Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, August 21, 2008

يوميات روشى وجومى... الحلقة الثالثة

- واء، يا أوشى يا أوشى.. إنتى فين؟؟

- ها، مين بينادى عليا؟؟

- واء، إيه ده!! إنتى مش فاكرانى؟!! نسيتى أختك الصغيرة!!

- هو إنتى، أنا تعبانة أوى أوى

- واء، وده بيجى فجأة كده؟

- مين ده؟

- واء، تعبانة دى، بيجى فجأة؟؟

- أوووووف! أنا تعبانة وسُخنة ومش قادرة أرُد عليكى

- واء، ما هو بدل ما كنتى قولتى كل ده.. كنتِ رديتى عليا أسهل

- تعبانة يعنى مش كويسة يعنى مش فى حالتى الطبيعية.. مش قادرة أعمل شقاوة ولا أزهقهم فى البيت..

- واء، طيب دى حاجة كويسة ولا وحشة؟؟

- يااااااارب، لأ يا جوجو دى حاجة مش كويسة ولازم أخد دواء علشان ارجع لحالتى الطبيعية

- واء، فين مامى تشوف مالك؟؟ بس انتى فعلا تعبانة ولا بس بتعملى كده علشان يهتموا بيكي شوية؟!

- أنا الأول كنت بمَثل علشان الاقى اهتمام منهم وينسوكى شوية.. بس واضح أن الموضوع قلب بجد..

- واء، يعنى إنتى عايزة ايه دلوقتى يا أوشى علشان كبس عليا النوم؟

- مش عايزة منك حاجة.. ناااااااامى

- واء، طيب تعالى هاشكينى شوية علشان انام بسرعة

- لااااااأ، انا عايزة اروح المستشفى.. مااااااامى


و بعد ثلاث ساعات

- واء، عدى الوقت بسرعة من غيرك ونمت براحتى فى هدوء.. ها، طلع عندك ايه؟

- عندى برد شديد و زورى تعبان أوى مش قادرة حتى آكل شيكولاتة ولا آيس كريم

- واء، معلش يا أوشى شوية وتبقى كويسة

- المفروض تقولى لى سلامتك

- واء، هى جاية؟؟

- مين دى؟

- واء، سلامتك، مش دى واحدة صاحبتك؟

- اووووف، صاحبتى اسمها سلمى.. لكن سلامتك دى علشان أنا تعبانة


و بعد عشر أيام

- واء، لسه تعبانة يا أوشى؟

- لأ، خلاص الحمد لله

- واء، ويا ترى بابى ومامى اهتموا بيكي زى ما كنتى عايزة؟

- مش اوى يعنى.. بس أهو أحسن من مفيش

- واء، بس انتى آرافتيهم جامد بعياطِك المستمر.. كنتى بتعيطى وخلاص حتى لو مش عايزة حاجة.. زن زن زن، إيه بُوقك مش واجعك؟؟

- ما هو ده المطلوب يا جوجو.. مادام مش عارفة أعمل شقاوة وقلبان في البيت.. يبقى أعيط علشان اثبت وجودى

- واء، رخمة رخمة يعنى

- يابنتى إنتى لسه صغيرة متفهميش فى أمور الرخامة والغلاسة

- واء، هو إنتى نسيتى إننا بننزل ومعانا الكتالوج أ- ب رخامة وغلاسة على أهالينا!!

- أه تصدقى يا جومى كنت قربت أنسى

- واء، بيكونوا فاكرين إننا عيال ومش فاهمين حاجة

- هاهاها، وخصوصا جدودنا اكتر ناس نعرف نضحك عليهم.. دول بقى مش بيقدروا على دموعنا ابدا وبينفذوا كل اللى بنطلبه

- واء، هاهاها، آه تصدقى يا أوشى أخدت بالى من الموضوع ده.. وحتى لو بنزن من غير دموع برضه بنعرف نضحك عليهم

- والهى طلعتى مسخرة يا أُختى.. شكلنا هانفهم بعض ونبقى أصحاب

رحاب المليحى

3 comments:

Anonymous said...

"والهى طلعتى مسخرة يا أُختى.. شكلنا هانفهم بعض ونبقى أصحاب"

Oh My Word...hee hee......this one is really amazing......It seems that Jumana is an Egyptian Pure "Labat" girl and we did not know that

Would love to see the catalogue please when they are done with it..hee hee

Alaa

Anonymous said...

Gamda awyee Salma we salmtek deeh, And I really hope the same "They grow up and be Friends" we sa3etaha la2ema tekonyee sa7betehom el 3, OR HOBA "ELMagnona" haytayroo el rob3 eli fadel 3andek.

Ahmed Shehata

Anonymous said...

ahhhhh ebtado yetsa7bo
alla ykon fe 3onek ya hoba

gogo