Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, November 07, 2011

فتاوى لندنية


- لو سمحت، حضرتك

- صدق الله العظيم.. نعم؟

- هو حضرتك بتتكلم عربى؟

- مش شايفنى بقرأ قرأن بالعربى!! مش محتاجة ذكاء يعنى حضرتك

- معلش انا اسف، اصلى لسه جى لندن جديد ولسه مش مستوعب الدنيا ماشية ازاى؟

- مش مستوعب ماشى، لكن مش بتشوف كمان، احم، لا مؤاخذة القافية تحكم، نورت لندن

- مقبولة منك يا سيدى، انا بس كنت رايح اصلى الجمعة ف كنت عايز أتأكد هلحق الصلاة ولا لأ؟

- (يبص ف ساعته) مهو حسب انت رايح تصليها فى انهى جامع؟

- ازاى يعنى؟

- يعنى لو الجامع الكبير، يبقى يا دوب هتروح ع الصلاة بالظبط لكن مش هتلحق الخطبة.. لكن لو اى جامع تانى من الصغيرين يبقى براحتك بقى.. عشان بيصلوا مرتين

- مرتين؟ مرتين ازاى يعنى؟

- يعنى بيصلوا الجمعة مرتين.. عشان بيكون فيه ضغط ع الجوامع الصغيرة

- حلو الاختراع ده.. طيب بالنسبة بقى لصلاة العيد؟

- لا صلاة العيد بتتعاد اربع مرات بس ف الجامع الكبير

- اربع ايه؟ يعنى بتقعدوا اربع ايام العيد تصلوا وللا ايه، يعنى حضرتك؟

- اه، لا واضح انه مش موضوع انك مش بتشوف بس، وشكل القعدة هطول.. بص يا سيدى الجامع الكبير ده اكتر جامع المسلمين بيحسوا بصلاة العيد فيه.. عشان بيكون زحمة قوى والتكبيرات بتكون فى الميكروفونات برة.. وبرغم حجمه الكبير لكن مش بيستوعب كميات المسلمين المتوافدين عليه ف صلاة العيد.. عشان كدة بتتكرر الصلاة اربع مرات ورا بعض.. تقريبا كل نص ساعة صلاة.. ف الناس كلها تقدر تروح تصلى

- امممم، وكدة ينفع يعنى؟ يعنى تتحسب لك صلاة؟

- ايوة طبعا، دى فتاوى الشيوخ بتوعنا هنا وكله متفق عليها

- طب دلوقتى انا جى هنا سنة، ولسه مش عارف اظبط مواعيد صلاتى ممكن اصلى قصر لحد ما اقدر اظبط حالى؟

- ممكن تصلى قصر السنة كلها لحد ما ترجع بلدك وبيتك

- نعم؟

- طالما مش ف بلدك ولا قاعد ف مكان حاسس انه بيتك.. يبقى مهما قعدت هنا سنين ممكن تصلي كله قصر لحد ما ترجع بيتك وبلدك

- طب السكن اللى انا فيه دلوقتى مفيش جانبه محلات حلال.. اقضيها بقى فول وتونة وابقى نباتى وللا اعمل ايه ف سنتى دى؟

- لا خالص، بص لو مش باستطاعتك انك تروح مكان تشترى منه لحم وفراخ حلال يبقى هات من اللى جانبك

- طب هو يعنى ايه مفهوم الحلال؟

- يعنى مدبوح ع الطريقة الاسلامية

- كان واحد صاحبى بيحكى لى انه جانبه محلين واحد حلال والتانى لأ، والمحل الحلال مغلى اسعاره قوى عشان مفيش غيره ف المنطقة

- يبقى يُحلل لصاحبك انه يشترى من المحل التانى، طالما المحل الحلال بيستغل ان مفيش غيره ف المنطقة ومغلى اسعاره، ف لو صاحبك مش ف مقدوره يشترى الغالى يبقى يشترى من المحل التانى

- اممممممم، طيب معلش سؤال كمان

- اتفضل

- الشغل اللى لاقته مع الاسف بيقدم خمرة وخنزير.. وبرغم انى قدمت ف حاجات تانية كتير، لكن هو ده اللى اتوفقت فيه.. اعمل ايه؟ اكمل وللا استقيل؟

- لو مالكش مورد رزق تانى، يبقى تكمل فيه لكن لازم تدور ع غيره.. ماتسوقش فيها يعنى وتقول هما اللى قالولى

- اخر سؤال بقى، اخر سؤال وافرج عنك.. انا يوميا لازم اصحى قبل الفجر عشان شغلى، وانت عارف العشاء بتأذن ع 11 والفجر بيأذن ع 3.. ف مش بقدر استنى للفجر، ف بصليها قضى وده مضايقنى

- لأ، طالما كدة، يبقى تجمع المغرب والعشاء وتنام.. مادام ظروف شغلك بتحتم عليك الصحيان من الفجرية ومش بتقدر تسهر للعشاء

- هو انت متأكد ان دى فتاوى صحيحة مش فتى؟؟؟ ولا دى فتاوى ع الطريقة اللندنية وصفة تيك اواى؟ نظام خليك فريش انت ف رحلة!!!

- هههه، لا يا عم مش بفتى ولا حاجة وروح أسأل الشيوخ بنفسك

- إلا صحيح، انا باخد بالى ان فيه بنات صغيرين محجبات فى لندن بس احيانا بيكون الحجاب ع لبس نص كوم؟ ده برضه عادى تبع الفتاوى النص كوم اللى انت هارينى بيها من الصبح ولا ايه؟

- هنا فى لندن بيحبزوا ان البنت تتحجب من صغرها، عشان انت عارف انها بلد الحرية كل حاجة فيها مباحة.. ف بتحاول الأهالى انها تخلى الحجاب الزى الطبيعى للطفلة من صغرها.. وواحدة واحدة تتعود ع انه جزء من لبسها مش حاجة غريبة.. عشان مايبقاش فيه تشدد قوى، بيخلوا البنت تغطى راسها الأول.. وبعدين الموضوع يجي براحة.. لكن لو ادينها مطلق الحرية ف لبس الحجاب من عدمه وكانت مثلا وصلت سن المراهقة ف بلد زى دى.. طبعا هترفض وتقولك حجاب ايه ومالبس زى صحباتى ليه؟

- اهاااا، تصدق دى الحاجة الوحيدة اللى مقتنع بيها ف الكلام الكتير اللى انت قلته، هى دى بس اللى استمخيت منها

- ماشى يا سيدى، فرصة سعيدة، ياريت ماتتكررش

- لأ رايح فين، هات نمرة تليفونك بقى لحسن شكلى هحتاجك كتير، ع موبيلات بقى يا صديكى اللندنى

رحاب المليحي

14 comments:

Anonymous said...

Sami Ahmed
ههههههههههههه, لأ جامدة
:)

Anonymous said...

Roka
فتاوى لندنية جاااااااااااااامدة

Anonymous said...

Maram El-Gendy
ya Hoba ya GAmeed ;)))

Anonymous said...

واضح من كل الفتادى انها هزار لكن انا اعرف ان القصر فى الصلاه الاربع ركعات لكن الفتوى دى جديده عليا بس فعلا هيا حقيقه ولا هزار

انا مصرية

Anonymous said...

Sarah El-Eskafy
ما انتوا لو عندكوا اخوان ولا سلفيين مكنش حد يجرؤ يقول الكلام ده :P

Anonymous said...

Salma Gamal
دين الاسلام يسر ياسلام لو كل حاجه كده نبسطها بس طبعا فى حدود الشرع مكنش هيحصل اى ازمات عندنا فى مصر
بس بجد تسلم ايدك حلوه اوى

Anonymous said...

Ahmed Mamdouh
هو الاسلام دين يسر بس هل الفتاوى دي فعلا أكيدة ؟؟؟؟؟؟؟؟؟؟؟؟؟؟؟

Anonymous said...

جد رائعة طريقة سردك للأحداث وممتع جدا الكلام, فعلا مبدعة لكن بحكم اختصاصي التسويق صفحتك محتاجة شوية همة (بالمصري) حتى يتعرفوا بها اعضاء كثير لأنهم فعلا سوف يستمتعون بكل محتواها.
زينب من المغرب

Anonymous said...

Mohamed Abdo
انا مقتنع بكل الفتاوي ما عدا حكاية صلة العشا دي !!

Anonymous said...

Sayed Shaban
لذيذه فعلاً ياحوبا

:)

Anonymous said...

SoŁŁŸ Emad
da begad ya rehab :D

Anonymous said...

فتي السنين يعني
حلوه ياحوبا
Ramy Elalfy

Ahmed Elfkhrany said...

حلوه يا حوبا

Anonymous said...

Rula Al-jadir
Hilwa ya hooba :) dahaktini wana mush fil mood :)