Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, November 14, 2011

لندن رايح راجع.. جولة ف شوارع لندن


- الله يا حوبا الجو نضيف قوي وهادي، لا فيه عوادم عربيات ولا فى كلاكسات. وااااو وللا الخضار.. ده مفيش شارع مفيهوش شجر وألوان الورد.. سبحان الله بجد

- هو إنتى لسه شفتى حاجة.. ملى عينكى وشميلك شوية هوا نضيف

- طيب تعالى تعالى عايزة أعدى الشارع علشان أتصور مع الحمام وبعدين نركب الباص

- ااااااااستنى رايحة فين؟؟؟ هو إنتى هتعدى كدة من أى حتة؟

- آه ليه؟؟ هو حتى التعدية ليها إجراءات هى كمان وللا إيه!!!

- تصدقى أنا شكلى هشيب قبل ما ترجعى بلادكم.. أيوووووة طبعا، مش فيه إختراع اسمه الإشارات. دوسى بقى على .......

- أدوس على إيه؟؟ ها، قولي لي أدوس على إيه وأنا أدوس

- دوسى على الزرار اللى على الإشارة ده علشان الإشارة تبقى حمرا

- إيه دة ؟ الله، يعنى أنا أول ما أدوس الإشارة هتحمر؟

- أها، فيه إشارات بيكون فيها الزرار دة إسمه (waiting) بيسرع من إن الإشارة تحمر.. وفيه إشارات بتبقى شغالة أتوماتيك من غيره

*****************

- هو أحنا لازم نقف ف الزحمة دى علشان نستنى الأتوبيس؟ ما تيجى نقف قدام شوية علشان كمان أول ما يجى نعرف ننط فيه بسرعة

- ننط؟؟ توووووب عليا يارب.. يابنتى إنسى بقى الفوضى اللى إنتى جاية منها دى.. هنا يا حبيبتى لازم تقفى تستنى الأتوبيس فى المحطة.. ولما يجي السواق بيفتح الباب اللى جنبه علشان الناس تطلع والباب الخلفى الناس بتنزل منه

- إحم، طيب براحة ماتزقيش.. معلش بقى مش واخدة ع كدة.. بس يا خوفى لما أرجع مصر أكون أتعودت على اللى بشوفه هنا واتعامل هناك بنفس الطريقة

***************

- لأ تصدقى الباص شكله محترم قوى من جوة.. وباب خروج وباب دخول.. المحترم محترم برضه.. هو إيه زرار (ستوب) دة؟

- دة علشان لما تبقى عايزة تنزلى المحطة اللى جاية تدوسى عليه فيعرف السواق إن فى حد عايز ينزل فيقف فى المحطة

- امممم، يعنى مفيش المحطة اللى جاية يا أسطى

- ...........

- ولا ع جنب يا أسطى

- هههههه

- إيه دة ؟؟ هو الأتوبيس مال للجنب كدة لييييه؟ إحنا هنخبط ف حاجة وللا إيه!!!

- يا بت بس هتفضحينا.. الحمدلله إن مفيش عرب راكبين.. يا بنتى علشان فيه كرسى متحرك هيركب الأتوبيس.. فلازم يميل للجنب كدة شوية وينزل له زى منحدر علشان يسهل طلوع الكرسى للأتوبيس. اهبطى بقى.. دوسى ياللا ستوب

********************

- هى الناس كدة على طول في حالها؟ مش شايفة حد بيتريق ولا حد بيضايق حد.. إيه الملل دة!

- معلش بقى تخلف بعيد عنك هنعمل إيه!

- بس ما شاء الله عجبنى قوى كمية المحجبات اللى عمالة أقابلهم ف طريقى.. واللى عاجبنى أكتر.. إنك كل ما تشوفى محجبة ترمى عليها السلام.. تصدقى كنت متخيلة إنكم مضطهدين هنا والناس بتبعد عنكم وحاسينكم إرهابين زى ما بيحصل ف بلاد أوروبية كتيرة

- بصى، فيه ناس هنا فعلا مش بتحب المسلمين لكن دول مش كتير الحمدلله

- بس أنا ملاحظة ان كلمة (سورى) على لسانكم على طول.. زى الإتنين اللى خبطوا بعض من شوية والإتنين في نفس واحد قالوا سورى.. من غير ما يفكروا مين فيهم الغلطان

- آه، تلات كلمات لازم يكونوا فى بقك على طول.. سورى، من فضلك، عن إذنك

- لا والله؟ احترام احترام يعنى.. لكن بالنسبة للصلاة بقى.. طبعا مفيش أذان صح؟

- لأ مفيش، إحنا بنعتمد على مواقيت الصلاة بتاعة الجوامع.. وعادة بننزل على الكمبيوترات والموبايلات مواعيد الصلاة علشان تدن ونحس بيه نوعا ما.. يمكن بس فى العيد الجوامع مسموح لهم يحطوا الميكروفونات خارج الجامع علشان تسمعى التكبير لكن غير كدة ممنوع

- أمال فين بقى الديموقراطية اللى دايما بينادوا بيها؟

- خالى بقالك إن دى مش بلد مسلمين.. تصدقى بقى إن الإسلام تانى ديانة فى إنجلترا.. ودى حاجة فعلا تخلى الواحد يفتخر بيها

******************

- طب أنا جوعت.. الجو النضيف ده بيجوع.. يا سلاااام أهو كنتاكى قدامنا يللا ندخل

- ااااااستنى، هو إنتى كدة على طول طايرة مع نفسك.. المحلات دى مش حلال

- يا شيخة! أنا ناسية قصة الحلال والحرام دى.. طب إيه؟ أنا جعانة

- مفيش أكتر من المطاعم ومحلات البقالة الحلال.. وخصوصا فى الأماكن اللى فيها نسبة عرب كبيرة.. بتلاقى مكتوب على المحل من برة وبالعربى (حلال)

*******************

- إلا صحيح هو فى جنينة عندكم إسمها الهايد بارك صح؟ سمعت إن الناس بترغى بقى فيها براحتها.. بس أنا مش مصدقة.. يعنى ممكن إنك تروحى تشتمى مثلا في الملكة أو ف أى ديانة.. وكمان تنادى الناس لدخول الإسلام.. دة فعلا بجد وللا أوشاعات؟

- لأ بجد، بس دة بيكون يوم الأحد بس وفى الهايد بارك برضه بس

********************

- هى محطة البنزين دى شكلها مقفول وللا إيه؟ والعربيات واقفة برضه؟؟ شكله كدة البنزين خلص من المحطة والعمال روحت

- خلص؟ إيه يا بت الذكاء دة كله.. هنا مفيش عمال ف محطات البنزين اساسا

- إزاى يعنى أمال العربيات بتعمل إيه!! إوعى تقولى نظام ((Help yourself

- أيييون بالظبط كدة، تنزلى من عربيتك هانم كدة تنفخى عجلك، تحطى بنزينك، تنضفى عربيتك.. وزى الشاطرة تدخلى تدفعى

- أدفع إيه؟ دول هما اللى لازم يدفعولى تمن خدمتى لنفسى

- بتدفعى تمن البنزين سعادتك حضرتك

- ممم، والله تصدقى بدأت أحب النظام والاحترام اللى باين فى كل ركن في البلد دى..

- ياللا بقى نروح لحسن أعصابى تعبت منك.. كفاية عليكى قوى كدة النهاردة

******************

6 comments:

Anonymous said...

Muhammad Fattouh
مسلمين بلا ايسلام و
اسلام بلا مسلمين يا حوبا و طبعا زى العاده مبدعه

Anonymous said...

جميله اوووي يارحاب بس تعرفي ان في وجه شبه بين لندن وطرابلس في حاجه ان هنا برده الواحد لازم ينزل من العربيه يجط بنزين وينفخ الكاوتش وعجبي :))))
Abdallah Elrefaiey

Anonymous said...

خلى صحبتك تنزل مصر فى اول تاكسى علشان انا جالى اكتئاب
Fatma Alzihery

Anonymous said...

Sara Abdeen
ايه الملل ده حاجه تزهق والله
تحيا مصرررررررررررررررررر

Anonymous said...

Basma Bahaa
ايه يا رحاب دا
عقدتينى!@

Anonymous said...

Amr Aly
أبعد بلد سافرتها هي
اسكندرية بس ليا ناس كتير عايشة برة
عرفت ليه كل الناس اللي عايشة برة لما بتيجي مصر وينزلوا يمشوا في الشارع مبيعرفوش يتعاملوا والناس بتفتكرهم مجانين او مرضى نفسيين خاصة لما يسوقوا بنفسهم وبيكونوا غير قادرين على التعامل او العيشة هنا وطول ما هما ماشيين يسبوا جام غضبهم وانتقادهم على العيشة والناس اللي عيشنها ويعدوا الايام عشان يرجعوا البلد اللي جايين منها

لناس اللي لسه مسافرتش برة زي حلاتي تحمد ربنا لاننا طالما لسه معرفناش برة يبئى لسه قادرين نعيش في بلادنا ومعتقدين ان برة زي هنا

شكرا رحاب قدرتي ترسمي البسمة على وجوهنا

القروي اللي بهرته أضواء المدينة