Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, November 16, 2011

لندن رايح راجع.. الفسح


- حوبا، أنا عايزة أغير صورة البروفايل على الفيس بوك

- وأنا مالى ما تغيريها

- إحم، مهو أنا عايزة بقى نخرج نتفسح علشان اتصور باللبس الكديد اللى جبته

- آههههه، قولى كدة بقى.. بلاش، بلاش، علشان الحسد

- قومى ياللا بقى بطلى رخامة

- إنتى يا بنتى مش بتتهدى من كتر الخروج.. إيه الناس دى؟ حاضر يا ستى

***************

- واااااااااو، هى التماثيل دى دهب؟؟

- مطلية بالدهب..

- وهو دة قصر وللا مؤاخذة؟

- سعادتك قدام قصر الملكة

- وااااااو، فعلا؟ دة كميل خالص.. هو دة كبير وللا أنا متهيألى !!!

- لأ نهائى يا حياتى.. دة يا دوب 775 أوضة.. منهم 52 أوضة للعيلة المالكة والضيوف.. و188 للشغالين فى القصر.. و92 مكتب.. و78 حمام.. وقسم شرطة.. واتنين مكتب بريد.. واللى شغالين فى القصر حوالى 400 شخص.. بسسسس

- !!!!!!......؟؟؟؟؟......!!!!!!!

- جوجو، مالك فتحتى بقك وبرقتى كدة ليه؟؟

- ......!!!! كل دة موجود جوه القصر؟ وطبعا من سابع المستحيلات إننا نشوفه من جوه؟

- علشان تزدادى تتنيح.. لأ ينفع تدخلى.. بس بفلوس ومش كل الأوض متاحة للفرجة.. وممنوع التصوير.. وده اللى خلانى مرضاش أدخل.. دة غير إن التذكرة غالية

- إممم، إيه الرخامة دى.. ده الواحد هيبقى عايز أكيد يتصور جنب كل حيطة فى القصر

- ياللا تعالى أصورك قدامه علشان نكمل المشوار

- هو الحرس دول مش بيضحكوا خالص يا حوبا؟

- لأ مش المفروض إنهم يضحكوا ولا يتحركوا من مكانهم.. حتى لو روحتى تتصورى جانبهم ولا هيتحركوا.. وعلى فكرة فيه كمان تغيير الحرس الناس بتيجى مخصوص تتفرج عليه

******************

- إنتى عارفة إنك ممكن تحضرى جلسة ف مجلس الشعب

- نعممممم؟؟

- أيييييون، لأ وكمان ببلاش

- ازاى يعنى؟

- ينفع تحضرى لكن لازم تدخلى مع عضو منهم مش مع نفسك كدة

- وازاى تجيبى العضو ده اساسا؟

- عادى اللى بيكون ماسك المنطقة بتاعتك مثلا، بتبعتيله إنك عايزة تحضرى

- كدة بيس يا مان؟

- ههه، ايوة يا جوجو كدة بيس

- كملى عليا بقى، هو مش دة باين بيت رئيس الوزراء؟

- ايون

- بيته الشخصى يعنى؟

- لأ طبعا مش بيته اللى ورثه عن الماما بتاعه، ده بيت بتخصصه الحكومة لكل رئيس وزراء وبيسموه: عشرة داونينج ستريت.. اكيد سمعتى المصطلح ده قبل كدة

- هه؟؟؟ آه طبعا سمعت.. امال انا جاهلة يعنى!! طب وعادى كدة الناس واقفة تتصور قدامه؟

- آه عادى، طبعا ف مصر متقدريش تهوبى ناحية أى مكان موجود فيه مسئول كبير

- طبعاااااااا

- عارفة، عارفة... تعالى بقى أوديكى جونينة حوا

- يا بنتى دى لندن كلها جناين.. دة أنا أعصابى خلاص تعبت من كتر الخضرة اللى حوالينا

- هههه، طيب يا اختى، الجنينة اللى هوديكى ليها دى بفلوس.. علشان فيها أشكال وأنواع من الشجر والورد فيه منهم عمره أكتر من 100 سنة

- وااااااو، طيب احكيلى كمان عن المتاحف.. كلها بفلوس طبعا؟

- لأ خالص، فيه كتير منهم ببلاش، فى مثلا متحف التاريخ الطبيعى ودة بيعرض التاريخ الطبيعى للأرض من فترة ما قبل التاريخ ولحد دلوقتى.. الحاجة اللى بحبها فى المتحف دة عاملين كدة جزء خاص بالزلزال.. لما تقفى عليه يبدأ يتهز بالتدرج من هزات بسيطة إلى أقوى..

- وااااااو، عايزة اروح يا حوبا، عايزة اروح

- حاضر، حاضر، من غير زن طيب.. فيه عندك كمان المتحف البريطانى.. فيه قسم خاص بالحضارة الفرعونية.. والغريب بقى إنك تلاقى فيه منحوتات فرعونية اتنقلت بالكامل فى المتحف دة.. فيه كمان ...........

- مش كفاية تحنيس بقى.. وياللا بينا نكمل الرحلة

- هاتهدى حيلى أنا عارفة.. ياللا بينا


رحاب المليحي

9 comments:

Anonymous said...

Abdallah Elrefaiey
جميله يارحاب

Anonymous said...

Ganga Hoba
ah b2aaaa 3ayzeeen el pica hoa da 2sr el maleka?

Anonymous said...

Mohamed Shouman
أنا مش طماع , وبما إني مصري وبرضي بقليلي

أنا عايز أوضة من أوض الشغالين ومزة من مزز الشغالين ونتجوز ونعيش هناك

God Live the Queen,God Take the"un" Mubark

Anonymous said...

Sara Abdeen
فيه حمص الشلم وحلبسه وكده يعني
عشان الواحد ييجي بقلب مفتوح

Anonymous said...

Basma Bahaa
- لأ نهائى يا حياتى.. دة يا دوب 775 أوضة.. منهم 52 أوضة للعيلة المالكة والضيوف.. و188 للشغالين فى القصر.. و92 مكتب.. و78 حمام.. وقسم شرطة.. واتنين مكتب بريد.. واللى شغالين فى القصر حوالى 400 شخص.. بسسسس

الكلام دا حقيقى؟!
طب النتى عدتيهم ازاى؟
طب هى الملكة عايشه هناك؟
طب لما حد يدفع عشان يدخل يتفرج بتقفل على نفسها اوضتها طيب ولا فى ستاير ولا ايه؟

Anonymous said...

Amr Aly كنتي كاتبه استيتوس انك هترجعيها مصر قريب

لا مش ترجعيها خالص خليها كدا محدثة وفاتحة بئها واحنا معاها

السؤال دلوقتي القصر دا إيجار قديم ولا جديد ومفيش ورثة ولاد عم اللي عايشين فيه مثلا بيتخانئوا عليه وقاعدين خمس وعشرين سنة في المحاكم

سؤال ساذج تاني لما لندن مدينة جميلة كدا من وصفك ليه سموها مدينة الضباب ومعروف عنها كأبتها

Anonymous said...

Fatma Alzihery
يختىىىىىىىى بيروحوا مع عضو مجلس الشعب
ولافيش تفرقه عرقيه فى الدخول يعنى الاجانب يدخلوا مكان صحاب البلد مش يدخلوه مش احناااااااااا طبعا

Anonymous said...

Aya Arafa يااه قصر باكنحهام

نفسي ازوره من زمااااااااااااااااااااان

Unknown said...

لندن !!جميلة
الـى أقصى درجة
رحتها من مده ومع
ذلك ما نسيتش جمالها