Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, September 29, 2010

ليه؟ وعشان إيه؟


- ليه دايما بنحن لذكرياتنا؟ وكتير بنعيش فيها متمردين على حاضرنا ومستقبلنا ؟

- ليه بطبعنا مايلين للحزن.. نعزه زى عينينا.. ولو غاب علينا شوية ندور عليه ؟

- ليه بنفكر كتير قوى فى بكرة ونعمل له ألف حساب.. وبننسى إن أكيد فى لحظة حلوة دلوقتى مش عايشين فرحتها ؟

- ليه دايما مش بنحس باللى فى إيدينا غير لما يروح مننا.. وبعدين نندم عليه ؟

- ليه كتير بنحس بالوحدة حتى وإحنا وسط كل اللى بنحبهم وبيحبونا ؟

- ليه بنبص على اللى مش لينا ومش فى ايدينا ونحسد الناس عليه ؟

- ليه بندور على اللى بيجرحنا ويقسى علينا ونجرى عليه.. ونهرب من اللى بيحبنا ويخاف علينا وبيدور على راحتنا؟

- ليه اتكسرت جوانا حاجات كتير.. واستسلمنا وما سعيناش للتغيير ؟

- ليه بقينا أصحاب بس على الانترنت والفيس بوك.. وأغراب على أرض الواقع

- ليه متغربين ومكسورين فى بلدنا.. وبنحلم بفرصة نطير فيها بعيد بغض النظر عن النتايج ؟

- ليه لما نثق فى اللى قدامنا ثقة عمياء.. يكون أول من يضربنا فى ضهرنا ؟

- ليه على وشوشنا مية قناع وقناع لا واضحين ولا صرحاء ؟

- ليه كتير بنجرى ورا السراب.. حتى لو من جوانا متأكدين إنه مش هيوصلنا لحاجة ؟

- ليه أحيانا اللى بنتمناه مش بناخده.. واللى مش عايزينه هو اللى بناخده ؟

- ليه المصالح والماديات طغت على كل شىء حلو فى حياتنا ؟

- ليه مابقيناش نمد إيدينا لبعض.. رافعين شعار (وأنا مالى يا عم.. هو أنا اللى هصلح الكون) ؟

- ليه الآية اتعكست.. والحرام بقى حلال ومباح.. والحلال بقى هو المستحيل بعينه ؟

- ليه الدنيا قدرت تفرق الأصحاب والأحباب.. وشغلتهم ساقية الحياة عن أحاسيسهم الجميلة تجاه بعض ؟

- ليه قلت مصدقيتنا مع نفسنا وبقينا نحاول نزيف الحقايق حتى قدام نفسنا ونصدق كدبنا ؟

- ليه مابقاش فيه حد مرتاح ولا حد راضى بحاله.. وكله بيغنى على ليلاه ؟

- ليه حاطين إيدينا على خدنا ومش عارفين نتحرك ولا نتقدم.. وشايفينها سودا بكل المقاييس ؟

- ليه بناكل فى بعض.. بنأسفن بعض.. بنغدر ببعض.. والشاطر اللى يلحق يضرب ويجرى؟

- ليه مابقاش عندنا هدف نعيش علشانه.. ولا عندنا حاجة نخاف عليها ؟

- ليه بقى إيماننا قليل.. وبقي أسهل حل هو الإنتحار ؟

- ليه مش بنتعلم من أخطائنا.. بنتناسى جروحنا وندور على جروح جديدة.. ونقول كان غصبا عننا

- ليه الإكتئاب والحزن تفشى فى حياتنا.. وبقى فيرس وماشى فى دمنا.. مسيطر ومتمكن من كل كياننا ؟

· مية الف (ليه) ومين يقدر يجاوب عليه؟

رحاب المليحي

15 comments:

Anonymous said...

SoŁŁŸ Emad
ma7desh y2dar ygweb =( bas ana like awy awy :)

Anonymous said...

7lwa awi we leki 7a2 awi awi :)
Neihad

Anonymous said...

‎7aga t7zn bs deh el 7a2e2a
Rody

Anonymous said...

حلوة اوى يا رحاب وعجبتنى جدا . ولو فعلا كل واحد فينا عمل عكس كل اللى بيحصل اكيد سنصبح اسعد بشر فى الوجود
حنان

Anonymous said...

محدش يقدر يجاوب على اي ليه، عارفه ليه،
علشان مانعلمناش اجابه لكل ده....ماشفناش حد بيعمل غير كده،
ما قابلناش ناس تغير كل ده... فبقت كل حاجه كده،
ومن غير ليه بيحصل كل ده ....علشان الاجابه حتكون: هو كده
نهى

Anonymous said...

هبة نظمي
لان ببساطه احنا بشر ودا من طبعنا

Anonymous said...

محدش هيقدر يجاوب
شومان

Anonymous said...

واحنا صغار بنينا احلامنا فوق السحاب ..ولما كبرنا فجــ ــأه اكتشفنا ان اجمل حلم فينا مات ومفضلش فينا غير شويه ذكريـــ ـات ...الواحد محتاج لايه بالضبط علشان يكون على طول مبسوط ؟... سؤال طول ما احنا مش عارفين اجابته عايشين ..ولو عرفنا نموت
لان... اجابته مش فى الدنيا دى
محمد عبد الدايم

Anonymous said...

ليه مع ان الحياة بقت اسهل بكتير ووسائل الاتصال اصبحت متاحة جدا مش لاقيين وقت حتى نقعد مع نفسنا نفكر
رائعة يا مدام رحاب
صلاح

Anonymous said...

بمنتها البصاته اذا فسد الحاكم فسدت الرعيه و اذا صلح الحاكم صلحت الرعيه و فى الاخر ان الله لا يغير ما بقوم حتى يغيرو ما بانفسهم تسلم ايدك يا حوبا
محمد فتوح

Anonymous said...

قلتي كل شئ في هذا الزمان رحاب
احمد فيتش

Anonymous said...

ممكن عشان مبئاش فيه ثقة في الفرحة لو فرحنا نقول خير اللهم اجعله خير, لو فرحنا واثقين ان الفرحة دي مش هتدوم الا قليل

اعتقد دا سبب
عمرو على

Anonymous said...

ليه وليه وليه ..
ديه أسالة مع نفسك في حالة ديق وفي مرحلة قعودك مع الذات ..
بس هتعملي ايه معزورة على شان هو دا الحال ..
عيشي يومك بما يملي عليه ضميرك ومتظلميش نفسك ولا تظلمي اللي حواليكي يا أحلى حوبا يا ارق كلمات ..
وسبيها على الله هي الدنيا ك... ده ببشر بدونهم مش حلوة وعلى ايه هنبصلها مهي كده كده مش دايمه على اي حال
خلتيني اردلك بخاطرة اهو .. عايزة ايه اكتر من كده مشاركة وجدانية وصدق احساس بيكي خدي نفس عميق جدا .. ورخي أعصابك . وارتاحي .. ومتتعبيش نفسك بأسألة زي ديه كل شوية حاولي تعيش بأفضل حال

جيهان

Anonymous said...

3lshan ely by3ml kda by3z alnakad zy 3inih, w may3rfsh y3eesh men 3'eroh.
Raef

Anonymous said...

اسئلة محيرة فعلا يا رحاب بس مفيش اجابة محددة. ممكن كل شخص ليه ظروف مختلفة عن التاني يعني واحد علاقته بربنا بس في الازمات و معندوش ايمان قوي و واحد عنده ازمة ثقة في الناس اللي حوليه وواحد اصلا حساس جدا و بيبالغ في ردة فعلهة تجاه المواقف حتي لو كانت من ناس هو بيحبهم و ممكن نكون كلنا كوكتيل بصورة او باخري من كل ماسبق و لكن بدرجات متفاوتة:)
بالنسبة للحنين الي الماضي اوقات الماضي مش بس بيعبر عن اوقات جميلة انما كمان اوقات فيها حرية وانطلاق بعيدا عن اي احساس بالمسؤلية , يا دوبك المذاكرة انما مفيش هم اوي لبكرة
ريهام