Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, October 23, 2013

كاك أوا




-         ازيك كدة؟
-         تمام
-         طب وكدة؟
-         زى كدة الاولانية بالظبط
-         انت مش كنت المفروض تبعت لى الصور لما ترجع؟ وبقالك ساعة اهو اون لاين ومابعتش حاجة!!
-         فعلا؟ هو انا مقولتلكيش!! اصلى كنت نايم ع ودانى.. انا كنت اون دى حقيقة، بس حضرتك كنتى اوف.. شوفتى ازاى؟
-         هه؟ احم، يعنى كنت هشم ع ضهر ايدى انى اوف.. ماركزتش
-         اى كلام بتقوليه، اه والله زيمبؤلك كدة.. ع اساس انك لو كنتى شميتى ضهر ايدك كنتى عرفتى؟
-         يا سلاااااام
-         وحياة عبد السلام
-         ابو الاتامة ع اللى اخترعها
-         ماشى، ماشى
-         مشش ف ركبك.. وبعدين ها، يعنى.. مارديتش عليا، هتبعت الصور امتى؟
-         المشش ده يبقى ازاى بقى؟ والمية دى هترد ف زورى يعنى مش ف السماعة؟
-         ايه يا بابا؟ مالك واقف لى ع الوحده كدة ليه؟
-         كاك بو.. إلا هو مين بو ده؟
-         ممممم، فقر من يومك
-         مهو انا لو فقر يبقى انتى اكيد قطة
-         كركركر، ده انت لو قدامى دلوقتى كنت طلعت زمارة رقبتك
-         زمارة رقبتى الواد ابن اختى اخدها يزمر بيها شوية.. عايزة الصور ليه بقى؟
-         خلاص مش عايزة حاجة
-         خلصت روحك
-         نعم؟ بتقول حاجة حضرتك؟ مش سمعه كويس.. وبعدين عايزاهم كدة وبتاع
-         سمعت الرعد ف ودانك.. كدة وبتاع وشاى بالنعناع
-         طب قوم بقى قامت قيامتك.. اتشملل كدة وابعتهم
-         مأنتخ  دلوقتى مش فايق.. فوتى علينا بكرة
-         يا عم الناس كلت وشى عايزه تتفرج ع صورها.. هتوكسنى بوكستك السودا دى
-         بالهنا والشفا.. بس ايه ده؟ هى الوكسة عاملوا منها الوان؟
-         اه، غلوش غلوش.. يابنى هو حد كان يعرفك اصلا ولا يعرف انك بتصور؟!  ده انت لحم كتافك من خيرى، عد الجمايل بقى.. هىء
-         ع فكرة كتافى كلها عضم مفيهاش لحم
-         مالك مزقطط كدة وعمال تألش؟ مهى ناقصاك اصلها
-         منشكح شويتين.. وع فكرة بقى، كلهم قالوا بعضمة لسانهم انى حريف تصوير.. انتى بس اللى قارشه ملحتى وعامله فيها قرشانه
-         تصدق انا اللى غلطانة انى بتكلم مع امثالك.. قفلتنى، يالا انا هقوم انام
-         نامت عليكى حيطة واستغطيت كمان
-         يا مصبر الوحش ع ..... ها، هتنام؟
-         لأ
-         لأ لما تلؤك.. هع  هع ، رديتهالك، رديتهالك
-         ممممم، طب انتى هتنامى؟
-         اه، بفكر
-         كاك اوا.. نياهاهاها
-         جررررررر، سلام
**************************************
** انا معرفش لو كنت اعرف كنت قلت **

كلام كتير بنقولوا وبنكتبوا.. لا له معنى ولا له اصل
بنردده من غير ما نفكر فيه عشان اتربينا عليه
ولو سألت اى حد انت فاهم اللى بتقوله ده؟ هتلاقيه سكت وشرد بعيد وملاقاش اجابة
كلامنا قرب يفقد قيمته.. اه والله زيمبؤلكوا كدة

ادهم ابو طالب
رحاب المليحي

10 comments:

Anonymous said...

Mona Elshennawy
حلووووة الفكرة جداااا
لكن معاكي حق في كلام كتير جداااا الواحد بيرددة وخلاص
وﻻ فاهمين أي حاجة منه
اﻻ هو مين ال إخترعه

Anonymous said...

Sarah El-Eskafy
نسيتوا ماما جاك مو

Anonymous said...

Ramy Elalfy
ايوه السؤال اللي يبطرح نفسه بقى مين المصور اللي كان مقصود ؟؟؟
هاه هاه هاه

Anonymous said...

Ragaa Mostafa
ده انتي لو قعدتي مع ماما يا حوبا هتلاقي معاها مصطلحات اد كدة

Anonymous said...

Samah Abdou
نص الكلام عمري ما سمعته .. بقالي كثييييير ما تعلمتش حاجة جديدة مصرية ... فرحانة اوووي اني عرفت حاجة جديدة شكرا

Anonymous said...

Sami Fawzy Al-Qasim
حلوة يا حوبا, المرة الجاية خلى الموضوع عن الكلمات اللى ليها أصل بس احنا مش عارفين أصلها زى كلمة طز مثلآ

Anonymous said...

Nooran Kotb
الله يا حوبا حلو اوي الفكره

Anonymous said...

Fatimah ElZahraa Qasem
حلوة اوووووووزى يسلم ايديك يا حوبا

Anonymous said...

Marwa Aref
حلوة اوى فكره الكلمات او المقولات اللى لها معنى مش معروف " زى جوع النمله او اللى اختشوا ماتو "وممكن كمان الكلمات المقتبسه من لغات تانيه
وانا بتفرج على حريم السلطان بلاقى تقريبا ربع كلامنا او اكتر مقتبس من اللغه التركيه

Anonymous said...

Rokia Yosri
انا الموضوع عجبنى اوى اول مره اشارك فى حاجه زاى كده حقيقى تسلمى