Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, November 17, 2011

عايزة اعمل رجيم.. لكن جعااااانة يا ناس


فتحت عينيها الصبح مش علشان هى عايزة تصحى.. صحيت من الجوع.. حاسة إن مش العصافير بس اللى بتصوصو فى بطنها.. لأ، دى جنينة الحيوانات كلها بتنعر..

حطت إيديها على بطنها علشان تفتكر هى كلت إيه امبارح.. أكيد هى نامت خفيف خفيف طالما جعانة قوى كدة.. لكن اتصدمت لما افتكرت.. دى قبل ما تنام ضاربة طبق فتة كبير ومحلية بطبق بسبوسة بالقشطة وحبست بكوبيتن فخفخينا..

طب إيه؟؟ أمال هى جعانة ليه؟؟ دى حتى أكلت ونامت على طول من التخمة.. بس هى جعانة ولازم تاكل، وبعدين تبقى تفكر بقى فى حل للى هى فيه ده..

قامت وقبل ما تجرى على المطبخ اتكعبلت فى المراية بتاعتها.. شافت نفسها فى المراية برغم إنها حاولت تتجنب دة.. ولما شافت منظرها بقى عامل ازاى صعبت عليها نفسها.. ودموعها غطت عينيها بقت شايفة نفسها بصعوبة..

لقت إنها بقت عاملة زى الشوال.. برغم إنها لسة سنها صغير ماكملتش حتى ال25.. وشكلها جميل وجذاب ولكن المشكلة فى جسمها اللى بقى كل جزء فيه مستقل بذاته..

معرفتش تتحرك من قدام المراية واتسدت نفسها ونسيت جوعها الشديد.. مانسيتش قوى يعنى بس بقى تركيزها على جسمها اللى مش طايقة تبص عليه.. وبرغم كدة واقفة متسمرة قدام المراية مش قادرة تحرك عينيها عنه..

وفجأة جاتلها فكرة مجنونة إنها تعمل دايت.. أيوة هتعمل ريجيم.. وليكن ما يكون.. يعنى هى مش هتبقى أول وللا آخر واحدة تتحدى نفسها وتعمل ريجيم علشان توصل للجسم المثالى اللى هى عايزاه..

دخلت المطبخ أكلت بيضة وواحد توست وهى بتحاول تقنع نفسها إنها شبعت.. بس هى لسه جعانة؟؟ لأ،لأ شبعت شبعت.. أى حاجة فى أولها صعب وبعد كدة بتهون..

حاولت تفكر فى أى حاجة تشغلها عن تفكيرها فى الأكل.. الجو كان كويس فنزلت تمشى ساعة فى الشارع علشان تحرق دهون..

لكن رجعت بتسب وتلعن، ووشها مش باين من كتر العرق.. الشارع كله بلاعات وعربيات ورصيف طالع ورصيف نازل.. مفيش مجال للمشى المريح أبدا.. لما حاولت تمشى فوق الرصيف اتكعبلت فى زبالة ومحلات فارشة بضاعتها فى نص الرصيف.. ولما نزلت تمشى فى الشارع نفسه كانت عاملة زى اللى بتمشى على الحبل فى السيرك ما بين العربيات والبنى آدمين والكلاب كمان..

دخلت تاخد - شاور- كانت دايخة قوى من كتر الجوع ومش قادرة تفكر فى حاجة تانية غير فى الأكل.. وبعدين دورت على حاجة فى التلاجة تاكلها وتكون خفيفة.. لقت تفاح كانت عارفة ومتأكدة إنه مش هيشبعها.. بس أهو أى حاجة تقرقش فيها وتشغل بيها بقها وأهو يبقى بتاكل حاجة مفيدة ومش بطخن.. خلصت التفاحة بسرعة من غير ما تتمزج بيها.. طلعت غلها فى لبانة علشان إحساسها بالجوع .. بقت زى المدمن اللى بيخبط راسه فى الحيط علشان عايز الجرعة

رمت نفسها على الكنبة تفكر: أنا إيه اللى عملته فى نفسى ده؟ ما كنت مبسوطة ولا على بالى.. زعلانة باكل فرحانة باكل.. حتى وأنا نايمة باكل رز مع الملايكة.. إيه بقى اللى جد خلانى أغير تفكيرى وأفكر فى تغيير نفسى شكلا؟ وبعدين المهم المضمون وأنا والحمدلله محبوبة قوى وعندى أصحاب كتير ومتقبلينى زى ما أنا.. خلاص بقى ليه بعذب نفسى؟

لألأ، أنا مش عايزة الشيطان يلعب فى دماغى.. وبعدين أهو حاجة جديدة أتسلى بيها شوية.. بس دى حاجة متعبة ومقرفة قوى قوى.. لأ بس أنا جدع ولا يهزنى.. لأ يهزنى ... أنا بحب الأكل.. وبعدين ما أنا قدامى أمثلة كتير قوى من أصحابى اللى عملوا دايت وفشلوا..

فيه منهم اللى دفع فلوس قد كدة ومشى مع دكتور وبرضه فى الآخر خسر ماله ومن زعله وإحباطه على نفسه زاد أكتر..

ومنهم اللى لعب رياضة وعمل ريجيم وبرضه مانزلش زى ما كان بيحلم.. فرمى ورا ضهره وكمل حياته زى ما هى.. ويقول اللى يتقبلنى على كدة أهلا وسهلا واللى مش عايز محدش هيضربه على إيده..

أيوووووه أنا أسهل حاجة أروح أعمل عملية شفط.. أهى فلوس كتير لكن حل مضمون.. لاااااااأ لحسن أموت من إهمال دكتور.. يعنى أدخل على رجلى وأطلع على نقالة.. وأكون ضحية شوية كيلوهات زيادة!!!! لأ وعلى إيه!

ماتعيشيش الدور بقى إنك بتعملى عمل بطولى.. ماهو فيه برضه أمثال كتير لناس عملوا دايت وخسوا وبقوا - متفشخرين- بنفسهم على عزيمتهم القوية.

بس دى أجسام.. فيه أجسام بتتقبل بسهولة وفيه لأ.. لكن برضه الريجيم عزيمة قوية وطول نفس.. أيوة لازم الواحد يبقى نفسه طويل.. ولما يحس إنه - هينخ- يقول بقلب جامد أنا أكلت كتير من الحاجات دى قبل كدة.. علشان يشد من عزيمته ويكمل المشوار..

إيه ده بقى؟ أنا صدعت، هى كيميا ؟؟ دة دايت.. لكن أنا جعانة يا ناس.. وأنا ماكملتش يوم دايت.. أمال هعمل إيه كمان اسبوع!!! عااااااااااااااااااا

قررت إنها تدخل تنام.. برغم إن الساعة ماجاتش 8م لسه.. كلت حاجة خفيفة وقالت تسد جوعها بالنوم.. بس هى مش عارفة تنام.. نفسها فى طبق بطاطس محمرة.. وللا ساندوتش طعمية متحبش.. وللا حتى طبق محشى..وبعدين تبدأ تانى الريجيم من بكرة.. وعد، وعد

نامت وهى بتحلم بالمحشى والكشرى والكوارع.. صحيت على الفجر بتصرخ:

جعاااااااااااااااااانة يا نااااااس مش قادرة.. دخلت المطبخ وأكلت كل اللى قابلها فى وشها..

بلا دايت بلا كلام فارغ..

رحاب المليحي

14 comments:

Anonymous said...

Mohamed Shouman
ههههههههههههههههه. الإنسانة دي من كتر ما هيا بتاكل بقي عندها تخمة أو بمعني أخر عندها شره, حتقعد تاكل تاكل تاكل حتي لو بطنها إتملت علي الأخر , بقت شهيتها مفتوحة للأكل دايما ومش بتتقفل وده بيبقي مرض أصعب من التخن نفسه

Anonymous said...

Hebatullah Nazmy ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

هي دي البنت الي علي حق تقو للرجيم لاء

Anonymous said...

Maha Muhammed Abd-Elmaqsoud
wacfte 7altna bzabt w elta3zeb alle bnkon feh,bc naw3yat elbnat de never tenzl aw t5c awln lazm 2erada w kman ana a5c 3lashan shakle yb2a never 7ad hykml elmwdo3 da,l2n ana b5c elmfrod l nfce w s7te.
Wasfk lelmashy f elshar3 excellent w da 7alna hena f egypt w da ale b3aneh.
Excellent and well done as usual y hoba :)

Anonymous said...

حلوة
وفضلت افكر فى النسيان
لما بقى النسيان همى
طبعا طول ما هى بالطريقة دى عمرها ما هتخس
بس اول حاجة لازم نعرف ان زيادة الزون بتكون اساسا نتيجة عدم اختراق الغذا احتراقا كاملا و بالتالى بيتحول المجزون الى دهون بغض النظر عن ان الاكل كتير او قليل
فى ناس بتاكل كتير و مش مليانه و فى ناس بتاكل قليل و جمسها زايد
الحاجة التانيه
الناحية النفسيه
الناحية النفسيه قد تساعد على الاكل مع عدم الحركة فيؤدى الى زيادة الوزن
الحجة الاهم
هو اهتمامى بموضوع الريجيم نفسى وقناعتى انى مش عارف اخس هيزود الوزن
لانى مركز فى ذهنى عليه و بالتالى احساسى بالفشل الدائم فى انقاص الوزن هيخليمى دايما عزمى ضعيف و بالتالى انا فشلت من قبل ما ابدا الرجيم
اسف طولت عليكم و لكن الموضوع كبير
محمد حسن

Anonymous said...

Ganga Hoba
جمييييله اووووووي اسلوبك رائع يارحاب
خليها تجيلي بس وانا اخسسها قصدي اموتها طقه واحده في اليوم
:)

Anonymous said...

Shahenda Salem
kowet el erada haia aham she2.... 7oba ya kama3a bt3mal diet 'b3'ad el nazar 3an enah me7tagah wala l2 , l2eny shaifaha kamela 5ales ,el mohem ' fe 3azema faze3a shoftaha wana bekol br2a ba7awel a3'reha bel chocolate ,laken bat7awal m3 meeen ..
No way
22 April 2010 at 14:19 · Like

Anonymous said...

Nadien Youssef
هههههههههههههههههههههههههههههههههههههههه
جامد جدااا
كلنا مرينا بالحظات دى
عرفه احلى حاجه ان الواحد يخس و يلاقى الحاجه وسعه عليه و يلاقى مقاسوا بسهوله
و يمشى فى المحل و هوه مبسوط بنفسوا و يقول هاتى دا و دا لا
بس الوحش بقى انك تنزلى غصبن عنك
احساس غبى جداااااااا و قاتل جداااااااااااااااا
بتحسى بس بتحاولى تاكلى علشان ترجعى زى ما كنتى علشان شكلك ابتدى يبقلب كلب مريض
سيبك انتى موضوع جااااااااامد جداااااااا

Anonymous said...

سلوى أبو عرب
ههههههههههه
جيتي على الجرح يا رحاااب
بس جميلة جدا جدا و لذييييييييييييييذة موت
جوعتينا
و بوظتي ( الدايت )
:)

Anonymous said...

ليه كدة بس تقليب المواجع يا حوبا
بتحكى معاناة حقيقية
يللا بلا دايت بلا ريجيم
omaimma ezz el deen

Anonymous said...

Hager Emad
hahahahahahahahahaha
gamila gedan gedan begad w begad fakartiny benafsy :D

Anonymous said...

El Shaymaa
اوقات لما بعمل ريجيم
ببقى عايزة اخبط دماغى فى الحيطة و لو ماما شايفاها قدامى فرخة حكٌلها هههههههههههههههه
تسلم نوتاتك الجميلة يا حبيبة قلبى

Anonymous said...

Basma Bahaa
على فكرة يا رحاب انا بقالى كم يوم مابتعشاش خلصت النوت دى ورحت كلت بسبوسه:@:@:@

بصوا انا من واقع خبرتى اللى والحمد لله كبرت مع الزمن فى الموضوع دا..اكتر نوع دايت ممكن تعمليه وتحافظى على سلامة حالتك النفسية فنفس ذاات الوقت..هو انك تاكلى كل حاجة بس كميات قليلة جدا ولو ناويه تكترى يبقى كترى من الحاجات اللى سعراتها قليلة..دا النظام الوحيد اللى عمرك ماهتزهقى منه وفنفس الوقت هتخسى..دا غير ان المشى او الرقص ساعة كل يوم بيخليكى تختصرى وقت ومجهود كبير جدا..يعنى اللى هتخسية فشهر هتخسيه فى اسبوع لو اتبعتى رياضه زى دى

Anonymous said...

Abdullah Hafez
جميلة جاد جدا جدا

Anonymous said...

Moka Bondg
اوعى تعملى رجيم كلى اللى
انتى عاوزاه طول النهار يعنى كلى وامشى