Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, April 13, 2010

طفولة مشردة


فيه حاجات فى طفولتنا بتفضل محفورة فى دماغنا.. وعمرنا ما بننساها مهما حصل ومهما عدت سنين وسنين..

وبما إنى طول عمرى نسمة وحمل وديع فأكيد عندى بعض المواقف والطرائف اللى فاكراها لسة لحد دلوقتى.. إنتوا عارفين بقى العضمة كبرت بعد التلاتين وياللا حسن الختام ولازم أرجع للتوكيل.. بس برضه لسه ذاكرتى شغالة كويس الحمدلله.. المكن لسه سليم ومانتهتش صلاحيته لسة

من المواقف اللى لسه فاكراها:

- أنا مش بحب حد يتنفس ف وشى خصوصا وأنا نايمة.. يعنى مش بحب يبقى فيه كائن كدة حاطط مناخيره فى وشى وشغال بقى شهيق وزفير.. خوفا من إن فى مرة مثلا يسحب الستارة أو يشد نفس جامد يبلع فردة شبشب..

المهم، وأنا صغننة كانت القطة بوسى لسة والدة.. وأنا قررت أنيم ولادها جنبى على السرير.. وفعلا أخدت اتنين منهم يناموا جنبى.. بس لسوء حظ بيبى منهم إنه كان نايم وشه فى وشى.. وعمال يتنفس فى وشى فماكنتش عارفة أنام.. عملت إيه؟؟ رحت حاطة المخدة عليه وقتها عرفت أنام فى هدوء.. بس لما صحيت الصبح وشيلت المخدة مالقتش فيه نفس.. ماااااات يا حرااااام.. مش عارفة ليه؟؟؟ برغم إنى أنا نمت كويس..

****************

- جاتلنا ضيفة فماما طلبت منى أعزم عليها بالشيكولاتة.. بعدها بشوية جالنا ناس تانية وهى قاعدة وأخدت شيكولاتة تانى.. بعدها بشوية جم ناس تالتة.. ودى مفيش ياما ارحمينى.. وقبل ما تمشى بقى.. بتقول لى شكرا يا حبيبتى على الإتنين شيكولاتة اللى أخدتهم.. قلت لها لأ يا طنط دول كانوا خمسة وياريت ماتجيلناش تانى.. ماما زغرتلى مش عارفة ليه!! يعنى هى جاية لنا علشان تخلص الشيكولاتة بتاعتنا وتروح؟ إيه الناس دى؟

**************

- أنا كنت البنت الصغيرة وسط تلات ولاد.. أخويا وولاد خالى.. فطبعا بحكم لعبى معاهم كنت مسترجلة جدا.. ولاد خالى كانوا معايا فى المدرسة وهما أكبر منى بكتير.. بس كان فيه واحد منهم بيخوف اصحابه بيا.. لو حد ضايقه يقول له هاجيبلك رحاب، التانى يقول له خلاص خلاص.. علشان كنت بضرب بالشلاليت وباعض.. وفى البيت كنت بجرى ورا أخويا اللى أكبر منى بتمان سنين ونضرب بعض وفى الآخر أكلم ماما فى شغلها اعيطلها علشان إيده تقيله

*************

- كنت رويتر ما شاء الله عليا.. إلا ما فى حاجة تحصل فى بيتنا غير لما انزل أحكيها لجدتى وخالتى.. بس لما كانوا يسألونى كلتوا إيه وأقول لهم.. جدتى تقول لى طيب اطلعى جيبيلنا طبق منه مثلا.. أقولها إيه ده هو أنا ماقولتلكيش ؟؟ دة خلص خلاص.. كريمة جدااا من يومى

**************

- واحدة قريبتنا غلطت مرة وجابتلى عروسة طولى بس المشكلة إن كان شعرها أصفر.. كنت بمسكها بقى يوماتى أسشورلها شعرها وأسرحه لحد ما بقت قرعة.. ماما قالت لها رايحة تجيبيلها عروسة شعرها أصفر مش تراعى شعور البنت.. اوعوا تفتكروا إنى كنت معقدة - نوهائى-

***********

- علشان بينى وبين أخويا تمان سنين.. عمرنا ما كنا اصحاب وإحنا صغيرين.. دايما كان فيه بينا مشاكل.. هو طبعا عايز يفرض شخصيته عليا وأنا رافضة دة تماما.. وكنت أقول له طول ما بابا وماما عايشين مالكش دعوة بيا..

كنا بنتصاحب فى حالة واحدة (مصلحة يا شقيق).. لما يكون هو عايز ياخد العربية علشان يخرج مع اصحابه.. وعارف إن بابا مش هيرضى يديهاله غير لو أنا معاه.. علشان حوبا طبعا ماينفعش تتبهدل فى المواصلات العامة.. فيزقنى بقى على بابا ويقولى عايزة تروحى السينما معايا روحى قولى لبابا.. وأنا طبعا مصلحتى فوق خلافاتى مع أخويا حبيبى.. أقول لبابا يدينا العربية ويبقى كدة الكل مستفيد أنا وأخويا.. احتمال بابا يكون المتضرر الوحيد.. ماهو بيدينا العربية وفلوس السينما والعشاء بره.. أنا أصلى مش بعتبر نفسى روحت سينما وخرجت غير لما اتعشى بعدها برة..

****************

- كنت بحب قوى أبيت عند خالتى (الله يرحمها) وأنام جنبها.. إحنا كنا فى نفس العمارة.. بس أنا كنت برفص كتير وأنا نايمة.. مرة صحيت مالقيتهاش جنبى.. بصيت كدة على الأرض بالصدفة لقيتها نايمة جانب الزبالة على الأرض.. تقريبا فى اليوم ده رفصت بزيادة

- كنت بتأثر قوى بالأفلام العربى النكد.. مرة فى نص الليل وأنا قاعدة جنبها وبنتفرج على فيلم عربى قديم.. لاقتنى بعيط وبتشحتف بصت لى باستغراب وقالت لى عايزة تطلعى عند أمك؟ فمعرفتش أرد من كتر الشحتفة اللى أنا فيها بس شاورتلها على الفيلم.. ففهمت إنى بعيط تأثرا بالفيلم.. فقالت لى لأ وعلى إيه ؟؟ ننام أحسن وقفلت التلفزيون.. وسابتنى لأحزانى بفكر يا ترى هتعمل إيه البطلة مع البطل

- دايما بحب لما حد يطلب منى طلب إنه يطلبه بالتفصيل الممل.. كنا نبقى قاعدين فى الصالة ويجى فيلم خالتى عايز تسجله.. تقول لى روحى يا حوبا افتحى الفيديو.. ف أسمع الكلام وأروح افتح الفيديو.. ولما يخلص الفيلم تقولى قومى معلش يا حوبا اقفلى الفيديو.. أروح قفلاه وأنا ببرطم هى خالتى اتجننت وللا إيه!!! وبعد كذا مرة وخالتى مش بتحرم.. لقيتها فى مرة بتسألنى هو أنا لما بقول لك روحى افتحى الفيديو بتعملى إيه؟ قلت لها بروح افتحه.. قالت لى وتدوسى (ريكورد) علشان يسجل الفيلم؟ قلت لها لأ طبعا، إنتى بتقولي لى افتحى الفيديو.. بس ماقلتيليش سجلى..

** عارفة من غير ما تقولوا إنى حمل وديع ونسمة.. بس ماحدش مصدقنى مش عارفة ليه.. ياللا اهو الواحد بيعمل الخير ويرميه الترعة

حوبا الأروبة

14 comments:

Anonymous said...

we betshtky men weladek leah b2a, men shabah omoh fma zalem
shaimaa

Anonymous said...

"يا فقريييييييية هههههههههههههههه ..و ايه الصورة القرشانة دى كمان هههههههههههههههههههه"
غادة سرور

محمد حمدي said...

لا واضح انها كانت طفولة بريئة جدااااااااا
تحياتى

محمد حمدي said...

التعليق اللى فوق تعليقى
محمد حمدى
مدونة دماغى
www.demaghy.blogspot.com

Anonymous said...

واحدة قريبتنا غلطت مرة وجابتلى عروسة طولى بس المشكلة إن كان شعرها أصفر.. كنت بمسكها بقى يوماتى أسشورلها شعرها وأسرحه لحد ما بقت قرعة.. ماما قالت لها رايحة تجيبيلها عروسة شعرها أصفر مش تراعى شعور البنت.. اوعوا تفتكروا إنى كنت معقدة - نوهائى-
ههههههههههههههههههههههههههه
انا مريت باللحظه دي"
هبة نظمى

Anonymous said...

أنا ماكنتش أعرف أنك بتعضى وبتضربى بالشلاليت لكن أنا ماكنتش بصدقك أبدا لما تيجى معيطه وأن حد ضايقك بكون واثقة أنك بتحكى نصف القصة فقط

ماما

Anonymous said...

ههههههههههههههههههههههههه
والله عسل ياحوبة
وصورتك وانتى صغنونة كمان عسل
سارة الإسكافى

Anonymous said...

hhhhhhhhhhhhhhhhhhh elly yshof keda y2ol enek et3'yaaarty b2aa!
Basma

Anonymous said...

3an tagarby m3 el aroooba ,f m7shy el korooooommmb, we CD el far7 'sh3'alo ya mostafa 3ala computer, tamer s2alha omal howa sh3'al 3ala ah .....bekol seka 3ala computer ... naktafy behaza el kadr :)))))) hoba el Aroba
Shahenda

Anonymous said...

ya 3eny ya tant.. akeed liha el ganna :P:P
el tefla el baree2a.. fe3lan 7amal wadee3 :D"
gogo

Anonymous said...

هههههه ... جامدة اوووى يا رحااب .... بس و الله العظيم انتى بالنسبة لاجيال اليومين ..حمل وديع فعلاً ... بس انت عارفة اكتر اجة مضحكة م الدنيا شقاوة الاطفال .. و ربنا يخليكى لينا
هبة

Anonymous said...

هههههههههههههههههه

طفولة طفولة يعني
:D
ياسمين

Anonymous said...

hhhhhhhhhhhhhhhhhhhhhhhhhh
tfola bare2a moooot hhhhhhhhhh bs ana b7b keda awi msh b7b el 3ayel yb2a saket keda lazem kedaaaa
Ganga heba

Anonymous said...

Amr Aly
جميلة اوي