Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, May 10, 2012

الحمدلله



تبقى ماشى ف الشارع وشك مقلوب ودماغك واجعاك من كتر التفكير.. ولو حد ابتسم ف وشك تقابل ابتسامته بتكشيره.. مش عن قصد لكن كتر همومك مخلياك لا شايفه ولا شايف ابتسامته..

ما انت اصلك حاسس ان مشكلتك مالهاش نهاية ومالهاش حل.. وانك اكتر واحد مظلوم على وجه الأرض وتعيد وتزيد ف سرك: ليه بس ياربى؟ اشمعنى انا؟ هو انا ناقص؟ مش كفاية اللى انا فيه.. السعادة تتفرق ع الناس وانا حظى دايما كدة تعيس وفقرى واخد الكأبة والمشاكل ليا لوحدى

بس فجأة يجي اللى يفوقك ويقولك بص ع حال غيرك وانت تحمد ربنا ع حالك

تبص قدامك تلاقى طفل مُعاق ماشى مع امه.. وبرغم إعاقته أمه مبتسمة ف وشه وبتحاول تلعبه وتتكلم معاه ع قد فهمه.. وهو عمال يصرخ ويعمل حركات لا ارادية بُحكم حالته ومفرج عليها الشارع كله.. ومع ذلك الأم مبتسمة وعارفة انه غصبا عن الطفل وبتحاول تراضيه

تبص لإبتسامة الأم الدافئة لإبنها.. وتبص لحالك وتستغرب

تلاقى شاب ف سنك وان ماكنش اصغر ماشى على عُكاز.. وبرغم ان مشيته فيها صعوبة ومحتاجة منه مجهود.. لكن تبص ف وشه تحسه راضى باللى هو فيه.. وعايش حياته عادى.. لابس كويس وبيقضى طلباته فى هدوء من غير ما يطلب مساعدة حد ولا يستنى حد يبص له بشفقة

تبص لرضا ملامحه اللى باينة قوى عليه وتبص لحالك وتستعجب

تلاقى أم ع كرسى متحرك.. رايحة تودى بنتها المدرسة.. بنتها مش اكتر من سبع سنين ماشية تزق والدتها فى هدوء.. تحس البنت مش مستغربة الوضع وكأنها بالظبط ماسكة ايد والدتها وماشية جانبها.. والأم كمان مركزة ف الشارع وبتحاول تخفف عن بنتها تُقل الكرسى، بإنها بتزق عجل الكرسى المتحرك معاها علشان تساعدها ف الزق

تبص للاتنين وعينيك تدمع وتقول ف سرك: ياااااااااه هو فيه رضا كدة؟ هو فيه بساطة كدة؟ إيه ده؟ هو انا اللى مش عايش ولا مش عارف اعيش؟ ولا هما اللى نفوسهم وقلوبهم صافية بزيادة ومُتساهلين ف حياتهم؟ لا حاقدين ع حد.. ولا يبصوا على حال غيرهم ويتحسروا على حالهم

ياااااااااه دى الدنيا فعلا ماتستهلش البكا عليها.. والواحد طول ما هو بيقول اشمعنى انا اللى بيجرالى كدة؟ عمره ما هيتقدم ولا هيشوف الحلو اللى ف ايديه.. وهيفضل شايف دايما النص الفاضى من الكوباية

الحمدلله الذى عفانا مما ابتلى بيه غيرنا

رحاب المليحي


10 comments:

Anonymous said...

Riham Elsharony
رائعة بجد ....

Anonymous said...

Hanadi Saif
حقيقى والله الحمدلله على كل حال الواحد فى نعمه والحمدلله

Cosmaktil Company said...

الحمدلله على كل حال
لا اله الا الله ........... سيدنا محمد رسول الله

http://healthorbeauty.blogspot.com/

Anonymous said...

Mohamed Salama
الله من أجمل وأبسط ما قرأت

Anonymous said...

Mony Afifi
الحمدلله على كل حال

Anonymous said...

Sahar Aktham
raw3a

Anonymous said...

The-Next Big-Thing
القناعه كنز لايفنى :(

Anonymous said...

Shahinaz Gamal Khairy
الحمد لله الذى عفانا مما ابتلى به غيرنا ٠٠٠ الحمد لله عدد خلقه ورضا نفسه وزنه عرشه ومداد كلماته

Anonymous said...

Aya Mattar
برافووووووووو

Anonymous said...

Shady El-Shahawy
كأن اللى بيكتب كان بيكتبهالى, اللهم لك الحمد عدد خلقك ورضا نفسك وزنه عرشك ومداد كلماتك