Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, November 26, 2013

دبلتك.. وبالسلامة

زى اى بنت كان نفسى ف جواز واستقرار.. وحظى وقعنى ف جواز الصالونات.. وكان عن طريق واحدة قريبتى.. اول مقابله عائلية مع العريس كان انطباعى عنه انه مريح وهادى وطيب

بعد اسبوع قرينا فاتحه.. وبعدها بحوالى شهر تمت الخطوبة.. وماكنتش لسه لا اتعرفت عليه ولا حتى قعدت معاه..

بدأنا نتعرف ع بعض بعد الخطوبة لما ابتدينا نجهز شقتنا ونخرج ونشترى كل حاجة مع بعض

كنت عايزة ف شقتى اعمل المطبخ مفتوح على الريسبشن..

فوجئت بأخته بتتصل بيا وبتقولى: مينفعش تعملى الحاجات الغريبة دى..
وانتى اصلا بتضايقى أخويا بأفكارك دى وهو مخضوض لوحده من الجواز والمسئولية.. ف لو صممتى على اللى ف دماغك يبقى انتى اللى بتعملى مشاكل وبتعطلى الجوازة

ساعتها بدأت احس ان اخته ممكن تكون مسيطره ع تفكيره بشكل او بأخر.. ف معدتش الموضوع وأخدت موقف وقلت لبابا.. ف بابا اتصل بيه وطلب منه يجى لنا البيت عشان نقعد ونتكلم

وقتها اخد جنب لا بيتصل ولا بيجي لمدة اسبوع.. وف الاخر جاب اخته وجوزها وجم.. وكان قاعد ساكت خالص..
اخته اللى بتتكلم وتناقش وتعترض.. دى كمان ماكنتش عايزانى انقى اى حاجة ف شقتى.. وبرغم كدة وعشان اول مشكلة تواجهنا ، اهلى عدوها عشان المركب تمشى

وبقيت انزل اشترى وانقى كل صغيرة وكبيرة ف شقتى.. حتى البياض كنت بقف ع ايد العمال وهما بيعملوه.. وخطيبى ماكنش له ف اى حاجة ولا بيعمل حاجة

واخته كل فترة تتصل بيا وعايزة تتدخل ف كل حاجة وتعرف عملت ايه وفاضل لى ايه.. بس انا ماكنتش بديها فرصه

وفات سنة ع خطوبتنا وكنا تقريبا خلصنا الشقة وحددنا ميعاد الفرح..

لحد ما قررت اجيب سُفرة (فيرفورجيه).. وهو شافها ووافق عليها.. واتعملت ونقلها كمان لحد شقتنا

لاقيت قريبتنا بتكلمنا اللى هى اصلا الوسيط ف الجوازة دى.. وبتقول لماما ان اخته اتصلت بيها

وقالت لها: يا يغيروا السُفرة دى يإما هتحصل مشاكل كتير.. وهى اصلا بتجيب حاجات مش من مستوانا

وجوز اخته قال لقريبتنا: لو صمموا ع السُفرة دى يبقوا مايطلبوش بقايمة ومؤخر

ماما ردت ع قريبتنا وقالت لها: واخته مالها ؟ دى حاجة تخص بنتى وخطيبها بس

قامت بقى الدنيا مقعدتش..

واخته تقول ان مامتى غلطت فيها وهانتها

قمت مكلماه عشان احل المشكلة وقلت له انى مستعده اخلى بابا يغير السُفرة عشان خاطرى ونخلص الموضوع..

فوجئت بيه بقى بيتنطط عليا

ويقولى : ده مش هيحل المشكلة اصل النفوس شالت من بعضها.. ولو كنتى عايزة يجمعنى بيكى بيت واحد، لازم امك تكلم اختى وتعتذرلها..

وبعدين دى الف واحدة تتمنانى انا وشقتى.. ولعلمك انا لو مراتى عاملت اخواتى بطريقة وحشه هديها فوق دماغها.. عشان تمشى زى الالف.. وانا كل ما اكلمك ف حاجة تقوليلى ابويا، ابويا..

ابوكى هيعمل لى ايه يعنى؟ ابه اقصى حاجة ممكن هيعملها؟ هيقولى مش هتشوفها غير ف كتب الكتاب؟ ولا هيقولى مش هجوزهالك اصلا؟ عادى يعنى

ده انا كل ما اجى بيتكوا ابوكى بيكون نايم.. بصراحه بقى ابوكى لا بيهش ولا بينش وامك هى اللى شايله الليلة كلها اصلا

بعد ما سمعت الكلمتين دول مابقيتش شايفه قدامى من الغضب والعصبية قلت له: انت قليل الادب، واى حد يغلط ف ابويا يبقى ابن ستين ..... وواطى .. وهطلع ..... اهله

كنت بغلى منه واول مرة احس انى قرفانه منه قوووى كدة وانه عديم الشخصية بالشكل ده.. وانا اللى مابقيتش عايزة الجوازة..
ومارضيتش اقول لبابا انه غلط فيه..

هو اتصل بعدها طلب الدبله.. واخدنا الحاجات اللى جيبنها ف الشقة وخلص الموضوع

بس دلوقتى عمال يرطرط بالكلام ويقول انى سلفه منه فلوس وانه ال ايه جايب لى هدايا بعشر الاف جنيه

عموما انا مبسوطة ان ربنا طلعنى من الجوازة دى ع خير قبل ما كنت البس وكان شكلى هتجوز اخته مش هتجوزه هو

بس اللى نفسى فيه بقى الناس تسيبنى ف حالى وماصعبش عليهم ومايفتكروش انى متدمرة نفسيا ومكسورة، عشان انا فعلا مش كدة وبحمد ربنا ع اللى انا فيه دلوقتى

رحاب المليـــحي

11 comments:

Anonymous said...

Samah Hassanien
ههههههههههههههههههه حلو اوى انك نسقتيها في قصه قصيره جميله يا حوبا لا وانا عماله وانا بقرأ اقول شبه القصه اياها لحد ماجت السفره الفيرفورجيه :))

Anonymous said...

ZǿǾmẫ ZǾǿmä Shŗbãtiķǻ
قطيعه تقطع
اغلب جوازات مصر وسنينها

Anonymous said...

Ahmad Helmi Al-Zawawy
ده نصيب قبل اي حاجة

Anonymous said...

Marwa El Etriby
بترتر

Anonymous said...

Sarah El-Eskafy
هو كله كوم والسفرة الفيرفروجيه مش مستواهم دى كوم
بصى هو من الاول ما نزليش من زور بركة يا جامع ان ربنا خلصك منه
قطعوا العالم الحشرية

Anonymous said...

Hëñd Êl-Shãmý
hwaa da kda ragel !! de lazem w hya tdeloo debleto tetf 3aleeeeh aslaaan

Anonymous said...

Tinkerbella H Land
الحمد لله على كل
حال ...

Anonymous said...

Nermin Hussien
انا اعرف واحده كانت هتبقي في نفس القصة دي ويمكن انيل كمان ههههههههههههههه بس برده الحمد لله دلوقتي بتحمد ربنا انها خلصت منها علي خير

Anonymous said...

Qamar Zaman
انتى فعلا ربنا بيحبك عشان انقذك من جوازة كان مصيرها فى النهاية الطلاق
سيبك من الناس وعيشى حياتك وهيجيلك الافضل منه ان شاء الله

Anonymous said...

Amal Elsayed
هااااار اسووود

Anonymous said...

Batota Salem
والله هى الى كسبت لما سابته بتاع اخته