Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, October 26, 2011

لقطات من وحى الحياة (2)


طول ما احنا ماشين بنشوف لقطات كتير متكررة فى حياتنا أو حياة غيرنا.. احيانا من كتر ما اتعودنا عليها مابقناش ناخد بالنا من وجودها حولنا


اللقطة الأولى:

- نفسى الاقى بنت الحلال اللى تفهمنى وتحبنى واحبها.. زهقت بقى من عيشة السينجل.. عايز واحدة كدة تبقى لى حبيبة وصديقة واخت.. يمكن وقتها اتلم واتعظ ومابصش بره.. حابب دفا البيت والأسرة.. ارجع بيتى الاقى مراتى كدة مستنيانى وكل حاجة ف البيت جاهزة.. ارمى همومى فى حضنها.. واكل من ايديها.. وازعلها واصلحها وادلع عليها.. وتبقى كل حاجة فى حياتى.. تستحملنى وتطبطب عليا.. واساعدها فى كل حاجة ويبقى ايدى ف ايديها نبنى مستقبلنا مع بعض.. خلاص تعبت من حياة العزوبية ونفسى أتأهل.. ومش هسمع لصحابى اللى بينصحونى إنى كدة ف نعمة.. لأ، انا كدة مش مبسوط ونفسى الاقى بقى نصى التانى.. بس المهم انى اختار صح وربنا يباركلى فيها وتبقى سندى فى حياتى وشريكة عمرى


*********

- يقطع الجواز وسنينه.. كنتى فين يا لأ لما قلت الأه!!! لو اعرف بس مييييين اللى زقنى على الجوازة دى! ما انا كنت قاعد فى حالى متهنى ومبسوط.. وكل يوم مع مُزة شكل.. ده انا كنت بكتبهم عشان مانسهمش من كترهم.. واللى تتسهوك وتفكر ف الجواز برميها ورا ضهرى واشوف غيرها.. هو كان فى زيي.. يا سلام، يا سلام، ده انا كنت دنجوان عصرى..

مش الحياة السودا اللى انا عايشها دلوقتى.. ادخل البيت الاقى وكيل نيابة مستنينى، غفر واقف لى ع الباب.. ولا شكلها يقطع الخميرة من البيت.. يا بتجرى ورا العيال منكوشة.. يا ريحتها كلها بصل من وقفة المطبخ.. ال ايه وكمان عايزانى اساعدها، هو مش كفاية عليا قرف برة البيت؟ يبقى جوه وبرة؟؟؟؟ يووووووم من ايامك يا عزوبية بقى


­­­­

اللقطة التانية:

- كل يوم شغل، شغل!!! مفيش يوم اصحى كدة الاقينى صايع ماوريش حاجة!! ولا مدير يطلع عينى، من أجمل صفاته انه رخم، غتيت، طلباته مابتخلص.. ومش كفاية مطلع عينى وسحلنى لأ، وكمان مش عاجبه شغلى مهما اعمل.. وبيرمى لى ملاليم اخر الشهر.. مش بيكفونى حتى لآخر الاسبوع وبضطر استلف.. ولما اشتكى واطلب زيادة.. يقولى ميزانية العمل لا تسمح..

وللا زمايلى ف الشغل حكاية.. كله بيخزوء كله.. متعرفش الضربة هتجيلك من مين، امتى!! واللى النهاردة صاحبك.. بكرة هيقعدك على حجره ويغنى عليك.. وف الاخر يقولك المهم انك شغال، لا يا عم انا عايز ابقى عاطل بس بكرامتى وبراحتى.. مه انا كدة كدة بستلف وعليا ديون قد كدة.. يبقى خلاص مهى محصلة بعضها

**********

- يارب اشتغل بقى، ولو شغلانة بسيطة تكون البداية حتى.. مش لازم يعنى أبدأ مدير عام.. انا طموح وعايز اخد السلم من أوله.. بس حد ياخد بإيدى ويورينى فين السلم ده يا جدعان اشاسا.. نفسى كدة اصحى كل يوم بدرى انزل اشوف أكل عيشى.. ارضى باللى ربنا قسمهولى.. اجيب اى حاجة من تعبى وشقاية واكون فرحان بيها واحمد ربنا عليها.. وبالورقة والقلم احاول اخلى مرتب الشهر يكفى كل طلباتى.. ومع الوقت والشغل بجد ونشاط مهما كنت مش حابه، هكبر وابقى حاجة تفيد نفسها وتفيد بلدها.. بش اشتغل يارب.. لحسن خلاص الفراغ والصياعة خلوا دماغى عاملة زى الحصالة الفاضية المتربة


اللقطة التالتة:

- بس ياااااااااااا واد... سيب اختك ما تضربهاش.. يا واد شعرها، هتقرع كدة.. يقطع الخلفة وسنينها.. امتى تكبروا بقى وارتاح من همكم ؟؟ بس اهو همكم ده هيفضل راكبنى لحد الممات.. قطيعة، انا عارفة كان ايه اللى هفنى فى دماغى انى اجيب عيال! طلباتهم مابتخلص.. وزن زن على طول الخط.. دول عدوا مرحلة دموع التماسيح بمراحل.. وللا المسكنة والتمثيل مالهمش زي، أجدع من امينة رزق ويوسف وهبى ف زمانهم.. جيل عايز تربطوا ف مروحة شغالة، وتسيبوا كدة يلف ويلف يمكن ده يغيرلهم سوفت وير دماغهم.. ومهما تعمل ولا اى حاجة بترضيهم.. يجوا ع الهايفة ويتصدروا.. ما كان الواحد جاب له عيل واحد كفاية، ولا ماجبش خالص وارتاح.. نفسى احطكوا على السايلنت مود بقى شوية.. مش ما بين كل ثانية والتانية عشر مرات تقولولى يا ماما، يا ماما.. يابااااااااى

***********

- مش بتمنى حاجة فى حياتى غير ضفر عيل.. يا سلام لو ربنا رزقنى بطفل، لا هاخليه ولا قبله ولا بعده.. يشاور هو بس ويلاقى طلباته أوامر حتى لو طلب لبن العصفور.. نفسى اسمع كلمة ماما.. نفسى اتعب ف تربيته ويطلع عينى معاه.. مش ربنا قال: الجنة تحت اقدام الأمهات! أُمال إيه؟؟ هى الخلفة والأمومة كدة بالساهل.. مهو لازم نتعب ف تربيتهم عشان ربنا يجازى آخرة صبرنا خير.. لازم نزرع زرع اساسه طيب وقوى.. عشان نحصد كل خير.. نفسى يجي يجرى عليا اخده فى حضنى ومايبطلش طلبات.. نفسى لما يتعب اسهر على راحته.. يكبر قدام عينى واشوف بذرة تعبى فيه فى أخلاقه العالية وتربيته الحميدة.. اضحك لضحكه وازعل لزعله.. ولما يعيط اجرى عليه اخده ف حضنى واحس وقتها انى ملكت الدنيا كلها ما بين صوابعى.. وعمرى ما هزعله ولا ازعق له.. يارب ارزقنى بطفل يكون سندى فى حياتى ويدعى لى ف مماتى.. طفل واحد بس يارب اعيش عشانه ويبقى عمرى اللى باقى كله


**********

محدش عاجبه حاله ومحدش مرتاح ف حياته.. ومحدش بيرضى بقليله.. وكل نفسه ف اللى فى ايد غيره.. ودائما وابدا الممنوع مرغوب.. وكله بيغنى على ليلاه


_____________________


الجزء الأول:

http://rehabelmelehy.blogspot.com/2010/11/blog-post.html

رحاب المليـــــــحي



15 comments:

Anonymous said...

Marim Esamy
صح محدش عاجبه حاله ابدا

Anonymous said...

Ahmad Mokhtar
حلوة قوي قوي قوي .. بسيطة بس جميلة وفى الصميم جدا

Anonymous said...

Basma Bahaa
جميلة يا رحاب:)

Anonymous said...

LosHa Øps
محدش عاجبه حاله ولا حيعجبه لان هو ده الانسان دايما عاوز ولما تيجى الحاجه ويشوف مشاكلها يقول انا كان مالى ومال وجع القلب ده ما انا كنت مرتاااااااااااح هى دى الدنياااااااا محدش عجبه حاله فيها ومحدش فيها مرتاااااااح بس الحمد لله على كل حال

Anonymous said...

Amr Aly
مما بين السطور يحمل بين طياته تفكير عميق للنفس البشرية وما فيها

سبحان الله ربنا لما خلق الخلق وقسم العقول على عبيده كل عبد من عباده عجبه عقله وتفكيره ودماغه أوي وتخيل إنه أوتي من العقل ما لم يؤته أحد من قبله , ولما ربنا قسم الأرزاق على خلقه نفس عباده اللي عجبهم عقلهم وارتضوا به هما نفس البشر إللي معجبهمش رزقهم وتخيلوا أنهم في ضنك وفقر وكرب وإنهم مكتوب عليهم الشقاء في الدنيا , النفس طماعة لا تتبع إلا هواها وميملاش عنيها إلا التراب الفقير يقول ليه يارب خليتني فقير والغني يقول ليه يارب اخدت مني كل حاجة وادتني الفلوس اعمل بيها ايه اقول بكل صراحة اني عشت اللقطة التانية مع نفسي والأولى عارف اني هعيشها وكل واحد فينا وأي نفس بشرية لازم تكون كدا

بجد يا رحاب نوت جميلة اوي على الاقل شفت نفسي ادام مرايتي

Anonymous said...

Amr Aly
مما بين السطور يحمل بين طياته تفكير عميق للنفس البشرية وما فيها

سبحان الله ربنا لما خلق الخلق وقسم العقول على عبيده كل عبد من عباده عجبه عقله وتفكيره ودماغه أوي وتخيل إنه أوتي من العقل ما لم يؤته أحد من قبله , ولما ربنا قسم الأرزاق على خلقه نفس عباده اللي عجبهم عقلهم وارتضوا به هما نفس البشر إللي معجبهمش رزقهم وتخيلوا أنهم في ضنك وفقر وكرب وإنهم مكتوب عليهم الشقاء في الدنيا , النفس طماعة لا تتبع إلا هواها وميملاش عنيها إلا التراب الفقير يقول ليه يارب خليتني فقير والغني يقول ليه يارب اخدت مني كل حاجة وادتني الفلوس اعمل بيها ايه اقول بكل صراحة اني عشت اللقطة التانية مع نفسي والأولى عارف اني هعيشها وكل واحد فينا وأي نفس بشرية لازم تكون كدا

بجد يا رحاب نوت جميلة اوي على الاقل شفت نفسي ادام مرايتي

Anonymous said...

Haitham Hassan
واللى وقف على لقطة
واحدة هو اكبر الخاسرين ... مش المهم الرضى بلقطة معينة انما الرضى بالتجربة نفسها وانها اصبحت جزة من حياة الانسان بخيرها وشرها اكيد هيكون ليها وجه استفادة فى حياته بعد كده ...
والحمد لله على كل شىء

Anonymous said...

معنديش غير رد واحد
قطشيعة :D
لا شكر ولا حمد كده خالص

سارةالاسكافى

Anonymous said...

Mohamed El Bermawy
حاسس ان فية تطور فى كتاباتك بمعنى انى بقيت اقرأ كتاباتك لاخرها ودى عادتا مش بتحصل كتير مع اى حد الا لما احس انه بيقول حاجة

Anonymous said...

رحاب - لقطات بحق من الحياه - فعلا من كثرتها لا نتبه لها - اسلوب جميل ممتع
تمنياتي بدوام التوفيق

أيمن المليحي

Anonymous said...

Omaima Ezz Eldeen
لذيذة جداااااااااااااااااا يا حوبا

Anonymous said...

Nancy Safwat
gamda gadan wsa7 gadn tslm aedk ya gamel

Anonymous said...

Miaie El Shafi
كل كلامك تحفه بجد تسلم
ايدك

Anonymous said...

SoŁŁŸ Emad
helwa awy :D
bzat bt3t el 3eyal de :D

Anonymous said...

جميلة المقالة ربنا يفتح عليكى ومافيش أحلى من الواقع

ماما