Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, November 16, 2011

لندن رايح راجع.. استخراج اوراق رسمية


- بووووووووسطة.. إصحى يا نايم بوووووسطة

- بزمتك يا جوجو حد يصحى حد كدة!!

- الله! اشمعنى أنا صحيت على جرس الباب.. مش بيتكم دة وللا مش بيتكم.. وأصحى أنا ليه؟ المفروض ....

- خلااااااااااااااااااص، حقك على ...... عليا

- هو إنتم لسه عايشين على البوسطة.. إيه يا بنتى التخلف دة.. قال لندن وتكنولوجيا قال

- كويس آهى الرخصة وصلت الحمد لله

- رخصة إيه؟؟ فى البوسطة؟؟ إيه هو دة؟؟ إنتى بتشتغلينى، صح، صح؟؟

- بشتغلك إيه بس يا جوجو.. ما هى قدامك، أهو بصى عليها يمكن تصدقى

- ودى بقى رخصة العجلة؟ ههههه.. رخصة إيه دى اللى بتيجى ف البوسطة.. إنتى هتجننينى

- لأ استنى قبل ما تتجننى هشرحلك.. ما إنتى مش ناقصة جنان اساسا.. علشان تاخدى رخصة السواقة هنا بتمرى على كذا مرحلة..

- أيوة إيه هما بقى؟ اطربينى

- الأول بتروحى البوسطة تجيبى أبليكيشن تمليها وتبعتيها ومعها باسبورك.. بعدها بكام يوم بيبعتولك (ID) كدة مبدئي

- فى البوسطة برضه؟

- آه إنتى بتبعتي الأبليكشن والباسبور فى البوسطة.. وبعدها بكام يوم يجيلك الID فى البوسطة برضه

- ومش بتخافي على باسبورك إنه يضيع!!!

- ماهو ممكن بقى تدفعى أغلى شوية وتستخدمى خدمة كدة إسمها التسليم باليد.. مش إنتى لما خبط ساعى البريد عليكى مضاكى إنك استلمتى؟

- آه مضانى.. وأنا كنت قلقانة إنى بمضى وأنا مش فاهمة.. بس برستيجى واجعنى إنى أسأله وللا حتى أقول له يستنى إنى أصحيكى

- ههههه، لأ إطمنى وسلامة برستيجك.. هى دى خدمة التسليم باليد.. لو ماكناش عاملين كدة.. كان هيسيبه زى أى جواب على باب المبنى من جوه وخلاص

- طيب وال ID ده فايدته إيه وللا ليه أساسا بيتعمل؟

- دى أول خطوة للرخصة.. إن يكون ليكى الحق أساسا إنك تسوقى فى لندن.. وممكن تستخدميه كمان كإثبات شخصية فى أى مكان علشان بيكون بصورتك

- ده فى مصر علشان تاخدى الفورم دى وتمليها.. تقفى فى طابور أيام وليالى.. ويا سلام بقى لو الفورم بفلوس.. تقفى الأول فى طابور علشان تاخدى حاجة إسمها أمر دفع.. وبعدين طابور تانى علشان تدفعى.. وبعدين طابور تالت بقى علشان تستلمى الفورم اللى دفعتى تمنها.. إستلمتى الفورم بقى إوعى تفرحى.. ده لسة فيلم بقى علشان تمليها.. نصها معلومات مالهاش لازمة ونصها التانى مش واضح أصلا.. لما تخلصى أوقفى بقى يا حلوة فى الطابور علشان تسلميها..

- تصدقى أنا رجلى وجعتنى منك وإنتى بتحكى بس.. هو فعلا ربنا يكون فى عونكم بصراحة

- ما علينا، وبعدين إيه الخطوة التانية؟

- إنك تذاكرى بقى النظرى علشان تمتحنى.. النظرى بيكون متقسم جزئين.. الأول أسئلة عن اللافتات اللى بتقابلك فى الشارع ومعناها.. وشوية حاجات خاصة بالعربية نفسها.. أما الجزء التانى بيكون فيديوهات كدة بيجبوهالك ولما تشوفى ......

- فيديوهات إيه!!!! ثانية واحدة.. هو الامتحان دة بيكون ازاى؟

- بيكون على الكمبيوتر.. بتحجزى فى مكان بيتعمل فيه الامتحان النظرى.. أول جزء بيكون عبارة عن إختيارات.. والتانى فيديوهات.. هحاول أشرحهالك علشان عارفة مستوى الذكاء عالى.. يعنى مثلا بيجيبولك عربية ماشية والكاميرا بتكون محطوطة فوق العربية مثلا.. فلو إنتى ماشية لقيتى واحد بيعدى الشارع فجأة.. بتروحى دايسة (كليك) على الماوس.. لو لقيتى واحد بيفتح باب العربية فجأة وإنتى جاية تدوسى برضه.. وكل ما تاخدى بالك من الخطر بدرى وتدوسى دة بيخليكى تاخدى نقط أكتر من إنك تدوسى متأخر

- .........!!!!!!.......؟؟؟؟؟

- جوجو، جوجو، يا ترى يا هل ترى المعلومة وصلت؟؟؟

- إعتبريها آه وصلت.. وبعد ما تنجحى فى النظرى؟

- بتاخدى حصص عملى سواء في عربيات أتوماتيك أو عادى.. حسب ما إنتى عايزة.. ولما تحسى إنك بقيتى متمكنة وواثقة من نفسك.. بتدخلى الامتحان.. بيركب جنبك الممتحن ويقول لك إمشى هنا، لفى من هنا، إركنى هنا.. لو نجحتى خلاص بتعدى ويبعتولك الرخصة على البيت.. لو لأ بتحجزى تانى أو بتاخدى حصص تانى الأول وبعدين تمتحنى.. حسب ما إنتى عايزة

- نظام نظام يعنى.. كل حاجة عندكم ماشية بالورقة والقلم.. واحد زائد واحد يساوى اتنين

- بصى هى الحياة هنا غير النظام هى ورق.. يعنى لازم دايما يكون معاكى ما يثبت كلامك.. مش تتكلمى وخلاص.. كل حاجة لازم تبقى مكتوبة.. وساعات ده بيخنق..

- هههههههه

- بتضحكى على إيه يا جوجو؟؟ خلاص اتهبلتى يا حبيبتى!!!!

- لأ، افتكرت لما كنتى فى مصر وطلع عينك علشان تشيلى نقطة فى إسم بنتك فى شهادة ميلادها.. تقريبا قضيتى عندهم اليوم كله

- ماتفكررررينيش.. ده كان يوووووم.. هو يوم بس، دى أيام.. وبعد ما تم بحمد الله وغيرت النقطة إكتشفت إن تاريخ ميلادها غلط.. والراجل يقول لى أكيد إنتى اللى مش فاكرة.. أقول له ماتجنننيش التاريخ ده قبل ما أتجوز أساسا..

- ههههههههههههههه، طيب هو ممكن أسأل شهادة الميلاد هنا بتتم إزاى؟؟ ويارب مايجيليش سكتة قلبية بعد ما أعرف

- هههه، هنا يا ستى بتروحى بعد تلات أسابيع من الولادة.. تستنى دورك وبعدين تدخلى فى أوضة لوحدك إنتى واللى هيكتبلك البيانات والكمبيوتر تالتكم.. بالراحة كدة بتديله البيانات.. اسم الأب والأم والطفل وتاريخ الميلاد.. وبعدين بيطبعلك نسخة من شهادة الميلاد ويوريهالك علشان تتأكدى إن كل الحروف مكتوبة صح.. ويطلب منك إنك تراجعيها بالراحة وتتأكدى إن البيانات كلها سليمة.. أول ما تديله الأوك إن كله تمام.. بيطبعلك بقى عدد النسخ اللى إنتى عايزاها.. وخلاص كدة

- بصى يا حوبا يا حبيبتى أنا معنديش غير مرارة واحدة وعايزاها.. بقول لك إيه ما تيجى نخرج

- مش دلوقتى مستنية ديلفرى

- أكل؟ بس إحنا ماطلبناش حاجة

- هو حد جاب سيرة الأكل ولا إنتى بتتلككى.. وبعدين نادرا ما تلاقى محلات أكل فيها أوبشن التوصيل للمنازل.. أنا مستنية ديلفرى حاجات إشتريتها من على النت

- واحنا بقى هانضيع اليوم كله فى إنتظاره إن شاء الله؟ وإفرضى ماجاش النهاردة أساسا

- لأ، هما بعتولى ماسج إنهم هيجوا النهاردة

- حتى دول منظمين.. يا ساتر ده أنا خلاص جاتلى كرشة نفس من النظام ده.. أوووووف

- لأ وعلشان أخنقك زيادة قايلين هيجوه ما بين 9ص و3ظ النهاردة

- اممم، الساعة إتنين دلوقتى يعنى هانت

- آه، يعنى عقبال ما تقعدى ساعة تلبسى يبقى يادوب

- هههه، طيب يا بايخة يادوب بقى أدخل أجهز.. أراكى أمس


رحاب المليحي

11 comments:

Anonymous said...

رائعة يا رحاب
و مش بعيد تبقى مصر كدا قريب ان شاء الله
آية عرفة

Anonymous said...

Mohamed Abd El Daym
حسرينا على حالنا
كمان وكمان يا حوبا ..اااااه يا مرارتــــى •̪●

Anonymous said...

طيب هو فى سؤال هى هاجر لسه بخير ولا لما رجعت مصر دخلت مستشفى المجانين ؟
بجد تسلم دماغك بس هو عمتا مفتكرش هاجر ممكن تسافر بعد كل ده
محمد فتوح

Anonymous said...

Mohamed Shouman
bosy ya 7oba ya okhty ana m3andesh gher marara wa7da w3yzha.anseny khales men london notes :D

Anonymous said...

Amr Aly
هنا اختبار المرور سهل أوي ب 600 جنيه الامتحن في السرير والرخصة توصل لحد البيت

اما عن شهادة الميلاد والسجق المدني

كنت بعمل قيد عائلي والاسرة كلها انا وامي وبس مفيش اي اخوات وووالدي متوفى سنة 90

عند استلام القيد العائلي من الموظف فوجئت ان انا ليا تلات اخوات في القيد فبقول للموظفة ان فيه غلط

بصتلي باستغراب اكني بشاورلها عالمصحف لا سمح الله انت بتقول ايه ؟ استاذ احمد مبيغلطش

قولتلها يا حاجة انا معنديش اخوات ولو الراجل الله يرحمه كان متجوز على امي كان ممكن اصدقك بس فيه واحدة مكتوبة بعد تاريخ وفاته بسنتين قالتلي ملناش دعوة انت اللي قولت دول واحنا مبنغلطش
لدرجة اني شكيت في ابويا واللهي العظيم اللي ميت من عشرين سنة
وبعد اسبوع من العناء والمشورة في كل مكاتب السجق المدني قدرت اقنعهم ان الحمد لله مليش اخوات

Anonymous said...

فكرة النوتز دى جامده جدا يارحاب برافو عليكى
بسمة بهاء

Anonymous said...

بجد اجمل مافي النوتس بتاعتك اسلوبها وتخيلك بس انا تقريبا عندي تعليفات علي كل جمله انتي قوليها بس جمله
تدخلى فى أوضة لوحدك إنتى واللى هيكتبلك البيانات والكمبيوتر تالتكم..

حسستنين ان الكومبيوتر ده هو الشيطان هههههه بجد تحفه النوت
عبداللا

Anonymous said...

Hager Emad

yaaaah.. malha el kam geneh ely benedfa3hom we7na 2a3deen fel 3arabeya, nro7 netsawar, na7'od el ro7'sa :D:D
la se7r wala sha3waza wala emte7an wala ay 7aga :D:D
dana 7ata madawartahash :D:D

Anonymous said...

Fatma Alzihery
يعنى فى المرور
الملندن مفيش تظبيط خالث خالث يعنى عمو الى بيعلمك السواقه مش كل مره لازم تديله ولا حتى بتاع الكمبيوتر ولا امضاء بلون معين انك ناجحه اوووووعى يعنى اطلع من ماركس وارسطو الاقى بوووسطه كمان صحيح يا اولادى عمااار يا لندن

Anonymous said...

Ganga Hoba
مممممممم حلو النظام ده
عاجبني ياحوبه ان الحلقات مش بقيت طويله اوي وفي نفس الوقت فيها المهم

Anonymous said...

Mohamed El Bermawy
رائعة من روائع
2011