدرسة ونقولها عشان اخلى مسئوليتى

- اه لازم نقولها، بدل ما تحصل مصيبة ونقول يا ريتنا.. بس ربنا يستر بقى من رد فعلها

فى المدرسة**

- صباح الخير يا ام روشان

- صباح النور

- انتى كويسة؟

- اه الحمدلله

- قوليلى انتى عندك فكرة اذا كان فيه ف المدرسة روشان تانية غير بنتك ولا لأ؟

- لا اكيد معرفش

- اممم، طب هقولك ع حاجة من غير حساسية

- خير؟

- هو انتى فيه بينك وبين جوزك مشاكل؟

- لأ خالص، اشمعنى؟

وحكوا لأم روشان الموضوع من اوله لأخره، وانهم كانوا لازم يخلوا مسئوليتهم ويبلغهوها بحاجة زى كدة وهى اللى تتصرف

وف نفس الوقت بلغوا المدرسة بالموضوع، والمدرسة اتصلت بالبوليس..

والبوليس جه وقف قدام باب المدرسة فى انتظار عمو صاحب ابو روشان او راشيل اللى جى يخطفها عشان يخطفوه هو واللى يتشدد له

رحاب المليحي



Sunday, March 11, 2012

قصة غريبة جديدة


كانت قاعدة تتفرج من شباك الطيارة وعلى وشها ابتسامة عذبة تحمل الكثير من التفاؤل، محجبة، قمة فى الشياكة، لون بشرتها ابيض قشطة

تحسها من اصل تركى مثلا

لفت نظرى شكلها ودفعنى الفضول انى اعرف عنها اكتر.. قربت منها وقلت اجرب اكلمها عربى..

رميت عليها السلام، ف ردت السلام

قلت: انتى مصرية؟

ابتسمت وقالت بثقة: لأ، انجليزية

قلت: طب ازاى؟

قالت: انا متجوزة مصرى

قلت: حتى لو، ده انتى بتتكلمى مصرى احسن منى

ضحكت وقالت: هحكيلك حكايتى، انا دخلت كل الأديان، مفيش حاجة استريحت فيها

لحد ما قابلت جوزى وحبيته واعتنقت الاسلام.. فعلا الاسلام الدين الوحيد اللى حسيت فيه بالأمان وانى مستريحة، وافتخر انى مسلمة

قلت: طب ازاى بتتكلمى مصرى لبلب كدة، مش انتى عايشة ف انجلترا برضه؟

قالت: لااااااااا، انا عايشة فى بلدى التانية مصر

قلت: هه؟

قالت: مش مصدقانى، صح؟

قلت: لأ، طبعا مش مكذباكى، بس مش قادرة استوعب.. جديدة دى

قالت: انا عندى 5 ولاد، من وهما صغيرين اخدت قرارى ونزلت بيهم مصر.. من ناحية لإنى بحب مصر جدا.. ومن ناحية لإن فى انجلترا، لا هيكون فى تعليم ولا فى اخلاق.. قلت فى نفسى عشان يتعملوا صح ويتربوا صح يبقى اعيشهم فى بلد ابوهم

قلت: وجوزك فين؟

قالت: جوزى مقيم فى انجلترا، بسافر له كل كام شهر اقعد معاه شوية.. وبعدين انزل لولادى تانى مصر

قلت: حكاية غريبة!!

قالت: يمكن تكون غريبة بالنسبالك، بس بالنسبة لى هو ده الصح

قلت: ولادك ع كدة صغيرين بقى؟

قالت: لأ مش كلهم، بنتى الكبيرة جوزتها مصرى وعايشة مبسوطة فى مصر الحمدلله، وعندى ولدين فى الجامعة، وتوأم لسه فى ابتدائى

قلت: اممممم، وجوزك مش زعلان من عدم وجودكوا معاه؟

قالت: طالما احنا مبسوطين هو كمان راضى ومبسوط، وانا كل كام شهر بروحله انجلترا اخد له معاية تموين الكام شهر كله معاية من مصر.. وشايفة انى كدة بوفرله.. انى اخد منه الاسترلينى احوله مصرى واشتريله كل احتياجاته من بلده .. والحمدلله احنا عيلة سعيدة ومبسوطة

وصلت الطيارة ارض الوطن مصر

قلت: ربنا يكتر من امثالك، والله اسعدنى الكلام معاكى.. ادتينى بارقة أمل فى بلدى أم الدنيا مصر


رحاب المليحي