Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, February 03, 2010

هى دى آخرتها

هو كان يوم باين من أوله.. وصلت بنتى روشان (5 سنين) المدرسة ومسافة ما أخدت الباص وروحت.. اتصلوا بيا يقولولى انها بتشتكى من الصداع وعايزينى اروح اشوفها.. حاولت افهمهم إنها كويسة ومفيهاش حاجة بس رفضوا يسمعوا.. وزى الشاطرة ركبت الباص تانى وروحت المدرسة.. وعفاريت الدنيا بتتنطط فى وشى علشان عارفة انها بتستعبط لإنها الصبح ماكنتش عايزة تروح المدرسة وانا رفضت طبعا انها تقعد فى البيت..

روحت لقيتها قاعدة فى (الاستقبال).. قلت لها فى ايه؟ ماردتش عليا.. طلبت منها بتحفز انها تروح فصلها، قعدت تعيط.. جالها اتنين من المدرسات يطيبوا خاطرها وهى طبعا جاتلها على التبطاب.. وبما انها ممثلة قديرة.. انهالت دموع التماسيح بحور فى ثانية.. وهما قاعدين يهدوا فيها.. سألونى ايه الخبطة اللى فى وشها قلت لهم انها اتخبطت امبارح فى الكرسى وهى بتلعب مع أختها.. وأنا كنت فى المطبخ ماشفتش اللى حصل.. واحدة فيهم قالت لى طيب وديها المستشفى، ممكن تكون امبارح ماحستش فعلا بوجع لكن النهاردة تعبت متعرفيش ممكن تكون حاسة بإيه، خصوصا انه باين شوية فى جبينها مطرح الخبطة..

اخدتها ومشيت، أول ما خرجنا من المدرسة بصيت فى عينيها شفت لمعان غريب وابتسامة خبيثة لواحدة قدرت تتقن دورها كويس وتعمل اللى فى دماغها.. اللى هو "ما انا قلت لك من الصبح مش عايزة اروح المدرسة، ما كان من الأول.. لازم اعملك فيلم هندى يعنى"!

روحت البيت اقعدت تلعب مع أختها عادى جدا ولا كأنها عملت حاجة.. قلت لها انها بكرة هتروح المدرسة وعلى الله تعمل الحركات دى تانى.. علشان أنا فاهمة دماغها وعارفة انها ممكن كل شوية تسوء فيها وتعمل لهم الشويتين بتوعها وهما طبعا دايما مع الأطفال.

على آخر اليوم لقيت واحدة بتتصل زى مشرفة إجتماعية.. بتقول لبابها إن المدرسة اتصلت بيهم علشان روشان تعبت فى المدرسة ومخبوطة فى راسها وهما لازم يحققوا فى الموضوع ويعرفوا إذا كانت فعلا هى اللى خبطت نفسها ولا حد خبطها..

أنا سمعت كدة كنت على أخرى طبعا.. دايما بسمع عن المواقف دى وإن الأطفال بيعملوا مشاكل لأهاليهم ولكن عمرى ما جربت أعيش التجربة دى..

جت المشرفة فعلا.. هى سيدة لطيفة هادية وراكزة ومعاملتها حلوة.. قالت لى إن البنت قالت فى المدرسة إنى ضربتها بالكرسى وهى محتاجة تقعد تتكلم معاها على انفراد.. قلت لها إن لغتها الأولى عربى فممكن متستوعبش قوى اللى هى هتقوله..

قعدوا مع بعض حوالى نص ساعة.. وأنا واقفة جوه وسامعة نوعا ما اللى بيتقال.. روشان قالت لها كذا قصة وسبحان الله فجأة بقت برابنت فى الإنجليزى.. وكل شوية الست تعيد عليها الأسئلة تانى علشان تتأكد إن روشان فاهمها.. وتسألها ده لون إيه وأنا لابسة نضارة ولا لأ.. أسئلة بسيطة علشان تشوفها مستوعبة اللغة وفاهمة الكلام صح ولا لأ.. والأهم طبعا إنها تكون مستوعبة الكلام اللى طالع منها كطفلة إنه مش أى كلام وخلاص..

بعد ما خلصت معاها طلبت إنها تقعد معاية على انفراد.. قالت لى ان روشان قالت لها كذا حكاية.. واحدة انها اتخبطت فى الكرسى.. التانية إن أنا خبطها بالبلوفر وده اللى خلاها تقع على الأرض وتتخبط.. التالتة انها وقفت على الكرسى واتخبطت فى الرف.. الرابعة انها وهى نايمة أنا دخلت ضربتها بالكرسى..

طبعا أنا فتحت بقى مش مصدقة آخر قصة دى.. قالت لى أنا عارفة إن دى أكيد من خيالها.. وطلبت منى اشرح لها اللى حصل بالظبط

قلت لها اللى حصل انها امبارح اتخبطت فى الكرسى.. والنهاردة الصبح ماكنتش عايزة تروح المدرسة وأنا طبعا رفضت إنها تقعد فى البيت.. وعلشان منتأخرش على المدرسة حدفتها بالبلوفر بتاعها علشان تلبس بسرعة ونلحق نروح المدرسة علشان لما بتتأخر دقيقة بياخدوا اسمها..

قالت لى يعنى انتى ماعملتيش كدة عن غضب؟ قلت لها لأ خالص، ده بس علشان نلحق ميعاد المدرسة.. طبعا هى عاملاه تجمع كل الكلام مع بعض فى دماغها.. وتكتب وتركز فى كل اللى اتقال من روشان ومنى.. وتربط الكلام مع بعض، شغلتها بقى..

قالت لى اعتقد انك لما رمتيها بالبلوفر فى وشها ده خلاها تتضايق قوى وكان سبب إنها تربط الأحداث كلها ببعض وتصمم انك ضربتيها.. أما عن موضوع انها وهى نايمة انتى ضربتيها بالكرسى.. يمكن بليل بعد ما اتخبطت حلمت بكدة وده علق معاها فى ذاكرتها.. ما احنا برضه منعرفش هما بيفكروا ازاى..

وسألتنى أنا ليه ماودتهاش المستشفى زى ما المدرسة طلبت منى.. قلت لها علشان حسيت ان الموضوع مايستاهلش وانها بتمثل خصوصا لما رجعت البيت ولقيتها بتلعب مع أختها عادى جدا ولا كأن فى حاجة تعبها.. قالت لى أصل المدرسة اتصلت بالمستشفى وعرفوا انك ماروحتيش.. قلت لها ما أنا كنت هاقولهم بكرة انى ماروحتش مش هكدب عليهم

بعدها طلبت تقعد مع أبوها على انفراد.. وسألته إذا كان عنده فكرة باللى حصل سواء امبارح أو فى المدرسة النهاردة.. فقالها لأ ماكنتش اعرف وبعدين روشان العادى بتاعها انها بتألف حكايات لا اساس لها من الصحة وأى حاجة عندها فى الماضى تقولك امبارح حتى لو كانت حصلت السنة اللى فاتت..

سألته عن طريقة معاملتى للبنات وازاى بعبر عن غضبى معاهم.. قال لها إنى ساعات بزعق فيهم لكن مش بضرب حد فيهم علشان عارفين ان الضرب فى لندن ممنوع.. قالت له حتى الزعيق بلاش منه حاولوا العقاب انها تدخل تقعد لوحدها فى أوضتها لكن من غير لا زعيق ولا ضرب..

وطلبت بعض نمر التليفونات للدكتورة المسئولة عنا والدكتورة المسئولة عن البنات وحتى تليفون حضانة أختها ومكان شغل أبوهم.. علشان تكمل التحقيق وهاتكلم المدرسة تانى تقولهم على اللى حصل مع روشان ومعانا.. ولو شكوا فى حاجة هيضطروا يلجأوا للبوليس.. لو لأ هايبعتولنا تقرير رسمى باللى حصل وخلاص

تجربة جديدة من نوعها عليا.. يمكن أنا دايما بسمع عن الحاجات دى وكنت باخدها دايما بتهريج.. يمكن كتبت عن العنف مع الأبناء قبل كدة ومشاعر الأباء بخصوص المواضيع دى.. لكن أول مرة أحس مشاعرهم ومواجعهم..

يمكن كان قلبى حاسس إن روشان هتعملها فى مرة معاية وتجبلى البوليس لكن عمرى ما تخيلت ان احساسى هيتحقق واتحط على بداية الطريق.. وحتى لو الموضوع إن شاء الله عدى على خير أكيد هيحطوا عينهم علينا فترة..

مش عارفة أقول إيه.. بس أنا فعلا حاسة من جوايا إنى فجأة وبدون تفاهم وبدون مقدمات وبكل عنف اتكسرت ومن مين من ابنتى.

رحاب المليحي

10-02-03

25 comments:

Anonymous said...

أرى ذلك كثيرا فى الأفلام الأجنبيه. و لكن لابد أن نكون صرحة مع أنفسنا حتى نستطيع أن نتخطى العقبات. أنت ورثتى هذه العصبيه منى فأنا عصبى فى الأوقات التى تستدعى هذه العصبيه و ساعات يكون رد فعلى عنيفا على أمور قد لا تستدعى

هذا. ولكن عصبيتك فاقت عصبيتى ولا أعتقد إننا ربيناكم على هذا الكم من العصبيه الذى نراه و أنت تتعاملى مع أولادك. المطلوب الصبر و التفاهم. أنا أذكر إننى كنت أسمع لكم و أنتم صغار مهما كنت متعبا أو ظروفى المزاجيه ليست على ما يرام فلابد أن تستمعى أكثر من أن تصدرى الأوامر. جربى هذه النصيحة قبل أن يفوت الأوان. رائف كنت أعامله من صغره على إنه رجل أمامى أصحبه معى فى كل مكان و أعطيه خبرتى فى الحياه وكلمته رجل لرجل وهو فى سادسة إبتدائى قبل أن ينجرف مع أصدقاء السوء أو قليلى الخبرة. كنت أوافق لك على مواضيع كثيرة ضد رغبة أمك على أن أعطيكى بعض الحرية لتكوين شخصيتك. قد أكون على صواب و قد أكون على خطأ. أخرجتكم من البيت وطفنا بكم فى أنحاء الجمهورية لتنطلقوا و تروا الناس فى كل مكان.رحاب أرجو أن تبدأى صفحة جديدة مع بناتك و على ما فعلته روشى عملته أنا فى الصغر لكن على أكثر من ذلك كنت أمثل و أقع على أرض الفصل مدعيا المرض و مستغلا أن والدى مسافر للخارج و أن عمى هو الذى سيحضر إلى المدرسه ليروحنى إلى المنزل

بابا

Anonymous said...

ala fakra khley balk 3alshan el mawdo3 momke y2lb bgad f3lan, ana a3rf nas hena kdh, bs matkdesh el mawdo3 3ala a3sabk kdh, de lasa so3'yera we mat2osdesh akeed, we b3den anty mesh betdrbeha bs 3alshan fe london :D ana law menha marg3esh masr abdan :D take it easy, ana 3arfa anha tedy2a bs 7aslt m3 nas su7aby we akhdo el mawdo3 cool gedan :)
Shaimaa

Anonymous said...

اللي متضايق منه في الحوار بتاع الدول الاوروبية ده وان كنت بحترمه
الا اني بكرهه لسبب انه ممكن يعمل حزازية بين الطفل ووالده
وخصوصا احنا كعرب علشان احنا متربناش كده
رحاب ده درس
خدي منه مميزات زي انك تقللي من حدة عصبيتك... See more
وان مكنتش هتحترمي نفسك بقى
يبقى العصا لمن عصا

لما تربوا ولادكوا كويس وتعرفوا ان الله حق فيهم
ومتضربوش عمال على بطال
هما مش هيربوكوا
لو ربنا اراد لي في يوم
ورحت عملت حوار مع اوباما ... See more
وده حلم واتمنى يتحقق
هطالبه انه ينفذ قانون الطفل عالميا وخصوصا على مستوى الشرق الاوسط
علشان احنا شعب مبيتعلمش الا بالكرباج للاسف
كريم الشيخ

Anonymous said...

ma3lsh tb3n 3ala elly 7asl mokf la to7sdy 3aleeh ,basi think enk a7sn t3'yry tr2tek m3aha w tes7beha
Taghreed

Anonymous said...

هههههههههههههههه مش ممكن بتفكرنى ببنت اخويا فى التأليف يارب يخليهالك و يباركلك فيها و خدى بالك بقى و ماتنسيش انك تحت المراقبة ههههههههههههههههه
غادة

Anonymous said...

هههههههههههههههههههه ولا اتكسرتى ولا حاجه يا رحاب هيا لسه صغيره ومش فاهمه قيمه الام وكده ربنا يخلهالك يا رب دلعيها بقى كده وظبطيها بدل ما تجيبلك المره الجايه اعتقال وبعدين انتى غلطانه بردو داخله تضربيها بالكرسى وهيا نايمه ههههههههه ناقص تحديفيها بالابجوره :)
ميدو

Anonymous said...

ياااااااااه للدرجه دي .. والله انا عمال اقرأ المقال وانا مشدود ومستغرب .. دي طفله يعني وده بيحصل عادي جداً .. همه كبروا الحكايه اوي كده ليه وتقرير ومشرفه ومستشفى واتصالات ومتابعه وممكن كمان بيلجأو للبوليس .. يا نهار اسود
يعني الواحد ميعرفش يضرب ابنه ؟؟
يعني لو غلط ميأدبوش
!!... See more
ده ايه الثقافه الغريبه دي
أيمن خطاب

Anonymous said...

بصراحة ...كان لازم أولادك يتربوا ويعيشوا فى مصر...هنا أمان وثقافة عربيه أصيلة وقيم وعادات وإنتماء....الصبح قلتلك على رجوعك..بس كل حاجة مش بايدينا دايما..وفيه ظروف بتحكم طبعا...لكن على الأقل لو هنا كانت هتعيش حياه غير هناك
اللى حصل فى المدرسة عادى جدا ...وبيحصل أكتر منه فى الغرب عموما..بس المفروض تكونى متفهمة الاوضاع دى لانك معيشاها وعارفة النظام والدنيا ماشية ازاى
ربنا يخليلك بنتك ويحافظ عليها...بكرة تكبر وتفهم وتعرف أكتر..واحنا كدة يا برضة امهاتنا تعبت معانا
عصام مهران

Anonymous said...

هههههههههههههههه
القصة دي على قد ما تضحك على قد ما بتأكد إن بنتك شاربة منك الكتابة بدري بدري
وعوما ربنا يعديها على خير وما اعتقدش انك لازم تتصدمي من بنتك لأن واضح إن بنتك ذكية جداً (ربنا يخليهالك) وفاهمة هي بتعمل ايه وواخدة الموضوع اصلا بنوع من التهريج والنوع ده من الاطفال ما ينفعش معاه العنف خالص ولا بالزعيق النوع ده عايز مواجهة بالكلام والحب وال... See moreتفاهم ولما يكون في ضرورة للعقاب تحرم من حاجة متعودة عليها .. مصروف أكلة حلوة .. خروجة او فسحة .. او حتى لعبة بتلعبها او حاجة بتشوفها في التليفزيون مع الوعد لها بإنها لو سمعت الكلام هاتنفذي لها اللي حرمتيه منها وبزيادة وبمكافأة بحاجة اكبر بتحبها وأنا أثق إن الأسلوب ده هو الأمثل بإذن الله
ماجد ابراهيم

Anonymous said...

طب احمدى ربنا يا رحاب
ده انا عمتى قعدت فى المانيا اول سنتين جابولها البوليس 3 او 4 مرات
كلها عشان حاجات عبيطة جدا لا تذكر
تخلص بشخطة اصلا
كويس انك لسة مش مسجلة لحد دلوقتى :))
سارة الإسكافى

Anonymous said...

قصة استفزازية جدا انا لو منيك ارنها علقة اول ما ارجغ مصر :))))))
طارق

Anonymous said...

لمهم هو ضرورة الفصل بين ان يكون الخيال خصب وبين الكذب فالفرق واضح .. وكان الله بعونك يا استاذة
وليد فؤاد

Anonymous said...

يااااا ... و كمان ده عند الغرب عادى كمان
بس .. .. .. مش عارف أقول ايه ؟
ممكن حفاظ على الطفل و حقوقه .. .. .. بس كدة كسر و قلة قيمة و تنزيل و تحقير من سلطة الولدين على الأبناء .. تك تك !! أيه اللى بقوله ده
!!
بصوا مش عارف ... See more
استاذة رحاب .. اقعدى معاهة انتى وباباها و طبعيهة فكرك و ان اللى هى بتعمله غلط .. وانهة نزلت من مستواكى و من شخصيتك فهميه يعنى ايه الأب و الأم و المعلم .. بالطريقة الشرقية العربية و الاسلامية .. مش هأقلك قال الله وقال الرسول
لكن مهما كانت ... دى تربية
والى بيربيهة مامتهة
ابراهيم

Anonymous said...

لا حول و لا قوه الا بالله العلى العظيم
ايه دا هوه فى ايه؟
هوه بره الواحد مينفعش يربى عيالوا؟
دا ايه الفيلم الهندى دا
هههههههههههههههههه... See more
و الله اولاد اختى ليهم الجنه
دا بنت اختى لو مسمعتش كلام مامتها بتمسكها وحياتك بالشبشب
ههههههههههه
دا لو فى لندن زمانهم كانوا اعدموها
نادين

Anonymous said...

Mohamed Mahmoud Ibrahem
هو الموضوع بسييط و اي طفل ممكن يعمل الي روشان عملته .. بس طبعا لانك في دوله اوربيه لذلك الموضوع اخد اكتر من حقه .. بس صدقيني لما يكون اسلوب التربيه بدون زعيق او ضرب بيكون افضل بكتيير ..لان لو عوتي البنات علي الاسلوب ده مع الوقت هيحسوا ان ده امر طبيعي ومهما تزعقي او تضربي مش هيجيب نتيجه زي بالضبط لما الانسان يتعود ديما انه ياخد دوا مسكن بكثره مع الوقت جسمه هيتعود عليه ومهما ياخد منه مش هيعمل مفعول الا اذا كتر من الجرعه .. وانا حاسس بيكي لاني بشوف اولاد اخواتي .. لكن حقيقي التربيه مش سهله ابدااا
محمد محمود

Anonymous said...

Begad da7ikt awee ya hobaa... ma3lish al 3ayal homa eily beyrabo ahalihom now
Nesrine Abbas

Anonymous said...

Houba, Kaffara :) listen if you would take away anything from that experience, it will be is to really control your temper with your girls, it is very importnat for their wellbeing, if you are keen on raising them as balanced, healthy girls, which I am sure you do. You have to immediately stop yelling or raising your voice while arguing, it will ... See moremake things better. Try to ask whay did they do that, or distract their attention to something else if they mis-behaved. While being naughty, take them for naughty corner (10-15 minutes) alone in a room, and dont talk to her till punishment is time is up. Kids in the age from 3-6 are very smart, and they do things that will make you upset, coz they now know what makes you mad...you should hide your emotions when things go out of control and be calm, always be calm and show your girls that you are incharge....and at the end of the day be calm for your sake ...sa7 walla la2? :)
Hager Amir

Anonymous said...

Gamda moooooooooooot
Ahmed Shehata

Anonymous said...

بجد بجد روشى لعبتها صحححححح
هبةالجوهرى

Anonymous said...

يا سلااااااااااام
دانا لو كنت فلندن
كنت سجنت عيلتى كلها!!!!

يا هوبه دى بنوته صغنتوته والطبيعى بتاعهم انهم بيتبلوا على مامتهم ولا باباهم لما يتنرفزوا عليهم عادى بتحصل هنا كتير ..تلاقى الواد من دول يلم قرايب مامته ويقولهم دى بتعذبنى وكذالك مع باباه ..بس عشان فى هناك بوليس صادفت ان هما دول الناس اللى اتكلمت معاهم... See more
عادى يعنى يا هوبا يا جميله تلاقيكى عملتى اكتر من كدا وانتى قدها بس الموضوع اتنسى لانك فمصر يعنى اخرك تحكى للجيران:))
بسمة

Anonymous said...

rabena ma3aky ,ana gatly sadma lama la2eet en elmawdoo3 begad ,ana kont fakra fe el2wel enha mograd maqala,lazem te3rafy heya 3malet keda leh we kaman lama elmdrasa tet2aked en elmwdoow koloh kalam fare3' enek tetef2y ma3ahom enek ezay te3rafeha enha 3'eltet 3lshann maytkerarsh tany ,we fe3la rabena ma3aky
dodo

Anonymous said...

ew3y teftekry enaha 2asda te3mel kol da ya rehab, la2enaha tefla matefhamsh kol el kalam da w akid mesh fahma ely beye7sal aslan. fa mat3akbihash 3ala keda wala te7asbiha wala tez3aly menha ya benty dy tefla. tetkesry dy law heya kebira w 2asda te3mel keda fe3lan, laken tool ma heya mesh fahma yeb2a matetkesrish wala te3ayaty wala el kalam da. ... See morela2en el mawdo3 mesh me7tag kaman enek teb2y metanshena. lazem teb2y hadya 3ashan te3rafy tetsarafy. w 3moman zay ma kol el comments 2aletlek, da mawkef ye3alemek begad enek lazem te3mely control shwaya 3ala a2sabek. lazem te3mely mesh t2oly ba7awel w mesh 3arfa.
gogo

Anonymous said...

"ya Hoba rawa2y, mawdo3 el child abuse dah mohem gedan barra w hata hena fel Saudi , bs besaraha I feel el engleze sa3been awy , Rabena ma3aky"
Reham

Anonymous said...

لعلمك انا بحزرك منها لما تكبر دى مش سهله
ابو الريش

Anonymous said...

Roba Mohammed
يا بنت العفريتة يا
روشى..
سورى يا حوبا بس البنت خرجتنى عن شعورى لما قريت النوت..كل ده يطلع من المفعوصة دى ..
فعلا ياما تحت الساهى دواهى ..
الحقى يا حوبا لمى هدومك انتى والبنات وفريرة على مصر الشرطة فى لندن يا بنتى مش سهلة مهما كان شرطة مصر أرحم هههههه