Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, November 17, 2011

لندن رايح راجع.. التعليم


- حوبا، هى بنوتتك بترجع الساعة كام من المدرسة؟

- على تلاتة ونص.. بس النهاردة فيها ربع ساعة كمان زيادة.. علشان بعتولى ماسج ان الفصل بتاعها فى المكتبة ف عقبال ما يرجعوا المدرسة

- بعتولك ماسج؟؟ إيه التكنولوبيا دى!!

- آه يا بنتى، دى كل حاجة بماسج.. لو الجو مثلا بيمطر تلج يبعتوا يقولوا إن الأرض حوالين المدرسة مزحلقة علشان الناس تاخد بالها.. أو فيه مدارس بتكون التلج قافلها خالص.. ف يبعتوا يقولوا إن مفيش مدرسة النهاردة

- للدرجة دى ؟

- لأ أصل التلج ده بهدلة بجد.. أنا مرة مشيت عليه معرفتش أمسك نفسى.. وأخدت هدر محترم

- أى أى، طب قوليلى أنا سمعت إن التعليم والعلاج عندكم هنا ببلاش، صح كدة؟

- آه صح، لكن ده لا يمنع إنهم بيقطموا وسطنا فى الضرايب كل شهر.. أنا منكرش طبعا إنك بتاخدى خدمة كويسة قدام الضرايب.. زى العلاج بالمجان والتعليم ببلاش لحد ثانوية عامة.. بس المبلغ اللى بياخدوه مش قليل برضه

- بس طبعا دى حاجة هايلة.. ده فى مصر يتقطم وسطك ضرايب وبتاخدى على قفاكى وتقولى كمان

- ماهو مفيش وجه مقارنة طبعا

- هى المدارس هنا بقى من الساعة كام لكام؟

- من 9ص ل 3:30 ظ

- بس كدة؟

- آه يا شيخة حاجة تقرف.. مايخدهمش كدة من 7 الصبح ل 5 الظهر وللا حاجة!!

- هههه، طب وهى متقسمة عندكم برضه كى جى 1 و2 والحاجات دى؟

- لأ، فى سن تلات سنين ونص يدخلوا الحضانة ساعتين ونص بس فى اليوم.. ومن السنة اللى بعدها يبقى يوم كامل ويدخلوا ريسبشن.. وبعدها بقى يبدأوا أولى إبتدائى

- إيه ده الحضانة ساعتين ونص فى اليوم؟؟ لأ، كتر خيرهم

- بصى أنا فى الأول كنت بتريق كدة.. بس والله طلعوا مفيدين جدا.. لإن مثلا فيه أطفال عمرهم ما راحوا حضانة قبل السن دة.. وطبعا ماسكين فى مامتهم بقى ماقولكيش صريخ وصويت لما تسيبهم.. فالسنة دى بتكون مفيدة إن الطفل تدريجيا يبدأ يقعد لوحده ولو للفترة الصغيرة دى ويركز فى حاجة تانية.. من ناحية تانية فيه أطفال بيكونوا أنانيين بقى جدا.. فالحضانة بتعلمه إن مفيش حاجة اسمها بتاعتى فى حاجة اسمها بتاعتنا كلنا وكلنا نلعب سوا.. والأهم طبعا اللغة للى الإنجليزى بالنسبة له لغة تانية..

- أكيد بيشترطوا على اللى لغته الأساسية مش إنجليزى إنهم فى البيت يكلموه إنجليزى مش كدة؟

- لأ، خالص.. بالعكس دول دايما يأكدوا على الناس إنهم مايتكلموش فى البيت غير اللغة الأصلية بتاعة الطفل.. لإنه لما يعرف يقول جمل مفيدة فى لغة بلده.. هيلقط أى لغة تانية بسهولة.. بس بقى أهم حاجة لازم يتعلمها الطفل برة وجوه البيت التلات كلمات الساحرة (من فضلك، شكرا، أسف)

- اه الكلام ده مهم جدا عندهم انا عارفة.. وفيه طبعا أنشطة للطلبة أكيد

اه فيه ، غير اللى بيتعمل فى المدرسة.. بيطلعوهم فى الجنينة اللى جنب كل مدرسة ويلعبوهم بقى حسب سنهم او النشاط اللى التلميذ حابب يشارك فيه سواء كورة قدم أو كورة سلة أو قفز مسافات طويلة.. وفى نهاية السنة بيعملوا مسابقات بين المدراس ف الجناين برضه.. بس الكلام ده مش لحضانة ولا الريسبشن.. اللى أكبر منهم

- طب وبالنسبة للحضانة فى الساعتين دول بيعملوا فيهم إيه؟

- ساعتين ونص لو سمحتى، أول ما بيروحوا المدرسة بتاخد الحضور والغياب و ب ......

- الحضور والغياب من حضانة؟؟؟

- آه يا بنتى الإلتزام هنا من أول يوم.. وبعدين يقعدوا يلعبوا زى ما هما عايزين.. والمُدرسات بيكونوا لطاف معاهم جدا وصبورين بصراحة قوى.. ودة عموما يعنى مش بس فى الحضانة بس.. وبعدين يقعدوا ياكلوا بقى كلهم على ترابيزة واحدة..

- الأكل بيكون حلال؟ وللا بتكبرى علشان أطفال؟

- لأ طبعا حلال، المدراس اللى بيكون فيها نسبة عرب كتير بيراعوا الموضوع دة جدا.. حتى وانتى بتملى الفورم بيسألك فيها تحبى حاجة معينة لطفلك فى الأكل.. لإن كمان فيه أطفال عندهم حساسية من حاجات معينة..

- وكل دة ببلاش؟

- إنتى فاكرة يعنى بيأكلوهم إيه؟؟ ده مجرد بسكويت ولا كيكة مثلا وعصير أو لبن.. مش وليمة هى.. بس، وبعدين يكملوا لعب وقبل ما يمشوا بنص ساعة بيعلموهم إنه زى ما لعبوا يلموا اللعب كلها ويحطوها مكانها.. وبعدين يتلموا كلهم على السجادة فى الأرض بما فيهم المدرسة وتقرالهم قصة.. وخلاص كدة

- كل ده فى الساعتين ونص!! لا والله فيهم البركة

- إنتى بتتريقى، لأ، بجد بيفرقوا معاهم جدا بيبقوا مروحين مبسوطين وحاسين إنهم عملوا حاجة.. يا سلام بقى لو الطفل شخبطله شوية فى ورقة.. الميس بتاعته تقول له وااااو جميل، وتكتب عليها اسمه وتديها لولى الأمر على اساس إنه أبدع طبعا

- هاهاهاها، هما كدة بيحاولوا ينموا مواهبهم

- آه طبعا، بغض النظر يعنى إن الشخابيط دى بالنسبة لى بتكون مصيرها الزبالة.. لكن فعلا هما مع الوقت هتلاقى الشخابيط دى بدأت تعمل شكل.. واللى بيعجبنى فى التعليم عموما هنا إنهم بيحاولوا يخاطبوا عقل الطفل.. يشوفوا هو بيحب يعمل إيه موهوب فى إيه.. مش معلومات وأدلق فى دماغهم علشان يمتحنوا فيها وشكرا

- واكيد مش بيفختوهم مذاكرة من حضانة زى عندنا مش كدة؟

هقولك على حاجة واحدة بس وانتى تفهمى.. ساعات بيعملوا استفتاء لأولياء أمور الأطفال الصغيرين إذا كانت مثلا الواجبات كتيرة على الطفل اللى بياخدها فى البيت.. ويسألك عايز نديله واجبات ف البيت وللا لأ.. ونديله كتير وللا قليل

- فعلا؟؟؟ تعالى شوفى التعليم عندنا فى مصر.. تلاقى الطفل ذكى لحد قبل ما يدخل المدرسة.. لو عايزة بقى تعليم المستورد عليكى وعلى المدارس أم ألاف مؤلفة فى السنة.. الأب يدخل إبنه المدرسة من دول وياكل هو فول بقية السنة

- هاهاهاها، هنا مرفهين قوى.. بحس إنهم بيروحوا المدرسة فى وقت الفراغ.. السنة الدراسية تلات تيرمات مش اتنين.. نبدأ فى سبتمبر ونخلص فى يوليو.. كل شوية بقى أجازة.. مرة أجازة الكريسمس، مرة أجازة التيرم، وبرضه مدرسة بنتى عاجبنى قوى إنهم فى العيد الكبير والصغير أدوهم أول يوم فى العيد أجازة.. بس معتقدش إن الكلام ده بيحصل فى كل المدارس

- يااااااه، جامدة الحركة دى جدا.. بس هى امبارح ماكنتش لابسة اليونيفورم ليه؟

- ماهو سعادتك بقى، ليهم كدة أيام معينة بيروحوا بلبس خارجى، لأ، وكمان بيحددوا اللون اللى يلبسوه.. مرة يبعتولنا نلبسهم أحمر يا أصفر، ومرة يلبسوا لبس شخصية فى قصة.. وكمان كل شوية يطلبوا من كل طفل جنيه.. برضه كل مرة لسبب..

- بحقدددددد عليهم يا حوبا، أنا عايزة أرجع طفلة تانى واتعلم هنا من جديد.. ماليش دعوة.. عااااااااااا


رحاب المليحي

8 comments:

Anonymous said...

Aya Arafa
شكرا جدا يا حوبا
بس عاوزيين منك خطوات عملية في ازاي نضيق الفجوة بينا وبينهم مرة تانية شكرا يا حبيبتي

Anonymous said...

Mohamed Shouman
wana kaman 3ayz arg3 kid tany

Anonymous said...

Ahmed Vitch
والله ياحوبا احنا متابعين للحلقات خاصتك كلها
علي أمل إني بلدنا ونظامنا وتعلمينا وصحتنا وكل حاجة تبقي زي كده
أنا عارف إنه حلم جميل بس لو بطلنا نحلم نموت
بجد نتمني نكون كده !!

Anonymous said...

Basma Bahaa
لا طبعا عمرى ماتمنى ارجع طفلة تانى الا اذا كنت متأكده ميه فى المية انى هعيش طفولتى دى فلندن:)))))

Anonymous said...

Neihad Elewa
roro bas el madares el international 3ndna keda fe cairo ana mdrsty kanet rahebat we kanet keda kwysa awi awi awi awi we nzamha to7fa bas tb3n el 7komeya msh keda khales alah ykon fe 3onhom

Anonymous said...

Amr Aly
قولتي بيتمرنوا على القفز ما احنا عندنا القفز برده بس من فوق الاسوار

اما عن الوجبة المدرسية فإن متسرقتش ووصلت لحد المدرسة بتكون مسممة

بس ما اتعرضتيش لموضوع الدروس الخصوصية في المراحل النهائية وهل لي وجود ولا لا والضرب في المدارس والشتايم

وفيه زي مدير المدرسة بتاعتنا الله يرحمه ان عايش او ميت كان بيكتب اسماء العيال اللي عايشة في الدور انها ملتزمة وبتحضر الطابور ويقف واللهي على باب المدرسة يستنى الفشلة اللي جايين متأخر الساعة تمانية يدفع جنيه او نص جنيه حسب مقدرته المالية

وامتحانات الثانوية العامة واللطم والصويت والعياط واللي بيحصل دا موجود ولا ايه

Anonymous said...

Mohamed Abd El Daym
اكثر حلقه عقدتنى بجد ...بما انى مدرس :) حلوة يا حوبا مستنى الباقى ..قصدى من فضــــلك اكملى الحلقات . اســــــف على التأخيرفى الرد , شكـــــرا جزيلا ؛)

ابتكار لتصميم المواقع said...

دورات تدريبية فى لندن
مركز لندن للتدريب
دورات فى لندن
مركز تدريب في لندن
تدريب فى لندن
الدراسة فى لندن
مركز تدريب فى لندن