Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, November 18, 2011

لندن رايح راجع.. الشرطة ف خدمة الشعب


- أنا ماصدقتش حوبا يا محمد لما قالت لى إنك عملت حادثة واتسجنت يوم.. فقلت آجى أتأكد بنفسيتى.. إيه اللى حصل لك؟

- آه شفتى، مفيش كنت ماشى فى حالى بسرعتى.. وفى الحارة اللى جنبى كان فيه ست قررت فجأة من غير أى اشارة تكسر عليا بسرعتها.. خبطتنى طبعا وجريت هى.. عربيتى بقى لفيت حوالين نفسها ودخلت فى شارع جانبى.. خبطت فى عمود نور وبعدين خبطت عربية واقفة.. انا بقى مش أفرمل.. لأ، من الخضة دايس بنزين وطايح

- يا لهووووى، هى اللى بتتكلم عنها دى البى إم بتاعتك؟

- اييييييوة اللى كانت بى إم

- اووووه، وبعدين؟

- طبعا احنا من كتر الأفلام بقينا خبرة ان العربية لما تخبط ف شجرة لازم تخرجى من الشباك مش من الباب.. اكتشفت وقتها ان الكلام ده حقيقى مش كلام افلام

- ههههه، والله انت رايق..

- بس يا ستى وبعدين صاحب العربية المسكينة اللى كانت راكنة فى أمان الله.. خرج لى كدة من بار قدام الحادثة.. قال لى خليك مكانك ماتتحركش لحد ما البوليس ييجي.. كان معايا علاء صاحبى راكب جنبى

- اهو ونسك برضه ف خضتك

- ما علينا، كذا حد بقى من اللى شافوا الحادثة من أولها.. قالوا لى إحنا شاهدين إنها مش غلطتك وسابوا لى أرقام تليفوناتهم علشان لو احتجت شهادتهم

- واااااو، دة لو فى مصر كان آخرهم صوروك بموبايلاتهم علشان ينزلوها ع الفيس بوك.. لكن وللا حد كان عبرك.. كله هيقول لك لا شفت ولا سمعت ولا هتكلم.. هو انا كنت موجود اشاسا.. وبعدين؟ البوليس طبعا جه نفخك بقى مش كدة؟

- ليه يا بنتى هو انا قتلت حد من عيلتهم!! لأ طبعا، هما جم سألونى بكل هدوء إيه اللى حصل.. قلت لهم بالتفصيل اللى حصل والراجل كان بيكتب كل اللى بقوله.. وبعد ما أخد أقوالى كان خلاص هيخلى سبيلى ويمشينى علشان الست اللى لبستنى فى الحيط دى هربت لكن ..

- يمشوك؟ كدة بكل سهولة!!!

- بقول (كان) لكن محصلش.. علشان الراجل صاحب العربية اللى خبطتها صاحب البار.. لقيناه طالع من البار ومعاه شوية ناس سكرانين وللا إيه.. وخلاهم يقولوا للبوليس ان علاء اللى كان سايق مش انا.. وانى بحاول أدارى عليه.. وعلاء اساسا معهوش رخصة وللا بيسوق اصلا.. وكدة داخلنا ف قضية تضليل العدالة

- يا لهووووووى وبعدين؟؟

- الراجل صاحب البار بيقول للبوليس دة شكله باكستانى ابن وابن.. الأول كان البوليس بيتكلم بكل هدوء واحترام.. لكن بعد اللى حصل رخموا بقى شوية.. حتى علاء بيقول له شايف بيشتمنا ازاى؟ قال له دة العادى هنا في البلد.. مقدرش اعمل لك حاجة

- سخيف فعلا، ها وبعدين؟

- طبعا كلامهم قلب الدنيا.. وبدأوا يستجوبونا من تانى.. وعايزينى اعترف بالحقيقة وأنا كنت مصمم على كلامى إنى أنا اللى كنت سايق..

- راحوا مطلعين بقى المسدسات وضاربينكم.. هههه

- إيه الفيلم القديم اللى انتى عايشة فيه دة.. اساسا البوليس هنا مش بيشيل مسدسات خالص كلابشات بس

- خالص خالص؟ يا ما شاء الله وبحدين!

- جت اللحظة الحاسمة بقى قالى انا معلش لازم أقبض عليكم.. والكلابشات بتاعتهم مفيهاش السلسلة الحديد اللى فى النص دى.. لأ، ف بيكلبشوا الايدين مع بعض.. طبعا ماكنتش طايق نفسى.. وراح متصل بعربية البوكس جت ع طول.. قلت له أنا عندى فوبيا من الأماكن المقفولة مش عايز اقعد ورا.. قالى مفيش مشكلة وقعدنى فى مكان كويس.. وعلاء زنقه لوحده ورا

- والله ناس محترمة بتحترم أدمية البنى ادمين

- روحنا القسم.. من الوقت ده بقى ماشفتش علاء.. علشان بيستجوبوا كل واحد فينا لوحده علشان يشوفه اذا كان فيه تضارب في الأقوال وللا لأ.. الظابط بقى اللى فى القسم بيكون شوية أرخم بس برضه بيتكلم بإحترام.. قالى لى انت ممسوك علشان كذا وكذا ع حسب يعنى الكلام اللى التانى كاتبه وقت الحادثة.. بيعيده عليا علشان لو فيه أى كلام مش عاجبنى اعترض عليه.. وبدأ معايا التحقيق بس تسجيل بقى المرة دى مش كتابة شغل الكاسيت يعنى..

- وسمعنى أغنية راااااااح

- هههه، سألنى انت عندك محامى وللا نجيبلك؟

- لأ لأ كدة كتير، تصدق جاتلى كرشة نفس من كتر الإحترام وبعدين؟

- قلت له لأ معنديش.. بيبعتوا بقى يجيبوا محامى على حسابهم هما

- كمااااااااااااااااااااااان!!!!! ده الواحد لازم يروح يصيف عينديهم

- آه وماله، المهم قال لى انت هقتعد معانا شوية وهتدخل الزنزانة لحد ما نخلص الإجراءات.. قلت له انا عندى فوبيا من الأماكن المقفولة.. قال لى مفيش مشكلة فيه كاميرا جوه هنكون متابعينك بيها.. ولو حصل لك اى حاجة دوس على زرار هتلاقيه عندك هنجيلك

- زرار ف الزنزانة وكاميرا كمان!!!!! يا سجونك يا لوندن

- من ضمن الأسئلة بتاعته قال لى انت سبق وحاولت الانتحار قبل كدة؟ لو الإجابة آه بياخد بقى منك اى حاجة تكونى لابساها ف ايدك او رقبتك علشان ماتحاوليش.. لو لأ خلاص بس كدة كدة بياخد الموبايل طبعا..

- وعملت إيه لما دخلت الزنزانة؟ قعدت فيها قد ايه؟

- حوالى أربع ساعات.. كنت حاسس انى داخل ف حيطة.. أول ما اتقفل عليا الباب هسهس الفوبيا اشتغل بقى.. قبل ما ادخل قلت له انى عايزة اتوضا دخلنى فعلا اتوضيت.. ولما دخلت الزنزانة قعدت أصلى.. فى مرة العسكرى جالى ولما لقانى بصلى استنى لما خلصت

- ناس قمة فى الاحترام بجد ايه دة؟ هو فى كدة؟

- شوية وخبطت على الباب قلت للعسكرى أنا تعبان وعندى فوبيا.. رد عليا رد فى منتهى الغباء اللى في الدنيا.. قال لى انا الحقيقة مجربتوش قبل كدة علشان اقولك تعمل ايه.. قلت له عايز اخرج.. قال لى انت لسه داخل من ربع ساعة مقدرش دلوقتى بس كمان شوية هاحاول حاضر

- كدة؟؟؟ ف سهولة ويسر؟؟ ده لو فى مصر كنت اتضربت ضررررب، وكان قالك ده عند أمه يا أدهم

- هههه، انتى هتقوليلى.. المهم بعدها فعلا خرجت بعد ما خلصوا الإجراءات بس فيها طبعا قضية بس ان شاء الله انا متفائل انها هتعدى على خير

- يا سلااااام، إلا هو ينفع اشتغل شرطية بوليس وأخد برستيجى كدة.. ووقتها مش هعرفكم يا كلاب

- قومى نامى يا بت


رحاب المليحي

13 comments:

Anonymous said...

Samia Mostafa
جااااامده جدااا ياحوووبه بجد
:):)

Anonymous said...

Eissa Allouh
حوبة الاروبة عليا الطربوش انك مبدعة

Anonymous said...

Basma Bahaa ههههههههههههههههه جامده

Anonymous said...

مروة الزارع
بغض النظر عن انك عقديتنا فى عيشتنا هههههههه
جامدة يا حوبة بجد

Anonymous said...

Mohamed Elsayed
هههههههه الجماعه فى لندن مضحوك عليهم هناك الشرطه فى خدمة الشعب هنا الشرطه فى خدمة الحزب :(

Anonymous said...

Hager Emad
ايه قلة الأدب دي؟ إزاي يودوه السجن من غير ما يستأذنوا يعني؟ لا لا ناس ماعندهاش دم صحيح

Anonymous said...

Amr Aly مرة شفت ناس كانت في البوكس اتنين متكلبشين مع بعض جرهم من الكلبش وزئهم زي الحمير ووقعوا عالارض من البوكس ممكن اكون مش عارف اوصف بس كان منظر بشع

ومر ة شوفت واحد بينازع الروح على الطريق الصحراوي والناس عاملة دايره وبتتفرج وبيصروه عالموبايلات ومستنيين الاسعاف ولما قولت مفيش حد ينقله المستشفى ليه قاله ان لو واحد تطوع ونقله المستشفى ومات معاه اصبح ان اللي بينقذه دا هو اللي قتله

Anonymous said...

Muhammad Fattouh
تسلم ايدك برضو بس عايز اقول ان انتى ها تبقى سبب فى الهجره الجماعيه ارحميييييينااااااااااااااا

Anonymous said...

El Shaymaa
يا نااااااااااااس يا بششششر يا خلق هووووووووو
ابعدوا البنت العسولة اللندنية ديه عنى
:)
26 June 2010 at 12:12 · Like

Anonymous said...

Mohamed Shouman يا حلاوتك ع الدبرياج

أنت فاكر نفسك ع البلاج

هدي شوية بنزينك

وحافظ ع الباقي من سنينك

Anonymous said...

كالعاده يا رحاب ، جميله جدا وساخره ، وفى نفس الوقت ، تصلى الى ما تهدفين اليه ، ونحن فى حاله من السعاده الشديده ، تماما كما نأخذ قرص الدواء المر المغلف بالسكر... مع خالص شكرى وتقديرى لكل كتاباتك الرائعه

Anonymous said...

Ahmed Elsheikh كالعاده ، رائعه يا رحاب ....

Anonymous said...

بصراحة عاجبنى اسلوبك قوى ف تناول الاحداث هناك احيانا لما مش بلاقى حاجة اعملها بقعد اقرا فى البوست بتاعة لندن دى بالذات...لابنا يوفقك
احمد عبد العظيم