Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Saturday, November 19, 2011

لندن رايح راجع.. الحياء


- يا حوبا

- نحم، عايزة إيه منى؟

- إيه المعاملة دى؟

- هااااا، قصرى

- أنا شايفة أطفال آخرهم في ابتدائى بيشربوا سجاير فى الشارع.. هو دة عادى كدة بيس؟

- لأ مش صح طبعا.. القانون بيقول ان شرب السجاير من سن 16 سنة.. والكحول من سن 18 سنة

- لا والله؟ حتى فى دى منظمين؟

- يعنى هى السجاير دى المشكلة!! ده أنا والله قلبى بيوجعنى لما بلاقى اتنين في المدرسة لسه ماطلعوش من البيضا واقفين يبوسوا بعض في الشارع

- آه والله مشكلة فعلا.. ربنا يحفظ بناتك

- آمين، المشكلة إنك عايشة فى بلد مباح فيها كل حاجة.. ولازم تكون عينيك فى وسط راسك خصوصا طبعا لما يكون عندك بنات.. طب احكيلك على حاجة

- ارغى ارغى.. هو احنا ورانا إيه غير إننا نجيب فى سيرة الناس

- هههه، بنتى بتروح تمرين سباحة.. لما بتخلص بدخلها تاخد دش فى الحمام.. كانوا حكولى عن حاجة كدة.. ماكنتش مصدقاها بقى لحد ما شفت بنفسى.. إنك تلاقى الناس جوة رافعين شعار (ما أحلى عيشة الحرية)

- ...... إزاى يعنى؟ اوعى تقولى اللى في بالى؟ يا نهار اسود

- أييييييون، ياخدوا الدش وينطلقوا بقى عادى كدة وللا كأنها ف حمام بيت بابا الباشا.. وبرضه عند الرجالة نفس الكلام

- يعنى الأدشاش سداح مداح؟

- إخص عليكى يا جوجو ..كدة مخك يروح بعيد! لأ طبعااا.. كل دش لوحده مقفول عليه باب.. بغض النظر طبعا إن الباب نوعا ما شفاف يبين اللى وراه.. بس سيبك .. المهم فيه باب.. لكن المشكلة لما بيطلعوا من ورا الباب.. بينطلقوا بقى كدة عادى جدا.. حتى لو معاهم ولادهم بنات أو ولاد صغيرين.. عادى جداااااا (خليكى فريش احنا في رحلة)

- طب وانتى بتعملى ايه مع بنوتتك؟

- أساسا بدخل قرفانة مش طايقة نفسى.. بخليها على قد ما اقدر ماتبصش على حد وأقولها إن كدة عيب.. وأخليها تاخد الدش بالمايوة بسرعة.. هما بس عاملين أوضتين صغيرين جدا مقفول عليهم باب.. بدخلها فى واحدة فيهم وبلبسها بسرعة ونخرج من المكان

- كويس كدة.. لكن مفيش مرة سألتك اشمعنى هما بيقلعوا قدام بعض وأنا بتقفلى عليا وتقوليلى عيب!!!

- ساعات بحسها بتتفرج عليهم وهى مستغربة.. وساعات بشوف السؤال دة فى عينيها.. بس أدينى بحاول اربيها إن مش كل حاجة بتشوفها تبقى عادى ممكن تعملها.. حتى لما بيكون فيه ناس بتبوس بعض في الشارع بحاول الفت نظرها لأى حاجة تانية.. علشان بقت تركز بقى دلوقتى مع اللى بيحصل حواليها.. اينعم خمس سنين لكن قردة يعنى

- آاااه انتى هتقوليلى، أطفالنا المصريين كلهم قرود جيل البلاى ستيشين والفيس بوك

- لأ اسمعى دى بقى، الحكاية اللى ضحكتنى.. كان موضوع الموسم أصغر أب فى بريطانيا اللى سنه لا يتعدى 13 سنة.. فوجئ أبوه إن صاحبته اللى كانت حوالى 15 سنة حامل من ابنه.. إيه بقى اللى كان شاغل البوليس!!

- إيه يا ترى يا هل ترى؟

- إن أولا يثبتوا إن الطفل ده هو الأب الحقيقى.. لإنه ماكنش أول واحد فى حياة البنت دى.. وتانى حاجة إنهم وحشين شريرين عملوا كدة وهما لسه صغننين يا عين أمهم

- يا حييييييياااااام، لا تصدقى صعبوا عليا.. كلبى اتقطع ... اووووبس قصدى قلبى

- حتى يا بنتى المجلات، تلاقى بنتى مثلا بتجرى تتفرج على مجلة أطفال.. تلاقى بقى حواليها من كل ناحية مجلات من اللى بالى بالك

- يا عينى يا حوبا، هتلاقيها منين وللا منين.. للأسف الحال اللى إنتى فيه دة فى بلد غير مسلمة بتكونى نوعا ما عارفة تسيطرى عليه علشان بتكونى عارفة الخطر جايلك منين.. تعالى بقى شوفى عندنا فى مصر.. تلاقى عمليات إجهاض بتحصل فى إعدادى، مخدرات فى سن صغير برضه تلاقى

- آه للأسف متابعة وعارفة.. فاكرة زمان كان السؤال المتعارف عليه (بابا هو انا جيت ازاى؟).. وانا بقى كنت حاسة نفسى ناصحة.. كنت أقول سهلة يعنى.. الست تقعد تاكل تاكل تطخن تخلف

- هههههه، دة كان زماااااان أيام الأبيض والأسود.. دلوقتى تلاقيهم بيلعبوا كدة لعب مريب.. تسأليهم بتلعبوا ايه يقولولك (اييييه بنلعب عريس وعروسة)

- ربنا يستر والله على الأجيال اللى جاية.. لما باجى أفكر أعيش فين.. أقول لأ خلينى هنا أربى البنات تربية نضيفة وسليمة وحياة كويسة.. أرجع أقول طب ماهو هنوصل لسن خطر وهنا بقى الخطر بيبدأ فى أى سن مالوش قانون.. يعنى كفاية مثلا ان تقنعى الطفل من دول انهم مش المفروض يحتفلوا بالكريسماس اللى بيدوهم فيه أجازة فى اليوم دة فى المدرسة.. بالإضافة إنهم بيعملوا حفلة فى المدرسة وكل الأطفال بكل الأعمار لازم تشارك فيه.. دى أبسط حاجة يعنى.. هتقوليلهم احنا مسلمين مالناش غير عيدين أى أعياد تانية أرموها ورا ضهركم.. حلينى بقى مع دماغ الأجيال دى إنها تقتنع بسهولة.. هما شعارهم دائما ( يا أقنعك يا أقعنك مالهاش حل تانى)

- هههه، وأكيد لما بتفكرى تنزلى بيهم مصر بتخافى أكتر.. خصوصا بعد الحياة النضيفة اللى أخدوا عليها هنا صح؟

- بالظبط، هما برضه لسه صغيرين يعنى هيتأقلموا فى أى مكان تعيشيهم فيه.. بس زى ما بتقولى فى مصر مش بتعرفى الخطر جايلك منين.. فى الآخر بوصل لحارة سد وأدعى ربنا يسترها علينا وعليهم وخلاص

- يارب، طيب وبالنسبة للحجاب ناوية على إيه؟

- جيتى للنقطة اللى مش عارفة لسه هعمل فيها إيه.. عندك الشيوخ اللى هنا فى لندن طلعوا فتوى انك ممكن تخلى البنت تتحجب من بدرى من وهى صغيرة علشان تتعود إن دة لبسها.. مش تستنى لما تكبر وماتعرفيش تحكميها وتبقى عايزة تعيش حياتها مع صحابها الأجانب زى ما بتشوفهم لابسين وعاملين

- إمممم، بس دة سلاح ذو حدين

- بالظبط كدة، انا سايبها على الله بقى

- ربنا يعنيك ويسترها معاكى ومع كل اللى زيك يارب

رحاب المليحي

11 comments:

Anonymous said...

محمد شاكر
فعلاً مشكلة كبيرة انك تحاولي تربي أولادك على طريقة غير طريقة المجتمع اللي عايشين فيه

الصورة دي خضتني بجد

Anonymous said...

Ramy Elalfy نايس بجد تسلم ايدك

من حلقاتك دي حاسس اني عايش هناك
اسلوبك حلو اوي
ربنا يعينك على تربيه اولادك وتحميهم من اي خطر
ربنا معاكم ان شاء الله

Anonymous said...

Muhammad Fattouh
فعلا يا حوبا هما عملين زى القطط فى صفيحه الزباله اول مره تبلى ريقى تسلم ايدك زى العاده قمه فى الابداع و ربنا يكرمك فى تربيه بناتك

Anonymous said...

Abdallah Elrefaiey
ربنا يعينكي لانها فعلا مشكله بس اكيد انتي ليكي الدور الاهم بانهم دايما يبقوا تحت عنيك وربنا يباركلك فيهم وفي كل اطفال المسلمين

Anonymous said...

Amr Aly مشكلة كبيرة الحفاظ على الهوية المسلمة داخل مجتمع مادي بحت الامور الروحية لا تاتي في حسبانه

بس هما على اد الضياع الاخلاقي اللي هما فيه بس مش عايشين الشيزوفرينيا اللي بنعيشها يعني في الدول العربية ممكن ادام الناس شخصية واخلاق وبينه وبين نفسه وعالنت اخلاق وشخصية تانية تماما لان الممنوع مرغوب عندنا انما في أوروبا معتقدش ان فيه شيزوفرينيا ولا ايه

Anonymous said...

Fatma Alzihery
ياارب احفظهم وارعاهم وابعد عنهم كل شرور ياارب العالمين
المشكله انها بقت ظاهره وكانها مسيطره بين الاطفال مش عارفه لانهم بقوا يشوفوا سلوكيات غلط ومن كتر ما بقت تتكرر فاخدوها بالعاده مش عارفه بلاقى كدا مع ولاد اخواتى وبخاف عليهم جدا بس الاهم من كدا اننا نصاحبهم ونشوف ايه الى جواهم وربنا يحميهم يارب ..
بجد موضوع مهم تسلمى يا حوبا

Anonymous said...

Mohamed Mahdy
حلو اوى يا حوبا انتى اتكلمتى بحيادية شديدة جدا وعقلانية اكثر من رائعة بحيكى على سردك للموقف طبعا واسلوبك انا وضحتلك قبل كده انى معجب بية جدا لأنك بتتكلمى بحيادية وحقيقة ودة المهم
ناقشتى أكتر من مشكلة فى الموضوع كلة وطرحتيهم بسهولة بالرغم من ان كل مشكلة عايزة تفكير كبير للوصول لحل كويس
وبرضو هرجع اقولك عاملة جو جميل قوى مع حوبا ربنا يكرمك يارب ويدوم من نجاحك انا شايف ان ده نجاح باهر انك تتكلمى عن موضوع زى ده وتوصلى المعلومة بالسهولة دى
شكرا ليكى تقبلى تحياتى :)

Anonymous said...

مروة الزارع
ياعينى يا رحاب
على اد ما انا كنت بحسدك على حياتك هناك ههههههههههههه
بس بجد انتى وراكى مسؤلية جامدة
خدى بالك من بناتك ومن نفسك
وربنا يخليهملك ويحفظم يارب

Anonymous said...

Yasmine Madkour
ربنا معاكي يا بنتي :)

Anonymous said...

Basma Bahaa تحفة والله سلسلة النوتات اللى تجيب نقته دى!

بصى يا حوبا حاولى تفهميها ان دينهم غير ديننا وان دا مش مباح اصلا فى الدينين بس دى ثقافة مجتمعهم
اقصد هى خمس سنين اه بس لو كلمتيها ان دا مش صح وحرام وفهمتيها حرام ليه هتفهمك
وبسرعه كمان اطمنى:))))

ربنا معاكى ويحفظهم ليكى ان شاء الله

Anonymous said...

Mohamed Abd El Daym
ربنا يقويكى يا حوبا قعلا لازم عينى تبقى وسط راسك :) حلوة الحلقه .