Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Sunday, January 23, 2011

عيلة فيرجن 2011

- حبيبى

- ها؟

- ما تيجى نعيش خمسة رومانسية

- رومانسية؟ معناها إيه الكلمة دى؟؟ دى بطلت من زمان

- بطلت؟ بص انا هافهمك.. انا هقولك شايف القمر يا روحى.. تقولى انتى قمرى ودنيتى يا روح روحى يا قلبى

- ماشى اتفقنا.. ياللا قولى

- بص يا حبيبى القمر منور ف السما ازاى.. شايفه؟؟

- ...........

- حبيبى؟؟؟ انت سامعنى؟؟؟

- هه؟ هو انا المفروض ارد اقول ايه؟ لألأ مش قادر أفكر قبل ما تأكلينى.. طبخ لنا ايه النهاردة يا حبيبتى؟؟

- هو انت ايه؟ فى دود فى كرشك!! اجيبلك فار ياكل الدود ده! انت مش لسه طافح من ساعتين؟؟؟؟

- طا.....؟ من شايف القمر لطافح؟؟؟ ايه معندكيش وسط؟؟؟

- لأ عندى رز وكوسة

*************************

- انت يا عم انت.. اصحى هتتأخر على الشغل

- هاااااااوم، فى حد ف الدنيا يصحى حد كدة؟ مفيش اصحى يا حبيبى.. اصحى يا حياتى

- يوووووه، مه انت لو تبطل فرجة على افلام ابيض واسود كتير هتبقى كويس.. صدقنى والله.. جرب انت بس

- ولا لو عملت ايه اكنى بالظبط بنفخ فى إربة مقطوعة.. خمسة بس واقوم.. هش بقى

- طب بص هقولك ع خبر يفوقك على طووووووول

- ها؟ اشجينى

- بنتك بوظت لك الأى فون.. نياهاهاهاها

- نعمممممممممممممم ياختى؟

- مش قلت لك هافوقك بسرعة.. هو وقع منها ف الكريم شانتيه.. ف البنت قالت تلحق نفسها راحت غسلته فــــ ...........

- اييييييييييييييييييييييييييييييييييييه؟ غسلته؟

- اه مهى كانت عايزة تفرحك بقى وتخليهولك فُلة.. بس باين عليه كدة باظ.. شكله ماحبش الكريم شانتيه

- اطلعى بررررررررررررررررررررررررررررررررررررررة

*******************************

- انتى يا بنت

- نعم مامى؟

- روحى ادخلى الحمام

- ليه مامى؟ هو انا هاعمل على روحى؟

- وانا ايش عرفنى يعنى.. يخرب بيت الاستفزاز

- طيب استنى لما اخلص أكل

- طيب كلى بإيدك اليمين

- حاضر

- يا بنتى اليمين مش الشمال

- هى دى اليمين؟

- اه كلى بيها بقى

- ماشى

- برضه بتاكلى بالشماااااااااااااااال

*********************

- مامى، مامى.. تعالى بصى بابى جابلك ايه؟

- ياما جاب الغراب لأمه.. جاب إيه يا حبيبتى؟

- جابلك ورد.. على فكرة يا مامى كان فيه ورد أغلى من كدة.. بس بابى قرر يسترخص

- يسترخص؟

- ايوة يا مامى.. بابى بيقول انك مش بتاعة ورد

- لا والله؟ امممم، وقالك ايه بقى تانى؟

- قالى يا مامى يا حبيبتى انه لو اداكى عشرة جنيه فى ايدك هتفرحى بيهم اكتر من شوية ورد يتحطوا ديكور

- يا حبيبتتتتتتى، طيب روحى بقى ناديلى على أبوكى حالاااااااااااااااا

***********************

- الو، ايه يا بنى فينك؟

- ......

- والله كلمتك كتير

- ........

- يابنى بص على موبيلك.. اتصلت مرتين الصبح ومرة كمان امبارح

- (تفتح الزوجة الخط من الناحية التانية): كداب على فكرة ماتصلش بيك خالص

- يا بنتى والله كلمته.. تصدقى انتى فتنة فى البيت

- مه انا بتدرب اهو عشان بعد كدة أوسع نشاطى

- الو، الو، شفتى الواد قفل وسابنا نكلم بعض

***************************

- عايزة أكل حاجة حلوة

- مه انا عندك أهو فى أحلى من كدة حلاوة؟؟

- هأ، ودى أصرفها من أنهى سوق سودا دى!! بقولك حاجة حلوة.. ياللا انزل هات لى تورتة

- هو انتى مش عايزة تخسى.. مش كويسة التورتة على صحتك

- لأ النهاردة يوم الفري

- اكيد المحل قفل

- لأ لسه هيقفل كمان ساعة.. إخلص بقى

- مفيش بنزين فى العربية

- يوووووووووه، بص التورتة 12 قطعة.. انا عشان نفسى ماتموعش هاكل 10 واسيبلك 2.. قشطة؟

- !!!!!! قشطة؟ ايه قاعدة مع صحابك على القهوة!!!!

- طيب ياللا متتأخرش بقى.. مستنية التورتة

*********************

- مامى، هو انا شعرى مبلول ليه؟

- عشان بتستحمى..

- مامى، انا خلصت الشامبو فى المية

- ليييييييييييييييييييييييه؟

- كنت عايزة اعمل بابلز

- مامى، انتى بتعمليلى شعرى ليه؟

- عشان يبقى شكلك حلو

- مادام انتى اللى بتعمليه تبقى انتى كرافير، صح مامى؟

- كرافير؟؟؟ الصبر من عندك يارب

- مامى، هو ليه كل يوم كل يوم بتجيبى أختى من المدرسة

- يعنى أسيبها وأسيبك هناك وارتاح من قرفكم انتم الجوز

****************************

- إيه رأيك نجيب بوتجاز غاز بدل الكهربا؟

- موافقة جدا، عشان كرهت الكهربا.. اساسا ازاى يبقى اسمه بوتجاز وشغال بالكهربا؟ وبعدين مش تتأكد الأول ان الماسورة اللى جوه دى غاز

- يعنى هتتطلع ايه مثلا!!! اكيد غاز طبعا

(بعد اسبوع)

- اخيرا جيبنا البوتجاز.. مبروك عليكى

- ما تدخل تشغله الأول.. لما أشوفه شغال بعينى الاول ابقى أفرح

(بعد ما دخل)

- مش كنتى تفرحيلك شوية

- ليه فى ايه؟

- احمم، اصلها طلعت ماسورة مية

******************************

- بابى جه... بابى جه.. هيييييييييييه

- ازيكوا يا حبايبى

- بابى، بابى

- نعم يا حبيبتى؟

- عندى واوا

- من ايه؟

- وقعت فى الحضانة واتعورت

- طيب ممكن تدينى فرصة أغير هدومى

- بابى، بابى

- ها انتى كمان خير؟

- بص كدة

- خيييير؟

- عضيت لسانى.. بيوجع

- سلامتك، هو انتوا لازم كدة تستنونى بالأخبار الهايلة دى على الباب.. لما ادخل اشوف بقى كبيرتكم كمان ايه اللى واجعها

- اى يانى انا اه

- ايييييوة، ادينى، خير يا حبيبتى؟

- ضهرى واجعنى قوى يا حبيبى

- باين عليا دخلت المستشفى بالغلط وللا ايه!!!!

رحاب المليـــــــحي

19 comments:

Anonymous said...

Amr Aly
جميلة جدا
اجمل واحدة بتاعة الأي فون والورد
الولاد بيكونوا في السن دا مخبرين لطرف على حساب التاني

الشاطر اللي يجندهم لنفسه

Anonymous said...

Ramy Elalfy
بجد ربنا يعينك
ده انا لو عندي بنتنين زي بناتك كنت ................... حبيتهم طبعا عشان مفيش كده في الدنيا يا ست الكرافيره هههههههههههه
ربنا يخليهوملك يارب ويحفظهم
وكالعاده في كل كتاباتك مهما قولت مش هاقدر اوفيكي حقك
ربنا يوفقك بأذن الله

Anonymous said...

Mo'men Sa'ad
اه ياني آه ...
جميلة جداً يا حوبا :)

Anonymous said...

Heba Farouk
حلوة اوى
وحلو اوى غسيل الموبيل ده
معرفش ازاى التعامل مع الاطفال ربنا يكون فى عونك انا بصراحة بتعامل معاهم بفترى بس ربنا بعدلى الحمد لله بنت اخوية تخلص فيه القديم والجديد يعنى مثال لسه من يومين صممت تخلينى انام على الارض لحد ما بكيت لانى... مش بعرف انام على الارضSee more

Anonymous said...

Ahmed Mamdouh
اكيد بتحكي عن يومك يا حوبا هههههههههههههههههه

Anonymous said...

Silver Man Mahmoud
اسلوب جميل
طبيعه الحياه الزوجية
ربنا يستر علينا يارب

Ask Fatma said...

مشاء الله يا حوبة
بيعجبنى السلالسة اللى بتبكتبى بيها و البساطة و و ارتباط الحكى بالواقع اللى بنعيشة
و البساطة اللى بتكتبى بيها بتشدنى اخلص لحد النهاية و فى النهاية بزعل انها خلصت
بالتوفيق
فاطمة

Anonymous said...

Ola Mostafa
تحفه يا حوبا وخصوصا لما تصحيه الصبح علي غسيل الموبايل ...... شريره انا احب الاكشن قوي

Anonymous said...

Muhammad Fattouh
تسلم ايدك يا رحاب بس عسل اوى كفرير دى و تحفه جدا موضوع الورد طلعتى ماديه يا رحاب :p

Anonymous said...

أحمد على إبراهيم
طيب انت بجد بتفرحى بالعشرة جنيه أكتر من الورد؟
:)

Anonymous said...

Rezko El Ezaby
ههه لا هوه يقولك شايفه القمر ياحوبا يأروبه تقوليلوه امال انت فكرنى مابشفوش... طبعا فى رومنسيه وموش شرط فيها الكلام ممكن تكون تفاهم وتوافق عقلى وعاطفى بنظره والحس موش اننا نفتعل الرومنسيه

Anonymous said...

Amira S. Abdel-Aziz
العيال في البيت دايما محضر خير :D

Anonymous said...

Green Apple
ههههههههههههههههههههه انتى مشكله والله ...جامده اوى لما قلتى برضه بتاكلى بالشماااااااااااااااال ... و > اساسا ازاى يبقى اسمه بوتجاز وشغال بالكهربا؟ و>انا عشان نفسى ماتموعش هاكل 10 واسيبلك 2.. قشطة؟ جاااااااامده

Anonymous said...

Sami Ahmed
ههههههههههههههه, جامدة جدآ يا حوبا ومستنى اللى جاى :)

Anonymous said...

هبة نظمي
مامى، هو انا شعرى مبلول ليه؟

- عشان بتستحمى..

- مامى، انا خلصت الشامبو فى المية
...
- ليييييييييييييييييييييييه؟

- كنت عايزة اعمل بابلز

- مامى، انتى بتعمليلى شعرى ليه؟

- عشان يبقى شكلك حلو

- مادام انتى اللى بتعمليه تبقى انتى كرافير، صح مامى؟

- كرافير؟؟؟ الصبر من عندك يارب

- مامى، هو ليه كل يوم كل يوم بتجيبى أختى من المدرسة

- يعنى أسيبها وأسيبك هناك وارتاح من قرفكم انتم الجوز

دي انا :))

Anonymous said...

Karim Farag
لطيفة ودمها خفيف
مع انها بتلعب على وتر مكرر

Anonymous said...

Basma Bahaa hhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhhh

enty elly ebtakarty el eslop el gamed da mo heck?:D

Anonymous said...

Mohamed Metwali
لزليزه العيله الشقيه دي

Anonymous said...

Nancy Safwat
جمدا جداااااااااااا بس وضح انهم بيحبو يهدو النفوس