Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Wednesday, May 22, 2013

اختيار سىء



انا مشكلتى مشكلتى تتلخص ف بلوتين
-         الأولى سوء الاختيار
-         والتانية الاصرار ع الاختيار السىء
بدأت قصتى لما أُعجبت ببنت زميلتى ايام الكلية وكانت لافته نظرى جدا.. ولما اكتشفت انها مابتكلمش اولاد اعجابى بيها زاد، وكلمتها غصب وقلت لها انى معجب بيها وعايز اتجوزها.. وشها احمر من الكسوف وطلبت منى اكلم مامتها واديتنى نمرة تليفون مامتها

كلمت مامتها فعلا رحبت بالموضوع، بس اتفقنا انى ماتكلمش مع البنت ف حاجة لحد ما اخلص دراستى وبعد كدة بابهم مفتوح ليا ف اى وقت

السنة اللى بعدها فوجئت بيها اتخطبت، اتصدمت، حزنت، بعدت ف هدوء.. وف نهاية السنة اتخرجت واتعينت مُعيد 

وبعدها بسنتين خطبت انسانة تانية بس ماكملناش خمس شهور لعدم التوافق ما بينا
بعدها بسنة جات لى البنت اللى كنت بحبها تعتذرلى وتطلب منى انى اسامحها وتبرر خطوبتها انها كانت غصبا عنها.. وانا عشان فعلا كنت بحبها ما صدقت، وسمحتها

نقطة ومن أول السطر

اتقدمت لأهلها وشرحت لهم ظروفى وماخبتش عليهم حاجة.. شرحت لهم انى لسه مُعيد ومرتبى محدود بس اكيد بكرة هيتحسن

وفقوا عليا واتخطبنا.. ومن اول يوم خطوبة وانا لاحظت ان مامتها كل حاجة ف حياتها بس ماكنش عندى مشكلة

علاقتها بوالدتى ماكنتش ع ما يرام لكن انا قلت هبقى اظبط الموضوع ده.. 

بدأت الطلبات والشروط تنهال عليا.. كانت عايزة شقتنا تبقى جنب مامتها وبرغم اعتراض اهلى الا انى نفذت لها طلبها

كانوا عايزين مؤخر كبير واهلى كانوا معترضين ع ده بشده.. ف اهلها يقولوا: مالكوا خايفين من ايه؟ هو انتوا ناوين ع طلاق؟ فـــ أهلى وفقوا ع مضض

ولما جه وقت القايمة.. اهلى رفضوها، لإنها ببساطة ماكنتش زى الأصول كانت نصب علنى.. واختلف اهلى واهلها وكانت الجوازة هتبوظ

ف اقترحت هى واهلها انى عشان اثبت حُسن النية امضى لهم ع القايمة النصب العلنى اللى هما عايزنها.. وقدام اهلى نعمل تمثيلية وامضى ع القايمة المتعارف عليها اللى اهلى عايزنها.. وعملت كدة فعلا لإنى كنت بحبها وخايف الجوازة تبوظ

اهلها اكتشفوا ان الشقة اللى هنتجوز فيها بإسمى انا وابويا ف اعترضوا بشدة..
 فأبويا قالى: الموضوع ده خط احمر.. وان شالله عنك ماتجوزت

فــ أقترحوا عليا انى استغل التوكيل اللى ابويا عملهولى واخلى الشقة بإسمى انا وهى.. فأخيرا قلت لأ، بس كانت لأ خايبة.. قلت انى ممكن اخليها بإسمى انا بس.. وقد كان

ف خلال الفترة الرومانسية دى كلها كانت علاقة خطيبتى بأمى بتزداد سوءا.. واهلى عاملين يحذرونى من الجوازة دى.. وانا مصمم انها تكون مراتى وأم عيالى

وصلت بيهم الوقاحة انهم رفضوا ان امى تفرش لى دولاب أوضة نومى.. وماما ماكنتش طايقاهم وشايفة انهم مش بيحبونا.. لكن انا كنت بحايلها واقولها بنتهم غير، وبكرة انا هظبطها.. تقولى: انت لسه ع البر .. البنت ده هتتعبك.. وانا ابدا

وف النهاية اتجوزنا، بعد الجواز بيومين اكتشفت انى اتجوزت بنى ادمة معرفهاش.. خناق وزعيق مفيش سمعان لكلامى نهائى

كانت بتحكى لأمها كل صغيرة وكبيرة ف حياتنا.. ده غير انها صممت ان امها تيجى معانا شهر العسل..

امها كانت بتتدخل ف كل حاجة.. وكمان تقولى خلى ابوك يديك مرتب شهرى لحد ما ظروفك تتحسن
ومراتى المصونة مارعتش ظروفى المادية ولا رضيت حتى تُصبر.. وصممت انى اسيب وظيفتى ف الجامعة واسافر عشان نحسن مستوانا المادى

ولما جت لى فرصة للسفر، 

اول سؤال سألتهولى: هتعمل ايه بمرتبك؟ انت تاخد منه حاجة بسيطة.. وتبعت لى بقيته كل أول شهر

ورفضت طبعا كلامها.. اتدخل اهل بيتها عشان يقنعونى، امها وابوها واخوها.. وانا راكب دماغى.. بقيت من وجهة نظرهم وحش ومابحبهاش واتغيرت من ناحيتها

تانى يوم صحيت مالقتهاش ف البيت، وفوجئت انها اخدت كل اوراقى.. باسبورى، بطاقتى الشخصية، وشهاداتى، حتى كارنية النادى ماسبتوش

روحت لها ع بيت أمها، سألتها ع حاجتى.. قالت لى اتحرقت، ضاعت
الكلام اشتد ما بينا،

 قالت لى: والله لبهدلك ف المحاكم.. وهذلك عشان تشوف ابنك ولا بنتك (عشان كانت حامل)

لجأت لأبوها ع انه الكبير قالى : ما انت اللى مش عايز تريحها.. لو كنت وافقت ع طلبها من الاول ماكنش ده كله حصل 

ولأول مرة ألجأ لأبويا عشان يساعدنى وفعلا جاب لى أوراقى، وسيبت لها البيت اسبوع
بس قلت خلينى انا الكبير ورجعت البيت..

 وإذ بالمفاجأة، لاقيتها مغيرة كالون الباب.. ودى كانت بداية النهاية

مشكلة جوة مشكلة، والمشاكل مابتخلص وفضلت قاعدة عند أمها.. ولما خلفت حاولت ارجعها البيت عشان خاطر بنتى ماتتعذبش ف المشاكل دى لكن رفضت ترجع وتسيب أمها

ولما فاض بيا الكيل خيرتها ما بينى وبين اهلها.. ف اختارت اهلها

ونفذت تهديدها انها تبهدلنى ف المحاكم.. لإن معاها اسلحة كتير ضدى.. ما انا ماضيلهم ع بلاوى.. بالإضافة انى مش قادر اطلقها عشان كاتب ع نفسى مؤخر كبير قوى 

ومازلت المحاكم قائمة ما بينا حتى الان

يا ترى تعملوا ايه لو كنتوا مكانى ؟

حوبا



14 comments:

Anonymous said...

Ahmed Ibrahim Aly Elsheikh
الموضوع من اوله خطأ ..... ثم كلما مرت الايام ارتكبت خطأ آخر ...... وهكذا.... ارى ان تنهى علاقتك بها وتصرف مره واحده (عفوا) كرجل عاقل بالغ .... ومهما كانت الخسائر فانت الرابح .... شكرا جزيلا صديقتنا الرائعه الاستاذه/رحاب .... وكالعاده كلماتك تجسد القصه ... سلمتى وسلمت يدك .

Anonymous said...

Haitham Ahmed
والله هوه شكله طيب فيمشى بقى فى سكه المحاكم و يطول نفسه و يدعى ربنا مادام حاسس انه على حق
عشان هوه شكله غلبان اصلا
انما ساعات بيبقى فى طرق تانيه لحل الموضوع ده بس مش بتبقى سلميه الصراحه و عاوزه قلب بس حتخسره منظره قدام نفسه و حتتكلف فلوس برده

Anonymous said...

Sama Shaker
حرام بجد معقول فيه ناس كده سيبها تضرب دماغها ف الحيط و اتجوز عليها و لو البيت بإسمك خليها تعيش ف البيت

Anonymous said...

ZǿǾmẫ ZǾǿmä Shŗbãtiķǻ
البدايه فعلا مكنتش مبشره بالخير .. مقدرش افيدك لاني ببساطه معنديش اي خبرات ... بس اقدر اقولك ربنا عمره ما بيرضى بالظلم ولازم يكون عندك ثقه في ربنا انه هيجيبلك حقك سواء قصرت المده او طالت حقك هيجي هيجي عشان ربنا اسمه العادل

Anonymous said...

Basma Bahaa
ميفكه ويتجوز عليها

Anonymous said...

Walid El Doghry
التنازل ابتدا م الاول ...اهل مراتي علي عيني وعلي راسي بس ف الصح مش ف اللي يرضيهم ..اظن انه ظلم البنت اللي خطبها قبلها لانه سابها بدونن سبب بعد ما اتعلقت بيه ..الحل دلوقت انه ميطلقش لانه لو طلق هيخسر كل حاجه وهيناكفوا ف القايمه ومش دي حاجه بنتنا وهيدفع المؤخر كامل وشقته هتاخدها حضانه متطلقش يا ابني عشان متضعيش نفسك خليها هي اللي تطلب الطلاق لان لالاسف القنون هييسحقك انت ..الكلام ده حصل لصديق شبه حرفي

Anonymous said...

Ahmed El Desouky
للأسف في المواضيع دي أول تهاون وتنازل بيجُر وراه تنازلات كتير جدًا لو اهلها مش كويسين، وواضح جدًا من الأول انها هي واهلها مش كويسين فعلاً، من أول ما ادوله كلمة ورجعوا فيها وخلوها اتخطبت أول مرة.

هو شكله طيب وكان بيحبها، بس تغور هي وحبها

انا لو منه متنازلش ولا أطلقها، وخلي المحاكم تشتغل، وامرمطها في المحاكم هي واهلها، في محاميين كتير يعرفوا يقرفوها في عيشيتها بالقانون حتى لو هي ماسكة عليه قايمة ومؤخر.
في طرق كتير جدًا، والقانون المصري بينصف الراجل اصلاً وبيبقى في صفة ( مش ميزة بس في الحالة دي ميزة بقى )

Anonymous said...

Asmaa Afify
هو تقريبا اعرف المشكله دى ومعنديش حل للاسف غير ان بدعيله ان ربنا يجمعه ببنته بالسلامه يارب وفعلا يشوف حياته بقه وربنا هيرزقه الزوجه الصالحه باذن الله اللى تعوضه عن كل اللى شافه بس طبعا صعب ان اى اهل عروسه يوافقو على وضعه لكن النصيب غلاب محدش بياخد غير نصيبه

Anonymous said...

Ragaa Mostafa
هي الجوازات بقت سرقة دلوقتي ؟؟؟

Anonymous said...

Sahar El-Ghonemy
ربنا يرزقه بزوجه صالحه غيرها تعوضه وتقدر هي واهلها الظروف دي ويجمعه ببنته علي خير
وهي يسيبها لاطايله سما ولا ارض وساعتها هي اللي هاتجري علي الخلع وفي الاخر مش هاتطول حاجه

Anonymous said...

Rannon Badawy
الله يكون في عونك ويقويك وحسبي الله ونعم الوكيل

Anonymous said...

Sameh Malek Sameh
تنازلات تنازلات تنازلات والطرف الاخر مافيش اي حاجه من عنده ...
اكيد هاتوصل لكده ...
الموضع هايطول في المحاكم ... اكيد في خسائر .. بس يشتري نفسه احسن الاستمرار هايخسر ايام من عمره كتير قوي

حاتم عبد اللاه أحمد said...

ياأخى أنت أوقعت نفسك فى المشكلة من البداية لأنك لم تسمع كلام اهلك بأن الناس دول هيتعبوك وقد حصل ما توقعوه وأنت عشان بتحب البنت لم تتضح الأمور عندك لأن زى ما بيقولو الحب اعمى كان عليك أن تستشف من معاملتهم معك وأنهم عايزين يستنذفوا كل ما لديك واتضح كل شىء ولكن بد فوات الأوان عليك ياأخى أن تدعو الله أن يخلصك منهم ويسلط عليهم أشخاص من نوعيتهم يعاملوهم بمثل صنيعهم وأنا لى رأى وأرجو أن تنفذه وترتاح هذه المرأه لا تستأمنها على مالك أو عرضك ولا ترجع اليها مهما كان الامر لأنها هتستأصل كل ما لديك وستنقلب حياتك الى جحيم لا يطاق اجعلها معلقة لا طايلة سما ولا ارض وان كانت تريد الطلاق فطالب اهلها بالتنازل عن المؤخر والالتزامات الا واخدينها عليك وأرجو أن مكنش ضايقتك بكلامى فأنت مثل أخى

Anonymous said...

Maha Abd Elmoneum Sadeek
الموضوع كله
غلط من الاول
اى شىء بيزيد عن حده يتقلب ضده
وبعدين مين اسم النبى حارسها الى يتكتبلها ده كلها
انت الى سكت من الاول
وبعدين ديه عالم قليلة الادب يعنى ايه امها تروح معاكوا شهر العسل
أمهات آخر زمن