Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Thursday, May 30, 2013

مصلحتى فوق كل اعتبار



أنا هحكى حكاية أختى واللى اتعلمت منها دروس كتير

ابن خالى عايش ف استراليا جاب لأختى عريس مصرى عايش برضه ف استراليا.. 

من ناحيه العريس عايز عروسة ع حسها ياخد الاقامة.. ومن ناحيه تانية اختى عايزة تهج من مصر وتسافر وتتفسح.. فـــ حصل قبول بدون أدنى تفكير من الطرفين، من قبل حتى ما يتقابلوا

ونزل العريس مصر أسبوعين حصلت الخطوبة وسافر تانى.. وتالت اسبوع بعد سفره عمل توكيل لأخوه عشان كتب الكتاب 

وبعد كتب الكتاب فضلت اختى كل ما تروح السفارة ورقها يترفض.. فضل الحال ع كدة سنة.. لحد ما اهلى طلبوا من العريس انه ينزل يكمل الجوازه بقى ف مصر ويعملوا الفرح عشان مش هينفع يستنوا اكتر من كدة

العريس فلاح من رشيد ومن عادتهم وتقاليدهم ان الفرح يتعمل ف بلدهم.. ده غير ان العروسة لازم تعيش مع حماتها ف رشيد.. يعنى الشقة كمان تكون هناك

اهلى طبعا رفضوا مبدئيا ان الفرح يتعمل ف البلد.. ف العريس قالهم لو الفرح ماتمش هناك امى ممكن تموت فيها.. اهلى صمموا ع رأيهم والعريس ف الاول ركب دماغه وقال وانا كمان مش نازل مصر
راحت أختى طالبه منه الطلاق.. بس هو عشان كان بدأ يحبها ف وقف قدام أمه وجاب لأختى شقة ف القاهرة.. 

وبالنسبة للفرح مسك العصاية من النص وقال خليه ف اسكندرية، لا منه ف القاهرة ولا منه ف البلد
لكن لما نزل مصر رجع  ف كلامه.. وقال أنه مايقدرش يخالف كلام أمه ولا يغضبها وان الفرح هيتعمل ف البلد.. 

ولما بابا لاقاه مش راجل ومالوش أمان ومش قد كلمته.. فـــ صمم انه يخليه يكتب شقة القاهرة بأسم أختى.. وعمل كدة فعلا وكتب الشقة بأسمها من ورا والدته

بس أمه أصرت انه يفرش شقة ف البلد.. فأهلى قالوا مفيش مشكلة طالما ضمن لها شقة ف القاهرة يفرشوا عادى شقة ف البلد

اهل العريس أخدوا منه 150 الف جنية ع انهم هيفرشوا شقة البلد.. لكن ضحكوا عليه ووضبوا شقة أمه بالفلوس وبيضوا العمارة كمان.. وجابوا حاجات رخيصة ومقرفة جدا لشقة أختى.. واهلى انا اللى اضطروا يوضب لهم الشقة

وبرغم كدة قولنا مش مشكلة ونمشى الموضوع ونعمل الفرح

بعد ما سافرت شهر العسل.. قعد الشهر مقربلهاش خالص.. وكل اللى نازل عليه يبهدلها ويشتمها.. بعدها اكتشفنا ان مامته عمله لأختى (سحر) عشان تخليه مايقربلهاش

لما رجعوا بعد الشهر اللى ماكنش عسل بالمرة.. قال انه معهوش فلوس يأجر شقة ف القاهرة لان اللى كان جايبها لاختى ف القاهرة ماتفرشتش.. ف لازم يروحوا يعيشوا ف شقة البلد.. أختى رفضت وطلبت الطلاق

بعدها فكينا السحر وجم قعدوا ف القاهرة..
 وأختى بعدها بقيت حامل.. 

بس عشان أختى كانت دايما بتحب تكون هى المُسيطرة وتهزقه وتشتمه قدامنا.. هو ف الاول كان كويس جدا معها بس من معاملتها السيئة معاه بدأ يرد الشتيمة بالشتيمة.. وبدأ حبها ف قلبه يقل.. حتى ماكنش مهتم خالص بكونها حامل ف أول طفل وكان سايبها وقاعد عند مامته ف البلد
والحمل كان هيسقط كذا مرة.. 
ومامته كل شوية تكلم أختى تقولها انتى لازم تجيبى ولد وكلام الفلاحين ده.. وف الاخر جابت بنت

المهم، بعدها هو رجع استراليا وهى فضلت ف مصر وبقى يشوف بنته بس ع النت.. لكن علاقتهم مابقيتش كويسة.. 

وتقريبا وصلوا لمرحلة انهم بيكرهوا بعض وعايزين يطلقوا.. وهو دلوقتى شرطه عشان يطلقها، أختى تتنزله عن الشقة وهو هيتنزلها عن البنت

ده بقى خلانى اخاف جدا من جواز الصالونات عشان مش عايزة اكون صورة مكررة لأختى
بس هقول ايه ربنا يهدلهم الحال

رحاب المليحي



11 comments:

Anonymous said...

Asmaa Afify
معلش ده ملوش ععلاقه نهائي بجواز الصالونات لا هو اعذرينى اختك بصتلها عريس من بره بقه معاه وهيعمل اللى انا عايزاه ومحترمتوش وعاملته بمنتهى الاحتقار وبالتالى هو كمان عمل كده كل واحد فيهم كان داخل لغرض معين بس العيب على اختك فالحقيقه تحميلى للراجل هنا السبب والغلط مش زى اختك هيه اللى عملت النار ومش عارفه تطفيها

Anonymous said...

Sarah El-Eskafy
سلو بلدنا كله بياخد على عماه ويرجع يشتكى

Anonymous said...

Basma Kamal
الله يعينها بس حضانه البنت لامها لحد ما البنت تتجوز . ولو الام اتجوزت الحضانه تروح لجدتها ام امها ومن بعدها لجدتها ام ابوها يعنى اساسا مالوش انه يتنازل عن حضانه البنت لانها للام . فتتمسك ببنتها وطبيعى هاتاخد الشقه الى هى قاعده فيها لانها هاتبقى اسمها شقه الحضانه وعليه نفقه لبنته كل شهر ومصاريف مدرستها وكمان له هو لوحده بس كأب انه يشوف البنت لو هو موجود طبعا وبما انه مش موجود فمفيش لاهله حق رؤيه . وعليه نفقه عده ومتعه لمراته بس توكل محامى كويس وتتوكل على الله .... كلامى من قضيه انتهت نفس النتيجه والام والاولاد اخدوا حقوقهم كده وشقتهم والولاد لسن 15 سنه فى حضانه امهم والبنات فى حضانه امهم لحد الجواز . .. عفوا على الاطاله

Anonymous said...

ZǿǾmẫ ZǾǿmä Shŗbãtiķǻ
اتجوزو مصلحه وش

Anonymous said...

Nessma Salah
انا رايي ان المشكلة مش في جواز الصالونات المشكلة في سوء الاختيار هي محولتش تتعرف علي شخصيته اهتمت اكتر بظروفه مش الشخص اللي حتعيش معاه

Anonymous said...

Hëñd Êl-Shãmý
kerheeet fekret 2ny atgwez :D

Anonymous said...

Samah Abdou
صراحة هما الاتنين غلطانين
: " من ناحيه العريس عايز عروسة ع حسها ياخد الاقامة.. ومن ناحيه تانية اختى عايزة تهج من مصر وتسافر وتتفسح.." العبارة دي اللي اتقالت في الاول خاالص بتلخص كل حاجة .. ادي اخرة جواز المصلحة

Anonymous said...

محمد بريك
انا مش صعبان عليا في الحكاية دي كلها غير البنت الصغيرة
ذنبها ايه يكون عندها أب وأم يمتلكون مقدارا قاتلا من الأنانية
كل شخص اتذكر اسمه في الحكاية مش هاقول فيه غير ربنا يهديه ومنه لله

Anonymous said...

Rana Badawy
قصة ملعبكة..بس معلش يعني أنا رأيي ان هما الاتنين وحشين مش هو بس يعني ايه هي بتحب شخصيتها تبقى قوية وتهزأه قدام أهلها؟!! وازاي بيسيبها تعمل كدة وهو ف نفس الوقت وحش معاها!! في واحد وحش يسيب مراته تهزأه قدام أهلها؟؟!

Anonymous said...

Mohamed Anwar
الغلط مش فى جواز الصالونات ... سورى الغلط على اختك وجوزها من الاول لانها كانت جواز مصلحة

Anonymous said...

Walid El Doghry
جواز الصالونات تم اقحامه هنا ف غير محله ..من اولويات جواز الصالونات وبدايتاته ان القبول يتم بناء علي تكرار الجلسات المشتركه لمعرفه المشترك اللي ممكن يحصل فيه قبول واستكمال وتحمل وبين اللي حصل ده
الطرف الاول جوازوه والسلام والبنت اختارت الماده والفسح فطبيعي تكون دي النتيجه