Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, October 03, 2016

الأروبه نقمه ولا نعمه؟

** أختلف مفهوم كلمة (أروبة) ما بين الناس.. فى ناس شايفها انها حاجة مش حلوة وناس شايفاها ميزة

هطرح الفكرتين من خلال حوار بنتين

·        أ : بُحكم أن أهلى متوفين وعايشه لوحدى كان لازم عليا انى اعمل كل حاجة بنفسى.. ماستناش حد يعمل لى.. محدش فاضى لحد حتى لو عيلتى.. بطبيعة الحال كل واحد عنده مشغله ومسئولياته وبيته وعياله.. بس ف نفس الوقت لما حد يقولى يا أروبه بتضايق بحس انها مش كلمه حلوة.. بحسها اللى هو اه ما انتى دايسه ف كل مكان وتعرفى تجيبي أرار الحاجة

·        ب: انا بقى عكسك انا شايفه انى لو كنت كدة كنت هبقى مبسوطه.. فكرة انك ماتبقيش محتاجة لحد ولا متعشمه ف حد ولا تذلى نفسك لحد عشان يعملك حاجة انتى مش عارفه تعمليها لنفسك دى نعمه كبيرة جدا.. وزى ما قولتى محدش فاضى لحد.. انا بقى بحس كتير انى مبعرفش اتصرف.. بحس احيانا بالسذاجه والعبط وانى كتير لازم اعتمد ع حد يتصرف بالنيابه عني ويفكر لى ف حل

·        أ: بس يعني مش أتحسد ع الحاجة الوحيده اللى انا فالحه فيها مش اسلوب يعني.. مابقاش بحاول اساعد الناس ولو حد طلب حاجة منى أقوله يعمل ايه.. وف الاخر يتقالى لا برافو عليكي طلعتي أروبه.. ايه الأروبه اللى فيها يعني؟ أنى بساعدك؟ أنى بُحكم انى عايشه بطولى بعرف اتصرف، ف بقولك تعمل ايه؟ يعني اسكت ابطل اساعد الناس ؟؟

·        ب: انتى ليه مأفورة؟ ليه واخداها بحساسيه؟ يكفيكي فخرا إن محدش بيلجأ لك وتخذليه.. يكفيكي فخرا ان الناس يوم ما يتزنقوا عارفين هيسألوا مين ومتاكدين ان المعلومات اللى هتديهالهم.. وانك حتى لو متعرفيش هتسألي مش هتقولى معرفش وتنفضى.. دى ميزة مش موجوده عند ناس كتير.. كله بقى بيقول يالا نفسى محدش فايق يساعد حد.. ده الناس تبقى عارفه المعلومه وتخليها لنفسها وماترضاش تساعد بيها غيرها.. يسموكى اروبه يسموكى عفريته المهم النتيجه مش المُسمى

·        أ: الحمدلله ده فضل ونعمه من رب العالمين بس انا مش قوية زى ما انا مبينه.. كتير من جوايا بكون ضعيفه ومحتاجه اللى يشد من اذري بس مبقولش.. ساعات بحتاج الإيد الحنينه اللى تطبطب عليا وتسمعني حتى لو انا عارفه هعمل ايه بس محتاجه احس ان في حد مهتم بيا  زى ما انا بعمل مع الناس.. ما انا ف الاول والاخر حتى لو أروبه أنا بنى أدمه ونفسى ف حد يراعينى ف وقت شدتى حتى لو مابينتش ده

·        ب: طبعا، كلنا ف الأخر مهما كنا بنبان أقوياء ف بتيجي علينا أوقات ضعف كتير بنحتاج اللى يحتوينا.. بس برضه هرجع واقولك العشم وحش.. الأفضل انك ماتستنيش حاجة من حد.. جه لوحده وحس بيكي خير وبركه ماجاش أديكي عارفه طريقك وعارفه هتتصرفى ازاى وهتعملى ايه وليكي الله اللى تدعيله وتشتكي له همك..

رحاب المليــــحي 




6 comments:

Anonymous said...

Eman Taha
نعمه طبعا ف الزمن ده

Anonymous said...

Nora Galal
بوصى أعتقد كانت ممكن تكون كلمة شكرا ما شاء الله ربنا يجعلك دايما فى مساعدة الناس أفضل كتير من اروبة اللى بتكون معها اماءات الوجه ومن اهمها تبريق العيون 😕😕

Anonymous said...

Hager Emad
ممكن يكون ده المقصود بس التعبير بيخون الشخص اللي بيعبر لك عن الشكر

Anonymous said...

Hend Hatem El Shamy
Wallaaah zamaaaaan 😃

Anonymous said...

Shahinaz Ahmed
حلو الكلام..وضحتي جوانب تانية للأروبة...عموما الأربنة دي فخر..حد طايل...النهاردة أروبة بكرة تلاقي الأأربن منك..عادي..الايام دول

محمد سلامة said...

يا ليتني كنتي أروباً