Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, February 02, 2011

انت مع ولا ضد؟


بعد ما سمعت بيان الريس انه مش هيرشح نفسه لفترة رئاسة جديدة.. اتبسط قوى من كلامه واحترمته.. واعترضت ان المتظاهرين رافضين يروحوا ومصممين على موقفهم انه يمشى.. لكن بعد ما فكرت فى الكلام.. لقيت انه مدرسة دهاء سياسى لا قبله ولا بعده.. ببيانه ده ولع الناس فى بعض.. قسم الناس إلى مجموعتين مع وضد.. وفجأة طلعت ناس تقول لأ خليه، انتوا اللى بتخربوا البلد، انتوا اللى هتقضوا على البلد..

كنتوا فين من اسبوع؟ كنتوا فين لما الشباب كان بيحميكم ويدافع عنكم؟؟ كان مين اللى بيقول إن لولا الشباب ده اللى حمينا كنا موتنا واتبهدلنا؟؟ دلوقتى جايين تقولوا ان الشباب ده هو سبب الخراب.. جايين دلوقتى تقولوا ان الريس صح وارحموا عزيز قوم ذل.. ده زى ابوكم.. مش هو ده برضه اللى اطلق سراح البلطجية والحرامية من السجون بأوامر منه علشان يثير الفزع والرعب عند الناس عشان يلهى الناس فى الخوف وعشان يقولوا لأ خليك بس ادينا الامان.. مش ده برضه اللى سحب الأمن مرة واحدة من البلد كلها.. مش ده برضه اللى عمل قانون الطوارىء وموت وعذب وسحل ناس ياما فى بلدنا.. دلوقتى ادوله فرصة.. دلوقتى ده زى ابوكم..

اسفة لو ده ابويا انا اولع فيه بإيدى.. اسفة انا مايشرفنيش ان ده يكون زى أبويا.. واللى ماوثقتش فيه 30 سنة ماقدرش اثق فيه 7 شهور كمان.. بلاش تبقوا عاطفيين قوى كدة لدرجة مستفزة..

انا عارفة ان البلد واقف حالها دلوقتى.. لا فى اكل ولا مرتبات ولا بنزين.. بس وجهة نظرى ان الناس دى لو روحت وسكتت على كدة يبقى خلصت كدة.. وهايتنفخوا السبع شهور اللى فاضلين.. مفيش اى ضمانات لكلامه وهو شخصية بقى غير موثوق فى كلامها.. وكفاية قوى اللى عمله ف البلد..

والناس اللى بتقول ميدان التحرير موجود وابقوا انزلوا تانى لو مانفذ كلامه.. هيكون بعد ايه بقى.. لا هو هيديهم فرصة ينزلوا.. ولا الشباب هيكون لسه بنفس النشاط والهمة انهم ينزلوا.. هيكونوا خلاص انكسروا..

شايفين اساسا اللى بيحصل دلوقتى حالا فى البلد؟؟ الناس عمالة تضرب ف بعض بالحجارة والعصيان.. وده بعد اقل من 24 ساعة من بيانه.. أمال كما 7 شهور هيحصل ايه؟

ربنا على الظالم والمفترى.. والقوى فيه الأقوى منه

انت معايا ولا ضدى؟

رحاب المليحي

*************************************

كلنا محتاجين التغيير، وكلنا مع التغيير، وانا واحدة من الناس اللي طبعا مع التغيير ومع اسقاط النظام، ولكن مع التفكير. انا مبسوطة من خطاب الرئيس وشايفة ان احنا خدنا كل اللي احنا عايزينه. إنه مش هيرشح نفسه الفترة اللي جاية، واستحالة ابنه يرشح نفسه، هيعدل الدستور، الطعون اشتغلت، ودي كانت المطالب الأساسية.

الناس لسة في التحرير بتنادي إنه يمشي دلوقتي حالا والنهاردة قبل بكرة. لكن انا ضد ده.

انا ضد انه يمشي دلوقتي حالا وإنه لازم يستنى لغاية ما الفترة الرئاسية بتاعته تخلص. يا جماعة هو الوحيد اللي يقدر يغير الدستور اللي احنا اصلا نازلين عشان نغيره، لو مشي قبل ما يتغير يبقى الرئيس اللي هايجي جديد هايجي على الدستور نفسه ويبقى ماعملناش حاجة.

انا عارفة ان الناس خايفة انه مايعملش اللي هو وعد بيه، لكن ليه مانديش فرصة الكام شهر دول نشوف هيعمل ايه، يمكن فعلا يغير، ولو متغيرش اهو ميدان التحرير موجود. وبعدين احنا صبرنا 30 سنة مش قادرين تستنوا كام شهر؟ ماتنسوش كمان انه راجل عسكري صعب عليه انه ينسحب لكن خطابه معناه انه انسحب بكل هدوء وكرامة.

البلد هتخرب اكثر من كدة ايه يا جماعة؟ كفاية بقى. الناس مش لاقية الاكل، مش معاها فلوس، البنزين هيخلص، كل حاجة باظت. ادوا فرصة الفترة اللي جاية لحد شهر 9 وكل حاجة هتروح، ومن هنا لشهر 9 نشوف هيحصل ايه. ليه مانفكرش انه يمكن يكون هيعمل اللي متعملش قبل كدة عشان الناس تفتكره كويس قبل ما يمشي وتبقى معاه.

الاحزاب هتتخانق على حتة التورتة اللي هي مصر واحنا في النص. كفاية وقف حال.

المصري اليوم كاتب انهم مسكوا ناس اجانب بتوزع على الناس في ميدان التحرير منشورات ضد النظام، يبقى واضح قوي ان اللي بيحصل دلوقتي مخطط.

كل اللي احنا عايزينه اتعمل، اتفقنا على المبدأ، هنيجي دلوقتي نتخانق على الوقت؟ حاسة ان الناس مابقيتش عارفة هم عايزين ايه، وسعت منهم، ومهما هيعملوا مهما هيقولوا مش هيعجبهم وبرضه هيطلعوا حاجة مش هتعجبهم.

انا شايفة انه لازم يستنى لنهاية فترته الرئاسية عشان الاستقرار وعشان اللي احنا عايزينه يتغير.

انا مش ضد التغيير، انا مع التغيير، ومع التنحي، ولكن في الوقت المناسب حتى يستطيع ان يحقق ما أردناه، وحتى نحترم هذا الرجل الكبير أن يرحل بكرامة.

مين اللي معايا؟

هاجر عماد

33 comments:

Anonymous said...

Ahmed SaȜeed
مع ارحموا مصر .. البلد بتولع

Anonymous said...

Halol Halol
ana tab2an kont ma3 el.mozahrat fel awl
laken ba3d khotbet el.rayes , ana ba2ol khalas, kefaya keda mozaharat , el.bald fe3lan wala3t
kefaya keda bgd , el.balad bazet
wel kol el.mataleb et7a2a2et

Anonymous said...

Eissa Allouh
انا يا رحاب مع الشعب وضد النظام اذا فى هالوقت نل الحزب الواطى ونازل ضرب فى الشعب طيب فى السبع شهور اللى ضايلة حيحصل ايه
حسبنا الله ونعم الوكيل عليك يا مبارك انتا ونظامك

Anonymous said...

SẳŘẳ K. Aĥḿệď
ضد طبعا

Anonymous said...

Nourhan Hossam
انا مع مصر والله العظيم مصر هتضيع لو حصل حرب أهلية

Anonymous said...

Farawlah Ahmed
ضد

Anonymous said...

Farawlah Ahmed
مبارك هو السبب

Anonymous said...

Aliaa Ibrahim
يعني ايه مع ولا ضد يا رحاب ؟؟؟؟
هما معرفوش يفرقونا بمسلم و مسيحي هيعرفوا يفرقونا بمع ولا ضد ؟؟؟
ليه منسيبش المجال فترة نشوف نتيجه اللى الشباب عملوه.. و لو معجبناش كلناااا هنرجع تانى.. ياريت نفكر بهدوء شويه

Anonymous said...

Rana Badawy
قبل ما أقرأ وبعد اللي شايفاه بيحصل في شباب الثورة في التحرير أنا ضد

Anonymous said...

أساس ايها الكاتب العزيز لم ينقسم الشارع المصري إلى قسمين بعد الخطاب ، فالشارع المصري هو شارع واحد "إرحل عنا يا مبارك مش عيزينك " أما ما قد شاهدناه اليوم هي لعبة عمر سليمان المخابراتية التي تنكرت بالزي المدني و هاجمت المعتصمين العزل في ميدا...ن التحرير بالسكاكين و الحجارة التي جلبوها معهم ، هذه اللعبة هي من تنفيذ عمر سليمان من أجل كسب الوقت و إظهار المؤيد و المعارض لكف الضغوطات الدولية عليه بالتنحي عن الرئاسة ... فالمواطن المصري الشريف ما زال صامداً رغم جوعه و عطشه و رغم الم حناجر المتظاهرين الصارخة في وجه الباطل و الفساد الذي ادخل البلاد إلا ما يحمد عقباه
و الحق هو المنتصر بإذن اللهSee more
كاظم لندن

Anonymous said...

Muhammad Fattouh
حلو الكلام يا رحاب و اختلفم معاكى يا هاجر لان فى 30 سنه سرقه و استهزاء و 130 قتيل و 500 لم يتم العثور عليهم يعنى باتيتكلمى فى تقريبا 700 قتيل ارحم اللى يستاهل الرحمه مش ده و سلام علشان انا نازل اكمل مع زميلى و بعتزرلهم انى روحت امبارح


انا معاااااكى يا رحااااااااااب و اختلف مع هاجر و على فكره انا اتشتمت امبارح لانى قولت مينفعش و الناس قالتلى كده كفايه بس كان عندى حراسه على الشارع و ك الناس اللى متعرفش حاجه عن السياسه الا من يومين هيشتمو فيكى و فيا

Anonymous said...

Ola Mostafa
كلامك كله صح يا رحاب وبقيت بتشتم من اقرب الناس ليا دلوقتي لما اقول لازم الثوره تكمل محدش عايز يفهم حاجه النظام وصلهم حاله من الذعر مش هينسوها لسنين طويله وبعدين اللعبه دلوقتي بعد لما منفعش موضوع البلطجه انهم سمحوا لعناصر من غزه بالدخول علشان يقولوا انها مساله امن قومي

Anonymous said...

Hesham Farouk Al Habbab
أنا مع وضد في آن واحد ... مع التغيير المتدرج والسلس حفاظا على مصر وأمننا وأمان أهلنا ... وضد كل من يتلاعب بأمن الوطن .. كل من يركب الموجة لمصلحة شخصية .. كل من يقلل من أنجاز الشباب ... كل من يهون من قيمة دم الشهداء ... ما حققناه حتى الأن يع...ود الفضل فيه لهؤلاء الشباب ودم الشهداء الذين ضحوا بأرواحم كي تعيش مصر حرة أبية ... لم يكن من الممكن الحصول على تلك المكاسب الديموقراطية التي أعلن عنها السيد الرئيس (فأنا ضد التقليل من قيمة أو إهانة الرموز بصرف النظر عن الإتفاق أو الأختلاف معهم) أقول ما أعلن عنه ولكن هذا الخطاب العاطفي تجاهل العديد من المطالب المهمة ومنها على سبيل المثال لا الحصر ... عدم إلغاء قانون الطوارىء ... عدم الإعلان عن محاسبة أجهزة الأمن والمتسبب في قتل الشباب وإصاباتهم ... إعادة تقييم شركات قطاع الأعمال المباعة بقيمها الحقيقية وتحصيل الباقي من ثمنها لصالح الشعب ... محاسبة ومحاكمة الفاسدين ورؤوس الفساد .. تعديل المادة 88 من الدستور التي تخول الإشراف القضائي على الإنتخابات ... وهذا مايجب أن يفاوض عليه أو يتحاور حوله المفاوضون أو المتحاورون مع رموز النظام ... طبعاً حل مجلسي الشعب والشورى هو مطلب ملح ولا يتحجج أحد بقصر الفترة فما بني على خطاً سيظل خطأ مدي الحياة ... لابد من تعيين لجنة لإعادة صياغة الدستور وبعدها يتم إنتخاب مجلس الشعب ومجلس الحكماء بدل من مجلس الشورى ويكون له صلاحيات تنفيذية وتشريعية كما هو حال الكونجرس الأمريكي .. ومن ثم إنتخاب رئيس للدولة بالإنتخاب الحر المباشر ... وفي خلال ذلك يجب أن يكون هناك مجلس ثلاثي للرئاسة يقوم بعمل رئاسة الدولة ورئاسة الوزراء أما الحكومة فيجب أن تكون حكومة تكنوقراط (تكنوقراط تعني إختيار أشخاص مميزين ومتخصصين كل في مجاله ولا ينتمون لأي من الأحزاب) وأن تسمى هذه الحكومة بالإنتقالية..See more

Anonymous said...

بجد انا مش عارف انا فين حاسس اني مش في مصر .. و اني بحلم بكابوس ونفسي اصحي منو بس للاسف دة واقع ولازم نتعامل معاه، بس يا تري هتمسك برحيله واستحمل اللي بيحصل في البلد من خراب و صراع و ضيق حال وقلق وكل يوم اشاعة وسهر للصبح نوم قلق علشان الحرمية و البلطجية، اذا كنت انا قادر استحمل اللي بيحصل غيري مش هيقدر;الطبقة الفقيرة كبيرة و معني اننا نستمر معني كده انك بتحكم علي ناس كتير بالموت ..

رغم كده من اللي حصل من الراجل ده من 30 سنة من نهب وسرقة في عهده يخليك تقلق انو يكون صادق في كلامو، انا بجد محتار و مش عارف البلد رايحة لفين بس، انا شايف وده رأي الشخصي ان نستني لحد ما تخلص فترة الرأسية ولو مبقاش قد كلامة خلال شهور يبقي اللي خلاك تنسي الخوف و تنزل الشارع و عرف التمرد والثورة يبقي اكيد هتعرف تعمل كده تاني وبكل سهول ..

انا معاكو في انو عالج الامور غلط في انو قطع وسائل الاتصال والانترنت ..

بس انا مش عارف ..

انا محتار و انا آسف يا جماعة اني طولت عليكو ..

تحياتي تحـــــيا مــــصر
حسونا

Anonymous said...

Princess Nour
طبعا يوم 25 يناير يوم تاريخى لمصر كلها وفعلا اتقلبت كل الموازين و قدرت فعلا تحقق انتصار رائع للغايه انا 100% مع تغير و اصلاح النظام بس انا مش مع الاهانه انا عمرى 32 سنه يعنى مشوفتش غيره و ده مش حلو طبعا بس فى نفس الوقت مقدرش اقبل خروج رئيسى... بطريقه مهينه مينفعش اقول لأ لازم يخرج حالا ديه دوله و دوله كبيره مش قريه و لا مدينه صغيره
بس فى نفس الوقت انا مش هقبل ترشيحه مره تانيه استحاله بدون نقاش
انا اتعطفت جدا مع خطابه و شوفت انه مش ازلال بالعكس ده كبر فى نظرى انه مش هيسيب الدنيا و يهرب زى ناس تانين و فى نفس الوقت مش هيرشح نفسه انا مش واثقه فى الحكومه زى ملايين بس انا مصدقاه و كمان اللى حصل النهارده فى ميدان التحرير مش من مصلحته تماما انا بفكر بعقلى مش اكتر
و ده رأيى

Anonymous said...

أحمد خالد
انا مع الامان والسلام للبلد الى اتولدت وعشت فيها مينفعش الى حصل غلطنا فى الريس دة خطا فى حد يغلط فى ابوة وادام العالم كلة وفى مصرى ينهب ويسرق ويروع المواطنون بهذة الصورة

الاخطاء مش من مبارك بل من الحكومة السابقة وهوة غير الحكومة غاوزين اية تانى انا بقول للشباب الى بياخد وجبات وفلوس من ناس غير مصريين على ان يتم تحريض الشباب على رفضهم للريس ان هؤلاء الناس العملاء عاوزين مصر تتخرب

Anonymous said...

Tarek Essam
ma3aky tab3an

Anonymous said...

Engy Mohamed Gamal Eldin
ana mesh ma3 7adh kefaya 7'arabh
i need peace

Anonymous said...

Fatmah Ali
لا ارجوكى لازم نتفائل بلدنا ان شاء الله هتكون احسن لازم نتاكد من دا هشتغل اكتر من الاول ونرجع كل حاجه احسن من الاول ان شاء الله لازم نقوى بعض هننزل كلنا ننظف بلدنا ونرجعها احسن من الاول نرمم الاماكن اللى اتحرقت ونحاول نرجع كل حاجه زى الاول ...لازم نكون ايجابيين مش هينفع نفضل زعلانين ومش بنتحرك كلنا لازم نرجع لشغلنا ولحياتنا مش زى الاول بس احسن بنشتغل عشان نفسنا ولبلدنا كمان احنا بنحب بلدنا مش كلام بس لازم افعال يعنى كل واحد يعمل حاجه ينفع بيها نفسه وبلدنا على الاقل الناس تتقن شغلها اكتر
ان شاء الله كل حاجه هتكون احسن
ان شاء الله بكره هيكون فى حمله تبرع بالدم فى رساله المهندسين من الساعه 10 لحد الساعه3
كل اللى عايز يبدا لازم نبدا بجد مش عايزين نضيع وقت تانى

Anonymous said...

Nora Galal
لا حول و لا قوة الا بالله العلى العظيم يارب العالمين خلاص هنقسم نفسينا استغفر الله العظيم يا رب

Anonymous said...

Mohamed Shouman
ana ma3a masr, ely delwa2ty sawa2 kont men Yes or No fa nasetoha kolokom,ana m3a masr ely btro7 fe el rgleeeeeeeeeeeeeeen

Anonymous said...

Sally ElFouly
Ana wa7da men el nas lama seme3t el 7'etab e7taramtoh we 2addartoh le7ad ma ba3daha be a2al men nos sa3a shoft e7'waty elly ba2alhom 8 ayam wa2feen 3alashany we 3alashan kol el masreyeen beyetderbo we men 3'er sabab. Men meen edarabo?? we l...eh??? we 3aiza 7ad ye2olly meen ba3d ma seme3 7'etab el rayes fakkar yenzel yedrab fe a7'ooh 3alashan yefdal Mubarak. Law feeh 7ad ektana3 be 7'etab Mubarak fa dah le sabab wa7ed...3alashan me7tag e3adet esla7 el balad mesh 7obban feeh...fa ezay nafs el sha7's elly 3aiez yesala7 el balad howa nafsoh elly nezel yet7'ane2 ma3a el motazahreen bel asle7a el bayda2 3alashan yerga3o beyothom. Nefsy nefu2See more

Anonymous said...

Shahinaz Ahmed
أنا مع هاجر لأن اللي ايده في المية مش زي اللي ايده في النار المجموعة اللي قي ميدان التحرير مهما كانت عددها مش هي كل مصر ولا حتى بتمثل الأغلبية في ناس اكتر منهم اللي عندها اسر ومسؤولة ما تقدرش تنزل في الشارع وهو ده السواد الأعظم مش معقولة شو...ية ناس في التحرير مهما كان عددهم يوقفوا بلد بحالها ليه هو الحكم دلوقتي بيجي من الشارع في دستور ولازم نحترمه والا نبقى زي النظام القديم وتبقى فوضى ده غير ان البلد حتضيع زي تونس واكثر لو الرئيس ساب البلد دلوقتي فيه ابعاد سياسية واقتصادية كثير تحتم وجود رئيس للبلد وخصوصا في هذا الوقت الحرج فيه ابعاد اكثر بكثير من اللى الأولاد اللي في التحرير يعرفوه ده غير اني رأيي ان اللي لسة قاعد في التحرير دلوقتي اما بلطجية أو ماجورين لأنه لا يمكن يكون أي مصري مخلص لسه متمسك بالجلوس هناك بعد كل المصايب اللي البلد فيها الوضع بقى في منتهى الخطورة وكل الناس اللي حالها واقف وهم كل البلد ماعدا الناس اللي في التحرير بأقول كل الناس عايزة تنزل تاكل اللي في التحرير وكمان تحرقهم بجاز حسبنا الله ونعم الوكيلSee more

Anonymous said...

احمد خالد ...
افتكر انك قولت انك شاركت في يوم 25 يناير زي كتيييييييير من المصريين
ويا تري استحملت الغاز المسيل اللي اتجاب من إسرائيل اللي كان مخلوط بمواد كيميائية بتخدر اللي يشمها ... جايز مشمتش
بالنسبة للناس اللي كانت بتصلي واترش عليها ميه ...وغاز مسيل وهما بيصلوا .. دا عادي ؟؟
يوم الجمعة ... لما كل افراد الامن المركزي والشرطة انسحبت في وقت واحد
وكل السجون انفتحت في وقت واحد .. دا عادي
ويوم المسيرة المليونية ... شوفت حاجة اتخربت ولا حصل حاجة ؟؟؟؟
مفتكرش
انتا زي ما بتقول انك كنت في لجان شعبية في الشوارع ... انتا عرفت ان كتير من اللي الناس مسكوهم كانوا افراد امن مركزي ... دا عادي ؟؟
وعلي فكرة حكاية انك وقفت في الشوارع عشان تصد المجرمين .. علي فكرة الناس كلها عملت كدا انتا مأنجزتش علي فكرة
طب اللي حصل النهاردة لما كلاب الوطني اعتدوا علي الناس العزل في الميدان
ولا الاربعة اللي ماتوا دلوقتي من رصاص حي من " المؤيدين " لمبارك .. دا عادي ؟؟
يا تري دم الناس اللي ماتت دي عادي ؟؟؟؟
راجع نفسك يا احمد

Anonymous said...

احمد خالد بالنسبه لموضوع ان المتظاهرين بياخدوا فلوس انا ربه منزل قاعده في بيتي من 8 ايام مرعوبه علي اولادي مخرجتش من باب البيت من شده الرعب ومع ذلك بقولك ان حسني مبارك لازم يرحل يا جماعه حرام قوي ان كل اللي ينطق كلمه حق يتقال عليه خاين ع...يب بقي وحرام هذا الرجل مستعد انه يعمل اي حاجه وباكد علي اي حاجه علشان يحافظ علي كرامته العسكريه وميظهرش في تلفزيونات العالم كله زي بن علي الهدف الاول ليه ولكل الزبانيه اللي حواليه ان الشعب كله يقول ولا يوم من ايامك يا مبارك كل مثقفين بلدك بتقول اننا بنتعامل زي البهايم وحجه مين ممكن يحكمنا بعده دي نتيجه لسياسه طويله قوي علي مر العصور بتخلي النظام يطرد اي بني ادم يتجمع حواليه شويه ناس حتي لو كان عالم دين علشان منشفش اي حد قادر علي الحكم غيره بلدنا مليانه حكماء وعقلاء وبيحبوها لازم كلنا نستحمل المرحله الانتقاليه اللي جايه مع بعض بس نغير هذا النظام الفاسد يا أحمد
علا

Anonymous said...

Ahmed Maher
.. منه لله
الظالم الطاغى الحرامى
انا مع الرحيل وفورا كفاية خلاص اعصبنا تعبت انا جالى اكتئاب واللة العظيم حرام الشباب الى بتموت دى حسبى اللة ونعمة الوكيل كل ظالم منه لله

Anonymous said...

Amira S. Abdel-Aziz
اللي واقفين في الشارع دول بيمارسوا حق من حقوقهم زي أي شعب في العالم - ولا الانجليز والفرنسيين ليهم الحق ده واحنا لأ؟؟ ولا هو كلام وخلاص؟؟ اللي حالهم واقف من البلطجية اللي كانوا بيسرقوا المحلات واللجان الشعبية اللي هي من نفس الشباب دول نزلوا يحموا الممتلكات لما الأمن هرب وسحبوهم من الشوارع - ولا أنتم بتتكلموا كده وخلاص؟؟ أهم موتوهم وريحوهم وريحوكم خااااالص والناس هتنزل شغلها وهتمشي في الشارع ماتقلقوش - اللي كان زعلان هيرجع يتربط تاني من رقبته ويلاقي العلف اللي اتحرم منه الكام يوم اللي فاتوا

Anonymous said...

Hesham Farouk Al Habbab
أيه ياجماعة أحمد خالد بيقول غير الوزارة أهوه أنت ماتعرف ياأحمد أنه غير أكثر من 10 وزارات خلال فترة حكمه؟ وحوبا الأروبة ياريت ياريت لو سمحت ومتزعليش يعني لازم نرتقي بلغة الحوار ... لابد من التعامل بتحضر مع المخالف في الرأي فمابالك لو كان هذا الشخص هو الرئيس الذي هو مازال وسيبقى حتى بعد تنحيه رمزاً لمصر ... ليس معنى أنه قد جانبه الصواب في العديد من القرارات يبقى مايشرفناش و و و و ... من فضلكم نرتقي بلغة الحوار علشنا أحنا طيب بلاش علشان خاطر حد تاني ... الأخلاق لاتتجزء ... تحياتي لك على مجودك الطيب وإنفعالك وتفاعلك مع أهم قضايانا

Anonymous said...

Shimaa Shosho
انا نفسي نرجع ونبقى قلبنا على قلب بعض ونحمي بعض تاني ومنقتلش بعض

Anonymous said...

لا اله الا الله اذا سكت نقول التجاهل استفزاز واذا اتكلم يبقى دهاء سياسى وبيقسم الناس لمجموعات كل واحد هيتحاسب على القول والعمل فتقوا الله واللى عنده كلمة حلوة يقوله والا يلتزم الصمت ودى وصية رسولنا فليقل خيرا او ليصمت وحسبنا الله ونعمه الوكيل
eman

Anonymous said...

ليه متقليش مش عاوز يسبها علشان كل مش يحصل زى اللى بيحصل فى تونس ومنظر الواحد برة يبقى وحش والناس تقول دا هرب حتى على الاقل يبقى مشى بشوية رحمة مننا واحترام لينا قبل منو مع انى قرفان منه اصلا
بهاء

Mohammed Ibrahim said...

انا مع تغيير النظام جذريا
من الرأس الى الذيل
ورحيل مبارك
لا بد منه

Anonymous said...

Abdallah Elrefaiey
كلامك مظبوط جداا وربنا يعديها علي خير ياااارب