Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, November 23, 2011

ليه يا بابى؟


(جنة) بنوتة مصرية عندها 7 سنين، اتولدت فى لندن وعايشة ومتعايشة فيها.. لكن لما تسألها :

- مصر ولا لندن؟

تبتسم ببراءة الأطفال المعهودة ومن غير ما تفكر ترد تقولك:

- مصر

لما تسألها:

- طب ليه مصر؟ وانتى مش عايشة فيها واوضتك ولعبك ومدرستك ف لندن

ترفع عينيها ف السقف وال يعنى بتفكر وتقولك:

- عشان جدو وتيتا فى مصر، عشان اقاريبى اللى بحبهم فى مصر، عشان بتفسح فى مصر، عشان بحب مصر

­­­­­­­­­­­­­**************

(جنة) راحت مع بابها ومامتها عند السفارة المصرية ف لندن.. لاقتهم بيهتفوا وقفت تهتف معاهم وهى واقع منها نص الكلام مش سمعاه

- الشعب يريد ..... تا تا _ تت تا

بتمشى مع نغمة الهتاف (اسقاط النظام)

عمالة تهتف بحماس وتبص حوليها تلاقى كل الناس بتهتف وعدسات التلفزيون بتصور.. لما روحت البيت سألت بابها:

- هو احنا كنا هناك ليه يا بابى؟

بصيلها فى حنان وقالها:

- كنا وافقين عند السفارة يا جنة عشان فيه ناس وحشين فى مصر بيضربوا الناس الكويسة.. ف احنا عايزنهم مايضربهمش ويتعقبوا.. مش انتى لما بتعملى حاجة وحشة مامى بتعقبك؟

- اممم، اه، ممكن تزعق لى، تضربنى، ماتخلنييش العب جيمز، لكن مش تودينى عند السفارة وتفرج الناس عليا

- هههههههه، لا يا حبيبتى الموضوع هنا مختلف.. دول ناس كبار وحشين قوى قوى، عشان كدة العقاب بتاعهم لازم يكون اكبر بكتييييير من العقاب بتاعك يا جنة

***************

قعدت (جنة) تتفرج على نشرة الأخبار مع بابها.. نفسها تقوله "ما تجيب كرتون قرفتنا بنشرة الاخبار"، لكن كل ما تبص له وتبقى عايزة تفتح بوقها تلاقيه مركز قوى ف تسكت

بس كانت عايزة تعرف هو ايه اللى بيحصل بالظبط ف سألته:

- بابى، هو الناس متعورة كدة ليه؟؟؟ الدم كتير قوى يا بابى، انا مش قادرة اتفرج

- فاكرة لما قلت لك ع الناس الوحشين؟ اهو هما دول اللى بيضربوا الناس الطيبين، الكويسين.. هما دول اللى عايزين يضروا بلدنا ويخربوها.. ولما الناس الكويسين بيحاولوا يقولولهم لأ، بيضربوهم ويعوروهم

- هو يعنى لما انا اقول لمامى على حاجة لأ، هتعورنى كدة؟

- لا يا حبيبتى هى تقدر.. دول كانوا جابوها من قفاها بقوانين البلد هنا، احم، قصدى لا طبعا يا حبيبتى، ماما بتحبك ولا يمكن تعمل كدة.. وهى لو بتزعق لك ف ده عشان مصلحتك عشان تبقى شاطرة وحلوة والناس تحبك

- طيب يا بابى مهو يمكن اللى انت بتقول عليهم وحشين دول قصدهم كويس وانتوا اللى مش عارفين!

- لا يا حبيبتى هما من الظاهر بيبانوا ان قصدهم كويس لكن من جواهم هما وحشين ومليانين شر.. هو فيه حد كويس يضرب الناس بالقسوة دى؟

- طب هما ليه فيه منهم نايمين على الارض كدة؟

- نايمين؟ لا يا حبيبتى دول ميتين

- يعنى هما طالعين عند ربنا؟

- ايوة

- طب ليه صحابهم بيعيطوا، مش عند ربنا احسن من هنا؟ مش انت قلت لى كدة؟

- ايوة يا حبيبتى احسن طبعا كتير، لكن لما يموتوا موتة ربنا.. بس اللى بيحصل فيهم ده حرام، عشان بيتضربوا من الناس الوحشين لحد ما يموتوهم ومفيش فى قلوبهم رحمة

- طب صحابهم مش بيروحوا ليه؟ مش انت قلت لى اللى يغلط ويتعاقب المفروض مايعملش كدة تانى؟ يبقى مادام هما زعلانين على الميتين يمشوا بقى عشان الوحشين مش يضربوهم.. صح؟

- مابقاش ينفع يا جنة، صحابهم اللى ماتوا وصوهم وقالهم اوعى تمشوا من غير ما تاخدوا حق اخواتكم اللى ماتوا، هما ماتوا فداء لمصر.. يعنى ماتوا عشان بيحموا بلادهم من الناس الوحشين.. يبقى لازم صحابهم اللى لسه عايشين وبصحتهم يكملوا مشوارهم

- بس يا بابى انا شايفة فى التلفزيون فيه ولاد وبنات كتير قوى، هما مش خايفين من الضرب ده كله، دى مامى لوحدها بتخلينى اقف كاشه وخايفة من زعيقها.. واكيد كل واحد فيهم عنده مامى بتصرخ فيه.. يبقى ازاى مش خايفين من كلللل الناس الوحشين دول؟

- عشان ربنا معاهم وهيقويهم ان شاء الله على الناس الوحشين دول.. ومهما الوقت طال لكن ان شاء الله ربنا هينصرهم عشان هما اللى صح.. وربنا مش بيرضى ابدا بالظلم، مش بيرضى ابدا بالوحش

- اهىء اهىء اهىء

- مالك يا جنة؟؟ بتعيطى ليه؟

- بص يا بابى، بص البيبى ده.. ده مات.. طب هو عمل ايه وحش عشان يموت؟ هو لحق يعمل حاجة ولا حتى يتكلم ولا يمشى!!! ده لسه مش فاهم حاجة، ده لسه ماقلش حتى كلمة مامى.. لسه يادوب جى الدنيا برىء وبيتعرف على اللى فيها.. قوام كدة يبقى الترحيب بيه انهم يموتوه!!!!!!

- حسبى الله ونعمة الوكيل على كل ظالم ومفترى.. حسبى الله ونعمة الوكيل على كل قاتل وخاين.. ربنا يا بنتى هينصرنا ان شاء الله.. ويجيب حق كل اللى ماتوا.. وربنا يصبر الجميع ويرحم الجميع

رحاب المليحي

(ماشفتش بعينى، لكن حسيت بقلبى تأثرا بالأحداث)

18 comments:

Anonymous said...

Nona El Shamy ‎3agabteenyyyyyyyyyyyyyyy

Anonymous said...

حلوة قوي يا حوبا بجد .. :)
Mo'men

Anonymous said...

Ahmed Mamdouh
جميلة اوي و مؤثرة اوي

Anonymous said...

Momen A Karime
تحمل اكثر من معنى وليها طعم ولون وريحة من الاخر احسنتى يا حوبا

Anonymous said...

Sarah El-Eskafy
‎:(

Anonymous said...

Diara El-Masry
أعجبتنى كثيراااااااااا

Anonymous said...

Maram El-Gendy
Helwa Aweeee :(((

Anonymous said...

Ayat El SaYed
وقفت عند ( دول طالعين عند ربنا ) ..... قلبي وجعني

Anonymous said...

Ramy Elalfy
وجعتني علي فكره

Anonymous said...

Mohamed Shouman
ليه بقي كدة بقي
:S

Anonymous said...

Amr Aly
عميقة جدا يا رحاب بين سطورها تحمل الكثير

Anonymous said...

Blue Jasmine
الشعب المصري ده مافيش لا اطيب ولا احن منه وحب البلد متربع فى قلوبنا صغيرين وكبار ربنا يحفظك ويحميكى يامصر وينصرك اللهم امين

حَنيّـن نِضال said...

حسبي الله و نعم الوكيل . . وان شاء الله ربنا ينصر اخواتنا بمصر و يحميهم و يحمي مصر بيهم

Anonymous said...

Marwa Marouf
likeeeeeeeeeeeeeee awyyyyyyyyyyyyyyyyyyyyy

Anonymous said...

والله يا ريحاب بيحصل حوارات زي ديه فعلا في بيوتنا بالضبط و الاطفال عندهم منطق واسئلة واجابات غير متوقعة شكرا علي التاج
yasmine sheira

Anonymous said...

تحفه يا رحاب بجد
نانسى صفوت

Anonymous said...

Shahenda Salem
Eh Elgamal dhhhhh to7fa , to7fa WAllahy .....

Anonymous said...

Ahmed Elsheikh
رائعه من روائعك يا
رحاب ..... شكرا جزيلا