Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, May 28, 2013

مهما كانت المحن.. تفائل



من ساعة ما اتولدت وانا منطوى وف عُزلة تامة..
 وده يرجع ان اهلى كانوا كثيرى التنقل من بلد للتانية.. ف ماكنش لينا أصحاب، حتى أقاريبى ماكنتش اعرف عنهم حاجة.. 
وكمان عشان انا كنت الولد الوحيد ع بنات..
 ف كانوا شايفين ان عزلى عن المجتمع ده أحسن حل انهم يربونى كويس

لما وصلت ثانوى كان نفسى ادخل هندسة.. ولكن للاسف دخلت طب بناءا ع طلب اهلى.. برغم انى ماكنتش بحبها ولا مقتنع بيها.. 

بس كل الناس اللى قابلتهم كلمونى عن مميزات طب ومستقبلها..  لكن محدش ابدا كلمنى عن عيوبها.. وده اللى اكتشفته بعد دخولى.. كنت بصبر نفسى انى ممكن احب الكلية بعد دخولها، بنفس مبدأ (الحب بيجي بعد الجواز).. بس برضه ماحبتهاش

دخلت طب ف الصعيد واخدت سكن مع زمايل ليا ف الكلية
سنة أولى عدت بحلوها ومُرها وبرغم انى ماكنتش بذاكر كويس.. إلا انى جيبت (جيد).. 

واللى عرفته بعدها انها عشان كانت سنة الثورة.. ف الدكاترة نجحوا كل الناس.. حتى اللى كان سايب الورقة فاضية جاب (مقبول)

ومن سنة أولى كلية وانا قررت مابقاش انطوائى.. واعمل صدقات، وكمان بدأت اتعرف ع أقاريبى اللى ماكنتش اعرف عنهم حاجة

وبفضل التميمة اللى حطيتها قبل اسمى ع اكونت الفيس بوك (د.) قدرت اكسب ثقة ناس كتير واتعرف عليهم

بس أنا ماكنتش عايز بس صداقات عابرة أو سطحية ف حياتى.. أنا كان نفسى ف أنتيم يفهمنى ويحس بيا ويشاركنى ف جميع حالاتى 

كمان كان نفسى ف بنت أحبها وتبادلنى نفس الشعور وتبقى هى كمان أنتيمى.. وكان نفسى ف بنت بعينها.. كنت بحبها من وانا ف اعدادى، كانت جارتى.. 
لكن عمرى ما فكرت ايامها أبوح لها بحبى ليها

لحد ما بالصدفة البحتة حد فتن لها بحبى ليها.. وده اللى شجعنى وقتها انى اتكلم وأقرب منها.. بس اكتشفت ان ظروفنا وتربيتنا مختلفة وده اللى منعنا اننا نكمل مع بعض كأصدقاء عاديين حتى، ونهيت الموضوع

من المشاكل اللى حصلت لى وقتها، انى كنت بتدرب ف مستشفى.. ف كان فيه بنت معاية اتكونت بينا صداقة.. وجت اعترفت لى ف يوم انها بتحبنى وماتقدرش تعيش من غيرى..

 ف أنا أعتذرت لها وقلت لها انى بحب واحدة تانية ومخلص لها.. راحت البنت مهزقانى وقطعت علاقتها بيا

بعدها بأسبوع لاقيتها جاية تعتذر لى وطلبت منى اننا نكون أصدقاء.. وانا وفقت لإنى كنت فعلا بعتبرها زى أختى مش أكتر

بعدها بيومين اختفت وابعت لها ماتردش.. وبعد شهر لاقيت نمرتها بتتصل ع تليفونى..

 برد لاقيتها مامتها وبتقولى: انت اللى قتلت بنتى.. أنا ارتبكت جدا وماكنتش فاهم حاجة ومعرفتش ارد

بعدها لاقيت اختها بتكلمنى من نفس النمرة بتقولى: اختي كانت بتحبك جدا، وكانت بتمر بظروف صعبة جدا وانت اتخليت عنها , وعشان كده هي انتحرت , انت السبب في موتها , لأنك موقفتش جنبها.. وسمعت كل كلامها وشتيمتها ليا.. وف الاخر ختمت المكالمة بــ (اتفو)

بعدها عيشت أسوأ أيام حياتى.. ومجرد التفكير ف انى السبب ف موت انسانه كان بيخلينى أبكى.. كنت عايزها ترجع بأى طريقة
لدرجة انى عملت لها أكونت بإسمها ع الفيس بوك.. 

وبقيت ادخل ابعت لها من الاكونت بتاعى وبعدين ادخل اتقمص شخصيتها وارد ع نفسى من الاكونت بتاعها

كنت متقمص شخصيتين ولد وبنت.. وكنت حاسس فعلا انى مريض وقتها.. ومحتاج اتعالج ف مصحة نفسية

ف الوقت ده اتعرفت ع واحدة من قريبى هى كانت اكبر منى سناً.. بس العلاقة بينا توطدت جدا.. حكيت لها ع كل حاجة ف حياتى، ماعدا موضوع البنت اللى ماتت دى

كانت أقرب من أى شخص ليا من أسرتى.. اتعلقت بيها جدا وهى كمان

غلطة عمرى بقى انى ضيفتها ع الاكونت بتاع البنت اللى انا عامله.. ضمتها إلى قائمة أصدقاء البنت اللى مش عايشة غير ع الفيس بوك بس.. وكلمتها منه ع انى البنت وبقوا أصدقاء

أيوة انا عارف انى كان عندى انفصام ف الشخصية.. عايش بجسدين ف جسد.. ولو حد هيتريق عليا، يتخيل نفسه مكانى انه يكون سبب ف موت انسانة بريئة

وبعد فترة من وجود قريبتى ف حياتى وتأثيرها الايجابى عليا.. قدرت أخرج من الحالة اللى كنت فيها.. وده شجعنى انى أحكيلها ع الحكاية الوحيدة اللى ماكنتش تعرفها.. 

وبعت لها نفس الكلام من ع الاتنين اكونت.. الاكونت بتاعى واكونت البنت الوهمى.. عشان تعرف ان الاتنين اكونت لنفس الشخص.. 

اتصدمت من اعترافى وحصلت لها حالة من الذهول.. وردت عليا رد عنيف جدا.. رد فعلها خلانى معرفتش أرد عليها ولا ادافع عن نفسى.. وعذرى الوحيد قدام نفسى انى كنت مريض وقتها

وبعد ما كانت قريبتى السبب ف انى أخف من الحالة اللى كنت فيا.. قطعت معاية خالص وسابتنى لوحدى ف النص الطريق.. رجعت حالتى أسوأ من الاول.. بقيت شايف نفسى شيطان متخفى ف صورة انسان

وقف بيا الزمن وقتها.. قفلت اكونت البنت الوهمى نهائى.. كنت وقتها ف سنة تانية كلية.. لا بقيت بذاكر ولا بعمل اى حاجة.. غير انى انام وانام وانام.. كانت أمنيتى وقتها انى أموت وانا نايم.. لولا خوفى من ربنا كان زمانى انتحرت

زمايلى ف السكن ماكنوش عارفين يتصرفوا معاية ازاى.. اتصلوا بوالدى قبل الامتحانات بأسبوع..
 جالى ع طول الصعيد قعد معاية حكيت له كل حاجة.. وقف جانبى كتير وهون عليا اكتر.. وشجعنى اتغلب ع الحالة اللى انا فيها دى بالمذاكرة.. 

ولإنه أكتر حد بحبه ف الدنيا دى كلها وعايز أرضيه.. عديت السنة بالعافية بس كنت شايل مادتين

بعدها ربنا بعت لى ناس ولاد حلال كتير.. وقفوا جانبى وساعدونى الملم شتات روحى الغايبة.. وحسسونى انى انسان كويس 
واستحق فرصة تانية ف الحياة وانى بشر وبغلط.. 
بعد ما كنت شايف نفسى شيطان وانى لازم اموت عشان الناس تتقى شرورى

عدت السنة وبقيت ف تالتة.. بس كنت حاسس ان فيه جزء مظلم ف حياتى.. كان الحل عشان اقدر اكمل حياتى طبيعى وانسى الماضى.. انى ادخل نفسى ف حالة من البرود واللامبالاة.. بقيت انسان ابرد من الجليد

بس حطيت لنفسى هدف جديد.. انى اساعد الناس وارسم الابتسامة ع وجوهم.. بقيت بدخل ف اعمال خيرية كتير.. بقيت بدى تدريبات ومحاضرات ف اى حاجة حد محتاج لها

اتغيرت حياتى كتير عن الاول.. لكن حالة البرود فضلت متمكنة منى

المفاجأة بقى العظيمة اللى لسه مُكتشفها من شهرين بس.. ان البنت اللى كانت مسودالى حياتى كلها عشان كنت السبب ف موتها.. 

طلعت عايشة وانها كانت عاملة تمثيلية عليا انها ماتت.. وده غالبا عشان تنتقم منى انى رفضت حُبها وكنت بحب غيرها

يوم ما عرفت.. فضلت طول اليوم ما بين بضحك بهيستريا ع المقلب الساقع اللى شربته.. ومابين بعيط بوجع ع نفسى اللى خسرتها بسببها

ناس كتير نصحتنى انى اروح اواجهها واكشف للناس قد ايه هى انسانة مخادعة وكذابة وممكن تعمل اى حاجة دون اى اعتبار لمشاعر الناس..

 بس انا رفضت انى اعمل كدة ولا حتى عايز اقابلها ولو صدفة.. هى بالنسبة لى ماتت فعلا

الدرس الجديد اللى اتعلمته حط مشاعرك ف تلاجة.. مابقاش ينفع البكاء ع حاجة

انا دلوقتى ف امتحانات سنة تالتة طب.. وبرغم انى ماذكرتش كويس.. الا انى متفائل حتى لو مانجحتش ودخلت دور تانى

وبرغم الأحداث الكتيرة اللى حصلت لى ف حياتى ف فترة تُعتبر قليلة إلا انى عندى أمل ان بكرة يبقى أحسن من النهاردة ومش هبص لأى حاجة ورايا

أنا عرفت هدفى ف الحياة انى اساعد الناس واكون سبب ولو بسيط ف ابتسامتهم.. هعزم نفسى ع طبق من السعادة ف وشوش الناس.. هاسعد أهلى وهاسعد نفسى

ياريت تدعولى.. وتتفائلوا انتوا كمان ف حياتكوا

تفاءلوا بالله خيرا.. ده ربنا كبير قوى.. مهما كنا مليانين ذنوب وعيوب.. ربنا الغفور الرحيم

رحاب المليحي

15 comments:

Anonymous said...

ZǿǾmẫ ZǾǿmä Shŗbãtiķǻ ههههههههههههههههههههه و الله فقساها من الاول

Anonymous said...

Samah Abdou
دة مقلب قاااتل حرام عليها بس بردو ما نحكمش لان لو جينا نسمع منها كانت اقنعتنا .. على العموم ربنا يعوضه خييير و يقدره على مساعدة الناس و اسعادهم و يبعتله اللي يفرحه و يريحه هو كمان .. حبة تفاؤل

Anonymous said...

Hëñd Êl-Shãmý
Ya5rbeeet da ma2lb
Da ana lo makano .. A2telha b nafsy

Anonymous said...

Shimaa Ezz Eldeen Albasuony
حلوووة اوووووى غير انى اتفقعت مرارتى من البت الهجاصة دى

Anonymous said...

Ragaa Mostafa
:D الحمدلله لقينا واحد متفائل

Anonymous said...

Marwa El Etriby
الله كريم والله

Anonymous said...

Gehad Abdel Aziz Mohamed
هههههههههه مقلب جامد
هو كان عنده استعداد انه يعيش الحالة دي بسببها او منغيرها بس طبعا انا لو مكانوا مش هقتلها هي انا هروحلها البيت وافرج عليهم الناس عشان واضح ان العيلة كلها ضايعه :@

Anonymous said...

Mai L Nemr
Ana 3eni dama3et :)

Anonymous said...

Samah Gebril
سبحان الله ربنا كبير ومهما فات الوقت الحقيقة بتتكشف انا سعيده انه بدأ من جديد وبيحاول يسعد الناس اللى حواليه لان دى سعادة كبيرة اوى وهتعوضة الحزن اللى عاش فيه لوحه بسعادة كل الناس بتشاركة فيها وان شاء الله ربنا هيوفقه ان مع العسر يسرا

Anonymous said...

Shimaa Sabet
اه يااروبه انا صدقت ههههههههههههه بصراحة لما قريت قلت مش معقول تنتحر والعلاقة اصلا مفهاش اى تطور ولا علاقة فات عليها سنين يعنى انتحار ايه دا وانت عشان طيب صدقت وقتها بس ازاى ام تطاوع بنتها ف كدبه واختها كمان ياساتر يارب وانت عشان نيتك كويسه احمد ربنا انه ظاهرلك الحقيقة من الاول لان واضح انها عيلة وبنت ضايعة وحوار الاكونت الوهمى وقريبتك دا اكيد اثر ع نفسيتك طبعا وحسيت انك مريض نفسى زى مابتقول ... الحمد لله تجربه وعديت ع خير من رد فعل بس انت قلته بانك رفضت حبها ربنا يوفقك وفوق لحياتك ودراستك الطب بردوا مش سهل وتفاءلوا بالله خيرا.. ده ربنا كبير قوى

Anonymous said...

Neihad Elewa
Yaaaaaaaaah ,tab hya 3mlt kda leh bgd ? 3shan y7s belzanb ? Hya msh kanet m3ah fi elkolya tab ekhtft tamaman w so7abha kano fkrenha matet wala eh ?? Y3eny bgd :(

Anonymous said...

Sophia
"‎هو ساذج انو صدقها لاء و عاش الدور كمان وده راجع لأنو محتكش بالناس كتير فكان عندو براءه في التعامل وكل دي دروس الحياة وياما حدق علي الرأس طبول المهم انو يطلع من التجربة بحاجة إيجابية‎"

Anonymous said...

متشكر علي الردود اللي شجعتني
واكسبتني مزيدا من التفاؤل

وأحب ارد علي بعض الحاجات
بداية انا قررت اني ارمي الماضي ورا ضهري وانسى اللي حصل وابدأ بداية جديدة من قبل ما اعرف انها لسه عايشة
فمفرقش معايا كتير

وانا بصراحة لحد دلوقتي مفكرتش اني اواجهها , لسببين بساط جدا : الاول اني خلاص نسيت الماضي وهيا بالنسبالي تعتبر ماتت فعلا
الثاني اني خايف لما اواجهها تحصل اي حاجة ترجعني للماضي تاني , او اكتشف حاجة ممكن تأثر علي نفسيتي تاني او علي بدايتي الجديدة

ببساطة انا قررت " ابعد عن الشر وأغنيله "

* هي مش معايا في نفس الجامعة هيا بتدرس في 6 اكتوبر , دا اللي قالتهولي
وانامن القاهرة وبدرس في الصعيد

* وأيوة أنا كنت ساذج
بس عشان اتربيت بين اب وأم وأسرة كلها طيبة وحنية , وكل الناس اللي اتعرضتلهم في حياتي كانو ناس كويسين جدا
اتربيت علي ان كل الناس كويسين وطيبين والعالم وردي زي ما بيقولو
وبرغم كدا كانت علاقتي بالعالم دا مقطوعة

البنت اللي ماتت مكانتش الحاجة الوحيدة اللي حصلتلي لما ابتديت اختلط بالعالم الخارجي اللي كنت فاكره عالم وردي زي ما بيقولو
وأديني اتعلمت ازاي افرق واعرف مين الحلو من الوحش ومين يستاهل من اللي ميستاهلش وحاجات تانية كتير
دفعت التمن غالي بس اتعلمت

وانا مش زعلان اني اتعلمت وخدت دروس في حياتي تقويني مش تضعفني
ولسه ياما هاتعلم وهادفع تاني وتالت
بس هقابل اي حاجة جاية بابتسامة وتوكل علي الله
" ومن يتوكل علي الله فهو حسبه , ان الله بالغ أمره "


# تحياتي

siliana-net.blogspot.com said...

و الله مش عارف أعزيك ولا أواسيك ولا أباركلك أنك سيبت الطريق الصحيح في النهاية بس دا درس يفتحلك نهج جديد علشان تصحح نفسك ، و لكل جواد كبوة .و شكرا

siliana-net.blogspot.com said...
This comment has been removed by the author.