Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Friday, March 26, 2010

ماما ذات حدين


فتحنا عينينا على كلمة ماما بتتقال من الزوج للزوجة.. وكانت ماما أول كلمة نقولها لما عرفنا يعنى ايه نحط حروف جنب بعض ونتكلم..

الطفل أول حد بيفتح عليه عينيه وياخده ما بين دراعاته بكل حب وحنان هى ماما.. فطبيعى إنه يكبر على حبه لماما ويقعد فترة كبيرة ميعرفش ينطق كلمة تانية غير ماما..

الزوج بيحس فى مراته بالسكن والدفء وإنها بيته وحضنه وأمانه اللى بيرمى فى أحضانه كل حموله ويحط راسه على صدره ويعيط من غير كسوف.. علشان كدة بيحس إن مراته زى ماما.. فبيقولها يا ماما من غير تفكير..

الأم بتخاف على بنتها من كل صغيرة وكبيرة.. ودايما ملاحقها بنصايحها اللى مش بتخلص خوفا عليها وحبا فيها.. وقلبها بيقع بين ضلوعها لو حصل لها أى مكروه.. كتير تلاقى الأم بتقول للبنت (حاسبى يا ماما).. البنت تبصلها باستغراب وبراءة وتقول لها (أنا مش ماما)..

زى ما الأم بتعطف على بنتها وتديها حنانها وحبها.. بتكون هى كمان محتاجة حضن بنتها وحنانها وحبها ليها.. فكلمة ماما بتطلع بكل عفوية من الأم للبنت تشمل كل حنان الدنيا.

تلاقى المتغرب أو اللى فقد ماما.. اتعرف على سيدة كبيرة سواء أم صديق له أو ربنا وقفها سند له فى طريقه.. تلاقيه بكل حب وتلقائية يقول لها يا ماما.. من غير حتى ما يستأذنها إنه يشيل الكلفة ما بينهم ويسمح لنفسه إنه يعتبرها زى ماما.. وده علشان حس إنها زى ماما فى حبها وعطفها عليه ودفء حضنها له.. اللى مش شرط يكون حضن مادى.. ممكن جدا يكون معنوى.. لكن بيكون فى أشد الحاجة للأحاسيس دى من ماما حتى لو ماكانتش ماما.

ولــــــكن

من منظور تانى.. نلاقى كلمة ماما بتستخدم كتعبير تهكمى أو استهزاء..

تلاقيها بتتقال ما بين الكلام سواء بعصبية أو تقليل من شأن الطرف التانى زى:

ليه هو انتى فاكرة نفسك مين يا ماما؟

ليه يا ماما هو انتى هتبقششى عليا؟

العبى بعيد يا ماما؟

ربنا يسهل لك يا ماما

ماما حلوة

السؤال بقى: ليه؟ وعلشان إيه؟ كلمة ماما كلمة تحمل معانى كبيرة أعمق بكتير من ظاهرها.. إزاى ممكن نقولها كدة بكل بساطة من باب التريقة أو الاستهزاء أو التقليل من قيمة البنى آدم..

حتى كلمة ماما بقت تحمل كذا معنى وبقت ذات حدين؟؟!!!!! ومش عجبى

رحاب المليحي

11 comments:

Anonymous said...

احنا بقينا مجتمع بيستهزء بكل حاجه
اى علاقه و اى كلام
دا راجع لان مبقاش عندنا قيم اصلا و لا مبادء
كل شىء فقد معناه
لان الحياه نفسها فقدت معناها
نادين

Anonymous said...

بغض النظر عن كلمة ماما
اى كلمة فى الدنيا تحمل اكتر من معنى
و لكن للاجابه عن سؤالك
ان المعانى فقدت قدسيتها و بالتالى بقت تتقال فى غير موضعها
محمد حسن

Anonymous said...

3andk 7a2 walahy :))
gogo

Anonymous said...

Rody Alaa El Din
u r right.

Anonymous said...

ماما.....كلمة باتت زى بابا برضة
اجرى يا با با بعيد.....مالك يا بابا
يعنى كل المعانى الجميلة باتت هى الأخرى تحمل معنيين
كسائر حياتنا
حتى الأفلام..كلم ماما.....سلم على ماما
ازدواجية عيشينها بمزاجنا...او غصب
مودة"
عصام مهران

Anonymous said...

يالهوى
ده انا مدمرة كل حاجة بقى ماما وبابا وابنى:))
بس هو فعلا الحقيقة
ان مبقاش عندنا حدود للتعامل مع اى حاجة
كل الكلام اتغير معناه وكل المعانى اتغيرت الاهداف اللى بتتقال ليها
سارة الإسكافى

Anonymous said...

يالهوى
ده انا مدمرة كل حاجة بقى ماما وبابا وابنى:))
بس هو فعلا الحقيقة
ان مبقاش عندنا حدود للتعامل مع اى حاجة
كل الكلام اتغير معناه وكل المعانى اتغيرت الاهداف اللى بتتقال ليها
star sky

Anonymous said...

la2 danty htla2i 7agat 3ageeba awi y3ny agmad shatayem hya eli bel om 3shan homa 3arfen enaha 7aga 3azeza 3alena 3shan keda ama y7eb yhstemak ygeblek seret omek 3la tol
aw we bardo klmet ya 7agga bkraha awi lma 7ad yegy y2olek eh ya 7aggaaaaaaaaaa ??!!!"
Neihad

Anonymous said...

Ghada Srour
ايه يا ماما اللى بتقوليه ده :))

Anonymous said...

لما الانسان ما بيقدرش يوصل للقيمة الحقيقية لكل شئ حواليه ..يبقى من الطبيعى ان يقلل من اى شئ ..و دى سمة العصر الحالى ..بالاضافة الى ان وسائل الاعلام نقلت للمجتمع مصظلحات كتير تناولتها بدافع الكوميديا ..فاصبحت فيما تقلل من المعنى الحقيقى للكلمات ..و موضوع رائع ووجة نظر سليمة
هبة

IMSA said...

الأمر بسهولة ليس فقد تلك الكلمات لمعانيها ولكن فقد المجتمع لقدسية ومكانة تلك الكلمات ومعانيها ..
//
البعض يرى أن المدلول نفسه تم فقده بسبب تشتت الكيان الأسري وإختفاء المعنى الأسمى للكلمة ..
//
الحل الأمثل هو عودة وتوعية الناس لمعاني ومدلولات تلك الكلمات والألقاب ومدلولها في حياتنا ليس فقط الأم والأب ولكن لكل الكلمات التي تحمل معنى أسمى في حياتنا ..
//
شكرا على البوست .
تقبلي مروري أستاذة رحاب .