Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, November 25, 2011

يا حمادة يا بابا


- حماااااادة، يا بابا

- هااااا، عايز ايه يا اتش يا يابنى؟

- تعال يا بابا كدة نشربلنا سجرتين ف البلكونة ونرغى شوية

- فاضيلك انا بقى !!!

- وراك ايه يعنى؟

- بتفرج على الملبن اللى قاعدة ف البلكونة اللى قدمنا، لووووز

- يا بابا الحركات دى قدمت قوى من ايامكوا لما كانت البنت لما تتجوز عرفى تقيموا عليها الحد، دلوقتى احنا ف عصر الحرية، لا ظابط ولا رابط، اللى عايز تعمله اعمله.. انت حر، عيش مع اللى يعجبك وسيبها وقت ما يعجبك

- ايوة يا اتش يابنى هو احنا كنا عايشين، ده انتوا اللى ايامكوا لوز، جالكوا كرشة نفس من كتر الحريم.. هى شغلانة المأذون انقرضت من شوية! مهو من عمايلكم

- طب قولى بقى يا حمادة، هو انت اتعرفت ع بيرى اللى هى أمى ازاى؟

- فاكر انت الفيس بوك؟ تسمع عنه مش كدة ؟؟

- يااااه ده من زمان قوى، ده انت طلعت قديم قوى يا حمادة؟ ماله بقى؟

- ايامها بقى كنت شاب روش كدة ماجبتنيش ولادة، البنات كلها بتجرى وراية، ف بيرى اللى هى امك اتعرفت عليها بقى ع الفيس

- حمادة الالش ده برضه قدم قوى، ما علينا كمل

- الاول ماكنتش واخد بالى منها، عادى واحدة زى اى واحدة ع الفيس.. شوف لما يكون عنده الف فريند، هتركز مع مين ولا مين! المهم هى لما لاقيت كدة، حطيتنى بقى ف دماغها.. وانت عارف يا اتش يابنى صنف الحريم دول ملاعين.. لما يحطوا حد ف دماغهم ياللا السلامة

- عملت ايه بيرى يا حمادة؟؟ شوقتنى

- حطيتنى بقى فــ ....

- حطيتك ف دماغها هااااااااا ؟؟؟؟

- لا يا اتش، حطيتنى ف الجروب بتاع الكلوز فريندز.. بحيث ان اى نفس اتنفسه ع الفيس.. سواء استيتس ولا شير لفيديو.. يجلها بيه نوتيفيكشن ع طوووول، وقعدالى بقى 24س ع فيس.. كل ما يجلها انى موجود وعملت حاجة عندى ع الهوم تروح راشقنى لايك صاروخ.. عشان قبل زحمة لايكات الحريم بقى

- اممم، بيرى طلعت قطة شقية اهو، وانت بقى اخدت بالك منها يا نمس ولا عملت عبيط ؟!

- مرة ف التانية يا واد يا اتش قلت صدفة، لكن لما لاقيت الموضوع ده متكرر.. عشرتلاف لايك ف اليوم الواحد.. اخدت بالى، روحت داخل بقى ع بروفيلها اشوف حكايتها ايه.. اشوفلها صور وللا اى حاجة

- لاقيتها مزة طبعا؟

- اسكت ده انا راشقت ف حيطة ف اول تعليق ليا عندها.. لاقيت صورة واحدة صاروخ كدة يا واد يا اتش، روحت بقى نافش ريشى وقلت اسبلاها وانت عارف حمادة ابوك نمس النماميس..

- ايه عملت مكسوفة؟

- ياريت، طلعت صورة صاحبتها مش صورتها، صاحبتها عاملالها تاج ع الصورة عشان امك اللى مصورهالها.. شوفت الخيبة

- اوووووووبس، قابل يا معلم

- لا ما انا بقى بعت لها ماسدج بريفت اعتذرتلها مع كلمتين بقى من اللى الجنس الناعم دول بيتضحك عليهم بيه، خلصت الليلة

- يعنى بدأت بلايكات وانتهيت بعيال

- ايوة، ماتفكرنيش بقى، اياااااااام، بعد ما اتجوزتها صممت ان احنا الاتنين نقفل الفيس وننساه بخيره وشره، عنننننننن

- والله يا حمادة يا باباية، اللى اكتشفته ف صنف الحريم ده، إن مهما الدنيا تتطورت ومهما التكنولوجيا عدت كل المراحل، إلا ان الجنس ناعم دول مش بيتغيروا، نفس الدماغ ونفس القلب ونفس الاسلوب، لكن مع بعض التطورات

- حماااااااااااااااااااااااااااااااادة

- احم، عن اذنك بقى يا اتش لحسن بيرى بتنده عليا

- صحيح، نسيت اقولك يا حمادة يا والدى، ان احنا كمان ممكن نقف اسووود قدام الجن الازرق، لكن بنيجى قدام حريمنا و ...... اقولك اجرى شوف بيرى عايزة ايه لحسن ماتبيتش النهاردة ف البيت

رحاب المليــــحي

15 comments:

Anonymous said...

Maram El-Gendy HHHHHHHHHHHHHHHHHHHHHHHHHHHHH mhwa dah elle na2s f3ln w 23tkd eno 7y7sl :D

wallahe enteee mshoftsh leke 7aga w7sha :D btl3ene mn moody
emwaah

Anonymous said...

Asmaa Bent Elshams
جامد فحت بجد
وربنا جامد جامد ههههههه
بموت أنا ف الحركات دي

Winda Tiodang said...

i am a new fashion blogger from indonesia living in singapore :) i really like your blog. i will really appreciate & it will be an honor to have u as my blog member (blog follower)

and of course i will folback!:D also, u can mention me anytime on twitter @tiodang if you want me to check out your latest post & leave a comment ^^ ,please list me on twitter, so i will know u're my follower!! ;)

i've just recommend your post to google!u can check it! that's what u got if you keep in touch with my blog too!! hope u will do the same ^^
(u can add me on facebook and contact me at : cheeringwinda@yahoo.com)

Anonymous said...

Samah Hassanien
ههههههههههههههه حلوة
اوى

Anonymous said...

Sarah El-Eskafy
يانهار اسود لسة هنستنى كتير بقى على كده عشان نوصل للمرحلة دى

Anonymous said...

Ramy Elalfy
ايه الجمال ده كله

عجبتنننننني جدا جدا

Anonymous said...

Rody
جامدة اوى بجد

Anonymous said...

Dalia Hazem
ههههههه حلوة اوي يا حوبا

Anonymous said...

ههههههههههههههه حلوة يا أروبا :P
نرمين

Anonymous said...

Basma Bahaa
ههههههههههههههههههه
جامدة جدددددددا

Anonymous said...

Ahmed Mamdouh

لا انا لأ :D :D

Anonymous said...

Mo'men Sa'ad
هههههههههههههه .. حلوة قوي بجد يا حمادة :D

abhasoft said...

مشكووور

Anonymous said...

Ayat El SaYed
ههههههههههههههههههه حلوة جدا..بس انا بدأت اشك فحاجة..هي بيري وحشة للدرجة دي ؟؟..يعني ولا كانت حطة صورتها علي الفيس ولا انتي كمان دلوقتي حطيتي صورتها مع الولد وباباه سوبر داد ؟؟ :D :D

Anonymous said...

تجولت فى مقالاتك الرائعه .... أحسست اننى فى حديقه مترامية الاطراف ، كل ركن فيها له طابعه الخاص ... وان كانت الرائحه العطره تعم المكان ، شكرا جزيلا صديقتنا العزيزه ، على هذه المتعه الذهنيه من خلال كلماتك الرقيقه الرشيقه .... مع خالص تحياتى وتمنياتى لكى وعائلتك الكريمه بالصحه والسعاده ... آمين

احمد الشيخ