Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, November 14, 2011

لندن رايح راجع.. الشوبينج وخلافه

حوبا، حوبا.. مش هنخرج؟ ها، مش هنخرج ؟؟ ها، ها

- لأ لأ، كدة قلبتى على زنانة بالكهربا.. حد يكبر فى ودانها مش كدة.. إهدى يا ماما.. حاضر.. نخرج ما نخرجش ليه صغيرين.. عايزة تعملى إيه النهاردة؟

- شوبينج، عايزة اعمل شوبينج.. أجيب هدوم بقى ألوانات كدة ومعاهم الإكسسورات بتاعتهم.. ممم، وإيه كمان يا بت يا جوجو؟ إيه كمان؟

- طيب طيب، حاضر.. لأ، ومفيش أسهل من إنك تلاقى إكسسورات ع الهدوم.. المحلات فيه منهم بيكون عامل سيكشنز كدة ألوانات معينة للهدوم ومعاها الإكسسورات اللى تناسبها وساعات الشنط كمان.. حاجة عقد كدة

- طيب ياللا بقى حنستينى بما فيه الكفاية

********************

- هو إحنا نازلين كدة على فين؟

- هنركب المترو

- وده أنفاق بقى وللا إيه نظامه؟ إيييييه دة واو.. هما كام خط مترو؟

- اتناشر باين.. خدى الخريطة بصى فيها

- ؟؟؟؟؟ مش فاهمة حاجة

- ماهى دى الخطوط كلها مع بعض متشابكة على الخريطة.. تشوفى إنتى عايزة تروحى فين.. مثلا ساعات بتكونى محتاجة تغيرى من خط للتانى.. ف بتشوفى هتنزلى فى أنهى محطة وتاخدى خط مترو تانى اللى هيوصلك..... جوجو، بسبس

- .... آه ، آه معاكى معاكى.. بس مش فاهمة حاجة.. أو مش مستوعبة يعنى الخريطة العنكوبتية دى

- ما أنا كنت كدة برضه أول ما جيت.. وكنت بخاف آخد المترو أحسن أتوه.. بس مع الوقت بقى اتعودت.. أظرف حاجة فى البلد دى إن المواصلات بتوصل كل الأماكن ببعض.. مهما كان المكان بعيد.......... ياللا وصلنا أهو

- إلا هو دة أسانسير؟ فى محطة المترو!! يا ما شاء الله.. وده لعامة الشعب كدة عادى!!

- ههههه، آه لعامة الشعب.. هو أساسا معمول لكبار السن ولكراسى الأطفال والمعوقين.. بس برضه عادى إن أى حد يركبه مش هيقول لأ.. ياللا علشان نطلع على الشارع

*********************

- إيه دة ؟ الله!!! دة سوق دة؟ عامل زى سوق الجمعة كدة ليه؟

- ده يا ستى الماركت.. بيبعوا فيه أكل.. سواء بالكيلو أو بالواحدة أو بجنيه

- بجنيه؟ مش فاهمة

- يعنى بيبقى البياع عامل أطباق، الطبق بجنيه.. يعنى شوية طماطم فى طبق، موز، خيار، كوسة.. كدة يعنى، فخمتو؟

- آها، طب حلو دة والله

- هو حلو طبعا.. بيوفر كتير.. بس إنتى عارفة نظام البياعين بقى، ممكن يكون حاططلك حاجات مضروبة فى النص ماتاخديش بالك منها

- مممم، طب أنا جعانة

- لأ مش وقته، يللا بقى علشان الشوبينج بتاعك دة هياخد اليوم كله لوحده

- عااااا، طيب..... وااااااو، إيه فتارين المحلات دى يا حوبا!!!! دى تهبل

- لأ ما هما هنا أساتذة إنهم يخلوكى تصرفى اللى معاكى وإنتى مبسوطة.. من أسلوب عرضهم للحاجة وكمان طريقة جذب انتباهك ليها

- دة فيه حاجات كتير قوى عاجبانى.. والوقت هيضيع إنى فى كل محل أدخل أقيس

- خلاص خديهم البيت وقيسى براحتك.. عندك 28 يوم علشان تبدلى الحاجة أو ترجعيها وتاخدى فلوسك

- وااااااااو؟ إيه الكلام الجامد دة!!! ناس ذوق ذوق بصراحة..

- طب بصى المحل دة.. فيه هنا .........

- تعالى ، تعالى، محل ديزنى يهبل يا حوبا يهبل.... إييييييه دة؟؟؟ ده أنا عايزة أشتريه كله

- أه يا حياتى، ما أنا عارفاكى تموتى ف الهيافة.. بس مانكرش إن الحاجات وهى مترصصة جنب بعض كدة تهبل.. بس أنا آخرى صورة جنبهم وخلاص.... عارفة ممكن بكرة بقى علشان الويك إند أوديكى (الكار بوت)

- نعم؟؟؟ كار مين؟ وبعدين مش النهاردة الجمعة يا سُطل!!!!

- توب عليا يارب، هو إنتى لسة مش واخدة بالك إن الجمعة هنا يوم زى أى يوم فى الأسبوع.. الويك إند با قطة سبت وأحد.. أما يا ستى الكار بوت دة فهو عبارة عن ماركت برضه الناس بتجيب الحاجات اللى هى مستغنية عنها سواء جديدة أو مستعملة وبتحطها فى عربيتها وتقف بقى تبيعها فى الماركت بأسعار مناسبة

- حلوة فكرته.. بس مش طالباه هعمل بيه إيه؟ هو أنا جاية أجيب حاجات مستعملة وللا إيه؟

- خلاص فيه ماركت تانى بيكون للحاجات الجديدة بس.. تلاقى فيه بقى من كل بستان زهرة.. يعنى أدوات مطبخ تلاقى، هدوم تلاقى، أجهزة إليكترونية شغال، لعب أطفال. وطبعا أكل أشكال وألوان وطازة بيتعمل قصادك.. فيه منهم اللى حلال وفيه لأ.. ها، إيه رأيك؟ تروحي؟

- ممم، مايضرش.. آهو الواحد برضه ياخد فكرة.. ودة بقى بتلاقى فيه حاجات كويسة تناسبك؟

- أه طبعا، وبرضه بيعتمد على حسب احتياجاتك. بس المفيد اللى فيه إنك بتلاقى فيه حاجات بنص سعرها برة

- برة إيه؟ برة لندن؟

- جرررررررر، برة الماركت.. يعنى في المحلات بتكون أغلى وهى هى نفسها.. بقول لك إيه إنتى واضح إنك جوعتى وخرفتى.. يللا نروح ناكل أحسن


رحاب المليحي

6 comments:

Anonymous said...

Muhammad Fattouh
اكلتو ايه اكيد سمك و بطاطس صح ولا وكلتيها فول برضو ما المصرى مصرى فى اى حته يدور على حبوب منع الفهم با منكاش

Anonymous said...

Mohamed Shouman
جميلة قوي يا حوبا

Anonymous said...

Abdallah Elrefaiey
جميله يارحاب بس انا ملاحظ ان جوجو هتجننك علي علي الاخر :)

Anonymous said...

Soliman Salem ‎-
خلاص خديهم البيت
وقيسى براحتك.. عندك 28 يوم علشان تبدلى الحاجة أو ترجعيها وتاخدى فلوسك

الكلام ده لو حصل هنا كانت الناس دى قفلت من زماااااااااان كنتى هتلاقى الناس تاخد الطقم وتهريه لبس وبعدين ترجعه وتاخد طقم غيره

Anonymous said...

Sara Abdeen
عاوزه الكار بوت ده هنا

حلو اوي ناس مبتضيعش وقها ولا فلوسها
ربنا يقويكي بقي علي جوجو::))))

Anonymous said...

Basma Bahaa
makontesh a3raf en el wekala liha far3 f london":)))))):$