Pages

About me

31 Years old Egyptian Living in London since 2004 with my husband and my two daughters..Member editor for the Egyptian magazine (Kelmetna)since 1999.... Finally, I have my own space to share with my readers :) SIMPLE WORDS 4 EASY LIFE

Tuesday, May 21, 2013

آخرة الفقر



بنت مغربية عندها 18 سنة من اسرة فقيرة كل راس مالها ان ربنا منحها شوية جمال

عايشة ف المغرب مع اهلها ف بيت صغير ع قدهم مأجرينه.. ابوها شغال بياع عند فكهاني.. والبنت ماكملتش تعليمها

وف يوم لاقت جارتهم جايبلها عريس.. مش اى عريس.. ده واحد غنى جدا.. ولإن البنت كان كل طموحها ف  الحياة انها تتطلع من عيشة الفقر اللى هى عايشاها.. 
ف كانت حاسة انها بتحلم ومش مصدقة نفسها انها هتتجوز جوازة زى دى وتشوف الدنيا بقي

هى واهلها وافقوا ع طول خصوصا لما عرفوا ان العريس واهله عايشين ف فيلا وعندهم مجموعة محلات ف ارقى المناطق ف المدينة

كانت واخده بالها ان عريسها مش بيتكلم كتير.. بس ماهتمتش، كل همها انها تتطلع من الفقر وبس..

اتعملها فرح ماحصلش.. وبعد الدُخلة جوزها فضل ساكت وقاعد ف البلكونة طول الليل.. ماكنتش فاهمة السبب بس سكتت..
تانى يوم نفس الموضوع.. تالت يوم حاولت هى تقرب له وتتكلم معاه.. 

راح جايبها من شعرها وفضل يضرب فيها.. وهى تصرخ وتصوت.. لحد ما اهل البيت صحيوه

وقتها بس عرفت حقيقة العريس.. انه مجنون ولسه خارج طازة من المصحة

البنت اتخضيت، اتصدمت، بس رضيت بنصيبها وماحولتش تبوح بالسر ده لحد من اهلها.. 

كانت شايفة ان العيشة ف فيلا مع مجنون، ارحم من العيشة ف الفقر مع اهلها

بس من ساعة ما عرفت الحقيقة واهل البيت بقوا يعملوها ع انها شغالة.. يصحوها من بدرى عشان تخلص شغل البيت وتشتغل ممرضة لحماها التعبان.. وتتشتم وتضرب من حماتها واخواته.. 

وبرضه كل ده ماقلتش حاجة لأهلها.. وجوزها كل ما تجيله الحالة يتجنن عليها ويضربها.. وهى مستحملة وساكتة

لحد ما فى يوم اخو جوزها كان راجع البيت سكران.. دخل عليها الأوضة اغتصبها.. وهى عمالة تصرخ.. 

تانى يوم الصبح حماتها اخدتها رجعتها ع بيت اهلها
والبنت ماكنتش بتتكلم كانت بتعيط بس.. وكانت بتعانى من سوء حالتها الصحية

بعدها بيومين جت لها دعوة قضاء من المحكمة ان جوزها رافع عليها قضية طلاق.. وعشان هى كانت تعبانة جدا ف ماحضرتش الجلسة.. امها وابوها اللى راحوا.. 

فوجئوا ان جوزها رافع عليها قضية بيقول انه دخل عليها لاقها مع حارس الفيلا.. وهما اساسا معندهمش حارس للفيلا..

 ومش كدة وبس، ده كمان اهل جوزها مطلعين شهادة ان جوزها اتجنن من ساعة ما شافها ف الوضع المُشين ده

اهلها ماكنوش مستوعبين ولا فاهمين حاجة.. ولما هى عرفت اتجننت وبقيت بتتعالج نفسيا وقليلة الكلام

اهلها فضلوا مش فاهمين حاجة لمدة شهرين.. لحد ما ف يوم واحدة كانت شغالة ف الفيلا جت لهم البيت وحكيت لهم ع كل اللى كان حصل لبنتهم من اهانة وذل من جوزها واهله.. 

وجارتهم اللى كانت جايبلها العريس لما عرفت.. اعترفت لهم انها كانت عارفة انه مجنون وانه لسه خارج من المصحة.. بس كانت نيتها كويسة انها عايزة تتطلع البنت من الفقر

فات سنة دلوقتى والبنت بدأت تتحسن بس لسه قليلة الكلام.. وللاسف اتطلقت بفضيحة وبقضية شرف

ربنا يكون ف عونها ويعوضها خير ان شاء الله

رحاب المليحي

10 comments:

Anonymous said...

لا حول ولا قوة الا بالله
هالة على

Anonymous said...

Marwa El Etriby
:( يالهوي

Anonymous said...

Samah Gebril
ربنا يشفيها ويعوضها الخير كله ساعات الواحد بيحب شئ ويكون شر له بس مفيش شر كله خير بكرا هتبقى زى الفل وياريت كل الناس اللى حواليها يساعدوها وربنا معاها

Anonymous said...

Ragaa Mostafa
ولا حول ولا قوة الا بالله

Anonymous said...

Hëñd Êl-Shãmý
a7eeeeeeh :S

Anonymous said...

Amira Smile
نااااااس مش عندهاااااااااااا دييييييييييين حسبي الله ونعم الوكييييييل

Anonymous said...

Haitham Ahmed
سمعت الحوار ده كتير للاسف فى مصر نفسها

Anonymous said...

Sameh Malek Sameh
لا حول ولا قوة الا بالله...

Anonymous said...

Sami Fawzy Al-Qasim
ربنا يعينها, للأسف هى اللى اختارت الفلوس من الأول

Anonymous said...

Ramy Elalfy
ربنا يصبرها علي بلوتها