Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Monday, November 18, 2013

سؤال لكم؟

ماكنتش عايزة لا تحب ولا تتحب.. بتتفرج ع الحب ف الافلام وتسمع عليه من اصحابها.. تدوب ف فرحهم وتحزن لحزنهم.. وتحاول على قد ما تقدر تساعدهم ف حل مشاكلهم العاطفية

وكانت شايفه انها كدة مية فل.. تحط راسها ع المخده تنام ف هدوء.. من غير ما تفكر ف حاجة تنكد عليها ولا تنام بدموعها ع خدها بسبب واحد مش سأل فيها

لحد ما جه يوم وقابلته.. مالفتش نظرها كان زيه بالنسبلها زى بقيه الناس.. اصحابها عرفوها عليه ومادتوش اى اهتمام..

بس هى لفتت نظره كان شايفها زى الفراشه اللى بتتنقل من مكان لمكان ف خفة ونشاط.. وعلى طول بتهزر وتضحك ومش شايله للدنيا هم..

لما سال اصحابه عنها عرف ان سر سعادتها ف انها مش مرتبطه وان شعارها ان الحياة احلى طول مفيهاش حب امتلاك يعنى مفيهاش نكد وسيطرة

حاول يتقرب لها بس هى كانت أذكى منه وعارفه الصنف ده من البنى ادمين.. اللى بيحاول يتودد للبنت اللى مالهاش ف الصنف..

ف يحاول الواحد منهم انه يعمل سبع رجاله ف بعض ويثبت لنفسه انه قادر ع انه يعلقها بيه..

ولحد ما يوصل للخطوة دى هو تمام اوى وحاسبها صح لكن بعد كدة تيجى زى ما تيجى بقى يا يزهق منها ويدور ع غيرها يرمى شباكه عليها

يإما تكون هى اشطر منه وهى اللى ترمى شبكها عليه وتجيب رجله لحد المأذون

ف كان كل ما يقرب ويتوجد ف خروجاتها مع صحابها تتجاهله مش عشان تشده ليها اكتر..
لأ، عشان هى فعلا مش عايزه تبقى لفته نظره ويفكر يتشدلها ولا يحبها..

ولو كان دخل من الاول دخلت صديق عادى زيه زى اى واحد من شلتها كانت هتتعامل معاه احسن من كدة.. لكن دخلته دى ماعجبتهاش


** يا ترى من وجهة نظركوا ومن تجاربكوا، هل هى صح وتكمل ع كدة؟؟ ولا تديله فرصه ويا صابت يا اتنين عور؟؟ **

رحاب المليحي

13 comments:

Anonymous said...

Marwa El Etriby
مبيجيش من ورا
الرجاله غير تعب القلب

Anonymous said...

Marwa Aref
هو عينه عليها ولو دخل كصديق عادى حيبقى بيلف وبيدور لان فى الاساس هى عاجباه
مش شرط يكون وحش .. وماينفعش واحده تبعد عن الصنف كله لان زى ما مش كل الستات زى بعض فبرضه مش كل الرجاله زى بعض ... الفرصه مطلوبه ومواربه الباب ضروريه والحذر فى كل الاحوال واجب

Anonymous said...

Sayed El Keblawy
لو حد سعيد فى حبه هيقولك طبعا تديلة فرصة والحب جميل وحاجات كتير اما لو فشل فى حبه هيقولك ملعون ابو الحب وهى صح وحاجات كتير عشان كدا هقولك تعمل اللى مريحها وبس

Anonymous said...

محمد بريك
انا رأيي تكمل علي كده
دا احسن مبدأ شفته في حياتي
ولو هو عايزها وشايف انها مناسبة له أكيد هايعرف طريق باب البيت لوحده
غير كدا يبقا وجع قلب فعلا علي رأي الأستاذة مروة

Anonymous said...

Maha Abd Elmoneum Sadeek
تكمل على كدا طبعا ده لو عرفت أصلا

Anonymous said...

Ramy Elalfy
انا بقى رأي تكمل عليك ده وتكبر دماغها
بلا وجع دماااااااااااااغ

Anonymous said...

Sahar El-Ghonemy
3een el 3a2l wallahy

Anonymous said...

Basma Kamal
تديله على قلبه هى بنات الناس لعبه .. ربنا يوفقها ويحميها

Anonymous said...

Hëñd Êl-Shãmý
لا تكبر دماغها أحسن
بلا حب بلا بتاع .. الدنيا كدة نعناع

Anonymous said...

Sami Fawzy Al-Qasim
تكمل على كده... وهو لو عاوزها هياخد خطوة جديدة

Anonymous said...

Mohamed Ibrahim El Banna
والله القرار يتوقف على هى عاوزه ايه هو ممكن يكون كويس جدا بس هى مش عاوزاه ومش طايقه اهله فيبقى بخ وممكن يكون ابن تيت بس بتحبه فهتروح زتشده من قفى اللى جابوه وترميه جنبها فى الكوشه و يلبس البرنس ونحسبه فقيد بس كدهون الموضوع كله متوقف على هى عاوزه ايه منه مش هو عاوز ايه منها

Anonymous said...

Nermin Hussien
صححححححح وخليها ثابته علي موقفهااااااااااااااااا والله لو غيرت موقفها هتندم وخصوصا انه فعلا موقفه مش صريح ومش واضح ليه هي تحط نفسها تحط رحمة الاحتمال مدامت سعيدة متحاولش تقرب من اي شئ يخسرها سعادتها لانه هيجي وقت مناسب تقابل فيه الي يسعدها اكتر واكيد هيدخل حياتها بطريقة مش تقلقها ابدا

Anonymous said...

Rokia Yosri
اول حاجه فعلا الواحد عاش التجربه دى بس كنت بحس انى فى حاجه ناقصه فيا مافيش حد مهتم بيا شايفه اصحابى البنات كلهم بيحبو وبيتحبو وبعدين هو اجمل حاجه فى الحب الخناق والغيره هى طبعا غلط لان فى الاخر هتبقى عايزه حد يحبها بجد ها تبقى عايزه حبيب يطبطب عليها وقت زعلاها صدقينى هى مش حاسه بالكلام ده دلوقتى بس حا تحس بيه بعدين بس بعد فوات الاوان ودى وجهة نظرى شخصيه والله وعن تجربه فعلا