Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, May 24, 2010

الغربة وتوابعها


**لو رجع بيكى الزمن.. تعيشى ف مصر وللا ف لندن؟ إنتى حاسة بغربة أكتر فى مين فيهم؟ يا بختك هو حد لاقى العيشة دى!! **

ياااااااه تقريبا بقالى ست سنين بتسأل نفس الأسئلة وبسمع نفس الكلام ده.. مبدائيا الزمن مبيرجعش.. ماكنش حد غلب وكنا غيرنا فى نفسنا وحياتنا حاجات كتير قوى يمكن مش راضين عنها دلوقتى..

لكن لو أفترضنا إنه حصل أحب أعيش فين؟ المشكلة اللى بوجهها ويمكن ناس كتير متغربين عندهم نفس المشكلة.. أولا إن الواحد بيوصل لمرحلة لا عارف يعيش في بلده كونه مصرى ولا كمان عارف يعيش فيها إنجليزى (أو أى جنسية تانية)..

بمعنى إنك لما ترجع مصر بتكون مُشتت مش بس علشان حال البلد عمال يسوء وحزنك عليها لإنها بلدك الأم.. لكن علشان ساعات بتحس إنك بقيت ضيف فيها.. ضيف ف بيت أهلك.. ضيف على أصحابك وناسك.. ضيف حتى على أوضة نومك اللى قضيت فيها أحلى سنين عمرك.. أول ليلة لرجوعك مصر وفى أوضتك وع سريرك مش بتعرف تنام.. آه وحشتك، آه عمال تتفرج ع كل ركن فيها وكأنك بتملى نظرك من جدرانها وحاسس إنك كنت مفتقد جزء كبير من ذكرياتك.. آه نايم كمان ع سريرك اللى ياما عملت ع روحك فيه وإنت صغير.. لكن برضه حاسس نوعا ما بغربة.. مهو مابقاش سريرك اللى متعود عليه دلوقتى.. حتى ده بقيت ضيف عليه.. بتزوروه ف السنة مرة

بجد بتوصل لمرحلة إنك لا قادر تعيش ف بلدك ولا قادر تعيش ف البلد التانية.. كدة كدة تعبان وزهقان وحاسس إن فى حاجة ناقصاك سواء هنا وللا هناك.. كدة كدة مخنوق حزين مجروح.. جواك مشاعر كتير متداخلة مترابطة.. في حاجة غلط.. إيه هى! مش عارف.. فى جواك طير محبوس جوا القفص.. حتى لما بتفتح له الباب مش قادر يخرج منه.. لإنه لو خرج مش عارف هيروح على فين.. يبقى خليه محبوس أحسن.. أهو القفص اللى يعرفه .........

أسوأ معنى للغربة بجد لما تكون جاية من جواك حاسس بيها بكل معانيها.. لما تحس إنها كانت السبب الرئيسى إنها تموت حاجات كتير حلوة جواك.. لما تكسرك، لما تهدك.. لما يبقى كل حاجة حواليك شايفها زى بعض.. لما تبقى خايف تتعب لحسن ماتلقيش اللى ينولك كوبية مية.. لما تبقى خايف تفرح لحسن اللى حواليك يحسدوك ويبصولك حتى فى فرحك.. لما تقعد بالأسبوع تليفونك مش بيرن ولا حد بيسأل عليك يشوفك لسه عايش وللا......

لما تكسرك الوحدة.. مه مش شرط تكون عايش وحيد علشان تحس بالوحدة.. كتير بيكون حولنا ناس لكن مش حاسين بيهم مش شايفنهم.

غير ده كله ولو تغاضينا عن الحاجات دى كلها.. تيجى بقى مشكلة إنك تحس إن الأحداث اللى حوليك بتتغير والدنيا ماشية بسرعة البرق.. وناس تموت وناس تعيش.. والناس اللى تعرفهم فى بلدك هما هما.. واقفين فى نفس المكان (محلك سر).. بيتكلموا فى نفس الحوارات.. تحس إنك عايش فى فيلم هندى.. مهما غيبت عنهم مش هتحس إن فاتك حاجة.. الإختلافات تكاد تكون معدومة أساسا.. ولما تقولهم كدة أو تلفت نظرهم تشوف نظرة غضب ف عينهم.. اللى هو قصدك إيه يعنى؟ هو علشان سافرت وشفت الدنيا هتيجى تتنطط علينا!! ماشى يا عم الله يسهلك.

حتى التفكير بطبيعة الحال بيختلف.. يعنى وانت وسط أهلك ومعتمد عليهم وعارف إن مهما حصل هتجرى عليهم هيساعدوك.. طبيعى جدا إن كل ده بيتغير فى اللحظة اللى بتفارقهم فيها.. وبيبقى إعتمادك الأول على الله ثم على نفسك.. لو حصلك حاجة محدش هيلحقك.. انت اللى لازم تتصرف.. ف منطقى جدا إن تفكيرك بيطور وبيتغير وبتتحمل المسئولية أكتر وأكتر علشان تبقى قدها ومتتحوجش لحد فى غربتك.. لما ترجع بقى بلدك ويلاقوك كدة تفكيرك بقى غريب مش اللى متعودين عليه.. يقولولك مه خلاص الغربة غيرتك ومابقاش قلبك علينا زى زمان.. وانت وانت وانت .......... ومهما قلت ومهما إدنت فى مالطة اللى فى دماغهم لو عملت قرد مش هتعرف تغيره..

أرجع وأقول لا اللى فى بلده مرتاح وللا اللى متغرب مرتاح.. محدش عاجبه حاله.. محدش راضى بنصيبه.. كله بيغنى على ليلاه.. كله باصص للى فى إيد غيره..

أفتح بقك بقى مع أى حد وإشتكيله همك يقولك: طبعااااااا خايف من الحسد.. أكيد حاطيتطهم كدة أكوام أكوام.. ده على اساس إن تحت القبة شيخ.. وعلى أساس إنهم فى البلاد التانية مستنينك إنت بالذات علشان تنورلهم حياتهم وأشغالهم ف قاعد بقى على بنك.. تعبت من المعلقة الدهب اللى فى بوقك.. تقوم من النوم علشان تنام تانى.. وفى أوقات الفراغ تشتغل..

يا جماعة الموضوع مختلف عن تصوراتكم تماما.. آه مانكرش إن الغربة ليها مزايا.. لكن كتير بتكون عيوبها أسوأ.. كتير بتحس إن فاض بيك الكيل وعايز ترمى كل حاجة ورا ضهرك.. وترجع ترمى حمولك كلها فى حضن الناس اللى بتحبك وتحس بحبهم ودفا المكان اللى بتحبه.. ساعات بيكون نفسك توقف الساقية اللى عمال تجرى فيها ومش عارف تاخد نفسك.. وتصرخ بعلو صوتك وتقول: خلاص بقى تعبت.. لإمتى هشتغل عند ناس تسعبدنى مش من دينى وكل حياتهم حرام فى حرام.. لا يا عم كفاية لحد كدة والأرزاق على الله..

فيه ناس فعلا زى السمك لما يطلع من المية مش بتقدر على الغربة مهما كانت كارهه بلدها بترجعلها قوام.. وفيه ناس بتحفر فى الصخر فى منهم اللى بيوصل وفيه منهم اللى بتضيع سنين عمره ومش بيوصل لنص اللى هو عايزه.. وكله بتاع ربنا سبحان وتعالى

يمكن يكون نفس الكلام بينطبق على كتير من اللى قاعدين فى بلدهم.. حاسين برضه بالإهانة.. حاسين إن بلادهم بتتسرق وتتنهب ومحدش بيعمل حاجة.. حاسين إنهم شاغلين فى نفس الساقية وبرغم إن كل حبايبهم حواليهم.. بس محدش شايف حد ومحدش حاسس بأوجاع حد.. كله بيقول يللا نفسى.. كله فيه اللى مكفيه.. وبقى النت والموبيلات هى صلة الرحم ما بين كتير مننا..

بس برضه فى النهاية لازم نحمد ربنا على اللى فى إيدينا.. لازم نحس بنعمة ربنا علينا.. أكيد أكيد فى حاجة معانا مش مع غيرنا.. مش لازم بقى تروح مننا علشان نحس بيها ونندم عليها..

رحاب المليحي

25 comments:

Anonymous said...

اية دة يا رحاااااااااااااب اثرت فيا اوى
انتى انسانة حساسة اوى
هقولك حاجة واحدة
لو علمتم الغيب لاهترتم الواقع
عيشى واقعك واستمتعى بكل لحظة فية وخلاص...
بلاش تدورى على تعب لنفسك
ضيف حتى على أوضة نومك اللى قضيت فيها أحلى سنين عمرك.. أول ليلة لرجوعك مصر وفى أوضتك وع سريرك مش بتعرف تنام.. آه وحشتك، آه عمال تتفرج ع كل ركن فيها وكأنك بتملى نظرك من جدرانها وحاسس إنك كنت مفتقد جزء كبير من ذكرياتك.. آه نايم كمان ع سريرك اللى ياما عملت ع روحك فيه وإنت صغير.. لكن برضه حاسس نوعا ما بغربة.. مهو مابقاش سريرك اللى متعود عليه دلوقتى.. حتى ده بقيت ضيف عليه

العبارة دى اثرت فيا لانى بحسها لما بروح بيت اهلى

بس الفرق ان بيتى بحبة جدا وبرتاح فية...
بس برضة بحس نفس احساسك فى العبارة دى
مروة الزراع

Anonymous said...

حاب انا عيطت انا جوه بلدي ه لكن متغربه فيها من زماااان
جميل النص واجمل ما فيه انه فضفضه حقيقيه
الغربه بقت جوانا يا رحاب منين ما هنروح هناخدها معانا
أسماء عابدين

Anonymous said...

رحاب ...
حبيبتي انتي اتكلمتي عن احساسي مش احساسك انتي لوحدك علي فكره.

بصي انا اهو اردنيه وامي خليجيه وكنت عايشه معاها في الكويت ...اول ما جيت مصر ماكنتش عارفه اعيش فيها واتحرمت من الكويت اول 6... See more سنين جتهم مصر ...عارفه لما رجعت الكويت حسيت اني غريبه جدا لان بيتي اتغير والناس الي حواليا اتغيروا ...في منهم الي كبر واتجوز او مات او هاجر ...في منهم الي فضل يخمن انا مين ؟وفي منهم الي وقفت اخمن هما مين ؟
لما روحت البيت بتعنا ولقيت الكلب بتاع ماما الله يرحمها متوفي وجايبين كلب جديد ...حزنت جدا برغم اني ما كنتش بحبه...بس موته حسيسني بالبعد .

لما روحت ادور علي صحبتي الي كانت بعد مني ببنايتين وكانت البنت دي ايرانيه ولقتها رجعت ايران ....حزننت جدا لان كان نفسي اقابلها قوي واسلم عليها ...لما جيت ادور علي اصدقاء زمان مالقتهومش اصدقائي لان افكرنا اتغيرت ولهجتنا كمان ...لان وقتها ما كنتش بتكلم خليجي كويس لغتي الخليجيه كانت ضاعت.

شوفي بقي لما بروح الاردن ...اه برتاح نفسيا ...اه بحس بالامان...اه بحس بكل حاجه حلوة ....لكن ببقي عامله زاي الي عليها بيضه وعايزه ترجع .

لما ولدتي اتوفت كله خيرني اعيش فين ...في الاردن مع اخواتي ولا اروح الكويت لخالاتي وخالي ...بس انا اخترت اعيش هنا في مصر
لان بصراحه بعد العمر دا ما عدتش اعرف اعيش غير هنا ومش هايكون عندي قدره ابدا تاني من الصفر .

وبرغم كده اهو لا انا مرتاحه كده ولا كده
هبة نظمى

Anonymous said...

تحفة
مصطفى فتحى

Anonymous said...

مش عارف اقلك تسلم ايدك ولا منك لله
محمد فتوح

Anonymous said...

مفيش حاجه اقولها بعد الى قولتيه يارحاب انتى قولتى كل الى جوايا بالظبط :(((
مريم

Anonymous said...

masha2 alah enty bgd fanana we mawhoooba we nkadeya kman ;);)
enty bt2ry le meeen 3shan tktby 7lw awi keda :)
la2 bgd you touch my heart every time i read a note for you
love u awi awi
elfar2 kber bena w ben london awi we ana 7sa beki we fahma tashtetek bek a7ases el ghorba we e7sas el khof mn masr we 3aleha
Neihad

Anonymous said...

جيتي ع الوجع يا رحاب
لو يرجع الزمن كان مليون حاجة اتغيرت حبيبتي
و لا العمر اللي راح في الغربة يتحسب عمر و لا الحياة حياة
دام قلمك الجميل رحاب
سلوى ابو عرب

Anonymous said...

فعلا الغربة هى غربة النفس ذاتها وليس الاشخاص او الاماكن
حقيقة اوى يا رحاب :)
بوسى

Anonymous said...

بجد جميلة جدا يا رحاب , بس في الأخر كلها أرض الله ومكتوب علينا يا نتغرب في بلدنا يا نتغرب برة بلدنا وصدقيني الغربة برة البلد ألمها مش بيوجع زي ما بتتغربي جوة بلدك"
محمد شومان

Anonymous said...

فعلا يا روبى الرضا بقي صعب تحسيه مع اننا احسن من غيرنا كتير
والغربه و الوحده موجوده جوانا واحنا فى وسط اقرب الناس لينا والخوف من بكره احساس رهيب بستنى الليل عشان انام بس بخاف ياترى لما اصحى ايه اللى هيحصل ..هى الدنيا كده نفضل نبص كل يوم فى المرايا نتمنى نكبر ولما نكبر نندم ونقول ياريتنا فضلنا صغيرين لان كل المشاكل النفسيه شوفناها لما كبرنا يالا الحمد لله كل اللى يجيبوا ربنا حلو وراضيين ان شاء الله:(((("
شريهان

Anonymous said...

لية بس كدة يا رحاب
قلبتى علينا المواجع
طب اعمل انا اية بقى دلوقت؟
:-(الله يسامحك "
إسلام

Anonymous said...

بصراحة...انا كنت بدأت اقلق عليكي و اقول دي بقت مش عاوزة مصر و مابقتش بتحبها ....لكن كده الله يكون في عونك اللي في مصر فاهم ان اللي برة ده بياكل في فته محلولة لكن الي جرب الغربة عارف الاحساس الي بتقولي عليه ده..... ربنا معاكم
هبة عبدله

Anonymous said...

الله يا رحاب انا حاسه بيكى من زمان بس المرة دى زعلت اكتر
ربنا معاكى
مسيرك ترجعى لبلدك وترجعى تانى تتعودى عليها..هتبقى صعبه بس هتحصل..مسألة وقت
انتى راجعة امتى ان شاء الله؟"
بسمة بهاء

Anonymous said...

"مش عارفه ارد بجد خلتنيني افكر في 500 حاجه في وقت واحد "
ganga hoba

Anonymous said...

عندك حق يا هوبه محدش عجبوا حالوا
لا الى قاعد هنا مرتاح و لا الى هناك مرتاح بس ايه رايك
لما تبقى فى بلدك و مفيش حد جمبك ولا اخوات ولا اهل و لا اصحاب
"
نادين

Anonymous said...

:)))
gamila gedan w fe3lan mo3abera 3an kol 7aga. fih 7agat ma7adesh ye7es biha 3'er ely fel mawkef nafso"
gogo

Anonymous said...

جميلة يارحاب وأحلى حاجة فيها الجملة الأخيرة والحمد لله على النعمة اللى احنا فيها مهما كانت ظروفنا لكن ربنا رحيم وبيقوى الواحد وبيدى كل واحد إبتلاء على قد إيمانة المهم هو الرضا بقضاء الله - فى جملة جميلة قوى قرأتها لواحد صوفى (من صبر علينا وصل إلينا) وده كلنا بنتمناه إن ربنا يقربنا منه
ماما

Anonymous said...

لمحتها بالصدفة .. مولودة وعايشة في بلد غير بلدي ومع ذلك تخيلي حاسة بالغربية رغم اني عارفة اد ايه مصر صعبه في عيشتها الى ان حلاوة طقوسها بتهون كل حاجة متعبه فيها ..

سبحان الله .. في بلدك مغترب .. برا بلدك مغترب ..

الحمدلله على كل شيء .. كل شيء مكتوب

وكل شيء ربنا كاتبه لكل انسان هو الأفضل ليه اكيد :)

المهم الرضا والقناعة والشكر في أي حال :)

كلماتك جامده جدا ياهوبا ... الموضوع بحد ذاته حساس جدا ..

بس احساسك وصل ..

خالص احترامي ..."
جيهان احمد

Anonymous said...

لحمد لله بجد احنا احسن من غيرنا
بس الحقيقه انها بالاسم بلدنا حتى هواها اتغير بقى يخنق لو بصيتى على وشوش الناس تحسى بالمرار كنت ماشيه من كام يوم لقيت طفل نايم على نفسه على حوض المجارى وساند راسه على مواسير المجارى هوا دا مش من حقه يعيش ..هى دى الادميه وحقوق الطفل يلا حسبى الله ونعم الوكيل
للاسف انتى فى غربه حقيقيه واحنا فى غربه مقنعه ربنا يرحمنا ويجمعنا تانى وتلاقى بلدك زى منتى بتتمنيها وتيجى بالف سلامه
"
pance ahmed

Anonymous said...

بجد صديقتي الغربة بقت في بلدنا هنا وهناك
وفعلا مش هتبقي غربة لو في أصداقاء واصحاب وناس بنحبهم وبيحبونا بنعتز بيهم ويعتزو بينا بنقف جنبهم ويوقفو بجانبنا نبقي بجوارهم وقت الفرح والحزن وهما كذلك غير كده هتبقي أصعب غربة هنا وهناك
"Ahemd vitch

Anonymous said...

ثرتي فيا بجد بس انا عايز اعرف منك ايه هي مزايا الغربه الا انتي قولتلي عليها غير الفلوس لو في خير في مصر مكنش حد هيسبها لو الا زيي ولا الا زي غيره من الا بره مصر كانوا لاقوا وظيفه بمرتب كويس كانوا قعدوا في مصر ولا ايه رايك"
عبدالله

Unknown said...

ŞÀŕă дђмỄÐ
انا عكس الناس يا رحاب انا مش بحس بالغربه الا لما اكون في بلدي

hasona said...

كل عام وأنتم من عواده
وكل سنة وانت بخير
وأسعدكم الله في عيد الفطر

Anonymous said...

2024 ولسه ناس بتشوف الي كتبتيه..🔥❤️