Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, November 21, 2011

لندن رايح راجع.. الحلقة الأخيرة


- هو احنا ليه ضاربين بوز كدة يا حوبا؟

- تفتكرى ليه؟

- علشان أنا خلاص مسافرة!!!

- طب برافو إنك عرفتيها لوحدك

- يا حوبا أنا اللى مسافرة.. أنا اللى المفروض أكون متضايقة

- إنتى عارفة، بطبيعة الحال الواحد اتعود على لحظات اللقاء والفراق.. بقيت عارفة إن مهما طالت لحظات السعادة مسيرها هتنتهى وكل واحد هيرجع لحياته تانى

- امممم، نظرة تشاؤمية شوية!!!

- لأ، بس زى ما تقولى الواحد قلبه قسى شوية مابقاش زى الأول.. عارفة يا جوجو لما دايما دايما قدرك إنك تسيبى كل الناس اللى بتحبيهم علشان هو ده نصيبك.. عارفة لما أهلك بدل ما ياخدوا ولادك ف حضنهم ويربوهم.. يبقى كل علاقتهم بيهم صور.. طول السنة بيتفرجوا عليهم صور بس.. علشان لما يشوفوهم شهر فى السنة يبقوا على الأقل شافوهم وهما بيكبروا ولو حتى فى الصور

- .............

- عارفة لما يكون أخوكى ساكن فى الدور اللى فوقيكى.. وفجأة وبدون أى مقدمات تقعدى اربع سنين من عمرك وعمره ماتشوفوش بعض علشان كل واحد فيكم فى بلد.. عارفة لما ولاده وولادك يتعرفوا أول مرة على بعض وهما فى المدارس

- هو ده للأسف تمن الغربة يا حوبا

- صح هو دة التمن.. بس غالى قوى يا جوجو.. غالى قوى أكتر ما تتخيلى

- حاسة بيكى والله، وعارفة قد إيه إنتى شايلة جواكى وساكتة

- محدش بيحس غير اللى بيدوق النار ويحس بلسعتها.. طول ما الناس شايفاكى فرحانة وبتضحكى وبتخرجى تقولك ايوة يا بختها يا ريتنى كنت زيها.. للأسف الناس دايما بتاخد بالمظاهر

- مش كل الناس بتقدر تتكيف مع الغربة يا حوبا.. فيه ناس بتكون عاملة زى السمك برة المية

- بصى هو أنا الحمدلله متكيفة لكن دة لا يمنع إنك ساعات بتحسى بالضعف برضه.. ساعات بتبقى عايزة حضن دافى ترمى فيه همومك.. ومهما كانت مصر فيها كل العبر بس هى البلد الأم ومش بيحس بالكلام ده غير اللى داق الغربة.. ومهما عمل فلوس أو بقى حاجة بيحس برضه إن فى حاجة ناقصاه

- طب تصدقى يا حوبا برغم إنى مقعدتش كتير فى لندن.. لكن فعلا مصر وحشتنى قوى قوى.. وانا فيها دايما اقول تجيلى بس الفرصة وأطلع منها.. لكن بجد لما بعدت عنها وبعدت عن كل اللى بحبهم هناك حسيت بالحنين ليها قوى.. فيها حاجات كتير بتشدك ليها تانى ومهما غيبتى عنها بجد لازم ترجعيلها.. دة كفاية إن أهلى وحشونى قوى ووحشنى مناكفتهم فيا

- وتفتكرى لندن هتوحشك؟؟ ماعتقدش

- ممممم، مافكرتش فى الموضوع دة يا حوبا.. أنا كل تركيزى إنى عايزة أرجع وأقعد أحكيلهم على كل الحاجات اللى شفتها هنا.. وأديهم الحاجات اللى جبتهالهم وبتمنى إن ذوقى يعجبهم.. بس متهيألى حتى لو البلد نفسها ماوحشتنيش هيوحشنى الحاجات الجميلة اللى شفتها فى البلد وفى الناس

- ........

- حوبا سرحانة فى إيه؟

- عارفة يا جوجو إيه أسوأ وأقسى وأصعب حاجة فى الغربة

- إيه؟

- إن كل ما يجيلك تليفون من مصر.. تردى وإنتى حاطة إيدك على قلبك إنك هتسمعى خبر حد عزيز عليكى

- يااااااااااااه فعلا مفيش أصعب من كدة

- لك أن تتخيلى بقى إن كل ما يجيلى تليفون برد وأنا متخوفة وأركز فى نبرة صوت اللى بيكلمنى علشان أشوف مخبى إيه وراها.. لحد ما أطمن إنها مكالمة عادية أفك بقى وأتكلم عادى

- كل مرة على كدة؟ فعلا صعبة بجد قوى.. الحمدلله إن كل مرة مخاوفك بتتطلع آوت.. يارب دايما

- لأ فى مرة منهم قررت أرد عادى وجالى خبر جدى

- الله يرحمه، ربنا يقوى كل المغتربين على غربتهم يارب.. فعلا مش سهلة خالص

- لأ خالص.. يكفى إنها بتموت فيكى حاجات كتير.. وفى نفس الوقت بتقويكى وتخليكى تتحملى المسؤلية وتتعلمى حاجات كتير.. يمكن لو كنتى قاعدة جنب أهلك ماكنتيش إتعلمتى نصها

- آه رموكى فى البحر وانتى مش بتعرفى تعومى وقالولك ياللا بقى ورينا شطارتك وإوصلى للشط

- أييييييوة بالظبط كدة.. ومن مكان ما رموكى لحد ما توصلى الشط.. بتتعلمى كتير وبتشوفى أكتر.. وفى نفس الوقت بتتجرحى وتتصدمى وتفرحى وتتبسطى.. طول ما انتى ماشية بقى بيكون عندك تداخل فى المشاعر غريب مريب

- سيبك انتى بس اللى أنا متأكدة منه إنى هوحشك.. صح، صح، إعترفى الإنكار مش هيفيدك

- هههه، طبعا يا حياتى ده انتى هتعمليلى فراغ كبير.. كفاية أسئلتك اللى ماكانتش بتخلص.. ماكنتش عارفة ألاقيها منك وللا من البنات

- كدة يا حوبا ماشى ماشى.. بس والله هتوحشونى.. ياللا أدينى عرفت السكة.. كل ما ازهق هجيلك

- لأ دة على كدة هتقعدى على قلبى طول السنة.. أنا بقول خليكى يا حبيبتى فى مصر وأنا اللى هجيلك

- دول الصحاب برضه يا حوبا!! لأ أنا اسهل إنى أجيلك لوحدى.. خفيف خفيف

- ماشى ياختى لما نشوف إذا كنتى هتعمليها تانى وللا لأ.. ياللا قومى كملى توضيب شنطك وماتنسيش حاجة.. علشان اللى هتنسيه مش هتشوفيه تانى

- هههههه، والله هتوحشنى لماضتك.. لكن مستنياكى فى مصر قريب.. ما تتأخريش بقى

- مش هتأخر ان شاء الله


رحاب المليحي

12 comments:

Anonymous said...

Mohamed Shouman
جميلة بجد يا حوبا
. وفعلا زي ما للغربة مميزات ليها سيئات برضه , بس في ناس بترمي أي شئ ورا ضهرها عشان تعرف تتكيف في الغربة وبينجحوا في ده

Anonymous said...

Silver Man Mahmoud
للغربة ثمن

وللعيش بمصر ثمن

وللعيش في تلك الدنيا اثمان

تحياتي

Anonymous said...

Muhammad Fattouh
فى السفر 7 فوايد يا
حوبا تسلم ايدك يا استاذه ديما بتمتعينا و الحمد لله الحمد لله خلصنااااااااااااااا هههههههههههههههههههههههههه

Anonymous said...

Fatma Alzihery
لأ ياجوجو خليكى
شويا.....
بجد يا رحاب كلامك اثر فيا اوى لان اختى بردو مسافره وانا بعتبرك زى اختى وحاسه بيكى اوى للاسف بنحبها وهيا السبب فى غربتنا وبنحبها بردو رغم قسوتها .. ربنا يصلح الامور ويسمعك كل خير وتنورى مصر بالف سلامه
هتوحشينى يا حوبا

Anonymous said...

Mohamed Abd El Daym
اوقات لحظات السعاده فى الدنيا بتنادينا بتقولنا تعالوا افرحوا ما تبصوش على النهايه اللى دايما هى عنوانى ..ورغم اننا مرينا بمواقف كتير تخلينا نتعلم اننا منفرحش اوى لان بعد اللقاء فى فراق الا اننا غصب عننا ولاننا نفسنا فى السعاده بنسيب نفسنا نغوص جواها وننسى النهاية دايما ..بس اتعودنا حبه كده وحبه كده ..رغم انك مسافره والحنين بيشدك للوطن ..لكن فى ناس فى قلب الوطن وحاسين انها وحشتهم اوى وغربتهم اقوى ...موضوعك طلع الكلاكيع اللى جوايا باين :) حلوة الحلقه يا رحاب ..بااى جوج مستنين السلسله الجديده

Anonymous said...

Amr Aly
الغربة بتموت فينا حاجات كتير

جملة صعبة أوي انا مش جربتها بس شوفتها في اقرب ما عندي
لما خالتي تصحى الصبح في غربتها على خبر اخوها الاصغر اللي هي مربياه ومات فجأة وتتحرم حتى انها تشوفه وهو ميت
بنتحرم من حاجات كتير اهمها لحظات جميلة مم.

Anonymous said...

Ahmed Vitch
حوبا بجد انتي رائعة
دائما فى سردك وده فى كل حلقاتك
بحق راااااائع
بالتوفيق ليكي دائما صديقتي

Anonymous said...

Basma Bahaa
hhhhhhhhhhhhhhh eslopek to7fa wallahy ya 7oba bravo 3aliki;) wahy el 3'orba nafa3etna b7aga;)))

Anonymous said...

Sara Abdeen
حوبا ما حنا كنا كويسين
وعمالين نقر عليكي لازم تزعلينا كده في الاخر ليه بقي :(

Anonymous said...

Abdallah Elrefaiey
قاسيه جدااا بس
اكيد صح جداا ووصفتي الغربه زي اي حد عاشها وجربها
تسلم ايدك وكانت سلسة حلقات تحفه:)

Anonymous said...

الوليد اسماعيل
عشان انا مجرب عارف ان لحظة لقي الاحبه في الغربه مالهش زي ..لكن بقدر جمال الاحساس ده لحظة الفراق بعد اللقي مالهاش وصف....بس هيا الحياه وتصاريف القدر...شكرا علي انك متعتينا يا حوبه بالحلقات ..

Boundless Technologies (Pvt) Ltd. said...

Incidentally, I like the way you have structured your site, it is super and very easy to follow. I have bookmarked you and will be back regularly. Thank you
security equipment