Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, March 04, 2010

وقفوا عقارب الساعة قبل التلاتين

من صغرى وأنا بحب جدا احتفل بعيد ميلادى.. اينعم عمر ما حد عمالى

Surprise party

لكن ماكنتش بزعل.. وبرضه علشان ماكنتش بدى حد الفرصة دى.. علشان الكل عارف إنى بقعد ارتب له من السنة للسنة.. وكنت بحتفل به مرتين فى نفس الشهر.. علشان أنا مولودة يوم 28 مارس ومتسجلة 30 مارس مع جدى (الله يرحمه).. اللى طلب من مامتى إنها تقيدنى معاه يوم ميلاده علشان نحتفل سوا.. فكنت بعمله مع أصدقائى يوم 28 ومع عائلتى يوم 30

فى ثانوى عام كنت تقريبا بحتفل به اسبوع كامل قبل وبعد يوم 28 علشان الدروس الخصوصية.. واللى كانت عادة بتكون فى البيت عندى.. فكنت بسيب الزينة وكل مراسم الإحتفال منصوبة لحد ما شهر مارس يخلص وقبل ما تبدأ كذبة إبريل..

أيام المدرسة كنت دايما بعمل عيد ميلادى فى البيت ومش بعزم أقل من 20 فرد.. ده اللى هو اليوم الخاص بأصحابى غير طبعا اليوم الخاص بعيلتى.. ما أنا كل ما بعزم أكتر كل ما الهدايا تكتر.. وده كان مفهومى عن الأعياد الميلاد وأنا صغنانة.. إنى عايزة ألم أكبر قدر من الهدايا.. وأجى بقى على آخر الليل أحط كل الهدايا اللى جاتنى على السرير واقعد افتحها واشوف مين جابلى إيه.. اللى كانت بتتعذب فى الموضوع ده هى مامتى.. علشان مطلوب منها تعمل أكل وحلويات لكل الناس المعزومة دى سواء يوم الأصحاب أو يوم العيلة.. وكان يبقى كتر خيرى قوى لو افتكرت وشكرتها فى نهاية الشهر.

فاكرة فى مرة وأنا فى اعدادى خالتى سألتنى تجيبلى إيه فى عيد ميلادى.. لإن كان بيكون يومه أسود اللى ينسى اليوم ده خصوصا من عيلتى..

فكنت شفت أباجورة صغيرة فى المكتبة شكلها أمور فطلبتها منها.. وفعلا ومن غير ما تشوفها اديتنى الفلوس علشان اروح اجيبها.. عملت أنا إيه بقى؟ روحت المكتبة واشتريت الأباجورة وكمان لفتها لفة هدية تليق بيا.. وروحت على البيت ودخلت على أوضتى حتى مكالفتش نفسى أفرج خالتى على الهدية اللى أنا جايبهالى بفلوسها.. وفتحت لفة الهدية قال يعنى بفاجأ نفسى ومش عارفة جواها إيه..

لما كبرت شوية ودخلت الجامعة ماما أصدرت فرمان بمنعى من الإحتفال بعيد ميلادى مع أصحابى فى البيت.. واكتفت بالإحتفال به يوم واحد بس وهو يوم العيلة.. كان بقى بيطلع عينى علشان آلاقى مكان يليق بحوبا الأروبة إنها تعمل عيد ميلادها فيه.. وكمان يكون حنين فى ال

Minimum charge

رأفة بحال أصحابى المادية.. وكنت أنا بدفع حجز المكان واجيب كمان التورتة لنفسى..

ووالله كنت حونينة عليهم.. اتفقت معاهم إنهم مايجبوش هدايا علشان يعرفوا يدفعوا الحد الأدنى فى الكافية.. اكتر من كدة طيبة قلب بقى مايلقوش.. بس الكلام ده كان قاصر بس على الصحاب العاديين.. أما الأصدقاء المقربين فدول يومهم أبيض لو ماجبوش حاجة.. وعادة وبالنسبة للبنات كان بيجيبوا دهب.. كله طبعا بحسابه ومش بيتنسى وفى أعياد ميلادهم لازم كله يترد.. وكل اللى باكله وز وز بيطلع عليا حديقة الحيوان كلها لما باجى بقى واجيب هدايا وأفلس من أول الشهر..

وبرغم إن عيد الأم قبل عيد ميلادى بأسبوع بالظبط.. بس ماكنتش بدى أهمية للموضوع للدرجة.. خصوصا إن بابا كان معودنى أنا وأخويا إن هو اللى بيشترى هدية لماما.. هى تقول نفسها فى إيه وبابا يلبى النداء.. وحتى لو فى مرة قررت اتشملل واشترى لماما هدية على قدى كدة.. بابا كان بعدها ومن ورا ماما يدينى الفلوس اللى دفعتها تانى.. دلع على الآخر أنا عارفة.. مه اللى يلاقى دلع وما يتدلعش .....

لما كبرت واتجوزت.. جوزى بقى مالوش فى أعياد الميلاد دى خالص ولا بيعترف بيها.. دايما يقول حد يحتفل بسنة راحت من عمره؟ طبعا الكلام ماكنش بيجى على هوايا وحاولت أعوده على عاداتى أنا وماحولتش أبدا اتعود على معتقداته هو.. فى أول سنة جواز لنا فى لندن.. ولإن عيد ميلاده قبلى بشهر بالظبط عملت له أنا

Surprise party

وعزمت كل أصحابنا عندنا فى البيت.. واتفقت مع واحد من صحابنا يجى ياخده يفسحه فى شوارع لندن بلا هدف ولحد ما الناس كلها تيجى.. وكان فى فعلا ناس واقفة فى الشارع اللى ورا البيت بتكتكك من البرد منتظره إنه ينزل واديهم التمام إنه خرج.. وفعلا كان يوم جميل ودخل لقى فى البيت حوالى 25 فرد.. قال إيه ده هو انا دخلت شقة تانية بالغلط؟

الشهر اللى بعده بقى كنت مستنية اشوف هيعمل إيه فى عيد ميلادى.. هو ماكنش ناسى لكن برضه ماحولش يعمل حاجة.. لولا واحدة صاحبتنا حاولت تلحق الموقف وتعزم أقاريبها وخرجنا كلنا روحنا الهايد بارك.. بس كنت متضايقة جدا ونمت معيطة.. عرف وقتها إن عيد ميلادى بيأثر فيا جدا لو ماتعملش زى ما أنا عايزة.. بس من بعدها كبرت دماغى وبقت أقول خلينى أخد حقى ناشف وخلاص.. مه مايبقاش لا عيد ميلاد ولا هدية كمان.. بقيت أبدأ التحذيرات من قبلها بشهرين إنى عايزاه يفاجئنى وإنه هيشوف أيام سودا لو ماجبليش هدية.. والحمدلله التهديدات جت بفايدة وبقى يفاجئنى بهدية اللى احيانا بكون قايلاله أنا عايزه ايه.. زى ما عملت مع خالتى فى اعدادى..

ولما كبرت كمان شوية قضيت الحقيقة أحلى عيد ميلاد فى المستشفى وأنا بولد إبنتى التانية.. واللى من حظى الفظيع المريع إن يكون عيد ميلادها تانى يوم عيد ميلادى.. واللى من وقتها وأنا بقيت مافكرش خالص فى عيد ميلادى وأركز معاها إنى أعملها عيد ميلادها من صغرها هى وأختها اللى أكبر منها بسنتين.. بس ده لا يمنع إنى مش بتنازل عن حقى إنى أخد حقى ناشف من أبوهم..

أما بالنسبة لعيد الأم فلسه ماحستوش برغم إنى أم من خمس سنين.. بس أول ما البنات تكبر وتجبلى هدية فيه أكيد وقتها هاحس بيه..

السنة دى بقى أول سنة ماكنش عايزة عيد ميلادى يجي.. وعايزة الساعة تقف يوم 27 قبل ما أتم التلاتين يوم 28.. مش قادرة أصدق إنى خلاص على أبواب التلاتين وبحاول امسك فى العشرين بإيدى وأسنانى.. يمكن الحمدلله الميزة اللى ربنا أنعم بيها عليا إن شكلى مش بيدى سنى خالص.. فالحمدلله فعلا على كدة وربنا يدمها نعمة..

أنا هكمل التلاتين وإبنتى هتكمل تلات سنين.. يلا هنعمل إيه؟؟ هى دى سنة الحياة.. ربنا بس يدينا الصحة والطاقة إننا نكمل المشوار..

وكل سنة وأنا وجومانا طيبين :)

رحاب الملـيــحي

18 comments:

Anonymous said...

I luv it! Kol sana wenti tayeba ya 7oba ;)) 3o2baaaall 300000 sana msh 30 bs :)))))
gamda gedn :)) fakarteeny b 3eed melady :))) i really hope u enjoy ur day :))
Marwa

Anonymous said...

ههههه
شوفتي ضحكتي علينا ازاي علشان تعرفينا او تفكرينا بعيد ميلادك :P
علشان مصر كلها تعرف و تحتفل و قال يعني مش عايزة تحتفلي
إلي فيه عادة مبيبطلهاش :P:P
و بجد كل سنة و انتي طيبة يا رحاب و عقبال 31 و 32 سنة و كل التلاتينات إلي حتعيشيهم بعد كده احسن و اجمل من العشرينات إلي عيشتيها و انتي عندك اسرة جميلة و صغيرة فيها بنوتين حيعيشوكي سن الطفولة كمان من تاني
مصطفى على

Anonymous said...

كاياتك جميله اوى بجد وبستمتع بيها جدا وعقبال يارب مانقرا مذكراتك ماقبل ال100 سنه كده ان شاء الله ده طبعا لو كنا لسه بنعرف نقرا ساعتها
مريم

Anonymous said...

كاياتك جميله اوى بجد وبستمتع بيها جدا وعقبال يارب مانقرا مذكراتك ماقبل ال100 سنه كده ان شاء الله ده طبعا لو كنا لسه بنعرف نقرا ساعتها
مريم

Anonymous said...

ا حوبا مطلوب منك تكتبى مذكرات يومية لحد يوم 27 :)))بهنيكى بجد على المذكرات دى مكتوبة بسلاسة و تلقائية رجعتنى فعلا لايام ما كنت عيلة و كان نفسى يتعملى عيد ميلاد و كنت دايما بقنع نفسى انهم نسيوه غصب عنهم ههههههههههههههه
غادة

Anonymous said...

كل سنة وانت طيبة يا حوبا
وعلشان انتى حونينة وبتراعى ظروف الناس مش قصادى غير انى اهديكى وردة محبة وقصيدة لدرويش : احن الى خبز امى
حاجة كدة على اد الحال يا الذ ام
أميمة

Anonymous said...

كل سنة وانت واسرتك بخير وسعادة يا رحاب
السنين والساعات مش بتوقف..يا ريت كان الواحد وقفها عند 22 سنة بس..المهم يكون بلغ سن الرشد وبقى مسئول عن كامل حياته...لكن الزمن والحياه والمعاناة والأمل والفرحة..وكل شىء جميل علشان نشوفه لازم ناخد خطوة لقدام جوة الزمن
عيد ميلاد سعيد
عصام مهران

Anonymous said...

gamela 2wy 2wy we kol sana we 2nti tayeben we rabena yewafe2ek dayman fe 7ayatek ya rab we yekremek fe banatek we yekono 27san nas
Dina

Anonymous said...

gamila awy ya hoba.. i think en ana ha7es nafs e7sasek da lama atem el 30 7'sosan en le7ad delwa2ty ma3amaltesh ay 7aga w mafish ay 7aga et3;ayaret fe 7ayaty wana 3andy 27 sana. bafakar en nefsy kol 7aga a3melha 2abl ma atem el 30. w rabena yostor
Gogo

Anonymous said...

the 30 is not the end bel 3aks.. it the beginning of a new era... bas e7na fi masr elli elnas me7assesaana en kammelt 30 aaaaaaah kebert we3aggezt welmafrood yadoob abtedi atsarraf be7ekmet senni ba2a yalla keberna :D

kol sana wenti be alf 7... See moreéer wtayyeba wenshaAllah ye3meloolek surprise party wetetbesti ;D

@hagar... wt if u didn't do everything u want before u r 30?? does it mean u can't or won't have plans for ur 30s?? balash eltafkeer da, we3eesho kol sana be7alawet-ha, e7na elli benkabbar nafsena mesh elseneen :)
Amira

Anonymous said...

مش هاقول لك سنة الحياة ومش عارف ايه .. لكن هاقول لك مش كل الناس بتهتم بأعياد الميلاد ... وعدم اهتمامهم بعيد الميلاد مش معناه ابدا انهم مش مهتمين بعيد الميلاد :) وعموما كل سنة وانتى طيبة مقدما .... لو لحقت أحوش تمن التذكرة قبل عيد ميلادك هاجي :)
احمد مختار

Anonymous said...

Ya houba...awalan kol sana wenty tayeba mokadaman, sanyan 30,32,33,34,35,msh far2a, as long as you are taking your share from life, enjoy your age, enjoy having your children and husband around you, no matter how old you are getting, there wil be always someone around you, this is the beauty of age and life:)nice article"
Gihan

Anonymous said...

"اولا كل سنةو انتى طيبة يا رحاب
ثانيا انتى شجاعة جدا لانى اول مرة اشوفت بنت بتعترف بسنها كدا على الهوا
دمتى ودامت ذكراتة الممتعة حقا
تحياتى
محمد عبد الرازق

Anonymous said...

كل سنه و انتى طيبه يا جميله
جمده فعلا
جداا
نادين

Anonymous said...

رحاب بجد كلامك اثر فيا اوى , انا مكنتش متخيلة ان فيه حد بيهتم اوى كدة بعيد ميلاده و يعمله ألف حساب ههههههههههه
بجد فكرتينى بأيام جميلة عندى لما حكيتى عن ذكرياتك عن عيد ميلادك ,, و احساس غريب جدا فعلا ان الواحد يبقى على مشارف الثلاثين , بس زى ما انتى قلتى و الدنيا كلها عارفة انها سنة الحياة ... على فكرة كلمة منطقية جدا اللى قالها زوجك بأن " حد يحتف... See moreل بسنة مرت من عمره " , زمان كنا بنحتفل عشان فرحانين اننا كبرنا و بنبقى عايزين نكبر اكتر , انما بعد اوائل العشرينات تفتكرى مش هنتغير ؟؟؟
كل سنة و انتى زى العسل و بألف صحة و سلامة و عقبال ما تحتفلى بيوبيلك الماسي ياااااااارب مع اسرتك الجميلة
:D :D
سارة

مرجانة said...

كل سنة وانتي طيبة يا رحاب
عقبال الخمسين في صحة وراحة بال
ربنا يخلي لك جمانة
عسولة موت
على فكرة انا عاملة كتاب جديد
اسمه حبة تراب
ادعيلي بأة يطلع للنور

Anonymous said...

كل سنه وانتي يا طيبه بجد
وعلي فكره انتي وانتي بتتتكلمي افتكرت انك بتتكلمي عني"
هبة نظمى

Anonymous said...

كل سنه وانتي طيبه يا روبي
ولا يهمك الشباب في القلب ومش بالسن
بسمة