Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, August 18, 2008

يوميات روشى وجومى.... الحلقة الأولى

- واء واء واء
- يا مامى، يا ..... إيه ده صوت بيبى عندنا فى البيت؟؟!!
- واء واء واء
- بيبى على سرير مامى!!!! إنت مين؟؟
- واء، أنا بنت مش ولد
- أنا مش بسألك انتى ولد ولا بنت.. أنا بسألك إنتى مين؟ وليه قاعدة على سرير مامى؟
- واء، أنا جومانا أختك
- أختى؟؟!! هما بيطلعوا امتى؟؟ مين اللى قال؟؟
- واء، سمعت مامى بتقول أنى أختك.. مش إنتى برضه روشان؟
- أيوة
- واء، خلاص يبقى أنا أختك
- وماما جابتك منين؟ من السوبر ماركت؟ أنا طلبت منها شيكولاتة مش بيبى.. وبعدين أنا عندى بيبيهات لعبة كتير
- واء، مش ماما كان بقالها فترة طخينة وده شىء غريب عليها؟!
- أيوة
- واء، أهو أنا بقى اللى كنت نفخاها كده.. لو شٌفتيها دلوقتى هتلاقيها قلت شِوية
- أهههه، هو إنتى بقى اللى كنتى جوه.. وكنت كل ما أجى أقعد على رجليها تقولى خلى بالك من البيبى
- واء، ايواااااة، أنا اللى كنت جوه.. برافو عليكى
- طيب وعايزة إيه بقى يا أختى؟ وناوية تقعدى معانا كتير؟
- واء، بقولك انا أختك يعنى قاعدة معاكم على طول
- على طووووول؟؟؟ لأ كده أوفر.. يا بخت من زار وخفف
- واء، خفف إيه؟؟ أنا زيي زيك فى البيت ده.. ولازم من أولها تعرفى كده
- ومين بقى اللى إداكى الحق ده إن شاءالله؟
- واء، انتِ عندك كام سنة؟
- سنتين
- واء، يعنى عندك سنتين ومش فاهمة ان كلمة أختك معناها أن راسي براسك في كل حاجة
- يمكن أكون بستعبط!!

- واء، إيه اللى فى ايدك ده؟
- شيبسى
- واء، هاتى واحدة
- لأ ده بتاعى
- واء، وبعدين بقى!! مش قلنا أنا ليا زى ما ليكى في البيت ده
- إنتى لسه صغيرة وبعدين معندكيش أسنان
- واء، أنا جعانة
- أجيبلك حتة لحمة؟
- واء، إية لحمة دى؟؟ لأ، انا شفت مامى بتشربنى حاجة أبيضا.. دى اسمها إيه؟
- قصدك لبن؟؟ اجيبلك شوية من التلاجة؟
- واء، لأ عايزة شوية من البقرة الحلوب علشان عايزة أنام
- مين البقرة حلوب دى؟
- واء، مامى، هو أنا كل حاجة هقعد أفهمهالك كدة.. ده انتى عندك سنتين وأنا لسه عندى يومين
- طيب ما اقولك على فكرة، نامى خفيفة أحسن.. تنامى؟؟؟ هو إنتى هتنامى فين بقى؟؟ مش بحب حد ينام جانبى على السرير..
- واء، ومين قال إنى هانام جانبك.. انا هانام جانب مامتى.. لالالالالا
- نعم؟؟؟؟ لأ بصى ممكن اسيبلك حتة جانبى تنامى فيها.. وبعدين أذوقئك وإنتى نايمة.. قصدى ... المهم يعنى ماتنميش جانب مامى
- واء، يا بنتى أنا الصغيرة هنا.. وطلباتى أوامر.. وهانام جانب مامى وإنتى هتنامى فى سريرك لوحدك.. يلا هش بقى روحى نادى مامى
- أووووووف! يا مامى يا مامى.. تعالى شوفى الزنانة دى اللى بتقول انها أختى

رحاب المليحى

9 comments:

Anonymous said...

جميله قوى يارحاب.. وإحساسك بالحوار جميل.. ممكن تكتبيها كيوميات أختين فى قصص للأطفال فى المنتدى علشان تكون درس للأطفال والأمهات
ماما

Anonymous said...

it is nice & simple ... lovely 2 read .....ma shaa allah ... go ahead ....good idea
Rabab

Anonymous said...

hehe different ya hoba than all of your articles , nice and funny
bas Jumi el ghalbana mesh zanana.. enti zalamteeha

Samr

Anonymous said...

زي العسل وحلو أوي استمري بقى
بجد ماشاء الله حلوه
دينا

Anonymous said...

It's a good idea
Keep typing :)

Raef El Melehy

Anonymous said...

el article comidea, te7sye 2nha el mafrood tettketb fe mickey 2aw samir :))

Taghreed

Anonymous said...

This is typical Roshan by the way...I could picture the whole conversation in my mind and it made me laugh...hee hee

Jumana is sooooo '3albanah to be wicked like the character in your article.....

Both characters are so funny and it bet this article is just out of your daily suffereing in the long holiday..;0)

well done ya Hobba ya Arobbah

Alaa

Anonymous said...

i think enek 2olty ely el atfal fe3lan betfakar feh

gogo

Anonymous said...

very nice and funny kaman, yala ba2a 2et7fyna bel ba2ye

Dodo