Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, January 01, 2012

ليلة لا تنسى.. النيو يير

كل سنة اتفرج ع النيو يير ف التلفزيون بحسرة كدة
وابقى متحسرة ومتفرتكة زعل انى مش ف الشارع ف ليلة السُكر والعربدة

السنة دى بقى طقت ف دماغنا ف لحظة اللا وعى.. اننا ننزل نتفرج على الــ (فير وركس) ف وسط البلد الساعة 12 عند
(London Eye)


** اللى مش عارف الفير وركس:: دى عبارة عن الفراقيع الالوانات اللى بتتعمل فى السما لما مصر بتكسب ف الماتشات **
وهى ف لندن لا تتعدى الربع ساعة.. لكن بتكون أمم واقفة تتفرج

وقررنا النزول فعلا بدون أى ضغوط خارجية.. وبرغم اننا بدأنا المشوار قبلها بساعتين وبالمواصلات طبعا.. عشان كانوا مقفلين المنطقة كلها اللى حولين المكان.. الا ان كانت الدنيا زحمة جدا برضه

وعشان نوصل للمكان اللى هيتعمل فيه الفير وركس اخدنا بتاع ساعة مشى..
ولازم نركز اننا كان معانا اطفال مسهرينهم للوقت المتأخر ده، عشان يتفرجوا ع فراقيع النيو يير

ياللا كله يهون عشان اول ليلة فى السنة الجديدة تبقى مختلفة

وصلنا قريب من المكان.. لاقينا اننا كل ما هنقرب اكتر كل ما هنتسحل ف الزحمة اكتر.. ف مراعاة لكرامتنا والطُفيليات اللى معانا قررنا نقف ع مسافة بعيدة.. واهو كله بيتفرقع ف الجو وكله هيشوف، بيس يعنى..
المهم اللمة يا ولاد.. ونقضى ربع ساعة حوه

بدأت الناس تتوافد وكله يجي قدامنا ويقف.. أو يزنق نفسه ف وسطنا ويقف.. وكان معانا عربية بيبى مش باينة طبعا بالنسبة لهم.. وكل واحد اساسا ماشيله بالازازة..
وحتى اللى ف وعيهم بياخدوا بالهم، بس بعد ما يكونوا هيتكفوا ع وشهم من الكعبلة ف عربية البيبى

هييييه، بقى بدأت الفير وركس، الاطفال الحمدلله مش شايفين غير رُكب الناس.. وعشان احنا بعيد شوية حلوين ف ماكنتش واو قوى

وعشان الليلة تكمل بقى كان فيه ضباب لفترة كدة.. ع اساس ان الربع ساعة مدة كبير طبعا تتحمل ان يجي ضباب يضيع شوية من الالوانات اللى بتتفرقع ف السما.. اللى احنا برضه مش شايفنها للدرجة اصلا

كل ده مش مهم..
خلاص خلصت الربع ساعة وهابى نيو يير وفرقعوا ازازيز الشمبانيا
وكان لا يقل عن 400 الف واحد حولين المكان بيتفرجوا..

ايه بقى الخطوة اللى جاية؟؟
اننا نروح ان شاء الله بيوتنا.. هأ، وهذه كانت اللحظة الحاسمة التى لا تُنسى
الناس ماشية ف اتجاهين قدام بعض، ناس عايزة تمشى يمين وناس شمال
ده غير طبعا السكرانين اللى ماشيين يتراقصوا وماشين بالعرض لوحدهم

تقريبا محدش بيتحرك من مكانه ولا حتى قوة الدفع نافعه من شدة الزحمة.. انا ماسكة بنتى ف ايدى متبتة عليها واكاد أُجزم انى مش عارفة الف راسى ابص عليها من كتر الزحمة.. وانا عارفة انها متداسة بين الرجلين بس مش شايفها

والبيبى اللى كانت معانا ف عربيتها كانت بترقع بالصوت، من الخضة وانها مش عارفة تتنفس من الزحمة.. وتقريبا الناس كلها بتتزق عليها ومش عارفين يعملوا حاجة

جينا بالذوق نقول لواحدة سكرانة ماسكة الازازة: حسبى معانا بيبى.. قالت: لا مفيش مكان.. وقعدت ترقص

لاقينا بقى ان الذوق مش هينفع مع العالم دى.. ف اتعصبنا كلنا ودخلنا فيها لابسنها الازازة كلها ع هدومها، وبقينا نزق بكل عزمنا واللى يقع يقع، واللى يسب ويشتم.....براحته، مش فارقة

المهم نعدى ايكش يولعوا كلهم ف ستين داهية

فضلنا كدة شاغلين ضرب بالكوع وزق ف البشر لحد ما وصلنا عند بوابة، البوليس قافلها وواقفين وراها.. قلنا ناخد بريك بقى شوية بعد المعركة.. دى اللى حسيت للحظة انى ف التحرير

وبعدين نكمل، تكون الدنيا هديت شوية عشان نطلع من الكابوس المميت ده ونروح

قعدوا بقى الناس يخبطوا ع البوابة ويشتموا ويتسلقوها عشان يعدوها.. لإن وراها ع طول محطة المترو..

بس عشان المترو مايقدرش يستوعب الاعداد الخيالية دى.. ف قفلنها عشان الناس تتمشى مش تركب

المهم ف الاخر هجموا ع البوابة فتحوها، والبوليس جه جرى يتصل ببعضه عشان يزودوا عددهم يمنعوا الناس اللى ماعدتش انها ماتعديش

كنا احنا بقى عدينا وشخطنا ف البوليس عشان معانا اطفال وهنعدى يعنى هنعدى

وكانت لسه بقى هتقوم خناقة ما بين اتنين هنود وهيكسروا ازازير ع بعض.. خدنا ديلنا ف اسناننا ونطنا ف المترو،

وصلنا الحمدلله سالمين بيوتنا.. نسب ونلعن ف دى تجربة ونحلف ما هنكرارها تانى

وهابى نيو يير بقى :)


رحاب المليحي

21 comments:

Anonymous said...

Ramy Elalfy
الا هو انا كنت سبب الاقتراح ده ؟؟؟
يارب تكون بخير ههههههههه
حلوه كالعاده ياحوبا

Anonymous said...

Alaa Eid
Remind me next year (even by locking me in the house and hiding the keys) not to go to the Fireworks again please ....;-)

Anonymous said...

Karim Elsheikh
هيئ .. بيتكوا اولى بيكوا
ده امبارح من كتر الزحمة معرفناش نمشي بالخييييييييييييل في الجبل ههههههههههه

Anonymous said...

Sami Ahmed
ههههههههههه, معلش, الحمد
لله انها جات على قد كده, وهابى نيو يير :)

Anonymous said...

انا مصريه
الحمد لله ربنا ستر وهابى نيو يير عليكم

Anonymous said...

Mo'men Sa'ad
ماله التليفزيون ؟!! :o
__________________
هابي نيو يير هوبه .. :)

Anonymous said...

Adel Elsayed
u should ask before u go lady????/

Anonymous said...

Mona Soliman
A7la 7aga forget el beit having something warm to drink we nice snacks to eat ;-) bas yala ma7adesh beyet3alem bebalash ya 7oba ;-) T3eshy we takhdy
(oups: 2a2sod tekteby) gherha ;-) LooooL

shahi2008 said...

mohima gieedaaannnnnn la7zit el break deeeeeeeee heheheheheeeeeeee

Anonymous said...

Sarah El-Eskafy
‎:-D

Anonymous said...

Mahmoud Abdo
وده جزاء اللى ميسمعش كلام مامته

Anonymous said...

Asma Assouma
‎7amdilla 3ala ni3mat el 2islam

Anonymous said...

Amr Aly
وصفتي كإني كنت موجود معاكم بس فعلا من خرج من داره اتقل مقدراه مفيش احلى من الفرجة في التليفزيون

Anonymous said...

Maram El-Gendy
a7eeeeeh kol da 7aslk y3ene :DDmlha masr byrmo kyaaas mya mn elblkonaaa wbs kda wkolna bnshofha :D:D

Anonymous said...

Heba Ghandy
hahahahaha .. da akeeed mn 7kdna ana w as7aby 3l L nas L kano hnaak .. m3lsh b2aa ya 7ooba :D

Anonymous said...

Hager Emad
hhhhhhhhhhhhhhhhhhhhh :D w ady a7'ret ely yo7'rog men daro

Anonymous said...

Orked Mohammed هههههههههههههههههههههههههه​هههههه علشان تحرمى تنزلى من بيتك تانى :D

Anonymous said...

Halol Halol
ma3lesh ya hoba adeeky etfsa7ty , we happy new year

Anonymous said...

Sayed Shaban
كان ماله بقى البيت يا حوبا وتجيبى ربع لب سوبر وربع لب ابيض من المقله اللى ف ميدان طلعت حرب بتاع لندن وتتفرجى ع فيلم هوم الون او ليله ساخنه بتاع الحاج نور الشريف :)))

Anonymous said...

Remo Eslam
هههههههههه
يعني التليفزيون وحش يعني
اجمل حاجة تقضي ليلة راي السنة وانتي تحت البطانية فالبيت :D
هابي نيو يير ياسكرة

Anonymous said...

Hossam Hanafy
المرة الجاية انصحك تحضرى ماتش كورة بين انجلترا و ألمانيا و ياريت يكون نهائى بطولة كده ... حتشوفى فايرووركس لمده أسبوع مع نفسك